ارجو المساعده

[smileq8]

السلام عليكم

انا حابه اطرح مشكلتي واتمنى ان القى حل او رد من احد الخوات اللي تعرضت لنفس مشكلتي


انا متزوجه من 3 سنين وللاسف للحين ماحملت...
عالجت بطبيب خاص... وكان هدفهم كله الابر التفجيريه والكلومين...

لكن احب اوضح ان عندي خلل بهرموناتي بااختصار دورتي مو منتظمه من قبل لااتزوج
يعني كل كم شهر تجي مره واذا جت ماتطول...


لما عالجت بطبيب خاص واخذت حبوب وابر صار جسمي ينتفخ وطبعا النفسيه صفر دائما...

لكن بعدها تعبت نفسيتي من الابر لكن العلاج دام سنه كامله...فقررت ان اسافر الى لندن للفحوصات... فكانت تحاليلي سليمه انا وزوجي..لكن الحل الوحيد تخفيف الوزن....

فسويت رجيم قاسي...لكن استمرت هالمشكله سنه وماكو حمل....

بعدها قررت اسوي تحاليل بمستوصف عادي ... وطلعت معاي قده وقالي الدكتور انها تمنع الحمل...وحلها تخفيف الوزن ومع هذا عطاني حبوب وكانت بدايتها 3 حبات باليوم والحمدلله صارلي اكثر من ثلاث شهور والحمدلله الحين وصلت لنص حبه وقالي نسبت القده خافه حيل وبهالامر الحمل سهل لان تعتبر راحت القده....

لكن للاسف ماتعدلت الدوره...والمفروض دام القده تخف المفروض على الاقل تنزل الدوره حتى لو متااخره نص شهر...

بعدها قررت انا وزوجي اني اعالج بطبيب خاص....للمره الثانيه

فسويت تحاليل وطلعت سليمه ونصحتني ماترك علاج القده...
عطتني حبوب

glucophage 500 mg مرتين باليوم
Duphaston 10mg لمده 10 ايام

فهذا يعتبر ثاني شهر لي اخذ هذا العلاج ومازلت مستمره على الرجيم....


خواتي انا طرحت لكم مشكلتي وابي ردود بالفعل ترحيني... لاني جد تعبت نفسيا وخصوصا كلام اهل زوجي يتعبني حيل..واحس بزوجي وانتظاره وفقدان الامل لان للاسف كل ماسوي علاج ومايصير شئ افقد الامل.....
ابي اعرف هالعلاج الاخير في احد جربه وكانت له نتيجه ولا لا


اتمنى القى ردود ياخواتي

 

[ام عبدالله زوزو]

الله يرزقك يلي تتمنه انت وزوجك يارب العالمين

 

[Q8_QT]

ماعندي فكرة حبيبتي بس حبيت أدعيلج
الله يرزقجبالذرية الصالحة يارب

 

[دنياالوله]

انا نفسج بالضبط
بس قالي الدكتور المشي باليوم مو اقل من ساعه مع الرجيم
عشان المبيض مايصير فيه كسل والله كريم

 

[شنوووفه]

ياحبيبتي كل شي بايد الله انا اختي فيها خموول بالغده وماشالله تحمل عادي بس الدكتوره تزيدلها جرعه حبوب الغده لمن تحمل علشان البيبي ادعي ربج وانشالله مايقصر وبيرزقج

 

[الزيـــــ^^ـــــن]

مادري والله بس استمري علا علاجج
خففي وزنج
واهم شي شربي برقدووووووووش
تلاقينه عند العويد علا شكل اكياس شاي
خليج مستمره ثلاث شهور ودورتج بتنتظم ان شاءالله

 

[ياحُبِي لِلكويت]

رفع لعيوونج .. وان شاءالله ربي يرزقج انتي وخواتج المحرومات اللهم امين ,, احتسبي الاجر الشفى بيد رب العالمين

 

[سعودية بالكويت]

