البر احتاج خبراتكم

[al_3needa]

السلام عليكم والرحمه






خوااااتي الله لا يهينكم بطلع البر :eh_s(9):

ومحتاجه خبراتكم :eh_s(15):

شنو اشتري وشنو اخذ

شلون ترتبون خيامكم وخصوصا المطبخ

كل وحده تكتب لي طريقتها وبالتفصيل

اكيد بستفيد منها كلها

لا تبخلووووووون علي :eh_s(22):

من الشقرديه اللي بتبدأ :eh_s(17):

 

[أحلى عيون]

اكيد انا اول شقرديه لوووووووووووووووول


شوفي حبوبه اولا :
ترتيب الملابس شوفي يا غاليه احنا طبعنا وطبع بنات عمي نلبس عباياتنا الكتف للبر وطبعا نكون لابسين بجايم متينه تحت العبي يعني ما يحتاج تلبسين دراعه بالبر اهم شي الستر يا وخيتي

ثانيا تاخذين لج جنطه زينه يعني تحطين فيها كل ملابسج وطبعا اهم شي الدلاغات متينه وملافع تغيرينها

وبعدين الخيام اذا فيها قاطع تحطين اغراضج كلها داخل القاطع احسن لج لانه فشله اذا زارووج الحريم واغراضج مبينه
واذا ما فيها قاطع لازم تاخذين على الاقل كبت صغير نص بس من تحت تحطين الفراشات فوقه يعني كبت نص فيه ادراج وبالادراج تحطين فيه اغراضج مثل مكياجج وشغلاتج المهمه


اما المطبخ احنا متعودين نسوي مثل الرف بالمطبخ نحط الطباخ الصغير للرحلات ويكون عندج مثلا مثل السطل الكبير تحطين داخله عيش والثاني سكر ويكون الرف حاطه فيه شغلج ولازم يكون عندج للمواعين الحديد الي يرتب فيه المواعين والله مااعرف اسمه بس موجود في سوق اليمعه على 4 دنانير


وهذا الي عندي واي شي تبينه انا حاضره

<<<تموت في البر

 

[al_3needa]

تسلمين يا الغاليه زهرة ربيع

لا خلا ولا عدم

انتظر باقي الكويتيات والا ما تحبون البر؟

 

[الحياة]

انا باجر بروح البر بس مو حاب شي اسمه بر وزين انه احنا رايححين نزور بس مو نقعد على طول

 

[مسك]

ما عندي خبره بسوالف البر

شوقتيني والله

يونسكم بالعافيه يارب​

 

[¤§ زيتونة §¤]

البر متعة ووناسة عجيبة


وطلعة البر والتخييم يبيله مصروووف وترتيب وتنظيم من اول شي عشان ما تتعبين بعدين


انتي اهم شي عندج الملابس والفراشات والمواعين
ملابسكم اشتري لهم الادراج البلاستك المقوى اللي على 6 تقريبا الكبار
والفراشات خليهم دايما بالشمس قبل لا ترتبينهم عشان تطقهم الشمس والهواء ورتبيهم ويفضل اذا عندج جياسهم او نيلون قوي تحفظينهم عن الريحة ولا عن الحشرات وحطيهم بخيمة غير اللي تتيمعون فيها او بزاوية مو مبينة وقطي فوقهم غطاء حلو شكله مرتب

والمواعين حطي لهم كبت اما خشب او نايلون وكله استعملي سهلة الغسل والتخزين وحطي طاولة للجولة اذا مو طباخ كامل وخليها مرتفعة عشان ما تجندسين كل ما بغيتي تسوين شي





وحاولي ما تكثرين الدثرة بالخيمة وخلي كل اغراضج بمكان واحد لو فوق بعض بس بترتيب

ولا تنسين تاخذين وياج معطر الفراش والغرفة ترى تحتاجينه وايد وينعش الخيمة

واذا استعملتي الدوة لا تنسين تحطين تحتها خشب عشان ما تحرق الفرش بالحرارة





والله حبيبتي البر يبيله انتي تجيكين على الاغراض وتشوفين بنفسج لكن ان شاءالله نفيدج باللي قلناه




وطلعة سعيدة ولا تنسين ركبي البقي وفرفري ههههههههههههههه

 

[غصون]

انا اصلا محاااااربة شي اسمة بر

بس اخذي لج مواعين نايلون عشان ما تغسلونهم بس تغطونهم

 

[الفرحه السجينه]

ما عندى زيادة على كلام زيتونه وزهرة الربيع

بس احس العبايه تضايق بالبر .. حلو تلبسين شال او بالطو ماله داعي العبايه وبعدين مخيم الحريم اكيد صاد عن الرياجيل


انا امي دايم تحط خيمة لنا احنا يا البنات وقعدتنا فيها والتلفزيون وخيمه حق العجايز الكبار وحلات ملابسج وفرشج بكبت تلقينه عند محلات الاثاث و يفضل تحطين قاطع عشان محد يشوف شغلج

