اسقاط القروض و المساعدات الخارجيه ...

[خبيرة اعشاب]

من المؤسف جدا ان الحكومه تكيل بمكيالين فعندما يكون الامر به مساعده للمواطنين الكويتين ماديا تتعذر عن المساعده تحت ذريعه المحافظه على المال العام .
اما اذا كانت المساعده للشعوب الخرجيه فانها تضرب بالنال العام عرض الحائط بل انها في بعض الاحسان تهرول للمساعده من تلقاء نفسها و دون طلب من حكومات هذه الشعوب ....

ان الشعب الكويتي تعرض لعده ازمات كتلك التي تعرضت لها بعض الشعوب الخارجيه الا ان الحكومه سارعت الى حل ازمه الشعوب الخارجيه و تركت المواطنين الكويتين يعانون ...

* تعرض الشعبين الاردني و الكويتي الى ازمه الكهرباء حيث اصبح الشعبين يعانون من انقطاع التيار الكهربائي فقامت الحكومه الكويتيه - جزاها الله خير - بدفع 75 مليون[/ لبناع محطه كهرباء جديده بالاردن لمواجهه زياده طلب الاحمال الكهربائيه ..و تركت الشعب الكويتي يعاني الصيف الماضي من الانقطاع المبرمج ..

* تعرض الشعبين الكويتي و العراقي الى نقص في المياه فقامت الحكومه هم بعد الله يجزاها خير ببناء محطتي تحليه للعراق و تركت الشعب الكويتي يعاني من انقطاع المياه و يشتري ماي صحه هههه

* تعرض الشعب اللبناني الى تدمير البنيه التحتيه و بنفس الوقت احتاجت المناطق الكويتيه حديثه الانشاء الى بنيه تحتيه فقامت الحكومه الله يجزاها خير بالتبرع بمبلغ 300مليون للحكومه اللبنانيه لبناء البنيه التحتيه في حين طلبت من الكويتين الذين خصصت لهم قسائم في المناطق الجديده بدفع قيمه البنيه التحتيه من حسابهم الخاص .

* يعاني الشباب الكويتي من البطاله كما ان دوله فلسطين تعرضت لازمه ماليه جعلتها غير قادره على دفع رواتب الموظفين و قامت الحكومه بالتبرع ب 747 مليون لدفع رواتب موظفيهم ...و في المقابل خلوا شبابنا ينطرون الميه و خمسين مالت بدل بطاله ...

* ظهرت ازمه جديده بالمستشفيات الكويتيه تتمثل بنقص الاسره و الحاجه الى بناء مستشفيات جديده و تركت الحكومه الكويتيه هذه المشكله عالقه فالشعب الكويتي يعالج نفسه دائما عند القطاع الخاص ...و تبرعت لبنغلاديش ببناء مستشفى متكامل من حيث المعدات و اللوازم الطبيه ...

 

[خبيرة اعشاب]

* تبرعت الحكومه الكويتيه ب 500 مليون للمصرف اللبناني للمحافظه على استقرار العمله اللبنانيه و امرت بنفس الوقت البنك المركزي الكويتي برفع قيمه الفائده على الشعب الكويتي 9 مرات خلال عام واحد فقط فتضاعفت قيمه الفوائد على القروض ..

* اجمالي تبرعات الكويت للعراق منذ سقوط صدام بلغ مليار و 150 مليون حتى عام 2005 في حين انها ترفض اسقاط القروض عن المواطنين بل و ترفض بشده زياده ال50 دينار

****** اجمالي تبرعات الكويت الخارجيه بلغ 19 مليار دولار اي ما يقارب 5 مليارات و 700 مليون دينار كويتي في حين ان اجمالي ديون المواطنين يبلغ مليارين و 200 مليون دينار

 

[دلوعة وحنونه Q8]

صايرين نفس عين عذارى نسقى البعيد وانخلى القريب

يعطيج العافيه

انا هالموضوع يحرق قلبى

 

[malak_alroo7]

