ابي نصيحتكم ضروري ..

[Maaya]

السلام عليكم خواتي

انا وايد محتاره بشغله صارتلي بالفتره الاخيره وصليت استخاره ولحد الحين مادري , طالبه رايكم لأن يهمني ..

انا أدخل مواقع أجنبيه واللعاب وكان اهناك في ناس من كل مكان بالعالم , تعرفت على اللمانية وزوجها وكانت نعم الصديقه برغم انهم مو مسلمين بس يحترمون عاداتنا وتقاليدنا (زوجها كان عايش بالكويت سنه وعارف طبيعتنا)
وكان من بين الناس اهناك كويتيين احتكاكي معاهم محدود ..
بيوم من الأيام صديقتي الالمانيه قامت تلمح علي ان في شخص كويتي معجب بأخلاقي وذكائي وشخصيتي ..

وبحكم ان صارت مواقف لي وكانت صديقتي الالمانيه شاهده فيها شافت معدني اني مارضى بالغلط ومتمسكه بالعادات وماني من البنات اللي رايحه فيها , فكانت صراحه تقول للولد عني وايد وتسولف له عن اخلاقي وعن تصرفاتي وانا مادري , واهو انعجب فيني فكلمتني عنه انا قلت لها مادري , يعني الولد على حسب كلامها وايد زين وغير عن باجي الشباب ..

ويوم من الأيام صارلي موقف بالموقع اهو استغل الفرصه وبدا يكلمني يساعدني بالحل مع الوقت صارحني ان اهو شاريني ويبيني انا قلت له امري بيد اهلي مو بيدي بس بمعرفتي فيه اهو ونعم الأخلاق وخوش واحد ..

لحد الحين تمام .. الشغله ماصارلها اكثر من شهر وارتحت له صراحه , حبوب طيب ومرات اقول على نياته هادي ومو من الشباب اللي يطلعون ويروحون يمين ويسار , يعني بكل صراحه نادر ومعاملته لي واااايد محترمه , بس الشغله اللي ضايقتني وخفت منها ان الولد ماخلص الثانويه وماعنده شهاده , دش معهد وتوظف بشركه بس قال ان اهو ناوي يكمل ويخلص وان عنده مبلغ مالي ميمعه ويبي يفتح مشروع بباله من سنين ..

انا يا بنات الحمدالله جامعيه وافكر اكمل دراستي بعدين يعني الدراسه بالنسبه لي شي اساسي وهم انا مو صغيره كملت ال 26 سنه ..
اللي محيرني ماني عارفه هل يصلح لي زوج ولا لأ , هل بيكون في توافق او لأ ..

اهو ماشاء الله عليه أخلاق وطيب بس ناقصته الشهاده .. والاهم من هذا امه كلمتني وكانت حييييييييل حيييل حبوبه وكلمتني بموضوع دراسته وان اهو يفكر يكمل ( انا ماكلمه فون بس امه اطلبت تكلمني وتوهقت لأن كل شي صار بسرعه بسرعه )..

طبعا مايقدر يتقدم لي حاليا لا اهو جاهز ولا انا , انا عندي ظروف وانتظرها تخلص بالاول عشان اكون جاهزه يمكن تاخذ اشهر او سنه .. واهو ناوي على مشروع وجم شغله قبل عشان يكون جاهز بعد .. فماراح ادري شنو اهلي بيقولون ..
بس طبعا الراي الاول والأخير بيكون لي انا ..

وايد محتاره اعطيه الاوكي ولا اقطع كل شي بس اخاف اندم صراحه هالزمن صعب البنت تلقى اللي بيحترمها ويحفظها ويحطها بعيونه .. وموضوع شهادته شلون ؟؟

هل الأفضل اقوله انا رافضه على امل ان يتقدم لي شخص احسن منه ولا هالوقت ماينفع جذي ؟؟

انتوا شرايكم بنات لاتبخلون علي بنصيحتكم ..



