ابي اسافر بس بنتي مشكلتي

[جزيلة العطا]

بنات تكفون انا خاطري اروح الصين بس بنتي عمرها سنتين وهي اسمالله عليها حركتها وايد

وريلي يقول ما فيه سفره بدونها.........تكفون منو سافرت مع جاهل بهالعمر...وشلون على التمشي فيها اخاف تتعب خو احنا من السوق ما نتعب بس الجاهل اخاف تزهق
وغير هذا اخاف تنعفس السفره وينعفس مزاجي............زوجي راح يحجز وانا ودي ادق عليه واقول له مابي اسافر وبنفس الوقت مابي اكسر فيه........

 

[عاصمة الموضة]

السالفة حدها عادية حبيبتي

حطيها بالعربانة وتمشي

وروحي من سوق ليه سوق عادي

وخلي معاج ديما الاشياء اللي اتحبها

مثلا بطاط - عصاير - كاكاو


وانتي بالسوق اشتريلها العاب تسكت

بس لازم اتخلينها ترتاح الظهر واتنام عشان لا تستعسر عليج بالطلعة


وبس


انا اقول روحي واستانسي ولا يردج شي

 

[أم عبداللطيف]

الله يخليها لج يارب

شوفي دام ريلج مصر لا تردينه بالعكس تستانسين معاه وتغرين جو

شوفي حبيبتي لاتحرمين نفسج عن السفرة شوفي اخذيها واخذي العربانه وجنطة متوسطة عشان تحطين فيها ملابس واكل لها واهم شئ الماي وكمبل صغير وكلينكس وادوات للنظافة ولعبة لها وانتي مع زوجج كل واحد يدزها والله متعه

انتي بس لا تكبرينها واهي صغيرة روحي واستانسي واستمتعي واخذيها انها سهله لاتقولين صعبه اخذها معاي وبتعبني لا تحطين هالافكار براسج

الله يسهل عليج

 

[أم وصايف]

بصراحه انا ضد السفر مع اليهال لانهم مايتحملون الرحله ويزهقون وحركتهم وايد

بس اذا زوجج مايبي يسافر الا وهي معكم خلاص حبيبتي مالازم اتطوفين هالسفره

بس اعملي حسابج قبل السفره يعني عدلي نومها عشان اتنام وانتو بالطياره

ولاتنسين تيبين الاكلات الخفيفه لها عشان ماتيووع وتلعوزكم هناك

واذا تاخذ مميه لا تنسينها

وبالتوفيق

 

[دلع الكون]

انا نفس طرقتج ريلي مايسافر الا مع بنته

عشان جذيه تعوت اخذها كل مكان

بس اهم شي العربانه واكيد اكل خفيف والنوم نوميها امبجر
وقعديها معاكم وحزة العصر تنام ساعتين وانتي رتبي اغراضج على راحتج
وانتي راح تحسين بالوضع صار طبيعي وراح تتاقلمين معاها[

ولا تفكريت تقعدين عشان ياهل

والله اي مكان تحطينه يقعد

خذيها وتوكلي على الرحمن ولا طوفج السفره وبعدين مو حاصلتلج كل يوم سفره

ولا تنسين صلاة الاستخاره

/COLOR]

 

[pama girl]

السالفة حدها عادية حبيبتي

حطيها بالعربانة وتمشي

وروحي من سوق ليه سوق عادي

وخلي معاج ديما الاشياء اللي اتحبها

مثلا بطاط - عصاير - كاكاو


وانتي بالسوق اشتريلها العاب تسكت

بس لازم اتخلينها ترتاح الظهر واتنام عشان لا تستعسر عليج بالطلعة


وبس


انا اقول روحي واستانسي ولا يردج شي

اتفق معاج



توكلي عل الله واخذيها معاكم لا تحطين ابالج انها راح تزهق و تمل ويخترب مزاجج لان راااح تكونين قاعده عل اعصابج طول السفره و ماراح تستانسين



قووووووود لالالالالالالالالالالالالالالاك

 

[جزيلة العطا]

تسلمون يا حياتي
والله لو تدرون اش كثر طوفت سفرات عشانها يعني من طلعت الاربعين وزوجي كل يوم متهاوش معاي يبي نسافر وانا ما عندي احد اخليها عنده
واخرتها حطني امام الامر الواقع قال اذا عذرج بنتي انا حجزت لها
يالله بسوي اللي قلتوا لي وربي يسهل

 

[cheese cake 84]

آآآآآآآآآآآآه والف آآآآآآآآآآآآه مع سفره اليهال انا الصراحه اقولج هالحجي مو عشان اضيق خلقج بس عشان تعرفين تجربتي المريييييييره مع بنتي وعمرها همن نفس بنتج سنتين سافرت معاها لندن يننتنييييييييييي قمت ادق على امي وابجيييييي منها:krkrkr: عسره وماتبي العربانه وماتبي احد وتبي بس تراكض بالشوارع الصراحه اخذيها مني نصيحه اذا عندج احد تخلينها معاه بالكويت اختج وتمونين عليها امج تقدر تستحملها والله خليهاا وروحي استانسي ,وبعدين الصين مافيها العاب حق اليهال روحو ماليزيا احسن:dddds: انا الصراحه قمت اطلع وقت نومتها عشان احطها بالعربانه وتنام والشي الثاني اوديها العاب تلعب وتستانس واشوف الضحكه على ويها وانساااااااا كل اللي سوته فيني:eh_s(6):