السلام عليكم ورحمة الله وبركاته
يا بنات ادعو انهم يطيحون القروض ويريحونه شوي

 

[الغاليه نونو]

حكومتنا رشيده لاتعليــــق

 

[eman-77]

حكومتنا رشيده لاتعليــــق

:eh_s(15): ok

 

[طال السكوت]

ماااااااااشاااااااء الله

كل هالفلووووووس عندنااااا

بالملاييييييييييين نتبررررررررررع؟؟؟

ويشتكون من الميزانية والعجزززززز:eh_s(2): :eh_s(2): :eh_s(2):

لا حول ولا قوة الا بالله

يعني لازم يقهروننااا

 

[sunshine22]

اذا جت ع القروض اعتقد صعبه
الشعب يطمع هل من مزيد
بس انا لي اخذ على الحكومه بتفرقه المره والرجل يعني الرجل اللي معاه دبلوم نفس معاش المره اللي معاها ماجستير واكثر بعد وين العدل ....؟
ليش اللي معاها دبلوم ماتصير جذي بعد

والامور الخارجيه ترا اكيد حكومتنا ماتواطن شي اسمه
((الاردن + فلسطين )) عشان تساعدهم بس لوجه الله وعشان البروتوكول
لانه الكل عارف وقفتهم التي ولازالت والدليل مظاهرات لوقف اعدام صدام
مابان فيهم الخير

(( نعبي بجربه مشقووووووووووقه )) بس لزوم البروتوكول

 

[خبيرة اعشاب]

السالفه صراحه اتبط الجبد ...و هي
لا بروتوكول و لا هم يحزنون ...يعني شكو يجاملون بنغلاديش و هي دوله مالها اي ثقل سياسي ...

بس انا اقول ليش ؟
XXXXXXXXXXXXXXXXXXXXXXXXXXXXXXXXX


الرجاء الالتزام بالنقاش الهادف

 

[أميرة الورد]

XXXXXXXXXXXXXXXXXXXXXXXXXXXXX

ههههه صححححححححححححححح لو أقدر جان قلت بس قلبي مترووووووووووووووسة

 

[طال السكوت]

امن الدووووولة :eh_s(13): :eh_s(13): :eh_s(13): ينادوووونج seule12

 

[ii DareeN ii]

الرجاء الاتزام بحدود النقاش الهادف موخوف من امن الدوله خوف على اسم ديرتنا الي ماتستاهل منا جذي

 

[حزن العبدلي]

ان شاء الله يسقطون القرووووض ادعو بس

 

[أميرة الورد]

اختي دارين هلكلام اللي قاعدين نقوله مو استهزاء ولاشي بس تقدرين تعتبرينه حرة قلب وقهر على ديرتنا اللي وصلت لما هالمواصيل ترى الناس ما وصلت لمرحلة انها تطالب باسقاط القروض الا لما شافوا أشياء تقهر بديرتهم طول عمرها الكويت ديرة خير ولله الحمد بس في كل ديرة فيه سلبيات وفيه ايجابيات ولما احنا نتكلم مو معناه استخفاف لأ معناه الخوف على هالديرة الطيبة .

 

[ii DareeN ii]

اختي اميره انا مابي اتناقش بالكلام الي لغيته لان كلام ماحب ان ينذكر هني لان ينتقص منا ومن اي احد يذكره ترا عادي الواحد يتهم بس ماتطلع منا احنا ياكويتين بعدين كلنا عندنا قروض ومحد طقنا على ايدنا وقالنا اخذو كل من عنده ضروفه بعدين اسقطوها خير وبركه ماسقطوها ديرتنا عازتنا ورازتنا بكل مكان وسنه الغزو يوم تشردنا وتبهدلنا مارد ديرتنا غير الله سبحانه وتعالي واعمال الخير الي تسويها

بكل شي بنتدخل بكل شي نبي نبجي ياتعطونا فلوس ولا نبجي مايصير صارو الناس يحجون فينا وكل من الاعضاء حسبي الله عليهم ونعم الوكيل شجعو وايد ناس مالهم حاجه بالقروض على القروض واستغلوهم عشان مصالحهم النتخابيه ومحد ربحان غير البنوك

