أنطوائيه وغير اجتماعيه ..وأريد اتغير..**

[الجوهرة111]

السلام عليكم بنات
بنات مشكلتي انا وإأآإأآإأآأآ يد أنطوائيه ومب أجتماعيه لدرجه أنا اذا يوونا حريم ما أسلم عيهم أبدأً وتقربياً فينا هالمشكله من 3 سنين وأريد اتغير حتى ربيعاتي ماصرت اروح عندهم مااعرف شو فيني .. اريد اتغير قولولي كيف ابدأ...؟؟؟؟؟؟؟؟:eh_s(16):

 

[غلآي شيمه]

مـــثـــــلك تمـامــاً
.
.

حاولت اغير من وضعي لاكن بدون فايده
من 6 سنوات على هالحال مااحب الجمعات
الله يعين

 

[الجوهرة111]

دخيلكن بنات الي تحب الجمعات واجتماعيه تدخل وتفيدنا

 

[Sweet Angle]

السلام عليكم يالغاليه
شلونج ؟

انزين ليش انتي جذي ؟ حاولتي تكتشفين الاسباب ؟

اذا بسبب عقدة وانتي صغيرة .. تذكري انه موقـف و مر و عدى وانطوى مع الصفحات ..

واذا من دون سبب بس اهو طبع فيج جذي .. ف بداية التغيير اهي الحل

ابدي شوي شوي

حددي يوم و قولي انا بدق على كل رفيجاتي وبسلم عليهم واعرف اخبارهم

و لو سويتي هالحركه بتكونين هدمتي حاجز كبييييييييييييير .. و شوفي السعادة اللي بتحسين فيها بعد هالحركة

اطلعي سلمي على ضيوفكم.. اجبري نفسج .. تقدرين والله تقدريييين

والله العظيم مافي احلى من الناس
الدنيا من دون ناس ما تسوا
بدون رفيجات ماتسوا
بدون يلسة حريم و سواالف ماتسواا

الناس هم شي اساسي بهالدنيا مانقدر نستغني عنهم

مسألة عاده .. لو عودتي نفسج رآح تنجحين بكسر هالقاعده

اقري كتب عن التأقلم مع الناس و الاجتماعية .. و بتأثر فيج حييييييييييل

والله يسعدج يآآقلبي =) :*

 

[ليه الجفآ]

حبيباتي اللي من 3 سنوات و اللي من 6 سنوات !

يعني ماكنتم جذي من قبل ..


معناته في مششكله ياليت تفكرون فيها ..

وتطرحونها اهني عشان نناقشها

مهما كانت صغيره او تافهه يمكن وقتها حسيتم بلعكس والدليل تاثيرها عليكم

فكروا ليش صرنا جذي ...؟؟

واذا كان ماكوو اي شي لو ان هشي مومعقول يعني مادام ماكنتم جذي فلازم فيه سبب ..

اذا كان ماكو اي مشكله يمكن لاسمح الله نظره من احد ترى تتعب الانسان ويضيق صدره من التجمعات

لازم ترقون ارواحكم وتلزمون الاستغفار

وبعدين تجبرون ارواحكم على الجلوس مع الناس وقبل هشي لازم تكون عندكم ثقه بارواحكم

يعني ضبطي عمرج وجلستج لاتجلسين مستحيه من شي فيج عشان تكون اعصابج هاديه


واندمجي وياهم بسوالف


تلقين روحج استمتعتي معاهم وكل يوم اجلسي فتره اطول شوي شوي حتى تتعودين



وربي يسعدكم​

 

[ابي اصير ممثلة]

نفس حالتي مو اجتماعية بس اسلم

 

[الجوهرة111]

اشكر ((وليفة القمر)) و ((Sweet Angle))
لان وإأآيد استفدت من كلامكم ونصايحكم

 

[زينب العقيلة]

انا بعد انطوائيه

ماحس بالسعاده الا لما اكون بروحي


السبب: كان طبع وزاد من كثر المشاكل اللي تييني من البشر

 

[ملوكة الامورة]

انا ماكان فيني الا العافية اطلع وادخل واحب الناس
وفجاة تغير كل شي من سنتين تقريبا صرت اكرهة الناس
ولا اقدر اقابل احد ولا اطلع من البيت
بس رحت تعالجت قالوا فيك اكتتاب ورهاب اجتمااعي
سبحان الله مع ان ماكان فيني شي فجاة
والحمدلله علي كل حال

 

[منو انت]

حاولي تبدين بزياره لناس عزيزه عليج

بالبدايه قعدي عندهم نص ساعه ثاني مره ساعه

بعدين راح تحصلين نفسج تعودتي على القعده وراح تحبينها