وحلات الخيمه مفروشه قص وفوقها زوليه حلوه وحطي لج قعده حلوه ومرتبه

المطبخ عندج الارفف والاكبات الالمنيوم اللي بالسردايب ( السلطان - العميد - العنود الخ ) احسه انظف من اكبات الخشب لانه بسرعه ينمسح وما يطلع ريحه

وعلب البهارات موجوده بالسراديب هم حلوه وعمليه للبر

والحين المطابخ مو خيام ..الناس تطوروا

 

[كلي تفاؤل]

..طبعا البر يبيلة مصرووف صراحة خاصة للي يطلع اول مرة ..

الله يسلمج في شغلاااات واجد تحتاجينها ومنها

الزولية انا خذيتها قص من سوق الجمعه المتر ب2.5اخذيه على كبر الخيمة وضروووووري قبل تفرشين الزل بالخيمة حطي لج حصير او طربال وبعدين حطي الزل وفايدته انج لما تشغلين الدفايه والقاع باردة راح ترطب الخيمة ويندي الزل فأنتي حطي حصير قبل عشان يمنع هالشئ...

اخذي لج منضد تحطين فيه ملابسج وتحطين فوقه الفرش ..واذا اخذتي سرير طبعا يكون الفرش على السرير


وعندج الدفايه الجاز او الغاز بس طبعا لازم تطفينها بالليل لآن الرسول نهى عن ان الأنسان ينام والنار شغاله ...

علاق (شماعه )عشان تعلقين شغلج..

صندوق بلاستك لمكيااجج ومراية (اهم شئ)

امممم بعد

نجي للحمام :يفضل انكم تحطون سيراميك او سميت انظف ..ولاتنسين المنظفات

المطبخ رووحي سوق الجمعه وانتي بتنهبلين من الشغلات اللى فيه روووعه
اخذي لج مطبخ ببابين يكفي للمواعين والماجله خليها بالأدراج البلاستك او العكس ...

ويـــة طولت عليج بس حاسة بمعاناتج لأني اكة البر وما ودي اتبهدل هناك واي سؤال انا حاضرة

 

[الاحمديه111]

شوفي اذا تعرفين سوق الصباح اللي بالفحيحيل حلو واذا ماتعرفين يمكن بسوق الجمعه تلقين عندهم جنطه كبيره مثل ملوت الحجاج اول الكروهات بس عندهم ساده هذي للفرش يعني تصفطين الفرش وتحطينهم داخله وعندهم بعد مثل التانكي الصغير وله غطى ومن تحت حنفيه تحطين فيه الماي الدافي وتحطينه في الخيمه للوضو او للجهال الصغار ترى هذامريح حيل بعداستخدمي العلب السفريه للريوق اوتوزعين فيه الحلوى العصاري وتروحون وتردون بالسلامه.

 

[al_3needa]

يااااااااااحياتي والله كلكم

الله لا يخليني منكم

وربي دخلت ومتوقعه ما في ردود

بسسسسس فرحت حيل بردودكم

واكتب واكتب واكتب

والحين بروح اشوف شنو ناقصني بعد

والجمعه الجايه روحه لسوووووق الجمعه

ههههههههههه مع اني ما احبه ولا احب زحمته

بس الحين يقولون احسن ومنظم اكثر

تجييييييكم الاخبار ان شاء الله

 

[كلي تفاؤل]

خبرج عتيييييييج سوق الجمعه تغير صار 5ستااار

 

[سمسميه]

البنات كفوا ووفوزا
بس ازيد عليهم لا تنسين
الفليت(مبيد الحشرات)
كل يوم بالليل رشي الخيمه كلها قبل لا تنامون عن الخنفسان وتوابعه!!ههههه
وعليكم بالعافيه

 

[كويت الخير]

الحين الحمامات بالبر صارت 5 ستار مسوينها بالسميت وفيها مرحاض ومغسله ومكان للتشطف حق اليهال بالاضافه الى هذا الدرام من سوق الصفافير تلقينه يمكن ب 4 دنانير وتحطون تحته جوله صغيره بالغاز ام 2 دينارين عشان تدفى الماى انا عندى اهم شى الحمام اعزكم الله حق الصلاه والوضوء ورحله سعيده

 

[كويت الخير]

الحين الحمامات بالبر صارت 5 ستار مسوينها بالسميت وفيها مرحاض ومغسله ومكان للتشطف حق اليهال بالاضافه الى هذا الدرام من سوق الصفافير تلقينه يمكن ب 4 دنانير وتحطون تحته جوله صغيره بالغاز ام 2 دينارين عشان تدفى الماى انا عندى اهم شى الحمام اعزكم الله حق الصلاه والوضوء ورحله سعيده