أفكارحلوة لاختيار هدية في رمضان

[غموض الصمت]

السلام عليكم و رحمة الله و بركاته
مبارك عليكم الشهر
و عسى الله يتقبل منا و منكم صالح الاعمال
بنات محتاجة لأفكاركم الحلوة
و مقترحاتكم اللي اكيد بتفيدني
الموضوع ببساطة أبي أهدي شخص مهم
هدية بس أبيها تبيض الوجه
انا في بالي ورد وصينية حلو بس كشخة
انتوا شرايكم وين المحلات اللي بتساعدني
على اختيار الهدية يا ليت تفيدوني

 

[AL-BaNDry]

مبارك عليج الشهر يالغاليه

على حسب الشخص ابوج او امج او زوجج او صديقتج

بس كلهم باعتقادي ينفع لهم مجموعة دهن عود وبخور من القرشي او اي محل ثاني وبالوسط يكون فيه قرآن كريم

انا شريت لأمي وخالتي نفس الهدايا دهن عود كمبودي اصلي بقرشة كريستال حلوه وخلطه صغيره للشيله وبخور ومعاهم مبخر صغير
وبالوسط قرآن كريم صغير وكلهم باللون العودي بصندوق مذهب مكتوب عليه مبارك عليكم الشهر
لقيته عند الفايز وانا اخترت جاهز بس انتي بكيفج تختارين اي نوع بخور تبينه


بقولج طريقة اختي

جايبه مجموعة خلطات للشيله والغتره وملبستهم دانتيل وكريستال
وحاطتهم بمزهريه شاريتها من لاند مارك تجننن وبينهم قرآن كريم صغير
ولافتهم بتور ومعلقة على المزهريه سراج وهلال تلقينهم بأبو ميه وحطت بطاقه صغيره دعاء

وان شاءلله اكون عطيتج فكره

 

[غموض الصمت]

هلا فيج البندري
مشكورة ما قصرتي و فكرة اختج حلوة اعجبتني
بس مشكلتي ما عندي وقت كلش
ابي شي جاهز
والشخص اللي بهديله مو من اهلي
بس هو وقف معي وما قصر في مساعدتي
وكانت خدمة انسانية بحته
وهو يشغل مركز مرموق في عمله
يالله قولوا لي شنو اقدر اقدم له :eh_s(10):

 

[opera]

انا اقول وديله صينية حلو وبس


العود والطيب والقران ماكو بيت مافيه .. وخصوصا القران لازم ينقرا منه اما جذي بتهدينه بحطه بس جذي زينه حرااام


صينية حلو من واو ولا مس جوكليت ولا هيل وزعفران

هيل وزعفران مناسب حق رمضان

 

[غموض الصمت]

يا هلا ..opera
مشكورة على الرد
وشكلي بروح لهيل و زعفران اشوف شنو عندهم
بس شلون على الورد ؟