البدووون في الخليج..

[ليدي الحاره]

يحياتي والله فعلا في ناس خدمو الوطن وصانوه وعلى مله ومذهب صحيح ليش نحرمهم الجنسيه ونعطيها للساقطين
للي مايستحقوها

انتو بالكويت تجنيس صار اللايرانيين بفتره وهم الحين قاعدين يخططون مع الاعداء علينا

وماحمدوربهم على الخير اللي عيشتهم الكويت فيه


والله الكويت ماتستاهل منهم كذا انتو اكثر دوله ع فكره مرفهه شعبها سواء مواطنين او وافدين ويبين خير ديرتكم عليهم

ومع ذالك جحدو هاذا كله ويبون خليج فارسي بعد مو عاجبهم الوضع


والبحرين يعضون اصابع الندم على المجنسين اللي عندهم اللي انكشفو باللي يسمونها مظاهرات اللي صارت من فتره

وقامو الحين يتداركون الاخطا ويجنسون اهل السنه من العرب << بس زين خطوه للامام

واحنا بالسعوديه نجنس كل من هب ودب واخرهم ماجد المهندس واللي احق واخلص للوطن قاعد ينتظر


ي رب حكامنا يتنبهون لهالنقطه الحساسه لان الضغط يولد الانفجار

 

[ليدي الحاره]

ي بنات السعوديه لا فيه في السعوديه بدوون ومن قبايل بعد

خلووو تكارنة الحجاز ع جنب


اقصد بدوون عنووز وشمامره اعتقد في الشماال


وحالتهم حاله ويرفضون الاندماج

 

[sweet.sanfoora]

البدون بالكويت عارفينهم , في بعضهم مستحقين و عددهم قليل بالنسبه
للطمعانين بالجنسيه الكويتيه و الي ينكرون و الي من الجيش الشعبي
العراقي .. ! ,

و الي صج كويتي و عنده احصاء 65 , خل يمشي على كلام الحكومه
و ينطر لما الله يفرجها عليه , بس الي طمعانين .. ان شاء الله ما ياخذونها

يعني كافي الكويت مسويه لهم جواز ماده 17 و صح مو هذاك الزود
بس على الاقل يقدر يسافر و يرد و اذا مو عاجبه كلام الحكومه
بريطانيا و السويد و كندا و امريكا و غيرهم .. يجنسون ,

ولا في دوله عندها ناس قاعدين بطريقه غير قانونيه و مسويه لهم جواز ؟
و على العموم انا مع المستحقين فقط , اما الباقي و التجنيس ضده

معاها

المستحق بياخذها

اما العرقرق والنور و اللي قاطين جناسيهم اييهم عزرائيل ياخذ روحهم قبل ما ياخذونها

وخواتي اللي ما تعرف شي عن الكويت لا تفتي من عندها

وبثثث

 

[دنيتي قرب حبيبي]

ي بنات السعوديه لا فيه في السعوديه بدوون ومن قبايل بعد

خلووو تكارنة الحجاز ع جنب


اقصد بدوون عنووز وشمامره اعتقد في الشماال


وحالتهم حاله ويرفضون الاندماج

صح البدوون الي في المملكه من العنووز وانعرف قصة شاب يتيم عنزي بدون بس هو وامه ومافي معين لهم غير اهل الخير..

واتمنى ماتلخبطون بين البدووون وتجنيس التكارنة الحجاز..
مانبي نشوشر ع الموضوع ارجوكم الموضوع عن البدوون
مموو عن التجنيس ارجوواكم فرقواا
واخيراا حناا نبقى نطرح حلوول يمكن يوصل صووتناا للمسؤلين او على الاقل نحس ان سوين شي لهذا الفئه ويفرجواا عن البدوون حتى لو مااعطوهم الجنسيه بس على الاقل يحسنوو من حالتهم الجتماعيه..
ارجوو عدم التجريح او سؤ في اي كااان..
ومشكورين ع التفاااعل بدون تجريح..

