استفسار عن قائمه الشرف بجامعة الكويت

[fri2010]

السلام عليكم

اشلونكم عساكم بخير

بشرونا عل القريدات ان شاء الله زينه

ماخذين صيفي والا مسافرين :gathering:

ايشرايكم بهالتيرم اشلون كان معاكم

المهم بغيت استفسر عن شغله واهيا مرتبة الشرف

الكورس اللي طاف كان معدلي 3 نقاط و7 اعشار

وحاطين لي بالبوكس نعم يم قائمه الشرف حلو؟

وغير جذي سامحين لي اني اسجل بسبع مواد!!!

هالكورس معدلي العام صار 3.15

وهم قائمه الشرف نعم

فبغيت اسأل قائمه الشرف على اي اساس؟

قالو لي على المعدل الفصلي وان لازم يكون من 3.50 ورايح

والمكافئه اللي اهيا 250 دينار لازم قائمه الشرف بالفصلين

الحين ابي اعرف صحيح هالكلام والا لأ وشنو الصح؟

يعطيكم العافيه

 

[الغدق]

انا اللي سمعته واللي اعرفه هالمكافأة يصرفونها
اللي يكون معدلهم الفصلي 4نقاط
وغيره والله مادري

 

[fri2010]

اوووله 4 نقاط لازم!!! يعني لازم اسطر كل المواد a لوووول

شكرا عل المرووور

 

[~.ąvȍƈaȚ.~]

انا بعد ابي الجواب

بس انا الكورس اللي طاف ما كنت على قائمة الشرف كنت 3 نقاط

بس هالكورس رفعت روحي وايد ماشالله

فبليز اللي تعرف الجواب ختقول

 

[فجــر]

اي بلييز وانا بعد ابي اعرف جم لازم يكون المعدل الفصلي والعام حق التفقوق وعلى اي اساس يعطوون المكافاءه التفوق شنو شروطها ؟


اب

اب

يليت اللي تعرف تفيدنا

 

[Q8yaaaa]

بنات شلون نظام الدرجات يعني مثلا سنه اولى انا مزفته ومعدلي نازل وسنه ثانيه رفعته اقدر سنه ثالثه ارفعه حييل واصير مع المتفوقين يعني على طول مرتفع لين اتخرج لان دايما يقولولي المواد اللي خذيتهم سنه اولى وماجبت فيهم قريدات حلوه راح اتاثر لما اتخرج بعدين
فهموووني الموضوووع كله بليييز<<<<فلم

 

[بدلية]

انزين الي معدلها 4 نقاط تنزل لها المكافاة ؟؟

والا لازم اكو شروط ثانية مثل عدد الوحدات المجتازة وجذي

 

[~.ąvȍƈaȚ.~]

بسم الله الرحمن الرحيم

شروط و معايير تكريم أوائل الطلبة المتفوقين وفقا لقرار وزير التربية و وزير التعليم العالي الرئيس الأعلى للجامعه رقم ( 24 ) بتاريخ 22\6\1428 هـ الموافق 7\7\2007 بالائحه التنفيذية للقانون رقم (10) لسنة 1995 م المعدل بالقانون رقم (34) لسنة 2004 م و القانون رقم (9) لسنة 2007 م بشأن مكافآت الطلبة بجامعه الكويت و الهيئة العامة للتعليم التطبيقي و التدريب ..



1- أن يكون الطالب كويتي الجنسية او من صدر في شأنهم قرار بمعاملتهم معاملة الكويتيين و أبناء الكويتيات ..

2- ألا يقل المعدل العام للطالب عن 3.5 نقطة كحد أدنى من سلم الاربع نقاط ، و تتم المفاضلة بين الطلبة الحاصلين على معدلات أعلى ، و في حالة عدم توفر شرط المعدل العام في أي من الاقسام العلمية يتم تكريم بديل من بين الحاصلين على أعلى معدل في الكلية أو القسم بما لا يقل عن 3 نقاط ..

3- ألا تقل عدد الوحدات المجتازة عن 45 وحدة دراسية ..

4- أن يكون مجموع الوحدات الدراسية المسجلة في التخصص في الفصلين الدراسيين للعام الذي يتم التكريم عنه 30 وحدة دراسية و في ذات التخصص ..

5- أن يكون الطالب مقيدا بالجامعه و لن يتخرج في نهاية العام الذي يتم التكريم عنه ..

6- ان تكون المفاضله بين الطلبة في حالة التساوي بالمعدل العام على أساس الرقم المكافئ ..

7- عند التساوي في الرقم المكافئ ، تتم المفاضلة بين الطلبة وفقا لما يأتي :

- اجتياز الطالب فصول دراسية اكثر ..
- الطالب الأكثر إيجابية في الأنشطة الطلابية الجامعية ..
- الطالب الذي يتمتع بسمعه طيبة في الكلية ..
- الطالب الاصغر سنا ..

8- تمنح مكافأة التفوق لطالبين من كل قسم او برنامج او تخصص فيما عدا كليات الطب و الصيدله و طب الاسنان و العلوم الطبية المساعده و الحقوق فيتم اختيار العشرة الأوائل من كل كلية ..

9- تصرف مكافأة التفوق لمدة 12 شهرا في كل عام دراسي تبدأ من شهر سبتمبر من كل عام و تنتهي في اواخر اغسطس من العام التالي ..

