اراده حديديه مع passion لرجيم هلا فبراير

[عليـاء]

هههههههههههههههههههههههه إحساس فديتج
اي يالله روحي امشي وحاولي بعد تركضين 3 دقايق
يارب يارب تصيرين مثلها

 

[عليـاء]

بنات ابي اطلب منكم طلب
خلونا نوعد بعض أن نستمر مع بعض ونسوي دايت ونشجع بعض
لأن لما تدخلين تجمع تتحمسين وتنزلين وفجأة بعد فترة يقل العدد ويقل لين تبقين بنفسج في التجمع
فعلى الأقل نستمر حتى لو شفنا في ناس ماجاوا او راحوا
< بابجي ههههههههه

 

[passion.666]

بسم الله الرحمن الرحيم

شلونكم يابنات
علياااااااااااااااااااااااااااااااااااااااااااااء اشفيج ارادتج ضعيفه
انت نزلتي كيلو لو نازله اكثر يمكن اتخربطين يوم واحد خلي هالأسبوع يمر على خير

بنات انا اليوم داشه معاكم بالرجيم وان شاءالله راح اصور يومياتي ونزلهم اخر اليوم بالليل واذا ما شاركت وبنفس اليوم انزل يومياتي اليوم اللي بعده
الصراحه كلش ما عندي وقت للحين ما عندي خدامه
وعيالي مدارس ودراسه وواجبات
والوالده بالمستشفى بالعنايه وان شاءالله بعد يومين يسولها قصطره
فاغلب الوقات زوجي اييب الغدى من بره من المطاعم وخايفه يكون وزني زايد
فبلشت من اليوم وانشاءالله راح اشتري الجهاز المشي ومن يوم لاحد ابلش امشي
وبالنسبه للمساج انطر لما توصل خدامتي
انا نازله معاكم بيومياتي علشان اشجعكم
فرجاء كل الرجا الأتزام
وان شاءالله راح امدد لنهاية شهر 3
وراح اتكون القوانين مختلفه عن شهر 2
يوم الميزان راح يكون 28\2 وراح يكون نفس اليوم
فريييييييييييييييييييييييييييييييي خربطو على كيفكم
بس قبل التخربط اوزني بعدين خربطي
وراح انبلش اول شهر 3 يعني يوم الأثنين
ورااح يكون الميزان كل اسبوع
والنظام الرجيم كل اسبوع غير علشان ما تحسون بالملل
اللي تبي اتواصل معاي
اتنزل اسمها
وانا بانتظاركم​

 

[ღ°° دلوعـ دنيتي ـة °°ღ]

باشن

ياهلا وغلا

وحياك معنا بأراده وعزيمه

قويه

وحمدالله على سلامة الوالده وفالها العافيه

وأكيد أنا مستمر معك

 

[مدرسة طفشانة]

هلا با شن
حبيبتي حالتج نفس حالتي
ما عندي خدامة وتعبانة من السفر والغدا والعشا كله من برا
قاعده احاول اخفف بس مادري خايفة يزيد وزني
بس ان شاء الله خير يبيلي اضبط اموري عشان الريجيم
والله يعين

 

[عليـاء]

هلا باشن
الله يعينج ياقلبي وسلامتها الوالدة تطلع بالسلامة يارب
ان شاء الله ماراح اخربط واستمر وارادتي تكون قوية
وان شاء الله مستمرين معاج في شهر 3 ونوزن يوم 28 ويكون وزنا نازل يارب

مدرسة
الله يعينج يارب

بالعافية أكلكم

 

[كيكه توفي]

السلام عليكم

باشن الله يقوم امج بالسلامه يارب

وانا بكمل معاج بشهر 3

وشفينا كلنا ماعندنا خدم حتن احنا ماعندنا خدم بس انا مو ام لوول بس ماكو غدا كل يوم يا من مطعم اهلي يطلبون وانا اطالعهم واتحسر او يدتي اتيبلنا هالعيوش اللي ريحتها تعذبني ابيي بس ماعليه الاكل مو طاير صارلي دهر مشتهيه سلطات بس مالي خلق اقصص ومادري شنو صج لازم خدامه وغير جذي كرهت الهمبرجر دياي ولحم والتونا بس ملييت من طعهم حتن ريحتهم كرهتها بس ميخالف اكل توست او بيض او كورنفليكس او روب هالشغلات للحين ما ملييت منها واليوم عقب ماقريت ردودكم شجعتوني نبي جذي كل وحده تشجع الثانيه وانشالله اليوم ماشيه اوكي بس اقول يومي بليل احسن كلا مره وحده