 

[بطاطا]

ازيدكم من الشعر بيت

طلبة اردنيين عانوا من عدم قدرتهم على دفع الرسوم للجامعات الخاصة اللي يدرسون فيها في بلادهم .. فقامت الكويت و دفعت مصاريف الدراسة عنهم .. و المقابل شكر و مجاملة من جم طالب بس .. و لو الحين كويتيين محتاجين جان قالوا ردوا ديرتكم و لا تكملون .. ما في ميزانية ..

بس خوووش سياسة .. الكويتيين الطلبة ينطقون و احنا نساعد اللي طقوهم



سياسة .. !!!!!!!!








xxxxxxxxxxxxxxxxxxxxxxxxxxxxxxxxxxxxxxxx



الرجاء التقيد بقوانين المنتدي ​

 

[الاسطورة]

كلنا عندنا قروض ومحد طقنا على ايدنا وقالنا اخذو كل من عنده ضروفه بعدين اسقطوها خير وبركه ماسقطوها ديرتنا عازتنا ورازتنا بكل مكان وسنه الغزو يوم تشردنا وتبهدلنا مارد ديرتنا غير الله سبحانه وتعالي واعمال الخير الي تسويها

اي صح ديرتنا عزتنا ايام الغزو والدليل الي اطلعوا حصلوا اشياء وايد مثل المعاش والمسكن والمشرب بس الي كانوا صامدين والي انا منهم ماحصلنا غير الامراض والقهر والعذاب من الي شفناه ايام الغزو
اشوف ماتكلمنا وقلنا نبي مبدأ المساوات يعني عطونا مثل ماعطيتوهم
وصحيح بفضل رب العالمين تحررنا بس لا تنسين تحررنا بفلوسنا ولا لو ما فلوسنا جان احنا نعاني مثل فلسطين بس الحمدلله على النعمه
والصراحه شي يقهر فلسطين والاردن اهم من اول الدول الي ايدت صدام ايام الغزو والحين احنا نمد ايد العون حق ناس انقرصنا منهم محد كان يبلغ على العسكرين بالغزو غيرهم
بكل شي بنتدخل بكل شي نبي نبجي ياتعطونا فلوس ولا نبجي مايصير صارو الناس يحجون فينا وكل من الاعضاء حسبي الله عليهم ونعم الوكيل شجعو وايد ناس مالهم حاجه بالقروض على القروض واستغلوهم عشان مصالحهم النتخابيه ومحد ربحان غير البنوك

اي ليش مانطلب ؟؟؟؟؟؟
على قولت المثل جحا اولى بلحم ثوره
خل نستانس بفلوس ديرتنا على الاقل احنا عندنا ولاء حق ديرتنا مو مثل غيرنا ياكلون من خيرنا ويلعنون فينا من الصوب الثاني
وليش الناس ماتحجي فينا ؟؟؟؟
من بعد ماكنا لؤلؤة الخليج والكل حاسدنا ويبي يكون كويتي الحين عطونا ظهرهم وصاروا احسن منا من معيشه وخدمات وسياحه

ما اقول الا الله يرحم زمان اول
الي لي دخل الكويتي مكان ينعرف من كشخته والحين الكويتي صار حافي منتف


ا

 

[ii DareeN ii]

اختي الاسطوره صج ان الامثال تضرب ولا تقاس بس ديرتج ماتشبهينها بالثور جزاك الله خير

ثاني شي الفلوس والفلوس والفلوس ردتها والله الفلوس لو ما رب العالمين وخير هالديره حكومه وشعب ماردت

بعدين الكويتين الحمدالله الله مرهي عليهم الحمدالله وظايف وتامين اجتماعي وكل واحد فيهم يقدر يعيش بحدود راتبه ملك وماشوف كويتي منتف انا اشوف الكويتين من لبسهم وسياييرهم ماتعرفين تفرقين الغني من متوسط الحال تتوقعين هذا صح ولا كل دوله مسؤله عن اسراف موطنينها وجهلهم الاستهلاكي