 

[Q8.BA]

بسم الله الرحمن الرحيم

السلام عليكم

البدون قضية شائكة خلقتها وكبرتها حكومة كل دولة خليجية أو عربية فيها بدون
فالقوانين واضحة وعندها تتجاهل الدولة القوانين وتعتمد سياسة غض البصر فلابد أن تكبر المشكلة كأنها كرة ثلج تتدحرج

___

أختي صاحبة الموضوع
أشكرك على فتح موضوع يخص البدون بالخليج
تمنيت أن أرى بموضوعج الأساسي نموذج عادل لطرفين ( شهيد سني وشهيد شيعي ) حتى لا نفتح المجال للمتصيدين بالماء العكر بأخذ موضوعج على أنه يخص فقط لا غير مذهب دون آخر ... ومقابر الكويت التي ضمت رفاة الشهداء من الطرفين تشهد على المذهبين وكذلك أسماء الأسرى ومثله البدون الذين هم سني وشيعي وبدوي وحضري .

وأعيب على المعقبين الذين تعمدوا أن يضربوا المذهب الشيعي بكلامهم ، كما أعيب على الذين جعلوا الكويتي فوق الكل وجعلوا غيره أسفل سافلين.

من يحب دولته وموطنه ويفديه بكل غالي أفضل من صاحب الجنسية الذي يفر ويترك دولته أو الذي يقتل ويسرق ويؤذي الدولة وهو صاحب جنسيتها فهذا لا يحب وطنه ولا ديرته ونفسه أهم من الأسرة الحاكمة والدولة والتي ارادت هنا اللعب على وتر المذهبين لدي عن الغزو من المذهب الذي تحبينه وكويتين فعلوا أمور لا يتشرف بها أحد وضد الدولة ، بل حتى يومنا هذا هناك من يفعل أمور تسيئ للدولة والحكومة ويحاربونها ومن المذهب الذي احبه قلبك فهل هذا دليلك على الولاء؟ تعقلي أختي .

إذا يا عقلاء الأمر يتعلق بالأخلاق والمبادئ والوطنية وهذا أمر ليس مكتسب من الجنسية فهناك مزدوجون من أكابر العائلات فهل هذا يعني أن ولاءهم وحبهم ودفاعهم سيكون ضد الكويت ؟ أم أن المقياس هنا لا يتعلق بمن بيده جنسية كويتيه أو سعودية أو خليجية بل يتعلق بالإسلام والأخلاق والمبادئ التي تجعله يوالي ويحب موطنه الذي اختاره لنفسه لأن كل بلاد العالم أرض الله وليست ملك لحاكم ولا غيره فالملكية هذه سياسية لا دينية .

البدون بالكويت أكثرهم إن لم يكن كلهم مستحقون وأتحدث عن بدون ماقبل الغزو لأن بعد الغزو هناك من انضم زوراً وتزويراً لهم .. عندما بدأت الكويت بوضع قوانين جديدة اسمها جنسية وطالبت الشعب بالتقدم كثير منهم رفض خصوصاً كبار السن جهلاً منهم وبعضهم رفضاً أن يُكتب اسم عائلة يرفضه لأن وقتها كانوا يطلبون بيانات من ضمنها لابد وضع اسم عائلة وأغلبهم يضغون المهنة ( قلاف ، بزاز ، نجار...الخ ) فلم يستخرجوا الجنسية.. جزء منهم بقي بلا جنسية للآن وجزء بعد سنوات عندما أراد استخراج جنسية وبسبب تغير بعض القوانين صارت جنسية ليست درجة أولى بالتأسيس فرفضوا استخراجها وبقيوا هكذا .. والفئة الثالثة هي البدون منهم الذين كانوا بالكويت حتى قبل احصاء 65 وللعلم الغزو دمر السجلات التي قبله لهذا الحكومة لا تملك بهذه الصورة اثباتات عن احصاءات ماقبله ..

بالعقل احسبوها شخص بالكويت من وقت 65 أو قبله وحتى الآن لم يخرج منها وبالغزو رفض أن يخرج من وطنه ودافع عنه رغم أنها فرصة ذهبية له الخروج أو حتى استخراج اثبات من العراق الدولة الغازية لكنه يرفض لحبه وولاءه لوطنه الكويت ومازال بدون فهل هذا لا يستحق الجنسية؟؟ وهل لو لم يوجد لديه احصاء 65 يحرم منها فلربما تواجد بعد الأحصاء باسبوع أو شهر لهذا لم يسجل فيه فهل معناه أنه لا يستحق .... والمغني والممثل وغيرهم وبعضهم له أصول معروفة يأخذ جنسية!!

