أبي أفكار حق عيد ميلادي ضروري مابقى شي

[^AyOoTa^]

بنات بليز أبي أفكاركم





"""
""
"
بعد شهر عيدميلادي
وبكمل ال 18 فا قلت السن واايد مميز
وودي اسوي عيدميلاد راح اسويه فبيتنا
بسوي البوفيه بالحديقة حديقتنا مسكره من صوب الجيران بس بسكراللي عالشارع
ووداخل حق الرقص وودي اسوي مسابقات بس مو مسابقات ياهال لانه العيد ميلاد راح يكون فيه بنات كبري واكبر بالعشرينات واكثر يعني ابي اشياء فصله
وقلت راح اييب دي جي
بس ما اعرف ولا شي
وانا ابي اجهز من الحين لانه عندي اسبوعين فاضيه فيهم
وبعدها امتحانات يعني الامتحانات بتخلص قبل عيدميلادي باسبوع او اقل
ياريت تساعدوني

 

[ام عفاف الكويت]

اتذكر اختي مره انعزمت علي عيد ميلاد اسمه هلاقه بارتي وناسه يرقعون باللبس والاشكال والكشش بس بنات عمر 20 بس مستانسين

وفي حفله انعزمت مره اسمها ايس بارتي كله اللبس لونه ابيض وكل شي حتى الاكل والكيك

 

[^AyOoTa^]

انا بسويه كله درسس نفانيف بس ما فكرت احدده اخليه ثيم محدد
وقلت بيييب وحده تزينلي سوالف بلونات وجذي وباجر طاولات حق برا مادري قلت اسوي طاولات كل طاولة حق 5 اشخاص جذي يعني
مادري شلون الفكره جذي حلوه يعني بوفيه بس بعد مايصبون يقعدون بطاولات

 

[صآعده تحت}..]

ولا يهمك : )

لي باك بكره بإذن الله ...

 

[^AyOoTa^]

منتظرين

 

[Brooy al-bata]

حبيبتي سوي مثل ماقالت ام عفاف حفل هلاقة يعني البنات يلبسون الوان مو متناسقة ويبدعون بشعرهم والصبغ الاظافر
والله وناسة حفلتج راح تكون فن واذا انتي تمونين على البنات باخر الحفلة العبوا بمسدسات الالوان بالحديقة <<<<علشان مايتوصخ البيت

 

[costa chic]

و منكم نستفيد
ام عفاف حلوه فكرة ال ice party غريبه

 

[- MaRsHmaLLoW -]

انا احس حق عيد ميلاد احلى ما تحددين اللبس يعني كل واحد وكيفها تلبس الي تبي ولان عيد ميلاد اكيد البنات يبون يكشخون وجذي
بالنسبه حق المسابقات مادري اهيا الفكره مو وايد بس مثلا تقدرين تسوين ان اغنية ويرقصون البنات بعدين ينقون الي رقصها احلى
واذا عندج صورج وانتي صغيره تقدرين تعرضينهم من كنتي صغيره لي كبرتي البنات يشوفون ووناسه
وهم حق المسابقات تقدرين تخشين اشياء بمكان قبل ما ايون البنات وبعدين تسوين مسابقه البنات يدورونه
البوفيه مادري ماعندي خبره بالمطاعم وايد بس دوري او سألي احد مجرب و الاغاني تقدرين انتي تسوين سي دي ووصلي بسماعات او ييبي دي جي العسعوسي او الرندي هم في وايد اختيارات حق الدي جي
تقدرين بعد مثلا داخل الصاله ان يكون ثيم الحفله عن شي معين انتي تحبينه مثلا ان يكون كل شي على ورد جوري احمر وتدخلين لون معاه ابيض واسود مثلا الكراسي يكون لونها احمر ومربوطه بفيونكه سوده
او ان يكون كل شي مكتوب عليه 18 والكيكه يكون تصميمها على شكل رقم 18 يعني اهيا الفكره ان كل شي يكون بلون معين
واذا تذكرت اي شي بعد راح ادش واقولج *^_^*

 

[- MaRsHmaLLoW -]

اي ونسيت اقولج ان حق مدخل البيت تحطين سوالف بلونات تقدرين تسوين عند بارتي لاند او في محل بالسالميه اسمه واو بالون
وفي شركات تقدر تسويلج كل شي حق الحفله اذا ماتبين انتي تفترين
وتقدرين توزعين على البنات اخر شي شغله بسيطه تكون ذكرى تقدرين انتي تسوينها تشترين الاغراض من بياع الورد وما يبيله شي
والتصوير لا تنسينه عشان تكون الصور ذكرى

 

[^AyOoTa^]

مشششكورين بنات

 

[عهود الحب]

من ترك شيئا لله عوضه
العيد ميلاد بدعة
وادري يمكن ردي ما يعجب البعض بس كلمة حق حبيت اقولها كنصيحة
وعسى الله يبارك لج بعمرج كله وبعملج الصالح

 

[^AyOoTa^]

ثانكس

رفع

 

[امووووما]

