أحنا يالحريم السبب في ارتفاع الاسعار..وراح ترتفع اكثر لو ماصحينا

[Vous jamais]

انتو من صجكم ترى التجار منكم و فيكم اللي ناهبيكم

ولا شكو السوريين والهنود بالموضوع اهما يتشغلون بالمحل

ولا الوكالة لصاحب المحل

 

[شمس.الحب]

توني راجعه من العمره ومريت جده دخلت لمحل نيو لوك كان تنزيلات لقيت جنطه بعلاق طويل صغيرونه لونها بني مسوين تنزيلات سعرها ١١ريال بعد الخصم
اليوم بالبيرق نيو لوك نفس الجنطه ب٧دنانير ترا ماصار علي رجعت من السفر غير ثلاث ايام ولا هناك سيل وهني ماكو سيل

شفتوا الفرق


من ١١ريال حتي ماوصلت دينار
الي ٧دنانيرررر

وكيلهم هناك خايف ربه مو هني 

 

[كويتية و لكن]

ممكن دايما كذة عادي هذي الفرص وحتي الكويت اذا تنزيلات ساعات تصير الشنطة بدينار وانا مرة شريت جوتي بالتنزيلات من نيو لوك بدينار ونص وكان رووعة

 

[سكريمزا]

الله يهدي هلمسؤولين

 

[أم محمد وريحانة]

حلوة فكرتكم خواتي بالمقاطعة فعلها صحابي الرسول عليه الصلاة والسلام عمر رضي الله عنه عند غلاء اللحوم


دائما تكون ناجحة ومن 3 سنوات إرتفع عندنا في السعوية اللبن زيادة ريال وكل الناس قاطعته وحتى الناس في السوبرماركت ينصحون بعض بعدم الشراء والحمد لله رجعت الأسعار كما هي

موفقين إن شاء الله تنزل أسعاركم بالكويت الحبيبة الله يحفظها​

 

[يارب احفظ عيالي]

اي والله صاجه الله يعطيج العافيه

 

[مقمش لولو]

احنا تعودنا على الترف والتبذير وهم مستانسين

حاطين عينهم على معاشاتنا وكل زياده اتيي جنها لهم مولنا الله يخليج شوفي سياييرهم والا اكو حلاق؟؟؟؟؟؟؟؟ سيارته رنج روفر

لا وعنده مورسيدس بعد لا واخر موديل ........ للاسف الكويتيين مايشتغلون ليش هالمحلات حق هالاجانب ليش الكويتي مضطهد

مايبونه يشم هوا مايبونه ايتنفس

عموما حبوبه انا صار لى فتره مسكت ايدي شوي عن المصاريف واتجهت حق شي افيد وانفع قمت اجمع كل فلس واشتري ذهب

باللى اقدر عليه عندنا عيال مايندره شنو مستقبلهم مدام هذيل نوابنا اللى لفوا الملايين فى بطونهم شنو راح يكون مستقبل هالاجيال

يعوينتى

 

[MyLittleBerry]

انا مريحه نفسي اطلب من النت مليون مره ارخص

بس انشاءالله شركات الشحن ماتزيد اسعارها اكثر

 

[ســتارز]

ياحلو الكويتيين شعب حبوب وودود ومتعود على العطاء بلا حدود

شعب كريم وما فيها شي لو نفعنا غيرنا بجم فلس

بس ملاحظة من اخذنا المنحة الالف دينار واهل المحلات الغرب للحين ينتقمون منا

 

[انصاريه قمره]

