الحب ولا الفلوس...اتزوج منو؟

[om_7amad]

السلام عليكم

انا بنت عمري ثلاثا وعشرين سنه...كنت احب شخص من يوم عمري ثمنتعش..هالشخص مو من نفس مستوى عايلتي...مو عن مستوى بس انه غير يعني...مثل سالفت اصيل و مو اصيل جذي يعني...انا ما انظر حق الامور بهالطريقا يعني عمري ماكان عندي تفرقا و ماكنت اقول الا اخذ شخص من العايله الفلانيه ولا ما اخذ...هاذي نظرت امي و اهلي...انا ابوي مطلق امي و عشت مع امي و زوج امي...وزوج امي مربيني...المهم...الحين انا حبيت هالشخص واهوا وااايد زين و امي تدري بهالشي لانها كانت تحبا وكانت تبي يكون زوجي بس لانما اكتشفت شنو عايلتا رفظت الموضوع...المهم انه اهوا واايد زين وانسان ماعندا سوابق وحبينا بعظ وكبرنا ويا بعظ....وحلم حياتي اني اعيش ويا ونتزوج لانا احنا متفاهمين ومرينا بوايد امور ويا بعظ وعلاقتنا مرت بكل شي...يعني نعرف عيوب بعظ ومقتنعين ببعظ...وهاذا اهم شي انه احنا ندري احنا شنو و مقتنعين ببعظ ونبي نبني حياتنا ويا بعظ...بس امي تحب المظاهر و تبيني اخذ اسم عشان تفتخر جدام الناس...بس انا هاذي مو نظرتي..انا طبعي غير...انا ابي اسره ابي تفاهم ابي ايب عيال يعيشون الشي الي انا ماعشتا الي اهوا ام وابو في بيت واحد...من ناحيت ابوي الصجي انا متاكدا انه راح يوافق على زواجي منه..اي ونسيت اقول انه اختي قبلي كانت ماخذا شخص امي ماكانت راظيا في ف الحين تقولي انا مافرحت فيها ف ابيج انتي تعوظيني...احس بحمل علا سدري..يعني اقعد طول عمري اعنس وانطر الي في بال اهلي ايني وهاذا امل بعيد شوي ف مادري

المهم الحين متقدملي واحد بس ليلحين ماشفته ولا صار شي رسمي..بس اهلي موافقين مبدأين...لانا عندا وظيفا زينا وعندا فلوس...وانا الحمدالله اهلي ماعليهم قاصر واحس اني عشت هالاجواء يعني مو ميتا على الفلوس...بس الكل يقولي اذا خذيتيه الفلوس بتخليج تحبينه وتنسين هذاك...احس اني محتارا...الشخص الي احبا طول عمري انطر اليوم الي اخذا فيه..الحين اتخلا عنه عشان ياني واحد مجرد انه اغنا منه؟؟؟وعشان اهلي يبونا؟؟وانا مالي اختيار...الشخص الي احبا اقدر اخذا بمجرد اني اقول حق ابوي يزوجنا...لانه راح يسال عنه ويعرف انه زين وانسان مؤدب واهله ناس موحافظين و ابوي مو راعي اسامي او مظاهر مو نفس اهلي الي انا معاهم الحين..شنو اسوي؟؟؟استسلم واخذ الي ياني واهلي يبونا؟؟واعيش طول عمري قلبي مع احد ثاني واتحس اني هديتا؟؟ولا اخذ الي احبا وراح اظل بروحي بدون احد؟؟ واذا ماصار نصيب مع هاذا الي ياي هل اقعد انطر احد ثاني ايي واهلي بنقون واحتمال يعدي العمر وانا انطر ولا اخذ الي يحبني واحبه؟؟انا طول عمري حلم حياتي كان اني اتزوج وانا عمري عشرين و يكون عندي عيال وهالحلم راح لاني انطر اهلي يرظون بالي ابي والحين بصير اربع وعشرين وانا انطرهم..بس ابوي موجود ويقدر يزوجني..شسوي؟؟؟وادري انه الام اهم شي..بس انا امي تفشلت من اختي ف تبي تعوظ فيني بس انا شنو ذنبي؟؟

 

[اوبراا]