​

 

[مهرة الخليج]

هلا حبيبتي ,,, والله يساعدك يارب
تأكدي من العائله زين واذا انتي معك اسم العايله تاكدي اكثر منهم كسمعه ,,, خلي احد من زملائك او ازواج صديقاتك يسال عنهم عدل ... هالايام الواحدي خاف من ظلاله
وبعدين اذا الولد طلع زين ,,, مساله الشهاده راده لج اذا انتي مهمه عندج الشهاده او اخلاق الرجل وسمعته فقط ,,, وديري بالج حق نقطة مهمه بعض الريايل ساعات يغارون من زوجاتهم بعد الزواج اذا هي اعلى منه شهاده وهذا يشكل بعض المشاكل ... حكمي عقلج وخلي قلبج وعواطفك على صوب لان البنت مو كل يوم لها ريل
وعسى الله يوفقك

 

[Maaya]

أختي مهره العايله مالته اصلهم زين والحمدالله مبين السمعه زينه بس طبعا كل هذا لما يتقدم رسمي وقتها اكثر من طرف بيدخل من اهلي وراح اعرف رايهم , بس الحين ماقدر اعرف اهي مسألة الشهاده متوقفه علي ومثل ماقلتي البنت مو كل يوم لها ريل ..

ودي اعرف لو في بنات جامعيات وتزوجوا من رياييل ماعندهم ثانويه شلون حياتهم؟

 

[ترانيم القصيم]

ههههههههههه سبحان الله , لو تمّ الموضوع بتكون هالألمانيّة الكافرة وفّقت بين راسين بالحلال ,,

طيّب كلميها عن الإسلام ,, ما جرّبتِ ؟ ^_^ لعلّها تتأثّر بسلوككـ و تهتدي ^_~

بخصوص مشكلتكـ ,, أوّل شي ,, طالما موب زوجكـ , يا حبيبة ما يجوز تكلميــنه حتّى على الإنترنت في مكان معزول

يعني زي المنسجر و كذا أو غرف الدّردشة ,, و الحديث مع الرّجال يكون للضّرورة مقيّد بالضّوابط الشّرعيّة

طيّب صارت السّالفة و انتهيـنا ,, طالما إنّكـ تشوفيـن الولد خلوق و محترم , وافقي عليـه , لا تضيعيـنه من إيديكـ و لامنّكـ تزوّجتيـه

ساعديـه على أنّوهـ يكمّل دراسته ,, بس أهم شي الآن كل واحد في حاله ,, يعني ما يصير بينكم مكالمات أو شي من هذا

تقدرين تتواصل مع أمّه أو أخواته أمّا هو فما يجوز يا قلبي لأنّوهـ ما بعد خطبتس رسمي

موفّقة

احترامي و تقديري

ترانيم القصيم

 

[Maaya]

مشكوره اختي ترانيم
الألمانيه مو مبين عليها ودها تسلم هههههه بس انا الحمدالله شخصين من امريكا اسلموا على ايدي وبأذني سمعتهم ينطقون الشهاده , لأن وجود بنت عربية متمسكه بأخلاقها بينهم نادر وبحكم قوة اللغه عندي اعرفوا الأسلام عدل ..

اما هالشخص مو محتاجين انا وياه نتكلم او يصير تواصل خارج الموقع بس اعتقد اهو يبي مني الموافقه المبدئيه عشان يضبط نفسه ويتقدم لي لأن مايصير يتقدم اذا انا رافضه .. بس مثل ماذكرت انا واهو محتاجين جم شهر لظروف ..
واهو صح خلوق ومحترم هذا اللي جذبني لأن اغلب شباب هالوقت مايحترمون البنت ومشاكل , وامه طيوووووبه وماعنده اخوات
وفكرت فيها اني اساعده على الشهاده بعدين ,, بنات لاتبخلون برايكم .. ودي اسمع تجارب البنات اذا في مثلي ..