حبيبتي عندي لج واااااااااايد افكار وطبعا الافكار الي بقولها كلهااااااااااااا من تصميمي وتطبيقي بكل حفلات الي اعرفهم والحمدالله من كثر ما ابدع بالفناتق قامو يطلبوني الناس اشتغلهم .... المهم مابي ابخل عليج بالافكار

اول شي اذا ما تبين تستخدمين ثيم معين استخدمي الالوان الصارخه مثل
الاحمر + الاخضر + الفوشي + اصفر + برتقالي + ازرق

عندج المدخل مال البيت خليه يعبر ان البيت فيه حفله سواء بالبالونات الهيليوم الملونه او بالتور الي تقدرين اتحطينه على عدت اشكال وافكار سواء فيونكات او تنلف بطرق عده على الدرابزين واذا كان عندج احواض زرع استغليها سواء بعصي ملونه وامشكله من بو 100 او الاعواد الي اتشب باليل الي انشوف دايما بالمسراحيات مالت الاطفال او شموع او شغلات اتصير مثل اكواب او كور تشتغل على بطاريه وفيها ليتات فلاشات من بو 100

ندخل البيت ونبدء التزيين اشتغلي على البالونات الحين في شركات بالوسيط اتزينلج الحفله كامله ب30 دينار
واذا كنتي من النوع الي يحب الفناتق طبعي اوراق رقم 18 ونزليهم من السقف مع كور وتور وكله ملون

انا مره سويت مثل المسرح من التور خيط يتعلق بالسقف بالطرفين من الصاله وركبت التور عليه ونزل جنه برده وخليت فتحه بالنص وربط كل مجموعة الوان بروحها وصار هالمكان حق المسابقات

واشتري الجهاز الي فيه ليتات ملونه ويتحرك بالصاله ولان البنات بهالعمر يحبون الاكشن راح يستانسون على الليتات والظلمه

واذا حابه هم هالفكره محد سواها غيري حطي ركن بالحفله يكون عباره عن بار للمشروبات والحلاو والخرابيط حطي طاوله مدوره او مربعه وفنتقي فيها بالتزيين سواء بالتور ولا بالليتات ولا الفيونكات عاد انتي وابداعج وحطي عليها مواعين زجاج ولا اي مواعين املونه او ابيض ساده من البيت وحطي داخل هالمواعين حلاو مثلا ماعون حلاو بيبسي ماعون حلاوة قلب الحب ماعون علج ماعون العصير العواده الي يتثلج ماعون مارشملو ماعون حلاو توتي فروتي وطبعا الحلاو خل امج اتييبلج من شويخ وايد احسن من الجمعيه وتحت حطي مطاره مالت البحر ولا الفلين مالت السمج وزينيها وترسيها ثلج وحطي فيها بطول بيبسي ميرندا سفن اب توت وكل بطل ملون لووول وفوق هالقسم حطي لوحه مكتوب عليها هيلب يور سيلف

امممم واااايد وايد عندي افكار اذا حابه تاخذين اكثر عطيني خبر وانشاءالله ماراح اقصر معاج وطبعا اذا كنتي مستخسره التور احب اقولج روحي لبلوكات عند الكلف واخذي طااااااقه فيها 22 متر وكل الالوان عندهم الطاقه اب 3 دنانيير واتم معاج وكل حفلة تستغلينها مثل الي قاعده اسويه انا

 

[التاجره ام ناصر]

حبيبتي انا عندي فكرة راح تبهر الحضور لأني سويتها بعرسي.... احجزي شاشة عرض كبيرة واتفقي مع محل ثقة ومعرووورف وعطيهم صور لج واعرضي فيها من يوم كنتي صغيرة ليمن الحين تكون طريقة عرضها من الطفولة لي عمرج الحين...العمر كله يارب... انا سويتها بعرسي بصراحة ابهرت الحضوووور حيل... حتي حطيت صوري وانا بالمدرسة.... رووووعة وبالتوفيق....

 

[meen_ana]

حبووبه حطيه بالنوونات وحطي فيها حلاو وارقام وعبارات ووعلقيها بالسقف بعدين بطوهم وكل وحدة تاخذ رقم وعلى الرقم تاخذون الهديه

 

[^AyOoTa^]

مشكورين بنااات افكاركم واايد حلوه

 

[farawlaa1]

اشرايج بحفله تنكريه قبل اسبوعين مسويين حق اختي بس حق كبار و اشكالنا كانت عجييييييييييبة انا شريت جنحان فراشة كبار طولي و نفنوف و باروكه شقره و الله تغير شكلي 180 درجه و اختي على ساحرة مع مخمه وبنت خالي على قطوه و راح اتشوفين اشياه تييينن في بارتي لاند اللي يم رامز بالشويخ اشياء اتهببببللل و اهناك بعد ينظمون حفلات سوينا اول شي مسابقات بعدين بوفيه العشا بعدين ديسكو بعدين قمنا انصور اخبال رقص اهنود بعدين سوينا لها مسرحيه و كانت ليله متنا من الضحك اخبال و الكل استانس وعلى فكره ترى اعمارنا مو صغيره من 30 سنه لي 20 سنه