حبيبتي الفلوس ماتشتري سعاده اهم شي بريال اخلاقه وانج ترتايحين له ويكون نفس عاداتج وقريب منج بعمر حبيبتي اذا فات الفوت ماينفع الصوت ياليتني كنت بمكانج قبل الزواج وفي من نصحني وصحاني اختار بحياتي ياليت شنو فائدة الفلوس
اهم شي يكون يشتغل واخلاق ويقدر يصرف عليج حلات البيت يبنى بالاحترام والتفاهم والسعاده

 

[Stillness]

حبيبتي استخيري وادعي ربج احنا ماندري باجر شنو ممكن يصير يمكن اللي تحبينه تتهنين معاه ويمكن العكس الحب قبل الزواج بصراحه مو دليل على حياة زوجيه ناجحه وعموما الحياه بعد الزواج تختلف وااااااااايد عسى الله يكتبلج اللي في الخير وييسره لج ..... واذا بتسئليني لو مكانج شنو اختار... بصراحه ولد الفلوس عن تجربه الزواج ينسيج اللي قبله وفعلا الحياة تحتاج مظاهر وبرستيج خصوصا ان اهلج عندهم خير فليش يصير شكلج ناقص وانتي بينهم؟!؟ نصيحتي لج فكري بمصلحتج , انا حاشتي صدمه لول فما ابيج تمرين فيها وبالتوفيق :*

 

[بنت^كآليفورنيآ]

حبيبتي
كل اللي تزوجو عن حب استانسو جم شهر عقب صار زواج عادي مثل اي زواج

لاتتوقعين بتعيشين بوناسه

انا تزوجت واحد ما اعرفه والحمدلله احبه الحين ماشاءالله


لاتفكرين بالحب


فكري بالعقل


وايد بنات حبو ونسوووو


فكري بالاحسن

اوكي هم الاصل والفصل مهمين لعيالج باجر

 

[om_7amad]

اوبراا كلامج وااايد ريحني لانه صج انا من داخل ودي اخذ الي احبه..بس حاسه بتأنيب ضمير وهم خايفه شوي

ستلنس تهقين يعني الفلوس والزواج راح يعوضوني عن شخص يحبني وشاريني

 

[om_7amad]

بنت كالفورنيا بس انا الي حبيتا حب خمس سنين مو شويه وكانت نيتنا زواج..الحين فجاه اخذ واحد ثاني..احس باجر على اي غلطه يغلطها راح اتحسف اني فرطت بهذاك

 

[baa6aa]

الفلوس مو كل شي بعدين اتيي و تروح
وما تضمنين مثلا يدش مشروع او اسهم و يخسرهم وبعدين ؟ فالفلوس كلش مو مقياس
اذا كنتي بتنظرين لها من هالناحيه فهذا شي ايجابي انه ماراح يقصر معاج بالاشياء اللي تحتاجينها وماراح تقصرين على عمرج و على بيتج بشي
وقبل كل شي خل اييكم البيت و قعدي معاه شوفيه و استخيري
اذا حسيتي انج ارتحتي وافقي واذا لا الله يعوضكم بالاحسن و يحنن قلب اهلج
بس غلط انج ترفضين اللي يايج الحين اول شي شوفيه كلميه قعدي معاه و بعدين قرري
واذا على اللي تحبينه كلمي ابوج و شوفي اذا كنتي مصره عليه و تحملي عواقب اللي تصير وبعدين هذول اهلج
لو مهماا كان مردج لهم و مردهم لج والظفر مايطلع من اللحم و الله يحنن قلب امج يارب

 

[om_7amad]

باطا اوكي صح كلامج وانا قلت بقعد ويا وبشوف شحس عشان ما اتحسف عليه بعدين...بس مافهمت اخر شي يعني انتي تشجعين انه اخلي ابوي يزوجني الي احبه ولا لا؟؟ طبعا اذا طلع هاذا الي ياي مو زين

 

[البازوكة]

أختي بسألج

اللي تحبينه مستواه المادي زين .


