احتاج شخص عنده خبره بالتعامل مع الناس والحياة

[6Mo0o7a]

السلام عليكم خواتي ..

انا عندي مشكلة تعبانة منها نفسيتي ...عن اهلي واخوي

عندي اخوي جالس لاشغل مايبي يدرس ولايتوظف بس فاتح ديوانه لربعة
وبعض الناس اللي حتى الخير مايتمنون له ..احسه طفل مايعرف عدوه من صاحبه
حلو الكرم لكن مو معناته اني اضيع مستقبلي عشان الناس وهو ما يستقبل كلام من اي احد
ادري باجر الدنيا اتسطره لانه مابنى لنفسه مستقبل ..وانا صارلي اربع شهور ما احاجيه وناوية اكمل سنة اواكثر..
..ابوي عاجز عنه ..جاب لأبوي سكر ..احسه زيادة عدد ما منه فايدة هالاخو ..ويشك فيني وبأختي
مايبي يسافر عشان الدراسة انا ادري انه يظن اذا سافر بنخرب انا واختي ..للأسف

شديت حيلي بدراستي عشان اعوض نفسي وتخرجت بمتياز وتخيلوا بأمتحانات
اخر السنة الناس تدرس عشان كنا بمرحلة تحديد مستقبل وحياة ..وهو جرعني المر
بالمشاكل اللي يسويها ..حتى جيرانا عرفوا مشاكلنا منه

تدرون شنو المشكلة :اني ادري انه له علاقات مع بنات ..ويكلم
واذا شافني ماسكة النت يبدأ يشك ...فيني اني اكلم احد

حقوقي ضاعت ..كل ماتكلمت ابوي سكتني عشان جيرانا لايسمعون صوته
انا انسانه طموحة لأخر حد ..وهو انسان ..يشك بضله كرهت كل شي
اكره اشوف شكله ..حتى بالسفر ..ولامره سافرنا وفرحنا نفس الناس
من مشاكله ..عنده البنت عيب تمسك النت عيب
كل شي والمشكله انه مايعرف العيب على نفسه ..

اسفة اذا طولت عليكم ..ادعولي الله يحقق مرادي وابي مشورتكم علي..؟!

 

[دلوول 2006]

حبيبتي قريت مشكلتج
وعورني قلبي عليج
بس صدقيني
في ناس عندهم أكبر من همج بكثير وصابرين شيسوون
عل قولتهم ما للمجانين إلا أهلها
فيه المدمن والسكير وراعهي الهوشات والمصايب
محد خالي أصبري
وادعيله بالهداية بكل صلاة
عسى الله يهديه لج ولنفسه
وشوفي أحد من الناس اللي تثقين فيهم ويمون عليه يكلمه وبدون ما يعرف أنه منج ديري بالج
وآنا معاج متابعه وبالتوفيج حبيبتي

 

[كلنا عشاق لكن]

جم عمرة ؟؟ إذا مراهق معناها ثلا ث أرباع مخة مومعاة طبيعي هالشي
بس قولي مدحتك لفلانة وشرايك نزوجك فلانة وهالكلام اللي يخلية يبدا مع نفسة من جديد
عشان يعرف إن الحياة موبس ديوانية وقعدات
بعدها قولي المررة تبي اللي يصرف عليها من مخباة موياخذ مصروفة من أهلة
هذا كلة جرعات ويوم عن يوم بيتغير
حاولي تغرينة بالشكر والهدايا كل ماسوالج شي مهما كان بسيط وإمدحي فية وبشهامتة جدامة وجدام أهلج
والله يهدي الكل إن شالله ​

 

[جوك احلى جو]

الله يعينج يارب

بس ماعليه دوام الحال من المحال

في امور ماتنحل الا بيد ربج

كثري استغفار ودعاء وصدقات وربج بيفرجها ان شاءالله

 

[قدســـاوية]

الله يكون بعونج

لا يرد القضاء الا الدعاء

عليج بالدعاء تدرين ليش؟.

لانج لو لقيتي شخص مختص بهالامور صدقيني ماراح يعينج كثر الله

 

[ام الدرر]

الغريب بالموضوع حبوبة ان الوالد ماله سلطة عليه
والاهم تكونين واثقة من نفسج
مدام انج ماتغلطين ولاتسوين شي يغضب رب العالمين
يشك مايشك هو اللي بيتعب ويعيش بهم
عيشي حياتج واستعيني بالخالق
المثل يقول كبريها تكبر وصغريها تصغر
كل ما فكرت بالموضوع تتعبين اكثر
فكري بالمستقبل
مصيره بيكبر ويتزوج ويلهى بزوجته وعياله
وانت ان شالله واختج بيجيكم النصيب
ياحياتي
دايم حطي في بالج
انه
مابعد الضيق الا الفرج
و((مابين غمضة عين وانتباهتها يبدل الله من حال الى حال ))​

 

[6Mo0o7a]

كلنا عشاق

اختي اخوي مو صغيررر ..عمره 20 وداخل ب21

ولا اقدر امدحه ..او اضحك بوجهه...لاني لو سويت هالشي راح يتمادى علي
لاتلبسين كذا ويتدخل بأموري اللي ما تعنيه ..جربتها من قبل ولا فااد