أسأل الله العظيم الحي القيوم رب العرش الكريم​

أن يشفيك ويعدل هرموناتك ويرزقك الحمل التام​

من غير زيادة ولانقصان​

بالنسبة للحبوب الأولى الجلوكوفاج أنا أستخدمها لي​

سنة الله يشفيني وهذي أخذها للتكيس حبيتين باليوم مايضر​

طول أستخدامها حتى لو حملت لأنها بعد تساعد على تخفيف الوزن​

بشكل كبير​

أما الحبوب الثانية الدوفاستون أخذها بعد الأبرة التفجيرية بيومين​

مدة عشر أيام أو إذا سويت تلقيح لأنها إذا فيه حمل تثبته وإذا مافيه​

تنزل الدورة وبكذا تساعد على تنظيمها بوقتها​

اللهم أشفها وأرزقها وفرج همها يارحمن يارحيم​

أتمنى أكون أفدتك وأعذريني عالأطالة حبيبتي​

 

[معالجة نساء]

رفع لعيونج

 

[مآزلت آنتظر]

الله يرزقج يااارب ..ويفرح قلبج عااااجلا غير آجل ..

إذا كنتي مترددة او خايفة من اي علاج وتبين تبلشين فيه ..

أستخيري وتوكلي على الله (فما خاب من استخار ) ( ومن يتوكل على الله فهو حسبه )

 

[ابدا يالغالي مانساك]

حبيبتي انتي الحين
خلج علي علاج الغده
ولا راحت الحمد لله لان لها سبب في زيادة الوزن
وعاد انتي شلي من بالج فكرة الحمل
ادري صعبه وماتدقدرين لاكن حاولي تلهين
نفسج
وعالجي دورتج
اهم شي تكون منتضمه منتضمه
عشان تبويضج لاكن منتضم كل شهر
يكون فيه حمل ان شالله يارب
وحافضي علي البردقوش 3 مرات باليوم
وستمري علي عسل العويد
لتنشيط المبايض
وابتعدي عن الكاكاوات
والدهوووون قد ماتقدرين وانتي لارجعتي عند دكتور
خلج عند واحدويكون شاااااطر ويعرف مشكلتج شنو بالضبط ويعالجج
ويرب يرزقناااااااااااا اجمعين يارب

 

[مواصله]

لاتحاتين ياعمري امورج ان شاءالله سهله وبسيطه

الغده ماتمنع الحمل بس ممكن تأثر عليها انتي انتضمي عالعلاج ومامنها خوف

-معاي غده من 10 سنين-


واذا تحاليلكم زينه اثنيناتكم مابيدكم الا انكم تطلبون الله وتدعونه

وان شاءالله مايردكم خايبين وبيرزقكم الذريه الصالحه وتقر عينكم بشوفتهم


اقري قران وقومي الليل وتصدقي ونذري وخلي املج وايمانج بالله شديد

 

[مسك وورد]

جربي تاخذين بردقووش

 

[smileq8]

مشكورين ياخواتي على الردود .... بصراحه كلامكم ريحني وايد...
وانا والله مستمره بعلاجي الخاص والقده

بس عندي سؤال واكيد انتو افهم مني...

اذا وانا اخذ ال

glucophage 500 mg مرتين باليوم
Duphaston 10mg لمده 10 ايام


شلون تكون طريقت الجماع يعني لازم يوميا او تكرر العمليه اكثر من مره او اكون عاديه يعني كل كم يوم او يوم ويوم؟

 

[جديده 1]

اختي انتي ماشيه على الطريق السليم .. لازن تضعفين عشان ينشط عندج المبيض .. الجماع لازم بأيام التبويض يعني من 14 يوم من بدايه الدوره .. جربي عشبه القشعه هي نفسها عشبه المدينه بالدوره يقولون ممتازه تنظف الرحم و تنشط المبايض سألي العطار عن طريقتها .. و سوي تحليل الصبغه حتى تتاكدين ان قنوات فالوب مافيها سدد لان لو فيها سدد ماتحملين طبيعي لازم طفل انابيب .. وشوفي توقيعي يمكن يفيدج .. موفقه يارب