 

[سيلينا]

قوه

اي صراحه تجمعنا حده يشجع انا معاكم لي شهر 3 ان شاء الله

الحمدالله يومي لحد الان ممتاز

الصبح شريت ماااي وشاي اخضر مع زنجبيل ومرميه
وتريقت شريحتين اناناس + 3 حبات فراوله

وتغديت ساندويش تيركي من دايت كير ( 180 كالوري ) + روب صغير خالي الدسم (50 كالوري ) + تمرتين

وبس الحمدالله طبعا اليوم معزومه على عشا بس ماراح اكل ان شاء الله بضيع السالفه احوس معاهم من غير لا اكل

اشووفكم على خير بليل لي رديت من العشا

 

[miss_solitaire]

أنا بعد معاكم لي شهر 3

و باشن الله يقوم امج بالسلامه

*************

بالنسبة لبقية يومي أمس

أمس بليل راحت علي نومه

و ما رحت للنادي و لا تعشيت

و بالنسبة لليوم

فتح الريج بعصير كوكتيل كي دي دي

و بعدين رحت للحصتين الأولى و الثانية

و بالثالثة

اتريقت كورن فليكس دايت و حليب خالي الدسم

و رحت للرابعه و الخامسة

و السادسة صلحت الدفاتر

و الفرصة خذيت سناك فول سوداني و وراه عصير جوافه

و رديت البيت على الساعه وحده و ربع

و اتغديت 2 سمك زبيدي مع سلطه

ووراه حليت بعنقود عنب

و حبة فراوله

و السناك الحين ( الجوز )

و انشاء الله اروووح النادي اليوم

و عشاي امفكره اطلبلي قطع دجاج من مطعم هيرفي

 

[miss_solitaire]

بناااات يوم الجمعه بخليه فري

بخربط خربطه

معزووومه على بوفيه

يعني نو واي اقاوم

اشرايكم

 

[عليـاء]

بالعافية أكلكم يابنات
ويالله قووا الإرادة وبنوصل للهدف إن شاء الله .

--

يومياتي
الريوق
- عصير برتقال وليمون وبقدونس
- ربع خبزة
- لبنة دايت
- طماطة

الغداء
- تبولة
- 1 كفتة لحم
- 3 ملاعق شاورما
- كولا دايت

السناك
- بسكوتة وحدة
- شاي اعشاب وزنجبيل

العشاء
- 1 كيوي
- 2 شاي زنجبيل واخضر .

ومشيت نصف ساعة
وسويت تمارين معدة وخصر ويد

 

[miss_solitaire]

توني راده من النادي

لعبت رياضة لمدة ساعة و 10 دقائق

أحس اني منهلكة

 

[miss_solitaire]

توني راده من النادي

لعبت رياضة لمدة ساعة و 10 دقائق

أحس اني منهلكة

 

[كيكه توفي]

السلام عليكم
يومي

الريوق : شريحتين توست مع حلوم (قليل الدسم)وزعتر وزيتون + جاي

غدا : ماكو

العصر : كليت قيماته وحده

العشا : روب

وبس

 

[ღ°° دلوعـ دنيتي ـة °°ღ]

مساء الخير

الغداء

تونه سلطه

عقبه شربت قرفه

العشاء

لحمه وسلطه

عقبها شاي أخضر

مشيت ساعه

ورقصت نصف ساعه

 

[احساس الغلا]

علياء
هههههههههههههههههههههههه إحساس فديتج
اي يالله روحي امشي وحاولي بعد تركضين 3 دقايق
يارب يارب تصيرين مثلها

ههههههههههه
لاتوصين من امس وانا هالكه عمري بالمشي

علياء
بنات ابي اطلب منكم طلب
خلونا نوعد بعض أن نستمر مع بعض ونسوي دايت ونشجع بعض
لأن لما تدخلين تجمع تتحمسين وتنزلين وفجأة بعد فترة يقل العدد ويقل لين تبقين بنفسج في التجمع
فعلى الأقل نستمر حتى لو شفنا في ناس ماجاوا او راحوا
< بابجي ههههههههه

