- إنضم
- 19 أبريل 2011
- المشاركات
- 2,430
- مستوى التفاعل
- 0
- النقاط
- 0
قبل كذا شهر ببرنامج ذا انسايدر Theinsider جابوا تغريدة لكيم كارديشان تقول فيها إنها تحس بتأنيب الضمير وتكره نفسها لما تنام وهي ماشالت الميك أب .
هنا مقالة فيها نفس الخبر:
حتى أنا ياكيم أحياناً أرجع من مناسبة أو عرس جداً تعبانة وأقول لنفسي بس بأتمدد شوي بعدين أنظف وجهي من الميك أب لكن أتناسى وأنام ، بالصباح تجيني الغلقة وأصير متنكدة طول اليوم أكره بقايا الماسكرا السايحه و الرمشة الطايحه من عيني وإلا الحبة اللي طلعت بوجهي لأن الفاونديشن متكدس ومسكر المسام إلين طلعت هالحبة تقول النجدة !
بصراحة أهم مرحلة من مراحل وضع المكياج هي لحظة إزالته لأن على أساسه راح تحددين العمر الافتراضي لبشرتك اللي ممكن بإهمالك تكبرينها عن عمرها الحقيقي.
كلنا نستخدم الميك اب عشان نبرز جمالنا لكن أكيد مانبيه يكون سبب في تلاشي هالجمال والحيوية ويصير المكياج حاجة و مو مجرد مكمل تجميلي .
هل هو سئ لهذي الدرجة .. يعني إني أنام وأنا مامسحت مكياجي ؟
ايه !
مساماتك راح تنسد .
في فترة الليل الجسم ينظف نفسه والخلايا تجدد نفسها وتصلحها ، بطبقات الميكياج انتي قاعدة توقفين هالعملية الحيوية الطبيعية اللي قاعده تصير بوجهك وبدل ماتصحين ووجهك منور ومنتعش وأثر الراحة باينة عليه ، تلقين كارثة !
البشرة هي عضو يتنفس ، ومهما كان مكياجك غالي ومن ماركات معروفة يظل هو مادة تغطي البشرة وتمنعها تتنفس بالتالي الغدد اللي بالبشرة ماراح تقدر تكمل مهمتها بافراز الأوساخ برا وراح تطلع لك البثور والدمامل.
غير كذا بشرتك راح تجف وبيطلع معك بدري خطوط الفم والتجاعيد وأنتي لسا بالعشرين .
هو سئ ، سئ ، سئ جداً لعيونك .
أكثر شي ممكن يتضرر نتيجة النوم بالمكياج هو عيونك . الجلد حول العين جدا رقيق ويجف بسهولة . النوم بالمكياج يجففه زيادة ويطلع التجاعيد ويسبب شيخوخة مبكرة .
مو بس كذا الماسكرا لو خليتيها تتعب الرموش وتسبب تساقطها نفس الشي بالنسبة للحواجب .
أما الحكل ممكن يدخل بالعين ويسبب احمرارها وتهيجها وممكن عينك تصير تدمع بشكل مزعج أو العكس تسبب جفافها وممكن تلتهب بعيد الشر عن الجميع .
تصبغ البشرة .
من الأثار البعيدة المدى من تكدس المكياج فترة طويلة على البشرة هو تغير لون اللي حول الشفايف والعيون ، وظهور التصبغات والبقع اللي راح تضيف سنوات إلى عمرك .
حتى مخدتج راح تتوسخ .!
راح تكون المخدة بيئة خصبة تتكاثر فيها الجراثيم بشكل مرعب بالتالي بتتعرضين لخطر الإصابة بالعدوى والحساسية .
شلون أمسح مكياجي ؟
1- أنا أبدأ بالعين أشوفها أهم شي زي ماقلنا العيون أكثر شي حساس بالوجه ويجف بسرعة من الكحل والشادو ، أنا أستخدم مزيل مكياج خاص بالعين من ميك أب فور ايفير أول واحد ع اليمين بالصورة لونه أزرق، يعجبني لأنه يشيل الكحل الواتر بروف "ضد الماي" مهما كان ثابت بسرعة و بنفس الوقت لطيف ع العين أفكر أشتري مستقبلا حجم أكبر أتوقع انه توفيري أكثر .
2- أمسح الحمره خصوصا لو كان من النوع اللي ثباته قوي ويدوم ساعات لأنه يتكون من وصفه ممكن تسبب أسوأ دمار للشفايف، أحط نقطة فازلين وأفركها بلطف بالمنديل .
3- أغسل وجهي بغسول لطيف ، هالخطوة تقريبا راح تشيل معظم المكياج ، أنا أستخدم غسول مقشر لطيف من نيتروجينا التركيبة الجديدة اللي طلعوها مره اعجبتني لأن حبيباتها ناعمه ع الوجه .
4- أخيراً أحط اللوشن المزيل للمكياج من ميك أب فور ايفر (لونه أبيض بالصورة) مكتوب عليه بعناية الحليب أي شي باقي من المكياج راح يبين لي بالقطنة وبنفس الوقت يرطب لي بشرتي يعني 2 في واحد مزيل مكياج ومرطب.
مزيلات ميكياج طبيعية ورخيصة ومتوفرة بكل بيت .
1- زيت الأطفال ، بديل ممتاز لمزيلات المكياج الكيميائية ولطيف جدا ع البشرة وهذا يخليه مثالي لإزالة مكياج العين .
-
2- زيت الزيتون ، مزيل مكياج طبيعي رائع والحلو فيه انه مرطب بنفس الوقت .. شخصياً أحب أخلطة بشوية ماي لحاله أحسه ثقيل أجيب علبة فاضية احط نصها زيت زيتون وربعها أو أوقل من الربع ماي ، بعدين بقطنة أوزعها ع الوجه ماعدا الشفايف والعيون وأخليها كم دقيقة المكياج بيتحلل ويتفكك بعدها أغسل وجهي .
3- الحليب أو الروب ، أكثر مزيل مكياج طبيعي متفق عليه عالمياً، غمسي القطنة فيه ومرريه على وجهك خليه 2 – 3 دقايق واغسليه .
تجاربكم إنتم !
- شنو طريقتكم بازالة المكياج ؟
- فيه منتجات معينة حبيتوها ؟
- وبصراحة قولي سبق نمتي وتركتي المكياج على وجهج؟
بالنهاية أتمنى لكم بشرة صحية ونوم هني
