ابلات الروضه ..متى تروحين روضتج؟

[مشغوله و محتاسه]

معلمات رياض الاطفال ..

عساكم عالقوه .. متى اتداومون برياضكم ؟؟

كل يوم نودي ولدي .. انا او ابوه .. و لحد الساعه 7 وربع والابلات مو موجودين ..!!
المناوبات موجودين طبعا .. بس البقيه وينهم ؟؟

 

[:: عائشه بقلبي ::]

وديه س 7-30

 

[مشغوله و محتاسه]

سبع ونص صعب ..
لازم اكون بمدرستي عالاقل 7 وربع او سبعه مرات ..

 

[زلابيا]

المناوبات مسؤولين عن الاطفال من الساعه 7

بس الابلات ياخذون عيالهم الساعه 7.30

 

[مشغوله و محتاسه]

وانتي متى تروحين زلابيا؟؟

 

[الحياة]

الله يسلمج حبوبة كل لها مشاغلة وله التزاماته بعد.انا وحدة اروح الروضة 7 ونص اذا ماعندي شي وان عندي شي ومبجرة رحت الساعه 7 بس ابجر من جذي ماقدر
ههههههههههه وبعدين احنا موجودين بس مانقعد بغرفة الانتظار نرتاح بفصلونا او نزهب شغلات من هالشي والساعه 7 ونص نستلم الاطفال..

 

[أم الجوري]

الدوام الرسمى سبع ونص ليش تبونا نروح ابجر ؟؟

حتى احنا ورانا عيال نوصلهم للمدارس

 

[مشغوله و محتاسه]

قواكم الله كلكم ..
ابلات الروضه اللي اعرفهم يروحون قبل 7 ونص ..
يجهزون و يستعدون ..

وانا اوصل عيالي و اكون بمدرستي 7 وربع تقريبا او قبلها ...
علشان يمدي اجهز ادواتي ووسائلي .. بس طبعا الوضع بالمدرسه غير عن الروضه .. لان شغلكم عندكم بالصف .. مو مثلنا تفترون بقشكم من صف لصف ..

 

[أم الجوري]

أختى احنا ما نطلع من الصف الا مجهزين شغلنا لليوم الثانى
لان ما في وقت عندنا نجهز ونستقبل الاطفال
عندنا فتره اخر الدوام نسميها فترة الانصراف
هذى الفتره نحضر فيها كل شغلنا عشان ما نتوهق الصبح

 

[معلمة روضه]

السلام عليكم ورحمة الله وبركاته ....مشغوله ومحتاسه...يا قلبي الكثير من أولياء الامور ينتظرونا داخل الفصل مع ان هالشي ممنوع والمعلمه ليست مكلفه بإستلام الطفل ما دامت المناوبه ليست عليها...بالتالي لابد ان طفلج يتعود يقعد بغرفة الانتظار مع معلمات المناوبه حفاظاً على سلامته أولا وحتى يطمئن قلبج بأنه في ايدي مسؤولين وحتى لا تتأخرين على دوامج.
ومعلمات فصله بالتاكيد راح يستلمونه الساعه 7 ونص من غرفة الانتظار

 

[زلابيا]

وانتي متى تروحين زلابيا؟؟

اي وقت اروح الروضه عادي بس مو قبل الساعه 7

واستلم الاطفال 7.30 ..

ويوم المناوبه 7 اكون بالروضه

لازم تعودين ولدج ان يقعد بغرفة الانتظار مع باقي الاطفال ويتعود على كل الابلات عشان ما تتأذين معاه وتروحين دوامج

 

[مشغوله و محتاسه]

انا كنت اسال عنكم انتم ...
ولاا ولدي غصبن عليه بيدش و يقعد بغرفة الانتظار حاله حال باجي اليهال ..

بس انا مثلا ... احب اروح مبجر .. واقعد شوي و اتهيأ

ومثل ما قلت لكم .. البنات اللي اعرفهم .. يروحون قبل السبع ونص ..

الله يعطيكم العافيه كلكم .

 

[لوميه]

انا اروح ايام المناوبه 7 الا عشر او الا خمس ...

والايام العاديه على حسب ... ومرات 7 وربع بس هم اقعد بالانتظار علشان مره وحده اخذ عيالي معاي ... يعني سواء علي مناوبه او ماعلي انا بالانتظار ...... مالي خلق ادش الصف الا بالنشاط الفردي ...

 

[مشغوله و محتاسه]

حلوو يا لوميه ..
عساج عالقوه ..