لو زين خليه يخطبج وتوكلي وتزوجيه على الاقل بتعيشين براحه .. بس لو وضعه موب وايد زين بتتعبين على قدام وهالشيء بيأذيج من أمج وأهلج

 

[طيبة83]

والله مادري شاقولج

لو انج بنتي اكييد ما راح ارضا ازوجها واحد عايلته ما تناسب عايلتنا احنا هل سوالف عندنا واااااااااايد مهمه

واكيد لو تقدم لها واحد ولد حموله وغني بزوجها اياه

ياما ناس حبوا بعض وشسوالهم الحب؟؟؟ انتهى كله بعد الزوج خاص اذا الزوج وضعه المادي حده بده

يعني بنت متعوده على السفر والتشري وعايشه بفيلا طول بعرض تاخذ واحد يسكنها بشقه وتسمع بالسفر ماا تشوفه مثلاااا يعني وايد صعبه

والاهل معارضينها ولا يحبون زوجها وعيالها





بس للاسف في وضعج انتي الكلام هذي كله ما ينفع لان الفاس طاح في الراس

تحبينه من 5 سنين وتوقعين بتنسينه

انا قول اخذي حبيبج بس تحملي الضغوط الاجتماعيه والتقشف المادي

 

[اوبراا]

حبيبتي شوفي قلبج لمنو يرتاح وهم شوفي ظروفه يشتغل قادر يفتح بيته اخلاقه زينه سالوا عنه لاتفكرين بفلوس هي السعاده ان فات الفوت مانفع الصوت شنو راح تسوي لج السعاده مقابل شخص ماتحبينه ولايحبج حتى لو حبج معقوله راح يحبج اكثر من اللي قبلج
لنفرض تزوجتيه بتتحسفين تالي تقولين ليه فرطت بفلان خوش انسان شنو تشتري لج الفلوس شاليهات ملابس مجواهرت وتالي بتسعدج ملايين الدنيا ماتعوض قلب يحبج وشاريج ولا ليش نسمع ان بنات وفنانات عندهم ملايين وتالي انتحروا !
غير الوازع الديني مالقوا الامان ولاراحه بدنيتهم اكتئاب حاد
المظاهر ماتسعدج الفلوس تسعد اللي حولج يتلزقون فيج مرت فلان وووو برستيج وانتي ياحسره شنو تفيدج لو ريلج يعرف عليج بنات وقلبه مو معاج او انتي قلبج مو معاه فكري زين قبل تهدمين حياتج وخليج قويه قدام اهلج هذي حياتج وانتي اللي بتقابلينه وتعيشين وياه

 

[اوبراا]

خليه يحاول يفتح له مشروع صغير او يفتح له شي يساهم يحسن ماديته وهم لازم يكون يشتغل وانتي اشتغلي معاشج على معاشه تعيشج مستوى حلو وهم لو فتحتوا مشروع زين
الفلوس ماتشتري سعاده
اما لو وضعه المادي تعبان وايد ولايشتغل ولافي امل يشتغل لاتتزوجينه لانه صعبه شلون يصرف على بيته
وتاكدي من حبه لج وانه يبيج لنفسج مو طماعان فيج سالي عنه لو مايشتغل عطيه فرصه جم شهر يشوف له شغل زين لو عنده ديون ومطفر ولايشتغل حطي عليه اكس لانج راح تتبعين وايد
لازم الريال يشتغل مو شرط يكون غني بس اهم شي قادر يفتح بيت ويصرف على اهله ويكون له سكن ودخل مستمر

 

[حكآية قلب]

استخيرررررري ربج


و الحب بعد الزواج الحب مو كلام و نظرات وعزل الحب امن و حياااااة كاملة

الحب ماااايجي الا بعد زواج و عشرة من 7 سنوات وفوق

و التوافق بين الزوجين من 10 سنين وفووووق هذا شي علمي مو خرابيط اكتبها

الحين اسألي ربج يبين لج الزين


و الحب 5 سنين راح تنسينه ب اشهر

و للعلم الحب قبل الزواج حرام

5 سنوات ليش؟؟

هذا العيب في بعض البنات و الاهل يخلونها تعرف و تكلم يعني ببتزوجه تالي يصدمونها

 

[دنيا الصدمات]