 

[Maaya]

حبيت أضيف ان بحكم اني ماطلع وماعرف شنو داير بالمجتمع فماعندي ادنى فكره شلون ممكن يكون الوضع بعد الزواج ,, هل بيكون ناجح ولا فاشل ومشاكل ؟؟؟

هل في احد مار عليه موقف جذي او مروا عليه اثنين مختلفين بالمستوى التعليمي وتزوجوا وحياتهم ماشيه تمام؟

 

[الرورو]

السلام عليكم
حبيبتي الشهاده مو كل شي ياما شباب عندهم شهاده وواصلين مراكز حلوه بس تكون اخلاقهم مو شي ولا انه يكون على علاقه مع بنات حتى بعد الزواج
وانتي عمرج 26 يعني مو ضامنه تلقين ريل بعدين
اهم شي انج اذا وافقتي انج ماتعايرينه بالشهاده هذا اهم شي
واذا تزوجتيه انشالله والله كتب بينكم نصيب انتي تقدرين تخلينه يكمل دراسته
اتمنى اكون فدتج بشي حبيبتي وصلي استخاره بعد احسن اذا محتاره
واهوه اذا تقدملج رسمي انشالله بيتضح كل شي بعد راي اهلج
مع السلامه

 

[غلا ستايل]

توكلي على الله فرصتك

 

[Maaya]

ماقصرتوا خواتي الرورو وغلا ستايل هم انا لما فكرت اكثر شفت اني مرتاحه دامه زين احسن من واحد مو زين

بس ابي اسمع تجارب

 

[z8rtia]

السلام عليكم ورحمة الله وبركاته
صلي استخارة، والله يوفقج لما يحب ويرضى

 

[3emya_Berry]

حدا عادي استخري وان طلع زين توكلييييييييييييييييييييييي انا رفياتي جامعيات وماخذين دبلوم ومن احسن ما يكون الشهاده مو مقياس الواحد على احترامه ورجولته واخلاقه الشهادة مجرد ورقه باجر بيبلها ويشرب ميتها على قوله المصاروه شنو بتنفعج فيه الشهاده بالقبر حبيبتي

 

[Gatwa]

أإهم شي الاخلأق
عمرهأ الشهأإده ماتحدد شخصية الشخص
وكل عايله فيه منها الشين والزين
دام مرتاحه الله يوفقج حياتي

 

[so_what]

الشهاده مو مقياس ومافي احد كامل صج انها ضروريه بس ساعات اشياء تغطي اشياء، والله يكتب لج اليي فيه الخير ان شاء الله

 

[Maaya]

ماقصرتوا بنات والله ردودكم ريحت بالي وطمنتني ..
امه بدت تكلمني وتسلم علي وايد ووايد مرتاحه لي وتمدح فيني وانا اكلمها.. منو تبي احسن من جذي ام ريلها زينه وطيوبه لأن هذي اخلاقهم خوش ناس ..
واهو مشالله عليه ماشافني كلش ولا كلمته بس يبيها من الباب مثل عاداتنا .. بس امه حسيت ان ودها تشوفني بس مادري لول احاتي ماعرف اتصرف بهالمواقف ..
انا فكرت اقول حق امي واجيس النبض واشوف رايها .. انتوا شرايكم؟؟

 

[دلوعة أبوهآ]

استخيري وتوكلي ع الله
الشهاده ماتحدد رجولة الانسان وتفكيره
دامه طيب وولد حلال وامه طيبه .! هذا أهم شي ..

ودام صارت اتصالات بينك وبين امه خلاص ليش ماتكلمين أمك وتقولين لها كل شي بصراحه ؟؟

وربي يوفقك

 

[^q8ia^]

انزين انتي ماشفتيه ولا شافج ؟؟؟

شوفوا اول بعض طبعا عن طريق الاهل

صج ان الشكل مو كل شي

بس هم لازم ترتاحين نفسيا له وتتقبلينه من هالناحية

والله يوفقج

 

[Mazyoona]

،


يالغلآآ Maaya

أستخيري و ربي بيسخرلج الصالح
آممم آلشهاده شوفي مهمه شوي لأنه الواحد يتحسف عليهآ لا كبر
برآيي وافقي بس قوليله يكمل حتى لو عنده مشروع و جذي بس ماراح
يفيده شي كثر الشهادة أهيا الثابت الوحيد !

ربي يوفقج