انا يبطون جبدي اللي قولون لاء انا سراحه ما اشتري رخيس باجر يسير فيني شي وهذاا خااامه امريكي وهذاك صيني والله انكم مقصه ترا كله نفس الشي
مثال
ابوي الله يحفظه قبل لا يتقاعد كان اييلهم هندي الدواام عنده بخور ودهن عوود وعطور عربيه تينن وهالسوالف ابوي كان طاايحه مكاسر مع الهندي واييب لنا جياس من هالسوالف ولي سألته بجميقولي ب 20 ولا اقل انصدم شلون كل هالسوالف ب 20 وانا التوله ونص التوله تكلفني اكثر من جذي قالي يبه انتوا الحريم صيده حتى الهندي يضحك عليكم يقوول هرمه مال كويت اذا ما يشوف بضائه قالي ما يشتري يقول مو جين مو مااركااا
واهو الصاج ما تعرفون كوعكم من بوعكم وركض ورا الغالي على اساس انه مااركه خلكم ورا الغالي ومع الخيل يا شقرااا وباج عيالكم الخبزه ما يحصلونهاا وانتوا السبب

 

[نوف الصقعبي]

احلى نصيحه كتبتيها للكل فعلاآ لازم نوقف لهم وقفه وايد تمادو برفع الاسعار علينا​

 

[فـراوله]

صح كلامكم والنصب بالكويت على الكويتيات بس أما الاجانب لا ​

مره رحت اشتري عبايه كنت حامل بالتاسع ومابي أفصل لانه كله أسبوعين ووالده ​

رحت محلات العبي الجاهزه ودخلت محل والهندي يقول للمصريه هذه العبايه بـ 3 دنانير طلعت ​

جيت أسأله على نفس العبايه قالي بـ 6 بدون ملفع مع ملفع 7 دنانير قلت احلف توك قايل للمصريه بـ 3 ​

دنانير علي 7 صج انك نصاب استفزني حييييل يومه ​

ومره كنت بسوق الجمعه أشتري للبيت ساعات وتحف علبة الكلينكس مع الزباله كرمكم الله قالها للهنديه ​

بـ 5 دنانير وأنا قالي اياها بـ 10 دنانير شفتوا الفرق نصب بـ 5 دنانير مره وحده قلت له على بنت ديرتك ​

بـ 5 وعلى بنت الكويت للي ماكل من خيرها بـ 10 ما عرف شيقول وسكت ​

طايحين نصب فينا عمى بعينهم ​

 

[فـراوله]

يا ريت الحريم يعقلون اشوي

رفيج زوجي اهو ومرته عندهم محل خام ومشاغل للعبي والدراريع والله المرا والرجال

يضحكون على الحريم يوم يشترون تقول هناك الخام بكبره أجيبه جمله تطلع علي نص ولا ربع دينار

اهني بس الكويتيه تقولها ابي خام حلو واصلي طبعا اذا رخيص ما راح يعجبهم لازم غالي عشان يعجبهم

ويشترون وهالمره تجيب أحلى الماركات من برا يعني شغلها حلو شوفوا الفرق الخام من برا جمله تجيبه بجم واهني تبيع المتر بجم طبعا دبل

واهي قالت الحريم يجبرونه نرفع الاسعار لانه ما يعجبهم اذا قالت سعره رخيص

الله المستعان



​

 

[عادت ذكرياتي]

يا ليت الموضوع يتثبت


ويا بنات خلونا نساعد بعض إذا في عروضات للتنزيلات ندز لبعض عنها وندل بعض عالأماكن اللي أسعارهم زينة


التجار طايحين نهب وحتى المطاعم


اكو مطلعم كان ماعون الفول عنده تقريبا ب 400 تخيلوا رفع سعره إلى 700


صدمة صح !!!


قطعناه على الرغم من إن فوله ما قد ذقت مثله عجيييب بس قلت عشان يحترم نفسه .


ويا بنات الغلط بعد مننا حنا الكويتيين ::

أشوف قبل رفيجاتي بالمقصف أيام الدراسة تاخذ العاملة اللي تبيع ال 50 فلس وال 100 والبنت تسكت ما تتحجى وبجذي اطمعوا فينا شلون ما يطمعون !!!!!


اصحوا


حتى لو 50 فلس ما اعطيه للعامل ولا أحلله إنه ياخذه أنشبله


عندي أعطي للصدقات هالفلوس ولا أعطي لعامل يبطل عيونه ويطمع فينا ...


قهههههههههههر بديرتنا ويطالعون على لقمتنا :"(