احترت شسوي ؟

[قمولة]

السلام عليكم بنات
شلونكم حبايبي .؟؟؟
عندي مشكله وايد ماثره علي وعلى حياتي وتواصلي مع الناس
مو عارفه منوين ابدي
يليييت تساعدوني وما تستصغرون المشكله لانها وايد مضايقتني
كلنا ندري انه اساس التواصل بين الناس اهوه الكلام وكلما ارتقى اسلوب الانسان ترتقي علاقاته مع الناس
مادري ليش احيانا احس الناس تحتقرني وما يعاملوني مثل الباجي
او انهم يطالعوني بنضره غريبه
ودايمن الناس اول ما يتعرفون علي اكون شادتهم حيل ويبون يرافجوني فجاه اشوفهم موخرين عني
الزبده اني ما اعرف اسولف ! :/ واذا بتكلم لازم مليون الف بدليه وبالقصب يطلع الحجي مني وماعندي عفويه بالكلام
فافضل اني اضل ساكته وايد احسنلي
وما عندي كلش ثقه بالنفس
تواصلي وايد صعب مع الناس وقام ياثر هالشي فيني
ما احب اروح اماكن فيها تجمعات
واذا بتكلم او اقول شي بخاطري لازم اكون بس مع شخص قريب وايد مني جذي احس اني متطمنه واتكلم عدل مادري ليش !
طبعا من ناحيه الصداقه على الرغم من الي اعانيه الحمدلله في وايد ناس تحبني بس احسهم يملون من القعده معاي
وما الومهم ما عندي مواضيع واحس مادري شقول غير اني ساعات استهبل اذا مليت
وبالطلعه وايد امل
ما اطلع كلش مع امي لاني هم ما اعرف اكلمها :/
وعندي خجل زااايد حيييييييل زياره عاللزوم
وكل يوم افكر بهالموضوع تعبني جد
وما يلفت نضري بالشخص الي يدامي غير طريقه كلامه وسوالف احس حطيته مقياس حق الناس
وطبعا اي موقف ولو صغير حيل اي كلمه تنقال لي اقعد احللها جني مينونه افسر كلشي
حتا الاشيا التافهه
مادري احتاج دكتور نفسي ؟
يمكن في عوامل موثره
الاهل وايد شديدين ويعصبون على كل شي ويحاسبوني على كل كلمه وما يحبون ابدي رايي بشي من انا صغيره وفي وايد اشيااااا
احس قمت اشوف الدنيا كلها ممله ومالها معنى
ما استانس بشي
ومادري فيني تناقض مو طبيعي
ساعات اصير دييينه وايد ومرات اصير فري بس ما اهد صلاه
حتا بالدراسه مرات اصير من اشطر البنات واحيانا اتكيييسل واصير مهمله حيل وبنفس وبنفس السنه
ومن وايد نواحي
ما اشوف روحي حلوه معنه وايد ناس تمدح جمالي ولمن اطلع وايد تصيرلي مواقف المهم
تعبانه جد وودي اكتب اكثر من جذي بس ما اعرف اعبر عن نفسي
وما اعرف ادافع عن نفسي دايما حقي ماخوذ بسبب اني ما اتحجا
ووايد ناس تستهزا بهالشي فينني مثلن يقوولون انتي ما تعرفين تكلمين او تحجي عدل او ساعات لمن اتكلم محد يسمعني او يعطيني انتباه
بليييييييييييز بنات الكل يرد

 

[Tom ♥ Jerry]

.


اذا تقدرين تروحين دكتور نفسي روحي عشان تطورين ذاتج و تحافظين عليها
لا تبخلين على نفسسسج ..

هاذي نقطه ، النقطه الثانيه .. تعرفي على بنت مثلا وحده !
و سولفي و اخذي و روحي و تعالي وياها .. حتى لو تكون هالبنت اختج
او بنت خالتج او بنت عمج .. و بعدين شوي شوي اندمجي ويا البنات شوي شوي

كل شي شوي شوي ايي بالتدريج .. اما اذا تبين تصيرين اجتماعيه في يوم و ليله ااكيد مايصير ،
روحي الدورات لـ تطوير الذات و روحي جرير اشتريلج كتب تستفيدين منها
شلون تبدين بسالفه و تتكلمين بموضوع بدون توتر ..
هاذا كلا كتب ترا تنباع باي مكتبه كبيره ..

