اتمنى تفسروون حلمي

[sad feeling]

السلام عليكم ورحمة الله وبركاته
الحالة الاجتماعية : عزباء
الحالة الدينية: عادية اتمنى لنفسي الهداية
المهنه :طالبه
حالتك قبل النوم : هل كنتي منزعجه من شئ ؟ تفكرين بامر ما له ارتباط بالحلم ؟
أفكر دايما بشخص كانت لي علاقة لفترة معه وبعدها قاطعني فجأه اعشقه لدرجة الجنون كنت كل ماأفكر فيه أنزعج لأن أحس اهنت نفسي أراسله ويتجاهلني ومايرد علي واتمنى بشيء اني اكرهه ...ولحد الان التفكير متواصل

الحلم حلمت فيه من كم شهر
حلمت ان صار عرسي بديرتي واني قاعدة على الكوشة وجاني العريس الشخص اللي افكر فيه بالحقيقه وجلس بجنبي على الكوشة بدون اي كلمة بيني وبينه وكنت احس بالحلم انه راح يصير شيء بس مادري شنو بعدها لقيت نفسي ثاني يوم الصباحية وكنت اشوف نفسي قاعدة بغرفة اختي وكنت كاشخة كشخة العروس بصباحيتها وكنت قاعدة على طرف السرير وامي واختي كانو عندي كأنهم مسيرين علي مع انها بالحقيقه غرفة اختي وكنت اقول لامي يمه ماجاني ماشفته اخاف يتركني (((وكنت بالحلم ماخذه موقف من قطاعته فجأةلي بالحقيقه)) خفت انه يتركني بدون سبب ويطلقني نفس ماقطع وصله فجأه وكان بالحلم احداث بس ماأذكرها

علما ان بعد الحلم هذا بكم اسبووع مادري بالضبط دقيت على هذا الشخص وسألته ليش تركتني فجأة وشسويت انا احبك ومناقشات اخر شي قال وبثقه أنتي تحبيني أنا ماأحبج وموغصب اكلمج........ّّ مادري اذا هذا تفسير هالحلم او تفسيره غيرر

اتمنى تفسرون حلمي وعذرا على الاسلوب اذا كان مو جيد
شكرا لكم:eh_s(17):

 

[مفسرة الاحلام]

اولا حلمك مو رؤيا هذا حديث نفس وان كنتى ماكنتي تفكرين فيه قبل النوم

ثانيا ليه تهيني نفسك له الرجل كان جدا واضح معك وماوصل لهدرجه من الوضوح الا انه وبكل صراحه ( طقت كبده ) من ملاحقتك له معليش اعذريني على صراحتي لاني احبك اقولك هالكلام انتي بالاخير اختي فى الله وما ارضى لك الاذيه ولا حتى الاهانه من شخص ما يستاهل الوحده تتعب نفسها عشانه

وعلى فكره كل الرجال كذا تصرفهم مع اي بنت تكلمهم او لها علاقه فيهم يستحقرونها ويهينونها

تقولين تحبينه مو قادره مادري ايش هذا كله لانك بعيده عن الله لو انك قريبه من رب العالمين ما همك لاهو ولا عشرة من اشكاله وبالعكس بتسحقرينه وتقولين انا كيف كنت اسوي كذا!!

عزيزتي املي قلبك بحب الله كيف اقولك صلي الفرض بوقته وزيدي عليه ركعتين سنه استغفري كثير فراغك اشغلي نفسك فيه بالدعاء والاستغفار ادخلي هنا فى المنتدا اقرائي ثقفي نفسك اشغلي وقتك مع اهلك شوفي تلفزيون اطلعي مع اهلك

الحياة ماوقفت على الحب والسوالف هذى الحب الحقيقي يجي لاتزوجتي وجاء الرجال وطلبك من ابو او ولي امرك وانتي معززه مكرمه يشوف فيك بنت عز وشرف وتستاهلين تكونين ام عياله وجاء وطلب رضاك ولا زعلك فكر وعمل الف حساب حق اهلك هذا الطريق الصح مو ترخص البنت بنفسها وتسلمها للي يسوى ومايسوى من هالشباب

الله يوفقك ويرزقك الخير ويصلح لك امرك