الحين ماكو اسقاط قروض والكتاب بين من عنوانه والاعضاء الي رجو حق الفكره الكل انخش وبيتنازل طلعو الفكره براس الموطنين وعشمو وايد وايد ناس حطو على روحهم قروض والحين فركش الموضوع كله مصالح انتخابيه لا اكثر ولا اقل يعني الرابح البنك والنائب الي نجح على احلام المواطنين الورديه الي انقلبت حق كوابيس عاني منها كل من انجرف ورا هالحلم واصاب بخيبه امل

اختي الفاضله هل الحل بان انمي البنيه التحتيه والجامعات والسياحه والمستشفيات بسقاط القروض شدخل هذا بذاك

واخيرا كلنا كويتين وماكو احد ماعنده ضايقه وماكو بيت مو ماخذ قرض الي خلص منه والي بياخذ عشان بيشتري بيت على مدى هالسنين يعني هذا درب كلن ماشيه كل جم سنه بنقول سقطو القروض يعني ولا نبي كل شي ببلاش ماكو شي ببلاش ابهاتنا تعبو وسددو قروض واخوانا واهلنا وعيالنا من عقبنا بيسون نفس الشي هذا درب كلنا بنمشيه والعالم كله دول غنيه وفقيره

احنا طول عمرنا عايشين معززين مكرمين ولازلنا وغيرنا دول اغني منا وهم بالخليج كانو يعانون ويمكن لازالو يعانون الارمله تضطر تعيش فراشه عشان تصرف على عيالها واحنا معاش الشؤون يوصل لي 500 دينار ويمكن اقل بشويه واكثر ومرتبات مستحقات المعاشات التقاعديه توصل لي 800 دينار في بعض الاحيان

وكل هذا ويحليلج يا كويت لكويت نقولها يحليلج والكويت نقولها انتي قصرتي بحقنا باي حق قصرت الدوله الي تتكفل فينا من ننولد لي نموت

ممكن نطالب بتحسين اوضاعنا ممكن نقول اسعار البترول علت ونطالب بتعديل الاوضاع بشكل عام بس بعقلانيه مو نجرح هالتجريح بهالديره الي ماقصرت فينا

الناس تحسدنا وتقول ياريتنا نعيش عيشتكم ماكو بلد عندها مساحه حريتكم ماكو بلد عندها ضماناتكم يجوز في بلدان علت رواتبهم على رواتبنا بس هالبلد مافي مثلها

 

[الاسطورة]

اختي الاسطوره صج ان الامثال تضرب ولا تقاس

بس ديرتج ماتشبهينها بالثور جزاك الله خير

هذا مثل ينقال بمثل هالمواقف وانا اولا واخيرا كويتيه واعتز بكلمه الكويت

ثاني شي الفلوس والفلوس والفلوس ردتها والله الفلوس لو ما رب العالمين وخير هالديره حكومه وشعب ماردت

بعدين الكويتين الحمدالله الله مرهي عليهم الحمدالله وظايف وتامين اجتماعي وكل واحد فيهم يقدر يعيش بحدود راتبه ملك وماشوف كويتي منتف انا اشوف الكويتين من لبسهم وسياييرهم ماتعرفين تفرقين الغني من متوسط الحال تتوقعين هذا صح ولا كل دوله مسؤله عن اسراف موطنينها وجهلهم الاستهلاكي

للاسف اختي الغاليه ماكو كويتي يقدر يعيش بحدود راتبه لان المعيشه صارت عندنا نار وصحيح انا معاج ان الدوله مو مسؤوله عن اسراف المواطنين بس هم الدوله مسؤوله عن التوعيه الاقتصاديه

الحين ماكو اسقاط قروض والكتاب بين من عنوانه والاعضاء الي رجو حق الفكره الكل انخش وبيتنازل طلعو الفكره براس الموطنين وعشمو وايد وايد ناس حطو على روحهم قروض والحين فركش الموضوع كله مصالح انتخابيه لا اكثر ولا اقل يعني الرابح البنك والنائب الي نجح على احلام المواطنين الورديه الي انقلبت حق كوابيس عاني منها كل من انجرف ورا هالحلم واصاب بخيبه امل


والله ما اعتقد انها دعايه انتخابيه لان وايد ناس مطلوب القبض عليهم من بينهم حريم ومن واجب النائب ان يتكلم بصوتهم ويوضح مطالبهم


اختي الفاضله هل الحل بان انمي البنيه التحتيه والجامعات والسياحه والمستشفيات بسقاط القروض شدخل هذا بذاك

للاسف ماني فاهمه معنى البنيه التحتيه علشان جذي بطوف هالفقره



واخيرا كلنا كويتين وماكو احد ماعنده ضايقه وماكو بيت مو ماخذ قرض الي خلص منه والي بياخذ عشان بيشتري بيت على مدى هالسنين يعني هذا درب كلن ماشيه كل جم سنه بنقول سقطو القروض يعني ولا نبي كل شي ببلاش ماكو شي ببلاش ابهاتنا تعبو وسددو قروض واخوانا واهلنا وعيالنا من عقبنا بيسون نفس الشي هذا درب كلنا بنمشيه والعالم كله دول غنيه وفقيره


كلامج بهالفقره يناقض كلامج بالفقره الاولى وعلى طاري القرض مال البيت اكيد الناس بتاخذ قروض لان قرض الاسكان مايسوي شي ولا يقايش مع ارتفاع العقارات بالديره. واذا اهلنا قبل اخذوا قروض ما اخذوا قروض نفسنا 70 ضعف الراتب وهذا يعني ابهاتنا اذا اخذوا قرض خلال 5 او 8 سنوات يسكرونهم مو مثل الحين 10- 20 سنه على ماتسكرينه واحنا مانبي شي بلاش نبي خيرنا حقنا



احنا طول عمرنا عايشين معززين مكرمين ولازلنا وغيرنا دول اغني منا وهم بالخليج كانو يعانون ويمكن لازالو يعانون الارمله تضطر تعيش فراشه عشان تصرف على عيالها واحنا معاش الشؤون يوصل لي 500 دينار ويمكن اقل بشويه واكثر ومرتبات مستحقات المعاشات التقاعديه توصل لي 800 دينار في بعض الاحيان


ما ابي اتناقش بمعاشات الشؤون الي الواحد يضطر يروح يمد ايده حق اللجان الخيريه نص الشهر



وكل هذا ويحليلج يا كويت لكويت نقولها يحليلج والكويت نقولها انتي قصرتي بحقنا باي حق قصرت الدوله الي تتكفل فينا من ننولد لي نموت



كلكم راع وكلكم مسؤول عن رعيته وبس



ممكن نطالب بتحسين اوضاعنا ممكن نقول اسعار البترول علت ونطالب بتعديل الاوضاع بشكل عام بس بعقلانيه مو نجرح هالتجريح بهالديره الي ماقصرت فينا


لا قصرت منو اولا عيال الديره ولا الزلمات؟؟؟؟؟



الناس تحسدنا وتقول ياريتنا نعيش عيشتكم ماكو بلد عندها مساحه حريتكم ماكو بلد عندها ضماناتكم يجوز في بلدان علت رواتبهم على رواتبنا بس هالبلد مافي مثلها

هذا الكلام يقولونه دول الضد

 

[ii DareeN ii]

اختي الكريمه الاسطوره انا بينت لج وجه نظري وانتي بينتي وجه نظرج
بس اتوقع موضوع القروض خذا اكبر من حجمه وصار اعلامي اكثر من الازم والموضوع بينتهي قريبا ومحد بيوافق عليه ياريت نعرف عقب رفضه منو المستفيد
انا وانتي كمواطنين
الحكومه
البنوك
النواب