صح كلاااااااامج
وانا معاكم قلباً وقالباً هههههههههههه
مارااااح اخليكم لما تملون مني


باشن
انا اول المشاركين
وياااااااارب يقوم الوالده بالسلامه
ويعطيها طولة العمر ان شاء الله
خطاكم السوء ياعين ابوي

كيكة توفي
وشفينا كلنا ماعندنا خدم حتن احنا ماعندنا خدم بس انا مو ام لوول بس ماكو غدا كل يوم يا من مطعم اهلي يطلبون وانا اطالعهم واتحسر او يدتي اتيبلنا هالعيوش اللي ريحتها تعذبني ابيي بس ماعليه الاكل مو طاير صارلي دهر مشتهيه سلطات بس مالي خلق اقصص ومادري شنو صج لازم خدامه وغير جذي كرهت الهمبرجر دياي ولحم والتونا بس ملييت من طعهم حتن ريحتهم كرهتها بس ميخالف اكل توست او بيض او كورنفليكس او روب هالشغلات للحين ما ملييت منها واليوم عقب ماقريت ردودكم شجعتوني نبي جذي كل وحده تشجع الثانيه وانشالله اليوم ماشيه اوكي بس اقول يومي بليل احسن كلا مره وحده

احسن ماكو خدم
عشان تشتغلين وتحركين عمرج
الحركه بركه
مو تبين تضعفين ؟
يالله فردي عضلاتج واشتغلي هههههههههههه
بالتوفيق ياعمري
وشدي حيلج لاتضعف ارادتج
وحطي جدام عيوووووووونج الجسم الحلوووووووووو والرشاقه






يوميااتي :
اليوم قعدت متأخر كـ العاده
وكان عشاي دايت من c bon



صارلي فتره اكل وجبه وحده باليوم
ومرتاحه جذي
والحمد الله


وأحلام سعيده ياللي نااااااااامو :eh_s(17):

 

[ღ°° دلوعـ دنيتي ـة °°ღ]

هذا وزني لليوم لأني مسجله بقروب وكل أربعاء نزل الوزن

 

[عليـاء]

صباح الخير بنوتات
بالعافية أكلكم ياحلوات

احساس
زين تسوين وترى موضوع الوجبة الوحدة من فترة شفت
وحدة كانت دبة بشكل غير معقول والحين ماشاء الله صاير جسمها روعة
تقول انها كانت بس تاكل وجبة وحدة باليوم وتاكل اللي تبي بس في هالوجبة وتمشي ساعة

بنوتة
مبروك النزول الحمدلله فديتج نزلتي الوزن اللي كسبتيه
يارب تنزلين اكثر بعد

خاطري اسوي ريجيم السوائل ادري انه متعب ومستحمله
بس بخاطري تكون عندي ارداة واسوي لو كم يوم

 

[سيلينا]

صباح الخير

باشن

الله يقوم امج بالسلامه يااااارب
ومعاج ان شاء الله لي شهر 3
وناطرين يومياتج معانا حبيبتي

علياء
معاج ان نستمر بحيل الله ما نترك هالتجمع
مستمرين ان شاء الله

بنوته الطايف

الف مبروووك حبيبتي النزول واستمري مشاء الله
هالنظام ناسبج ان شاء الله توصلين للوزن المطلوب باقرب وقت بصحه وعافيه

احساس الغلا

الله يتمم عليج ونظام الوجبه الوحده انا قبل ضعفت عليه
مع اني اكل وجبات من كنتاكي وماكدونالدز واحلي بعد وضعفت
موفقه يارب

مس سوليتير

الله يوفقج مشاء الله نظامج وروحه النادي ممتازين استمري
والله ينزل وزنج بصحه وعافيه

كيكه توفي

موفقه يارب حيل بديتي تقللين وجباااتج صح ؟
الله يتمم عليج​

 

[عليـاء]

بنات شلونكم
يارب بخير

سيلينا
هلا والله
يارب نستمر على طول

- أنا معزومة على الغدا باحاول أكل عادي
والعشا باخليه عصير كيوي وانانس ان شاء الله

- امس رحت اتش اند ام يااشياء عنددهم روعة واسعارهم حلوة مو غالية
بس الا شياء اللي جايبينها تشبة الماركات الكبيرة ويبيلها اجسام سمبتيك هههههههههه
الله ينولنا وناخد رقم 8 ههههههههههههه