اتمنى من المعلمات رياض الاطفال مساعدتي

[غلا مطير]

السلام عليكم ورحمه الله وبركاته ،،،

كل عام وانتم بخير

اتمنى تساعدوني انا طالبه تربيه عمليه ومو عارفه شنو اسوي احس اني ضايعه

والموجهه راح تحضر لي يوم الاربعاء وبتشوف طريقه تدريسي،،،

وانا مو عارفه اشلون اطلع منبه واشلون اتدرج بشرح علشان احقق الاهداف ثلاثه في الحلقه ،،

الهدف العقلي : ان يتعرف على اوجه تشابه والاختلاف بين الجنسين

الهدف الوجداني: ان يتقبل ذاته

الهدف الحركي : ان يجمع الاشياء التى تخص جنسه من الاركان،،


اتمنى تساعدوني لاني بصراحه متضايقه ولاحسيت بطعم العيد بسبب تفكير

الله يجزاها خير اللي تساعدني ويحقق اللي تتمناها

بليز

 

[عالي مستواها]

وعليكم السلام ورحمة الله وبركاته ..


اللـــــــــه يعينج .. حاسه بمعاااناتج والله

للأسف ماقدر أفيدج
أنا تربية عملي وكنت نفسج معطيني حلقة حق نفس الدرس بس بعدين مددوا فترة المشاهدة لأنه الأطفال بالفترة اللي طافت ما داوموا

أنتوا بروضتكم مداومين الأطفال بالعشر الأواخر ؟

ان شالله تدش وحدة من مدرسات الروضة وتساعدج تعطيج منبه

أهم شي خلي أفكارج مترابطة ومتسلسلة ولا تقرين من ورقة أثناء الحلقة واربطي الجانب الوطني والديني مع عرض سلوكيات

 

[غلا مطير]

مشكوره اختي عالي مستواها على الرد ،،

اي والله معاناه بمعني الكلمه ،، ان شاءالله نتخرج

الاطفال غابوا عشر الاواخر ،، بس المشاهده مدتها اسبوعين وخلصنا منها

مشكور على نصيحه ،،

يامعلمات وينكم عفيه ردوا

 

[غلا مطير]

وينكم يا مدرسات

 

[منورة]

هلا غلا اللّة يهداج ما لقيتي الا هالدرس مختارتة بنفسج ولا مفروض عليج ؟؟


اسمعي التربية العملية دايم ناخذ الدروس السهلة علشان تكون أسهل لنا لاتخلين المدرسات ياخذون السهل وانتي الصعب عليج ياما سووها فينا اللّة يسامحهم بس مو كلهم طبعا احم احم صرنا مدرسات ما نرضى ترى هههه


المهم يا بنت عمي

المنبة والدرس اجتهاد مني مو ينقدونج وتبلشيني مالي شغل انا قاعدة اشرحلج ع حسب توجيهنا والاهداف اللي كاتبتها اوكي




نبدا

المثير :ممكن عن طريق لعبة السلال الملونة ولا الاكياس الملونة دوريها من محلات ابو مية انزين وزعيها بالاركان وحطي فيها دشداشة ولا بنطلون المهم شغلة يلبسها الولد والسلة الثانية شغلة تخص البنت ماشة شباصة تاج والثالث فاضي


المهم بعد السلام واللي منة الخبرة قولي وخلي نبرات صوتج تجذب الطفل كأنج تمثلين

حباااايبي عندي لكم لعبة من يحب يلعبها معاي ؟

واختاري ثلاث اطفال وحطي عندج سلة صغيرة فيها قطع قص ولزق ملونة على حسب لون السلال اللي وزعتيها من الاول اوكي يختارونها ويجيببونها لج مع الموسيقى او التشجيع


بعدها تحطينها جدام الاطفال وابدي الاسئلة


حبايبي من يستخرج الاشياء الموجودة بالسلة الاولى راح يطلع الدشداشة ابدي ائلي شنو لونها منو يلبسها ؟
راح يجاوبون شجعيهم بالاستكرز بالصيحات وبعدها كملي السلال الثانية

المهم راح يتعرفون ع البنت والولد لا تعرفوا قولي يلا يا اطفال كم بنت موجودة توقف
والاولاد كم يرفعون اصابعهم عقبها اسئلي تعالي يا فلانة واهنية ميزي بين البنات بالشعر يلبسون ملابس للبنات ويحطون ماشات يعني تميزينهم انهم بنات ولهم طريقة باللبس وبالشكل مثل الشعر الطويل وجيبي ولد ونفس الشي

عقبها السؤال منو اللي خلقنا ؟؟


بعد الاجابة قولي اللّة سبحانة وتعالى خلقنا بأحسن صورة ويجب ع الانسان يتقبل شكلوة وجنسة ويحمد ربة ع هذة النعمة وحطي الاية



اووكي


خلصتي


تبدأ المسابقات


وزعي اشيااااء بالاركان تخص البنات والاولاد


عن طريق لعبة مثلا كور موزعةعند كل شغلة بكذا ركن عاد خلي الطفل يجيب الشغلات اللي نفس الكور اللي عندة


مثلا ملابس
كور
لعبة
للبنت ولا للولد
كبابيس للبنات والاولاد

يعني نفس جذي اشياء تخص الجنسين وماتنسين لما تجيبين الاشياء تذكرين السلوكيات

قبل اللبس شنقول الدعاء
وهم نحرص ع نظافة اجسامنا وتمشيط شعرنا كثري السلوكيات


وممكن تستخدمين شفافيات تخدم السلوكيات عندج مثلا بمكتبة السنافر صور سلوكيات لبس تفريش الاسنان تمشيط الشعر حوليها لشفافية واعرضيها وناقشي مع الاطفال شنو يشوفون ويعبرون عن الصورة




وعقبها اذا ما كفى الوقت حطي تغذية راجعة ممكن تقولين سؤال شنو تعرفنا علية اليوم ؟



وبس


ان شاء اللّة يكون واضح وموفقة ^^

 

[عهود الحب]

ان يتقبل ذاته



هذا الهدف خطأ وغير محسوس


حطي بداله يحافظ على نظافة ملابسه

او يحافظ على ترتيب الاركان بعد الانتهاء منها


موفقه ياقلبي وبشري ان شاءالله خير

 

[ياسمينا]

هلا ياغلا
شوفي ممكن تبداين منبه قصه حركيه عن بنوته حلوه بتلعب بالعاب بسله ومحتاره وين العاب البنات وين العاب الاولاد خلي الاطفال يساعدون البنوته ويطلعون مع الموسيقى الرياضيه العاب كل جنس وناقشيهم فيها وكم بنت معانا بالفصل وكم ولد
ومن لوحه الحضور والغياب طلعي الاطفال الغايبين ويتعرفون على سمات الولد والبنت والفرق بينهم
وتشجيع الاطفال شي مهم وحطي فيلم من برمجيات الحاسوب عن الحلقه
وبعدين سوي تغذيه راجعه لعبه مسابقه اسئله كيفج
وسلامتج وتعيشين

 

[غلا مطير]

خواتي منوره و عهود الحب وياسمينا مشكورين على الرد والشرح انقذتوني

اختي منوره هذا الدروس الاسهل اللي عندهم وباقي صعبه شويه،، بس احس المدرسات مالهم خلق يساعدونا ،، الله يعين ابي اتخرج وبس

اختي عهود الحب الهدف يتقبل ذاته شافته المشرفه وقالت صح ، انا نفس رأيج ،

اختي ياسمينا يسلمو على فكره ،،