اشكركم خواتي ع تفاعلكم معاي ريحتوني بكلامكم ..
ياكثر ماتمنيت ذاك الاخو اللي يصيرلي كل شي ..ويرفع راسي
قدام الناس ويثق فيني ..كل ماتمنيت هالشي يعتصر قلبي
وتجيني البجية ..الله يرزقني باللي يعوضني ..!!
والله انا عمري 18سنة داخلة ع الجامعة ..اني اخاف من جور الدنيا
وتغير الاحوال ..وشادة حيلي ..عشان ماانحني باجر
بسلاحي "الشهادة والمستقبل"

بس صج من قال ان الكبر بالعقل مو بالسن

 

[6Mo0o7a]

ام الدرر

اختي ...المشكلة ..ان ابوي دلعه دلع مو طبيعي
وهذا وصله لهالمرحلة ..وافقده السيطرة



مشكورة ع كلامج الرائع

 

[روحي زوجي]

شوفي اختي الغيره بالرجل على اهله زينه مهما كانت

وغلط انج ماتكلمينه شلون راح تحلين المشكله من غير تقاش ناقشيه حاوريه اكتبي له ورقه اي شي بس لازم يكون فيه تفاهم وحل للاسباب

السكوت ماراح يحل شي

 

[صدى القلب]

حبيبتي الله يعيينج وربي حااسه فييج

شوفي نصيييحه حاولي مثلا وانتي قاعده مع اهلج وهو بيدخل انج تقولين اصاابع الايد عمرها ماصارت مثثل الشي وومو كل شخص نشوفه خرباان نحكم ع الكل انهم خربانيين منهم الصالح ومنهم الخرباان

وقولي اللي يششك بخواته يعني يشك بنفسه لانه طالعين من نفس البطن ونفس الايد ربتنا ونفس الاخلاق بس ربنا يفررق بينا بالعقوول والحمدالله انه عقلي صالح واتقي ربي واخااف من ربي قبل مااخاف من المخلووق وصدقيني بيفكر بالكلام هذا وبيحس ع دمه

والله يعيينج ويصببرج اهم شي خلي ثقتج بنفسج وبربج والله ماينسسى عبااد حيااتي

 

[قطوووة]

هالنووعية ماينفع معاه الكلام
اعرف ناس يصيرون لي مثل حالتج والعن

اخوهم حاكرهم وموصاحي
بس من تزوج طخ شوي ولهى مع مرته

الله يوفقج وشدي حيلج بابدراسة ويارب يغير حالكم للاحسن

 

[chee$e cake]

حبووبه الحل الوحيد انج تقعدين معاه بروحكم و تسايسينه بالحجي و تبدين تنصحينه ترى المره الاولى ما يسمع بس الباجي بيسمع مو على كيفه صووت الضمير اهوا اللي رح يوجهه بس اهوا محتاج تنبيه !

 

[الباسمه]

المسأله مسأله وقت لا تحاتين
ومصيره يتعب أو بالأحرى يلهى عنج بحياته
اهووو حاليا فاضي فماعنده الا انتي
بس نصيحه حاولي تكسبينه لان بعدج عنه راح يزيد غيرته منج
ودايم ادعي بصلاتج ان ربي يصلح حاله ويسخره لج ولوالديه
حبيبتي انتي طموحه وربي يوفقج وتوصلين لقمه أهدافج
ويقر عينكم بصلاح اخوكم
وما ذلك على الله بعزيز ........... بس أنتي أحسني الظن بالله سبحانه​

 

[fulla 7elwa]

الله يفرج همج و يهدي اخوج

 

[صب القفشه]

لا حول و لا قوه الا بالله

الله يعينج يارب و يهديه

 

[هنـــد]

اول شي الله يعينج ويصبرج عليه

اخوج ليما الحين تفكيره طايش يبيله سنتين ويتعدل

في احد من ربعه قاعد يعقده من الدنيا واهله واتوقع قريب من عندكم

صدقيني الحجي معاه ضايع ماراح يسمع لكم ولا لابوج

الي عليج اتسوينه تدعين رب العالمين ( الدعاء يصنع المعجزات )

تشكين لرب العالمين الكلام الي ودج تقولينه لاخوج تدعين فيه الله ماراح يردج خايبه صدقيني

ادعي مره مرتين ثلاث ادعي بالسجود واخر الليل سهمه لا تخطئ واستغفري دايما وتصدقي بنية هداية اخوج لكم

جربيها لمدة اسبوع وشوفي اخوج شلون يتغير واستمري عالدعاء صدقيني راح تدعين لي ووصي امج وابوج يدعون له

والله يهديه لكم يارب

 

[سكوتي بذوقي]

اخوكِ مايبي يشتغل ولا مهتم بحياته

لأنه معتمد على الوالد

وواضح من كلامك إن الوالد مايقول له شي

وأكيد من يوم كان صغير متعود ياخذ كل اللي يبيه

يجيه اللي يبيه بدون تعب

ويوم كبر يبي يفرض رايه ويقول أنا رجال

ظنه الرجوله في تعذيب خواته والشك فيهم

تدرين ليش موسوس لأن له علاقات دايم اللي له علاقات يكون شكاك

الله يهديه يارب ويسخره لكم

ادعي له بالهدايه دايم

والإستغفار فيه فوائد عجيبه كثري من الإستغفار

موفقه يارب