أي انصاف وعدل لهذه الفئة؟!

الفئة هذه برقبة الحكومة ويوم القيامة سيحاسب كل من وقف في طريقها .. في طريق البدون التي لم تتزوج بسبب تضيق الخناق على عقود الزواج وشهادات الميلاد .. في طريق البدون الذي لم يكمل تعليمه بسبب قانون منعه ولم يشتغل ولم يتعالج مثل الناس من أمراض فيه تأكل جسده وغيره الكثير الكثير .

الحكومة إذا رغبت بشئ فعلته
وإذا لم ترغب وضعت كل الذي تستطيع على شماعة كذا وكذا

الله يعين كل بدون
ويعين الكويت لأن البدون بدؤوا يدعون من قلب صادق أن يأخذ الله بحقهم من الجميع من أكبر رأس بالكويت لأصغرها بسبب الظلم الواقع عليهم ودعوة المظلوم مستجابة ، فالله يحفظ الكويت ويستر عليها.


اختكم

 

[وردة-الكويت]

اجل مجنسين لنا داوود حسين تحت بند اعمال جليله وينهم عن شهداء من البدون الي قدمو ارواحهم للبلد

داوود واشكاله كانو ياخذون مقابل مادي مقابل ادواره بلمسرح والتلفزيون لكن الي اعطى روحه للكويت

ويتم عياله هل كانو يبون فلوس او جنسيه لا كان ولائهم للوطن


روحو شوفو مقطع لدااوود وهو في مظاهر ضد مركز وذكر بلله هاذا كفووو

 

[دانه الشطوره]

حبيبتي ورده الكويت
بالنسبه لمركز وذكر
انا ماعرف قصه داوود مع المركز
لكن هالمركز كل شوي يطلع لنا بسالفه و يفتن بيناا

اتمنى تتقبلين رايي بكل صدر رحب
:$

 

[دانه الشطوره]

بنات رجاء لا تقعدون تقولون جنسوو فلان و علان
الحكومه هي ادرى قاعده تجنس منوو
و حتى لو كان لها مصالح من ورا هالشي لكن

بالموضوع هذا نبي حل للبدون المساكين
مانبيه ينقلب هواش
و كل وحده تقول شمعنا جنسوو هذا وما جنسوو هذاك

نبي حل ينصف البدووون المستحقين
نبيهم يعيشون بحياه سعيده و هانئه
نبيهم يحسون بأنهم بشر ملثنا

المستحقين ثم المستحقين ثم المستحقين

ودي
دانه الشطوره

^_^

 

[NanYah]

الله يفررج عليهم مشكلتهم
ويرزقهم بفضله وييسر لهم امرهم
وانا مع تجنيس المستحقين منهم فقط لا غيرر
لانه في منهم اللي واقفين مع الديرة من قبل الغزو جزاهم الله خير

 

[دنيتي قرب حبيبي]

بنات رجاء لا تقعدون تقولون جنسوو فلان و علان
الحكومه هي ادرى قاعده تجنس منوو
و حتى لو كان لها مصالح من ورا هالشي لكن

بالموضوع هذا نبي حل للبدون المساكين
مانبيه ينقلب هواش
و كل وحده تقول شمعنا جنسوو هذا وما جنسوو هذاك

نبي حل ينصف البدووون المستحقين
نبيهم يعيشون بحياه سعيده و هانئه
نبيهم يحسون بأنهم بشر ملثنا

المستحقين ثم المستحقين ثم المستحقين

ودي
دانه الشطوره

^_^

جد دانه اناا دخلت قبلك بس من الردود ماعرفت ايش اكتب انااا اقلهم البدوون وهم يدخلون موضوع التجنيس ليه فلان وليه علان
يمكن انتي وصلتي الي كنت بقولوهـ
التجنيس او التحسين للبدوون المستحقين..
يسلمووو دانووو..