الله يوفقج :$

 

[واصله]

حبيبتي المشكله مثل ما قلتي باهلج ماعلموج من الصغر انج تبدين رايج بشي وهذا غلط طبعا
وانتي تقدرين تحاولين بدون دكتور حتى
مثلا زهبيلج سالفه صايره او حدث صاير او خبر وقوليه بيمعه رفيجاتج شدي انتباههم انتي فتحي مواضيع وخليهم يتناقشون معاج سالفه صايره اي شيييي وصدقيني مره على مره راح تتجراين وتصيرين احسن منهم
وسالفه البدليات هذي من الخجل الزايد
مافيج الا العافيه لاتحطين ببالج جذي

 

[Uou0Uo]

حبيبتي حاسة فيك حيل انا تقريبا مثلك ومستعدة اساعدك باللي تبين لاني ساعدت كثير بشهادتهم مو مدح لنفسي لاني مريت بهالتجربة
اللحين زادت ثقتي بنفسي احسن من اول صرت اقرا كتب بالمجال اللي احب بس عليك بهالفترة بحاجة وحدة ثقي بالله اولا واخرا ووكلي امرك له ودائما ادعي بكل وقت ان يجعل محبتك عندة فيقول للملائكة اني احب فلانا فاحبوة فتحبة الملائكة وينزل له القبول فالارض ثانيا رضى الناس غاية لاتدرك ولو بنجلس نرضي الناس بكلامنا وبافعالنا ماراح يرضون ولا انفسنا كمان بترضى علينا لاننا نتبع الناس اللي يحبك بيحبك ع طبيعتك بس طوري نفسك خذي نفس عميق لمن تتكلمين وقولي بنفسك انا واثقة من نفسي وقدراتي ودائما اي شي ينقصك مثل اهمال الدراسة قولي مع نفسك انا متفوقة عطي نفسك دافع ايجابي عكس اللي يصير من ذاتك وراح تتطورين مع الوقت حاجات كثيرة بس هذا اللي ءيحضرني مستعدة اكون معاك لحد ماترضين عن ذاتك تبين بالمنتدى تبين نتواصل خارج المنتدى انا مستعدة باللي يريحك اعتبريني وحدة من اهلك لبى قلبك

 

[OM-TURKY]

حبيبتي مافيج الا العافيه المشكله بالاهل الله يسامحهم مفروض من وانتوا صغار يهيئونكم ويتناقشون معاكم ويخلونكم اتعبرون ..

عموما اهممممم شييييي لازم تسوينه انج تقرين صدقيني القرايه بتفييييدح وايد اول شي بتثقفج بتساعدج بالكلام وباختيارج للكلمات..

اقري كتاب صغير بالبدايه بالميول اللي انتي حابتها او جرايد .. اي شي يطيح بيدج اقريه ..

ثاني شي لا طبيب نفسي ولا خرابيط كلش ماله معنى ،،، الموضوع بس يحتاج وقت وكل شي تدريجيا راح يتعدل ويتغير وضعج للافضل

اختاري الرفيجات الزينين راح يساعدونج وايد ،، او بنات عمج بنات خالج المهم اللي انتي ترتاحين معاهم..