 

[smileq8]

اختي جديده 1
اولا اشكرج يالغلا على الرد...
انا دائما اسوي تحاليل لكن عمرهم ماقالو لي ان عندي تسدد...لكن
قالت لي الدكتوره الخاصه بعد السونار الداخلي ان الله يخلق الارحما شكلين وعن امراه لاامره تختلف في امراه رحمها سيده وفي لا وانا من اللي رحمهم مو سيده

وقالت لي بعد الجماع لازم انام على جنب او على بطني..

وبصراحه... المشكله ان بالفعل اعاني من هذا الموضوع .... ومابي ابتدي بمرحله الطفل الانابيب لان انا احس اني مو بمرحله اني ابتدي هالخطوه لان للحين بدري عليها
بااختصار اللي يسوون الطفل الانابيب اللي متزوجين اكثر من 5 سنين مو انا بحالتي 3 سنين

والناس تسوي هالعمليه لان فيهم خلل بهرمونات الزوجه او خلل بالرجل...

لكن انا الحمدلله مافيني شئ ولازوي وادري ان اللي فيني يبيله مجرد وقت بااختصار للحين ربي ماكتب لي اني احمل..

لكن انا تعبت واحس ان علاجي صاير مايفيد لان النفسيه صارت تتعب...

 

[مواصله]

الجماع يصير بيوم التبويض وهو مابين يوم12-18من الدوره ومو شرط كل يوم..خليها يوم وترك

 

[مزنة]

اولا الافضل لابد يكون الجماع بطريقة منتظمة هذا الافضل

ولابد توضحي كم كمية السائل المنوى الخارج من ذكر زوجك لابد يكون كميتة كبيرة ليحصل الحمل

وهذا ماعندي

 

[جديده 1]

اختي كلامج سليم بس في نقطه غلط .. الانابيب مو شرط لها وقت معين .. الانابيب تتسوى اما لأشخاص مستعيلين للعيال .. أو مايقدرون ينجبون الا بالطريقه هذي .. بخصوص تحليل الصبغه اهو تحليل يتسوى اما بتخدير او بدونه و يفضل بتخدير و تاخذين مضاد حيوي بعده و التحليل هو يحقنون المبيض بماده سائله و يسوون اشعه و يشوفون الماده هذي ماشيه بقنوات فالوب ولا لا .. اذا ماشيه فإنتي اوكي .. اما اذا مامشت الماده بقناه وحده ومشت بالثانيه فهذا معناه انج تقدرين تحملين بمبيض واحد يعني شهر احتمال تحملين و شهر مستحيل تحملين و ماراح تعرفين اي واحد فيهم دوره لان نزول البويضه يكون عشوائي .. اما السدد بالقناتين فمالج الا طفل انابيب او عمليه فتح القناتين من السدد و هذا يعتمد لو الالتصاقات ضعيفه ممكن تنفتح اما الشديده او الخلقيه فمايصير و احيانا سبحان الله في بنات فيه سدد و من يسوون التحليل الماده السائله تفتح القناه لان الالتصاقات تكون خفيفه .. و التحليل اسمه تحليل الصبغه و يكلف بالخاص حوالي 80 دينار بدون تخدير و 110 مع تخدير و اذا ماسويتيه ضروري تسوينه و ان شاء الله مافيج الا العافيه بس حبيت احطج بالصوره .

 

[smileq8]

اشكركم خواتي على الردود...وادري طولتها بأسلتي ..

انا وزوجي قررنا اذا الله مارزقنا هالشهرين ... بسوي طفل انابيب

بس بستفسر منكم وين تنصحوني اسويها بأي مستشفى... وكم العمليه تكلفني هي والعلاج ...

ارجو اللي سوت العمليه او عندها فكره تقولي... وكم تاخذ ورى العمليه على الحمل...

انتظر ردودكم ..وعسى الله يرزق كل محروووومه