بسم الله الرحمن الرحيم
السلام عليكم ورحمة الله بركاته
هذي اول مشاركه لي وعشانها اشتركت في هذا المنتدى المعطاء لاذكر تجربتي*
اولا احب اشكر اعضاء هذا المنتدى واخص بالشكر تجمع معالجات لاطفال الانابيب لاني صراحه استفدت من خبراتهم عسى الله يفرجها عليهم ويحقق لهم حلم الامومه باذن الله*
وعلى هذا الاساس راح اكتب لكم تجربتي مع العلاج عشان ان شاءالله افيد غيري وماابي غير دعواتكم الطيبه ان الله يثبت حملي ويقر عيني بشوفته*
انا رحلتي مع العلاج طويله انا صاري 3 سنين ونص متزوجه والله ماكتب لي الحمل وماكان هناك *اي مانع للحمل وبعد سنه راجعت مستشفى رويال حياه وسويت عندهم تلقيح صناعي يمكن مرتين *وطفل انبوب وكانت الاجنه ممتازه وماصار شي ورحت دار البراء عند الدكتوره ماجده اليتامى وقالت زوجك عنده ضعف في الحركه وانتي عندك هرمون الحليب مرتفع وعطتنا علاج وسويت لنا عمليه طفل الانبوب والاجنه كانت حلوه من الدرجه الاولى على قولتها والله ماكتب وعقب سوينا تحاليل قالوا الحركه عند الزوج تحسنت فراح نسوي لكم تلقيح صناعي وماصار شي الحمدالله على كل حال وبعدين كتبت لنا الدكتوره ماجده تقرير حق مستشفى الصباح عشان تعالج على حساب الحكومه عندهم بس زوجي اخذ تقرير وقال نتعالج في الصباح احسن وسويت عندهم تلقيح صناعي *لانه انتوا سليميين بس عشان صارلكم فتره طويله من غير حمل واذا ماصار شي نبدي وياكم بالانابيب والله ما كتب وسويت اطفال انابيب والحمدالله وكانت النتيجه اني حامل وهذا كله من فضل ربي والدكاتره ودكتورتي كانت منيره العدواني ودعاء امي لانه اول مره اقولها *
الحين نبدي بالعلاج
اول شي في يوم الارجاع الصبح قبل العمليه تاخذين قفشه نشا وتذوبينها في كوب ماي وتشربينه لانه يساعد على تثبيت الاجنه باذن الله وهذا شي تستمرين عليه لي يوم *التحليل وان شاءالله اذا طلعت النتيجه حامل تستمرين عليه لين يقولون وقفي الادويه*
ثانياً الاكل تلتزمين باكل صحي كثري شرب الماي وشربوا حليب ولبن واكلوا فواكه وخضره وخس*
ثالثاً واهم شي اذكار الصباح والمساء تقرينه وقريها وانتي تمسحين على بطنك والرقيه الشرعيه ماواوصيكم فيها وتاخذين مطاره ماي وتقرين فيه وتشربين منه واذا بخلص تزيدينه ماي ومن هذا الماي اخذي منه حق كوب النشا وتاخذين زيت زيتون وتقرين فيه وتمسحين فيها على بطنك وارحامك وظهرك واسفل الظهر قبل النوم وتكونين على وضوء ولانه يفضل الواحد ينام وهو متوضي لانه الملائكه تستغفرله لين يقوم وفي هذا الرابط الايات الي حاطتها الاخت الله يوفقها *تقرونها في الماي والزيت الفاتحه والكرسي 7 مرات والاخلاص والفلق والناس 3 مرات وباقي سور مره وحده مع النفث (كل ماقريتي ايه تنفثين وراها مثال قل هو الله احد تنفثين ويفضل ان يخرج شويت رذاذ مع النفث وتكملين وهكذا)
آيات قرأنية تساعد على الحمل.
وحطي عند راسك ورقه مكتوب فيها هالدعاء ( لا اله الا الله وحده لا شريك له له الملك وله الحمد وهو على كل شي قدير سبحان الله لا اله الا الله والله اكبر ولا حول ولا قوة الا بالله العلي العظيم) لانه من قام من نومه في اليل ودعا هذا الدعاء ودعا مايريد *بعدها بإذن الله يستجاب دعاءه*
وكنت طول الاسبوعين الانتظار كله منسدحه مااقوم الا حق الاكل والحمام تكرمون والصلاه كنت اصليها وانا قاعده وعقب كل صلاة تقرين هالايات الي حاطتها الاخت في هالرابط جزاها الله خير
بخمس ايات حملت في نفس الشهر بعد انتظار9سنوات
وماتسبحت الا اليوم الي قبل التحليل لاني كنت خايفه اتعب وانا اتسبح وكانت تجيني الام خفيفه في بطني واسفل بطني وماحسيت باعراض حمل بس كانت تجيني احلام تفسيراتها كلها تقول اني حامل والحمدالله تحققت*
وكنت لازم في اليوم اسمع هذي الرقيه الشريعيه واقول وياها الايات وامسح على بطني واسفل وبطني من اليوتيوب تكتبون في البحث *الرقيه الشرعيه وتسمعونها وبعدين تكتبون رقيه ايات الحمل لتثبيت الجنين والحمل وتسمعونها*
وخلوا ايامنكم بربكم كبير وخليكم على يقين انه الي رزق زكريا وهو شيخ كبير ومرأته عقيم والي رزق مريم من غير زوج انه قادر انه يرزقكم ان شاءالله وهو الذي يحيي العظام بعد موتها*
واذا ما الله كتب لكم لا تيأسون قولوا الحمدالله وانا لله وانا اليه راجعون وحاول مره ثانيه يمكن الله يختبر ايمانكم وصبركم وان شاء الله يرزقكم كلكم ولا يحرم كل منتظره*
واخيراً اسمحولي على الاطاله ودعواتكم لي* وارجوا نشرها في اي منتدى عشان الكل يستفيد ان شاءالله