10 - تشجيعا من الإدارة الجامعية لأوائل الطلبة المتفوقين من غير الكويتيين علميا و حثهم على مواصلة التفوق ، يتم تكريم طالب واحد فقط من من كل قسم او برنامج او تخصص بالكلية ( بمنحة شهادة تقدير و درع التفوق ) وفقا للشروط المذكورة أعلاه على ان لا يقل معدله العام عن 3.5 نقطة و أن لا يوجد طالب كويتي او من صدر قرار بمعاملته معاملة الكويتيين و أبناء الكويتيات أعلى منه في المعدل العام لم يتم تكريمه لاحتلاله المرتبة الثالثه ..

 

[no0oneta]

عشان يحطون اسمج بقائمة الشرف لازم المعدل العام يكون 3.50 و فوووق

ومكافأة مافي حدهم جذاااابين ياخذون احسن 2 من كل قسم ويعطونهم 1200 دينار

وباجي المتفوقين طل بوجيهم يعطونهم شي

جامعة الكويت وصل على النبي

 

[fri2010]

بس ليش حاطيني بقائمه الشرف يعني زينه!!!؟

واشحقا اسجل 7 مواد؟

 

[no0oneta]

ماعليج من اللي يكتبونه السستم مخرف

كل الاقسام تبدي قائمة الشرف عندها من 3.50

 

[fri2010]

انا اتكلم عن قائمه الشرف مو التفوق!!!

وبعدين اشحقا حاطين كلمه نعم مع قائمه الشرف

وليش مخليني اسجل 7 مواد!

 

[no0oneta]

حبيبتي قائمة الشرف قلت لج لازم نسبتج 90% يعني 3.50

وياما بنات حاطين لهم بالمربع صح على قائمة الشرف واهما نقطتين بس يعني السستم مخرف

وعلى سالفة 7 مواد هاذي مادري عاد

اتأكدي كلامي صح انا ما اتكلم من فراغ انا بقائمة الشرف وكل البنات اللي بقائمة الشرف ما تنزل معدلاتهم عن 3.50

والمكافأه مافي بس يعطون لاحسن 2 بالقسم ما يعترفون بالباجي

 

[فجر Q8]

حبيبتي قائمه الشرف مالها شغل بالمعدل العام

وهذا نص ماخذتها من لوائح موجوده بموقع جامعة الكويت

كيف يمكن أن يضاف اسم الطالب إلى لائحة الشرف؟

يوضع اسم الطالب على لوحة شرف الجامعة في أي فصل ( عدا الفصل الصيفي ) يحصل فيه على معدل فصلي (3.67) نقطة وأكثر، ويثبت ذلك في سجله الأكاديمي، شريطة ألا يقل عبؤه الدراسي عن (15) وحده معتمد لذلك الفصل .

يوضع اسم الطالب على لوحة شرف الكلية في أي فصل (عدا الفصل الصيفي) يحصل فيه على معدل فصلي(3.50) نقطة وأكثر في ذلك الفصل، ويثبت ذلك في سجله الأكاديمي، شريطة ألا يقل عبؤه الدراسي عن (15) وحده معتمد لذلك الفصل.


وشتان ما بين التفوق وقائمه الشرف بس بصراحه ما اعرف عن المكافئه ولما يبي يخرف الكمبيوتر يحط تحت البوكس كلمه نعم مو داخل بوكس فأنتي اختي قائمه الشرف على اساس المعدل الفصلي

 

[فجر Q8]

مرتبةالشرف:

تمنح مرتبة الشرف للطالب عند التخرج بشرط حصوله على معدل عام تراكمي ( 85% )
فأكثر ، وإنهاء المدة الاعتيادية للتخرج ( 4 سنوات ) كالآتي :
90% - 100% امتياز مع مرتبة الشـرف
85% - 89% جيد جداً مع مرتبة الشرف .

قائمةالشرف

يوضع الطالب المستمر على قائمة الشرف في نهاية كل سنة دراسية إذا حصل على معــدل ســنـــوي (85%) فأكثر, وأنهى العبء الدراسي الاعتيادي


وقبل كان اول خمسه عل الدفعه يعطون 500 الحين الميزانه ما تكفي وكانو يسون حفله بعد

 

[B6O6A CUTE =)]

اهو شنو يعني قائمة شرف شتسوي ؟
< داشه عرض هههههههههههه

 

[الغدق]

اتسجلين 7مواد إذا كان
معدلج ثلاث نقاط وفوق بس ماله شغل بالتفوق
لأن شروط تفوقهم على كيفهم حاطينها وبس حق التحبيط
شكو بس اثنين يعطونهم المكافأة
وأكيد في طلبه وايد معدلاتهم 4 نقاط
فيراري أنا باطه جبدي هالسالفة من دشيت الجامعة
رحت وسألت التوجيه وحبطوني أكثر وقالوا ماكو مكافأة تفوق
بس تخصص نادر
وقلت بالطقاق أهم شي أنا راضيه عن معدلي
وشكرا

 

[fri2010]

اها فهمت الحين يعني انا جيد جدا مع مرتبه الشرف بالكليه بس مالها مكافئه صح؟

مشكوووورين وايد بنات ما قصرتو يعطيكم الف عافيه

 

[المـــــها]

لووووووووووووووووول
أنا كلا حاطين لي قائمة شرف بس جذي أصلا معدلي ما وصل 3.50 أنا عارفه غنه غلط منهم و ما لهم خلق يعدلونه ههههههههههههه

 

[fri2010]

حبيباتي مو بس الامتياز اللي يكونون مع مرتبة الشرف حتى الجيد جدا ويبتدي من 85% عيل ليش الامير يكرم الامتياز والجيد جدا بس