دايما خلي يكون عندج ثقه بنفسج بالعكس مافيج الا العافيه بس انتي خلي المستحى الزايد شوي وتلحلحي كل امورج بتعدل

الله يوفقج

 

[قمر بيت أبوها]

تكلمي مع كل الناس حسب اهتماماتهم اطفال غني لهم اساليهم عن الرسوم المتحركه امدحي ملابسهم
والكبار اساليهم عن خلطات القهوه الطب العربي القديم وسوالف الجيره والاهل قصص تصير
والبنات اللي تحب المكياج بلشي معاها بنفس المجال واللي تحب الفلسفه تفلسفي عليها ههههههههه وربي البيت لتطلعين لشيخة المجلس يفقدونك كلهم
ومن ناحية الكلمات انا اشوف علي ثقافة الشخص لو انتي تتابعين برامج دعويه وحواريه وفكريه بيكون اسلوبك روعه
واذا انتي من النوع اللي يتابع افلام ومسلسلات اتوقع انك صامته اغلب وقتك
وانا اهم شي ثقافتي الشخصيه لان كلما تثقفت كلما حاسيت نفسي فاهمه الحياه والناس تقبل علي لاني شي متجدد هذا من تجربه شخصيه

 

[لمى الهاجري]

اهلج زرعوا فيج هالشي لانهم يحاسبونج على كل شي

 

[غراوي]

بعد عمري مشالله شزين اسلوبج كا كتبتي مشكلتج بكل وضوح وفهمناج
بالعكس انتي مافيج الا العافيه بس الطريقه الللي تربيتي عليها اهيا اللي خلتج جذي شوي مو واثقه بعمرج

اذا عندج استعداد تتغيرين يا تروحين لاستشاري نفسي يعطيج اسس المحادثه
او سوي اللي انا اسويه واستفدت منه

قلدي الناس
يعني اللي يعجبج باسلوبهم قلديه وطبقيه عليهم وعلي غيرهم

مثلا عجبتج طريقة ترحيب وحده قلديها بنفس طريقة الترحيب
اسلوبها طريقتها اقتبسيها وطبقيها لغيرها او معاها
مع الوقت بتشوفين نفسج اكتسبتي من الناس

احنا بالدنيا نكتسب من بعض الاساليب اللي تقوي علاقتنا بالبشر

خل اقولج عني شغله
انا كنت ماعرف ابدي حوار مع احد ولا اعرف ارحب باحد واحس نفسي ضايعه
قمت اشوف شنو يسوون الناس وشيقولون وقت الترحيب او وقت القعدات الحواريه واسوي نفسهم
ومع الايام صرت تعدل وضعي

 

[زهرة البرتقال]

ويييي حبيبتي فديتج انتي مثلي ما تكلم الا مع الناس الي واثقه فيهم انا بعد ماعندي صداقات غير اهلي وربع بنت خالتي اانا اول كنت ساكته وووما اتكلم واستحي بس حاليا صايرة طلقه بالسوالف ووووخف خجلي من الناس وسبب اني قمت اطلع من المحيط الاسري يعني انا صغيره كنت بيتوتيه درجه اولى وووما اطلع الا الزوارة الاهل او مع امي فقط ونادر ماطلع مناسبات او لمات مثل شاليه او ماغيره كنت مااحب هالسوالف بس من كبرت وفتحت عيني على الدنيا عدل وقمت اطلع وادخل مع البنات خالتي وربعهم قمت اجوف الناس قمت اسافر احس صارت فيني جرءه زياده يعني جفتي انا شخصيا ماعندي ربع ربعي ربع بنتات خالتي ،وازيدج من الشعر بيت كان كلش ماعندي ثقه بنفسي اي احد مثلا يقولي شي كان يضيق خلقي وامي تقولي اشفيج اقولها فلانه قالت جذيه قالتي امي كله والي اليوم انا حاطتها حلقه بأذني قالتلي الله يخليها يابنيتي الكلام الي يعجبج سمعيه واستانسي فيه اما الكلام الي مايعجبج حذفيه بحر البحر كبييييرياخذ ومايرد ومن يومها محد قام ياثر فيني

ياحبوبه اول شي لازم تكون فيج ثقه الي تستهزء فيج محتره منج اكيد انتي فيج شي وهي موقادره توصله ، وثانيا اقري كتب وثالثا طلعي سافري جوفي الدنيا مع اهلج

 

[گـحِـلْ |~]

الشيطان يوسوس لج ويكبر الموضوع

الموضوع بسيط حبي نفسج الناس تحبج