 

[دنيتي قرب حبيبي]

الله يفررج عليهم مشكلتهم
ويرزقهم بفضله وييسر لهم امرهم
وانا مع تجنيس المستحقين منهم فقط لا غيرر
لانه في منهم اللي واقفين مع الديرة من قبل الغزو جزاهم الله خير

مشكورهـ حبيبتي..

 

[دنيتي قرب حبيبي]

ايش رايكم نسوي حمله للتجنيس البدوون المستحقين فقط
وكل وحدهـ معانا في هذا الموضوع تحط عنوان الحمله في التوقيع اذا كنتوا موافقين وتشوفون القترااح منااسب..

 

[عرش الأنوثه]

الله كريم

 

[sul6ana]

اسمحي لي اختي ما فيه بدون بالسعودية فيه مخلفات حجاج و هذول مستحيل يتجنسون لان كل سنة يتخلف اشكال و الوان

السعودين عوائل و قبايل معروفه بكل سهوله يثبت نسبه للعائله او القبيله و يطلع له بطاقه احوال و يسير رسمي سعودي

الفبركه مالها داعي

اقول انتي لاتتكلمين بشي ماتعرفينه...احنا بدو عيال اصل وحموله وشيوخنا كبااار محنا مخلفات الحجاج فياااريت تقولين كلمه سنعه ياماتتكلمين....وعندج النت وشوفي وابحثي قبل لاتفتين من راااسج وانا عنزيه وابوي عنزي واهلي كلهم عيااال بدو محنا صومال والا من السودان...وعلى فكره عندي عم اخو ابوي متجنس واحنا لااا وين العدل؟؟؟

 

[توتا الكتكوته]

قبل 300 سنة لما كانت الكويت بيوتها من طين وكانت زي الورده وتمر السنين وبعد ظهور النفظ وغيره وبعدها في كل شي عن اسماء الكويتين طبعا بالبداية كانوا 200 الف وكلهم يعرفون بعض وماشاءالله مع التزايد السكاني صرنا مليون

طيب مافي انسان ينزرع ؟؟ حتى النبات له جذور ؟؟ اذا احنا الكويتيين اللي ماده اولى ام واب يقولون لنا انتو من وين اصولكم

فما بالكم انسان يقول انا بدون مع احترامي للبعض

وايد ناس نعرفهم جل معرفه هم عرقرق هي بدون وولد عمها كويتي ؟؟ والسبب ,,, ؟؟؟ اقول ولا لا ؟؟؟

وفي بلاوي ما اقدر اكتبها بالعام والله شي يشيب الراس لو اقدر اكتب كنت كتبت شلون اخذو الجنسيه

بس اخاف على نفسي صراحه ولا كنت سودت وجيه ناس

عموما في ناس يستاهلون بس السوات اللي سووها اللي ما يستحقون اخذوا حقهم

الله يكون بالعون ولوكنت انا من هالفئه كنت ما اقعد دقيقه بدون جنسيه اروح اي دوله واخذ جنسيتها واعيش يعني الحياة

موجوده بكل مكان بس اعتب على ناس والله شباب كلهم ماتوا من القهر على سالفة الجنسية قلت لامي

جان قلتي لامهم بدل هالبجي والدموع وخسروا شبابهم جان سافروا كافحوا انطر الجنسيه تنزل علي من السما ؟؟؟


وبالنهايه كلنا عيال قرية وكلمن يعرف خية ،،

والحين وقفوا التجنيس بس يجنسون الامريكية والبريطانية وجنسيه ثالثه ما اعرفها لان اصلا هال 3جنسيات مستحيل يتنازلون عنها وخاصه سفارتهم قوية ومحد يقدر يكلمهم

ترى هال3 جنسيات فتلقين اكثر من ناس اهني متزوجين امريكيه والله ولا طمعت ولا قطت جنسيتها ،،،،

بس اهني مبادئ الانسان تلعب دور مع احترامي للبعض ،،،

بما ان الحياة فرضت عليج جذي كافحي تحركي احرم نفسي من السفر ومن الحياة ومن كل شي على جنسية واصلي موجود من خلال النظر الى وجهم تعرفين من وين اصلهم

