أخوي جننا وأتعب نفسية البيت كله و اللي يبي يصير بالطيب و لا بالغصب !!

[أهبل أجنن]

السلام عليكم و رحمة الله وبركاته ..

خواتي جزاكم الله كل خير أبيكم تساعدوني شنو أسوي مع أخوي اللي أصغر مني بسنه .. هو اغلى واحد من أخواني عند أبوي و أمي تسألون ليش ما أدري مع إنه يعاندهم ويعق فيهم ويطق اخواني ويطقنا ويهاوشنا يعني بإختصار متسلط لدرجه أخوي الكبير صار ماله شخصيه هو اللي يتحكم فينا و اللي يبيه يصير غصبن على الكل ولا بيصير شي ما شفناه بحياتنا .. يسوي مشاكل على أدنى شي يعار من أي شخص أحسن منه مع إنه إنسان فاشل في حياته ماعنده هدف غير إنه يطلع ويروح المجمعات و يقز هناك ومرته متعذبه معاه وهو مسكينه دايم نصبرها وبعض المرات يطقها بدون سبب .. أحس إنه يبي ينحشها غصب .. مع العلم أبوي من كثر ما يحبه زوجه قبل أخوي الكبير .. وأخوي الكبير فيه غصه من كثر مايفرقون بينه وبين أخوي الصغير .. أنا دايم أبجي من الظلم اللي أشوفه تكلمت ماكو فايده محد يسمع لي يطلعونا حنا الغلطانين وهو الصح لدرجه والله يابنات هالشعور صار غصبن علينا كلنا صرنا نكرهه مانحبه .. من كثر ماهو يظلم بإخواني .. و فينا يسوي حركات تقهرنا .. و اليوم سوا مشكله كبيره بدون سبب دخل على أخوي اللي أصغر منه بسنه ودزه يبي يطقه وتحاشاه اخوي الصغير لان يدرون إنه هذا طبعه قام وتفل بوجه أخوي .. وصاروا يتطاقون مع بعض و انا ابجي وامي تبيجي وهم والله العظيم كل واحد يبي يشل السكين على الثاني يذبحون بعض طلعوا دم بعض و انا انهرت قمت أبجي ونص ساعه متقاضبين مع بعض وهو الغلطان على أخوي .. أخوي الصغير محترم مايتحرش فيه ويتحاشاه دايم لما طفح الكيل .. هذاك ركض للمطبخ يبي يذبحه وكلنا صراخنا والبيت صارت فيه حالة إستنفار .. انا فقدت اعصابي وطحت بالأرض رجولي ماشالتني من كثر ماابي أفرقهم ولا قدرت .. والحين طلع من البيت انحاش ماادري وين ؟؟!! واخوي الثاني الصغير دخلته الغرفه وانا حالتي الله لايوريكم مو قادره اتنفس من كثر البجي وامي تعذبت حيل .. بس الحمد لله إن اليوم شافوا قدام عينهم هو شنو سوا ..

بنات أنا خايفه يسوي في نفسه شي ؟؟ و لا يسوي بأخوي الصغير شي ؟؟ قاعد يتهدد يقول والله لا أذبحك انا مت حره أقولهم ليش جذي يصير بينكم .. ولا كأنكم أخوان ولا طالعين من بطن واحد من زمان على هالحاله ليش انا تعبت نفسياً أصبر نفسي وكل يوم مشاكل بمشاكل مدخلنا بدوامه ومطلعنا بدوامه .. أنا اللي ذابحني هو ماخذ حقه وزياده ليش يسوي فينا جذي شنو انا تعبت أفكر قهر أبوي ورفع السكري و الضغط .. مع هذا يحبونه أكثر مننا كلنا ..

والله حنا كلنا مانقصر ودايم نراعي أمي و أبوي .. ونخاف عليهم بس أكثر الأوقات يوقفون معاه ضدنا مع إنه هو الغلط ..
بنات أبي نصيحتكم قولولي شسوي .. شتنصحوني معاااه .. هو إنسان غامض يسوي مشاكل بدون سبب ؟؟ أنا بعض المرات أحسه مريض نفسي ليش ما أدري مع إنه مدلع من امي و أبوي .. وبعض المرات أقول يمكن يمشي مع ربع السوء ومعطينه شي يخرب عقله ويسوي جذي فيه ؟؟ والله مالقيت تفسير له .. علموني شلون أتفاهم معاااه والله أكلمكم و أنا ابجي من اللي صار اليوم انا للحين مخترعه أتخيل إنهم بيذبحون بعص بالسكين .. !! شنو بيكون مصيرهم ؟؟ وأمي و أبوي !!

 

[لبى حنانكـ]

الله يهديه و يصلحه ..

ادعوله بالهدااايه والله يعينكم عليه ..

ولازم أحد يوقفه عند حده لأنه اذا سكتوا رااح يتمادى أكثر ...

 

[بنــت ** الشيخ]

الله يهديه وادعوا له ان الله يهدي سره
ولازم تخفون الدلع لأن شكل الدلع هو اللي خربه

 

[آلسحرآلحلال]

لله يهديه ان شاء لله

لازم تتغير المعاملة شوي معاه عشان ما يتمادى ...