شوفي نصيحه من وحده خبيرة سنيييييين بالقطاوه ربيت اجيال لوووول
1- اول ما تشترينها وديها الطبيب يفحص عليها اذا ما عندج خبره بالفحص واحسن دكتور من سنين اتعامل معاه دكتور اندرو بالدهماء
يجيك على اذنها وعلى فروتها انها ما فيها فطريات واذا عمرها عمر التطعيم يطعمها لج ويقرظ لج اظافرها ويشوف حلجها ومكان خروجها يعني فحص شامل عشان تطمنين من سلامتها وصحتها
2- أول ما تردين البيت طبعا تجهزين لها صندوق الرمل حطي يمه الماي وحطي تحتهم سماط نايلون انظف واحسن لوقت التنظيف
3- سبحيها بشامبوها الخاص عشان من بعد القفص تصير وصخه وريحتها خايسه
4- نشفيها عدل لا تخلينها تنشف بروحها عشان ما تمرض عليج وبعد ما تنشف 100% مشطيها
5- عطيها الاكل الخاص بالصغار لا تعطينها اي نوع لأن الانواع الباجي يكون قوي عالمعده وممكن يسبب لها اسهال وتتوهقين فيها وترى القطوه تاكل ما تشبع ممكن تاكل اكثر من الكميه المطلوبه بعمرها او كل شوي تشوفينها تناوي يوعانه لا ينكسر خاطرج عليها موزين كثر الاكل مثل ما قلت لج يسبب لها اسهال . في اكل خاص للكيتن (القطاوه الصغار) وثبتي على نوع واحد لا تغيرين وحطي لها شويه بمقدار قفشه وحده بس ونظمي وجباتها اذ صغيره 4 وجبات باليوم .
6- طبعا المكان اللي بتحطين فيه الرمل والاكل والماي هذا لازم يكون فيه تهويه وتكييف احسن عشان الجراثيم والريحه
7- اول يومين حبسيها بهالمكان لا تطلع منه حتن لو تناوي انتي دشي المكان وقعدي معاها لعبي وووكليها ودفيها بحضنج يعني خلي وقتج معاها شوي بس لا تطلع خل تعرف ان هذا مكانها ولازم تشممينها الرمل وتحطينها عليه جم مره.
8- بعد هاليومين انتي فتحي لها الباب وخلي بروحها تكتشف المكان لا تشيلينها وتودينها لأ غلط خليها تطلع من مكانها تكتشف المكان اللي حواليها عشان تعرف ترد طريجها حق الحمام والأكل ومكان الأكل لا تغيرينه خل تعرف ان هذا المكان الخاص فيها للحمام والاكل وطبعا الصحن مال الاكل ينسغل بعد كل وجبه. والمايدايما يكون نظيف
9- مشطيها كل يوم عشان ما يتعقد شعرها ونظفي عيونها اذا من النوع اللي دايما تتوصخ بقطن وماي دافي.
10- اي شي تلاحظينه على جلدها وديها الطبيب لأن الفطريات تعدي البشر والفطريات شي وااارد ان ايي حق القطاوه اذا صار معاها فطريات لا تخافين بس لا تخلينها تطلع من مكانها وانتي لي بغيتي تشيلينها لبسي دس راح يعطونج الطبيب حبوب وشامبو خاص للفطريات ويعلمج الطريقه وحبسيها لمدة 10 ايام الى اسبوعين ولا تخلين احد يختلط فيها لين يروح منها والافضل اذا كانت من النوع الشيرازي تقصين الشعر المكان اللي فيه فطريات عشان يسهل عليج معالجته .
11- لا تعطينها سمج ولا حليب لأنه يطيح الشعر ولا تكثرين سباحه بالصيف مره بالاسبوعين وبالشتا مره بالشهر الا اذا شفتيها توصخت او ريحتها مو حلوه سبحيها.
وأي سؤال انا حاضره