 

[sul6ana]

اسمحي لي بتعلميني بديرتي !!؟؟ البدون نشوفهم في الكويت عايشين بين الناس بدون السعوديه وين مكانهم ؟؟ اشباح عايشين الفضاء !!! انتي الي شفتيهم !!و حنا نضرب السعوديه طول و عرض ودرسنا بجامعات لمت شرايح المجتمع ماشفنا بدون :bbbiu:

اي بدوي يجي يقول انا من قبيلة و يجيب شهود 2 مب لازم اوراق كذا يخلص موضوعه و لا عاد فيه احد عايش بالصحراء بدون اثباث شدعوه تحسسيني افريقيا مب السعوديه

انتي بدون ! شدراش طلعتي من الكويت ؟

و الاخت الي تكلم عن الي في الحفر حبيبتي هذول الي جاوا هاربين من العراق وقت الغزو حطتهم السعوديه فمخيمات ... و كثر الله خيرها ان شاء الله يبون الجنسية انا اذكرهم ايام الغزو

بعدين و ين باقي بدون باقي الخليج !!؟ وعيينا شكل في بدون واجد ماندري عنهم

حسبي الله ونعم الوكيــــــــــــل...انا عنزيه ماني من عراق...واهل نجد معروفين هم عنوز...

حسبي الله ونعم الوكيل..حسبي الله ونعم الوكيل...حسبي الله ونعم الوكيل

 

[sul6ana]

اي حبيبتي في بدون بالسعودية - بس طريقة الحكومة حلوة بالتعامل معاهم - ما عطتهم اثباتات

لان تدري ان في لهم جذور من غير السعودية - وانتي عارفه ان فيه من العوايل اللي هناك من

بقايا الحجاج - بس خلت لهم مجالات وتسهيلات في كل مرافق الدولة وخاصة الخدمات الصحية .

واللي اعرفه بعد ما يصدر لمواليدهم شهادة ميلاد ترى .

ابشرج عندي اخوان اثنين مولودين اهني ولهم شهادات شفتي شلون كلاامج غلط...روحي اسألي وبعدها تفلسفي...

 

[sul6ana]

حابه ااكد على البنات اللي يقولن مافيه بدون بالسعوديه....حبيبااتي اسمهم قبائل نازحه يعني مجملين الاسم شوي عن بدون...وشوفي الجرايد وش فيها عنا وشوفي ابحثي بقوقل عن هالاسم وبتعرفين انه فيه بدون....واحنا عيال بدو محنا صوماليين

وحسبي الله ونعم الوكيـــل على كل من ظلمنـــا....

 

[توتا الكتكوته]

حسبي الله ونعم الوكيــــــــــــل...انا عنزيه ماني من عراق...واهل نجد معروفين هم عنوز...

حسبي الله ونعم الوكيل..حسبي الله ونعم الوكيل...حسبي الله ونعم الوكيل

في من عراق الاصل وش فيها اذا من عراق ترى اصول العرب منها في قبائل شيوخ هناك

كانوا وفي ناس واصله اهني ومعروفه وهي بالاصل هناك شيوخ على عشيرتها

لو اذكر لج الاسم الحين واحد منهم بس ماله داعي


والنعم بكل الاصول بس المهم الانسان ما يخبي اصله ويزور بأصل ثاني اعرف ناس

اهني اهوازيه حاطين العنزي بالاخير

يقصون على منو على نفسهم ؟؟؟

 

[بنت النوخذا]

ربي يجبر بخاطركم مثل ماجبرتم بخاطرنا بهالكلاام الطيب...
صحيح من خلت الدنيا خربت والحمدلله مادام فيه ناس مثل قلوبكم احنا بخير...

والحمدلله على كل حال...

ربي يوفقج يا الغاليه
و يسخر لج الزوج الصــــــــــــــــالح الي يسعدج يا رب
و تفرحين بعيالج ان شاء الله
و ان شاء الله شده و تزول يا رب

:yaaaaaarb::yaaaaaarb: