الحبل السري ملتف على رقبة صغيرتي:::>دعوآتكم يآبنآت المسسسلمين

[حلآتي بخلطآتي]

السسسسلام عليكم ورحمه الله وبركاته​

اخباركم حبوبآت​

كنت اتمنى اول موضوع لي بركن الحمل موضوع بخبريه حلوه بس قدر الله امس رحت المستشفى​

مراجعه عادي وتحاليل والحآصل​

ماشاء الله قالت الدكتورة انو على السسونار صار الحمل في الاسبوع36 ​

يعني من يوم واحد محرم الولادة طبيعيه ومامنها خوف وان شاء الله بعد عشر ايام بروح افك الربط وربي يرزقني الولادة السهله الميسره ويطمن قلبي على بنتي وهي في احسسن حال ​

وطمنتنتي على وزني والضغط عندي والتحاليل السكر تمام والكالسيوم تمام ونسبة الدم تسعه وطمنتني عن الاشعه قالت الجنين تحت ووزنه 2800 يعني ثلاث كيلو إلا ربع تمآم ولله الحمد​

بس ان الحبل السري ملتف حوالين رقبة الجنين وما اعارت الموضوع اي اهميه الله يسامحها وروحت البيت على بالي كل شي طبيعي​

قريت عن الموضوع طلع ماهو طبيعي وان فيه اجنه تموت بسبب التفاف الحبل السري عليها ولو كانت الالتفافه بسيطه يمكن تأثر بدقات القلب او وصول الاكسجين للجنين وللدماغ​

سئلت ام زوجي قالت شكلك كنتي تنامي على ظهرك ومايقدر الجنين يتحرك فالتف عليه قلتلها لا والله اصلا مارتاح الا على جنب قال يمكن من الجلسات الطويله او يمكن من عند الله الجنين نفسسه​

اهم شيء انتي كل اربع ايام راجعي شوفي وضعه يمكن بحركة تنفك ويمكن بحركة تزيد ولاحظي حركته اذا قلت او شي روحي على طول​

وسئلت امي قالت نفس الكلام وقالتلي عن اخت ابوي ان جنينها كان ملتف عليه ووقت الولادة اختنق وانشل وقبل ست سنوات توفى وعمره 14 سنه وهو معاق ربي يرحمه ويجمعه بامه ​

المشكله الدكتورة ماقالت لي تعالي كل اسبوع ولاهم يحزنون يوم قالتلي بالمشكلة كنها شربت مويا ​

ومن وقتها وانا افكر :eh_s(2): ياربي اللحين يمكن تختنق او يصير لها شي لا سمح الله :eh_s(2):​

اللهم أحل العقدة من على ابنتي واحفظها بحفظك واحمها بحمايتك وارعها برعايتك واني استودعتها عندك فاحفظها لي يامن لاتضيع الودائع عنده واجمعني بها على خير​

يالله لك الحمد وربي تيسر لي ان شاء الله ولكل اخواتي بالركن ولاتنسوني من دعواتكم والله اني محتاجتها ​

ومين من الاخوات عندها خلفيه عن الموضوع او تعرف وحده مرت بنفس الشي تريح قلبي ربي يريح قلبها دنيا واخره :eh_s(2):​

 

[فرفشه منعنشه]

حياتي لا تخافين الحافظ الله واغلب ا لاجنه يلتف عليها ويرجع عادي بروحه الخوف وقت الولاده وانتي تطلقين يكون مازال ملتف لانه بيخنق الياهل مثل ما صار معاي في بجري سبحان الله كان تمام التمام ووقت الولاده لف عليه وازيدج بدل اللفه لفتين وكنت اضغط وهو ينسحب وما يقدر يطلع ويختنق ولحد قريب ما طلع راسه الدكتوره لاحظت انه لاف بسرعه سحبت شوي من الراس وقصت الحبل قبل طلعته والله ستر عليه وطلع رماااادي ازرق ومافيه اوكسجين وداخل عيونه دم وتم لونه لمده 10 ايام مايل على الابيض من قلت الاوكسجين وكاهو سمالله عليه جدامي بخير وعافيه
فلاتخافين الاجنه بالرحم اغلب يلتف عليها ولكن الخوف وقت الولاده واطلبي سونار وقت الولاده وانشالله تكون امورها طبيعية وربج يكحل عينج بشوفتها سالمه واسفه طولت عليج

 

[حلآتي بخلطآتي]

ربي يطمن قلبك فرفشة مثل ماطمنتيني ان شاء الله اموري تتيسر مثل ماتيسرت امورك

وربي يخليلك ولدك ويحفظه لك وين ماكان ياحبيبتي ​

 

[مجنونه هواهـ]

اولا حبيبتي مبروك على حملج وانشاءالله ربي يقرج بشوفتــــه
ثانيا لازم تروحين حق وحده تمرخ لج بطنج او دكتوره اوكـــي
بتختنق البنت وتموت >فال الله ولا فالج عشان جي لحقي عليها

 

[بعيدة الدار]

حبيبتي لا تحاتين ولاتخافين انا يوم كنت حامل في بنتي التف الحبل السري عليها بدايه التاسع وكان يلتف ويطلع وهكذا وكنت اروح مرتين بالاسبوع اشيك ع النبض لان حالتي خاصه
ووقعتني الدكتورة على عمليه قيصرية لو لاسمح الله تعسرت الولاده
واثناء الولاده اختنقت بنتي شوي لان يوم دفعت النف لفتين عليها
وحطوها بالشيشة يوم كامل
والحمدلله اللحين عمرها سنتين وماشاء الله مافيها شي

انتي بس ادعي ربك ليل نهار ان ربي يحميها لك ويسهل عليك ولادتك وتشوفينها بحضنك

 

[قطوووة]

مبرؤك الحمال

ؤان شاء الله الله يحفظها

 

[Loloki]

الله يطمنج فيه ويكون مافي الا عافيه حبيبتي صلي وادعي ربج

يمكن بهاللصلات الي صليتها يفج عنه الحبل سري قولي ان شاءاالله

 

[yasmeen_q8]

حبيبتي شلون الحبل السري ملتف ومخليتج عقب ١٠ ايام الحبل السري لو التف عالبيبي لازم ولادة سريعه هذا اللي اعرفه
اختي يوم التف الحبل السري على ولدها ولدوها بسرعه
وانا امي تقول ولدوني بازل التاسع لان الحبل السري كان ملتف علية
الله يسهل عليج ويقومج انتي والبيبي بسلامه بس روحي لدكتور و دكتوره ثانيه

 

[عنون محمد]

استودعيها ربج ,

 

[ام كوثر2007]

لا تحاتين يا قلبي خلي ايدج بيد الله وان شاءالله منتي خسرانه


عسى ربي يقر عيونج بشوفتها وتقومين بالسلامه انتي معاها


وعسى الله ما يضيع لج تعب يا قلبي

دعواتنا لصادقه لج ان شاءالله .


طمنينا عليج بليز

 

[توتا حمرا]

الله يحفظها لج ويبعد عنها كل مكروه وتولدينها ولادة سهلة وميسرة

 

[توكلت على الله 22]

الله يحفظها لج ويبعد عنها كل مكروه وتولدينها ولادة سهلة وميسرة

 

[ناني سيكرتس]

انا اقول روحي شوفي دكتور شاطر وخليه يطمنج احسن وان شاء الله ماكو الا كل خير ...
اذا تبين دكتور شاطر عندج حيان الاحمد بالمواساة وايد زين ..

 

[مواصله]

لاتحاتين الموضوع مامنه خوف ان شاءالله شوفي كلام هالطبيب:

http://www.youtube.com/watch?v=oYHkTKyde0s

 

[Eng.Kokoro]

لاتحاتين الموضوع مامنه خوف ان شاءالله شوفي كلام هالطبيب:

http://www.youtube.com/watch?v=oYHkTKyde0s

:eh_s(15): حدددددده يريح كلامه شكرااااا

حلااتي بخلطاتي الله يقومج بالسلامة وتفرحين بشوفتها وخلي ايمانج بالله قوي محد بيحفظها غيره واهوه حفظها طول فتره حمالج وراح يحفظها بولادتها *

 

[ابوي دنيتي كله]

حبيبتي الله يحفضها لج يارب وتشوفينها باحسن حال وصحه ويقومج بسلامه والله انا من رأيي انج تراجعين عند دكتوره ثانيه وتشوفين كلامها علشان ترتاحين اكثر والله انا بحمالي هذا اول مراجعه لي قالتلي الدكتوره احتمااال حملج خارج الرحم والله وخفت حييييل قالت بعد اسبوع تعالي عندي وانا ثاني يوم اروح لدكتوره ثانيه وطمنيييييي حيل وتضحك عل كلام الدكتوره الاولي تقول عل اي اساااااس فسرته حمل خارج الرحم وانتي حملج سليم

 

[عالية بهمتي]

شوفي اختي انا عيالي اثنين

ملتف عليهم الحبل السري مرتين

وما دريت الا عند الولادة والحمدلله الله سلمهم
بس انتي نامي على جنبج لا تنامين على ظهرج

الله يسهل عليك وتقومين بالسلامه ويرزقك الطفل المعافى

 

[Princess^Mom]

ادعي ربج الله يسهل عليج
وبإذن الله مافي ضرر على الياهل
اذكرلج تجربتي كنت حامل وكان ملتف الحبل السري مرتين على ولدي وعرفت يوم كنت بالسابع طبعا دكتورتي ماعلمتني عشان ما احاتي والنفسية تأثر مثل ما انتي عارفه المهم عرفت بالشي من دكتور اشرف بالسلام نفسيتي تعبت حيل وخفت وقلت حق دكتورتي اول شي قالته لي ليش قالج ماله داعي تعرفين قلت لها امانه في ضرر قالت دام ماء الجنين موجود مافي ضرر ان شاءالله بس الخوف وقت الولادة احتمال كبير قيصرية ونسبة الطبيعي 15٪ فقط عاد انا وقتها ما فكرت طبيعي ولا عملية كل اللي كنت اتمناه اني اولد وولدي ما يكون فيه الا العافية وفعلا اثناء الولادة انبط الماي وبدا نبض الجنين يقل لانه اختنق من الحبل السري ودخلوني على طول غرفة العمليات بس رحمة الله حبيبي ولدت طبيعي بغرفة العمليات وكان ملتف الحبل السري عليه 5 مرات تعبت حيل بالولادة والبيبي هم تعب بس الحمدلله على كل حال مالج الا الدعاء وانتي تطلقين لا تنسين الدعااااااااء والله يسهل عليج ويسهل على كل الحوامل ويقومنا بالسلامة ياااااااارب

 

[بيتي بوب بس كويتيه]

حبيبتي الله يسهل عليج والله يطمئن قلبج
ما عندي اي خبره بموضوعج بس ما حبيت اطلع من غير ما ارفعه لج

 

[بيتي بوب بس كويتيه]

بس على فكره ماله شغل النوم انا سالت دكتوري قالي هالشي من الله ماله شغل النوم عال ظهر او جنب