 

[فرحه عمر]

اختي زوجي مثل حالتج فتعودت اخذها معاي من كان عمرها سنتين وانا وحده ماااااااااحب اليهال بالسفر بعلمج طرقتي والاغراض اللي تاخذينها معاج لها
اول شي قبل السفر بفتره اكتب بورقه الاغراض اللي احس محتاجتها عشان ما انسى شي
** نصيحه اغراضكم وزعوها بالجناط يعني مو جنطه خاصه فيج و جنطه لزوجج يعني كل جنطه اعتبريها لكم الثلاث و خصوصا اذا كنتي متحجبه بعد اخذي معاج هاند باق بالطياره فيه بدلتين لج و حجابهم مع غيار لبنتج...لا تقولين شهالعباله حبيبتي اذا ضاعت الجنطه وين تلقين لج ملابس متحجبات انا قياسي ميديوم وماالقى قياسي بشرق اسيا(( لما ضاعت جنطه ريلي قعد يحووووس مو عاجبه شي و هو كل شي متوفر وقعدت افكر لو انا اللي ضايعه جنطتي وانا بصراحه انقرصت و قمت اسوي هالطريقه بكل سفراتي

**بخصوص اغراض البنت للسفر بالطياره ياريت يكون كم طويل وبنطلون عملي طويل لان الطياره بارده قبل لاتطير او اخذي جاكيت ربيعي خفيف وراح تحتاجين نفسه اذا ركبتو التكاسي بالسفر لان الجو رطوبه و تكاسيهم بااااااااارده عشان ماتاخذ برد و تتاذين معاها اغلب اليهال اللي سافرو معانا سنغافوره صخنو عيالهم من هالسالفه و بعد ماشافوني اشترو لعيالهم
واللي صار معاهم التهاب بالاذن من البرد وعليه صراخهم بالطياره اذا طارت من الضغط

** دايمن اروح المستوصف قبل اقول للدكتور اني مسافره و اخذ ادويه عن البرد (زكام ) و للحراره و حطيهم بجنطه الهاندباق اللي بالطياره مع ترمومتر للحراره بعيد الشر

** تلاقين بمذركير كيس فيه صدريات اطفال بس ورق قيمته يمكن دينارين الا فيه 10 صدريات والله ادعلي للي سواهم عباره عن صدريه ورق بس مايشرب الماي تتلزق بستكر عالكتف و تحت فيها مثل الجيب بس لازم تقلبينه عشان الاكل اذا اكلت يطيح بحظنها على ملابسها حده مريييييييييح بتقولين لي كبيره عمرها سنتين بس حق البرد و المعكرونيه و البيتزاوالاكل السفري تاكل على راحتها ماتحاتين غسيل الملابس

** زياده اخذي الورق المعطر ديتول حق غسيل بعد الوجبات بهالعمر عفيسه اذا كلو

*** حفاظات اللي تنلبس مثل السروال للطياره والطلعات عشان اذا نامت ماتوصخ ملابسها

*** والعربانه طبعا بس اخذ الصغيره والخفيفه

** والله الله بالعلوج للطياره اول ماتطير هههههههههه وراح تنام لاتحاتينها

اعذريني ماعرف اختصر كله بالتفصيييييييييل الممل ان شاء استفدتي
وان شاء الله تستانسون

 

[لولو70]

ماشاااااءالله عليكم يا كويتيات فعلا نصايح الوحده تستفيد منها
اختي فرحه ماشااااءالله والله استفدت من افكارج الله يبارك لج بس ممكن سؤال شلون صايرين صدريات مذركير يعني قصدج لبسه وحده وتقطينها ما فهت طريقتها ممكن اذا تقدرين صوره لها او وصف اكثر واكوووون شاكره لج وما قصرتي

 

[لولو70]

وينج فرحه عمر ؟
مارديتي علي ؟

 

[فرحه عمر]

هلا بالولو موجوده
للاسف ماعرف انزل صور بالمنتدى بس اهم عباره عن استخدام مره وحده بس وان شاء الله تلاقينهم بكل الفروع في مذركير

الكيس شفاف و شكلهم باين صدريات ارضيتهم ابيض غالبا و عليهم ا شكال ملونين اسئلي الموظفات بس نصيحه انت افترى لللاسف فيهم غبااااااااااء مو طبيعي خصوصا اذا فلبينيه
وغالبا يكونون معلقين
خذيتهم مره من فرع شرق وين مكان المميات و اللهيات معلقين عالطوفه وراهم
وان شاء استفدتو ومانسيت شي

 

[لولو70]

ايه فروحه موجوده
جزاج الله خير ما شاااااااءالله ابداع
اشكرج مره ثانيه وان شاءالله بكره بروح اشيك والحين عندهم تنزيلات فرصه حلوه
يعطيج الف عافيه واتمنى ان تقبلي صداقتي
موفقه خيييييييير

 

[فرحه عمر]

ولو اختي كلنا لبعض
و تحياتي للكل
نسيت اقولج مرت خالي تشتري من جمعيه الروضه اذا ماحصلتيهم بس بصراحه ماعجبوني اييون مثل الرول نايلون مثل نايلون السفره مال الغدا اللي استعمال مره وحده
بس قلت يمكن ( الله لايقوله ) ماتحصلين شغل مذركير ومحتاجتهم بس للامانه وصفتلي مكانهم و ماعرفت الاقيهم بس اذا سئلتي العمال اكيد اذا موجود بيساعدونج