الحين انتي تبين تعرسين وبس والا تبين تاخذين شخص انتي مقتنعه فيه
اوكي الحب مو كلشي الزواج مسؤليه فعلا
بس ليش تحطين روحج بين خيارين
يعني الحين ابو الفلوس لين طلع زين بيسعدج والي تميتي وياه سنين وارتحتي له لا ما بيسعدج لان امج تبي تتفخشر ع حساب حياتج
حبيبتي الام فعلاا كل شي وما تتعوض ولكن لا تنسين انها تطلقت من ابوج وعاشت الحياه الي هيا تبيها
والمفروض تتيح لج هالفرصه وتخليج تختارين
الحب نص الحياه الزوجيه ولو صارت مشاكل باجر ويا زوجج بتتفاهمون وتتسامحون باسم الحب خصوصا ان الريال شاريج
لكن الفلوس شنو بتفيدج اذا ما انوجدت الراحه النفسيه والحب والاحترام والتفاهم
انتي الحين تقولين تبين تدشين مقابله ويا الثاني عشان تجوفين الراحه النفسيه اوكي ولين ارتحتي له وطلع زين
انزين والصبي الي يحبج اشذنبه تتلعلبين فمشاعره ترضينها ع نفسج
اذا انتي مو جاده خلي للي لغيرج تتهنى فيه وتقدر مشاعره واتيحي لنفسج الفرصه تدشين مقابلات لين ما تحصلين الراحه النفسيه مع ولد العيله الي يرضيج

 

[amorah1]

استخيري والخيره فيما اختاره الله ​

 

[البابانه توته]

استخيري

 

[baa6aa]

في حالة انج ما ارتحتي .. مو ما تبينه عشان اللي تحبينه .. لا

اذا حسيتي انج مو مرتاحه توكلي على الله و كلمي ابوج اهو ولي امرج و اهوة اللي بيده كل شي

والام مردها بتحن باجر ان شاء الله ان تزوجتي و يبتي عيال وتدشين عليها واهمة معاج ماراح تقاوم احفادها و ان شاء الله يطيح اللي براسها

بس هذا ما يمنع انج تكلمينها اذا ابوج وافق قوليلها انج تبين رضاها عشان تتوفقين بحياتج و من هالحجي عشان تحن شوي و ترضى

انا مع انج تاخذين اللي تحبينه دام انكم عارفين بعض و انتي عارفه اهوة شنو واهوة عارف انتي شنو و تقدرون تعيشون مرتاحين

احسن من انج تاخذين احد ما تبينه و مغصوبه عليه عشان اسم و وظيفه و مركز و قلبج مع غيره حرام ماراح تعطينه حقه و بتكونين مقصره وايد بحقه فحرام

والله يسهل لج ان شاء الله

 

[غبنة عشق]

اذا كنتي صادقه في مشاعرك من ناحية تبنين عايله ما تنفصل ب حول الله اكيد راح تختارين الرجل اللي من نفس فئتك هاذا اريح ياما بنات اخذهم الحب لبعيد والواقع صدمهم ما زلت على البر خذي الشخص القريب من مستواك في كل شي ولا تتعبين انتهت ايام الناس اللي تحشم وتقدراما من ناحية الحب طبيعة الانثى اذا لقت الاهتمام من اي شخص راح تحبه وشوي شوي يجي الحب بعدك صغيره لا تستعجلين

 

[نـعـومـه]

استخيري أولا

ثانيا الشخص اللس تحبينه لي هالدرجه اصله موذاك !! يعني موكويتي مثلا وظيفته ضعيفه وماتعيشكم !؟؟

شوفي الشخص اللي متقدملج هل مرتاحتله يمكن ترتاحيله اذا مارتحتي رفضي ماكو شي غصب اهم شي راحتج

واللي تحبينه لازم تشوفين حل معاكم يا يخطبج او تتركون بعض اذا مافي امل

السعاده مو بالفلوس وبنفس الوقت الحب الحقيقي بعد زواج

 

[om_7amad]

كلامكم وااااااايد يريح والله اخيرا احس في احد يناقشني بالموضوع...وكل الي حولي يبوني اخذ الي متقدملي...احس اخيرا في احد فهمني شوي وحبيت نظرتكم..يعني اذا خليت ابوي يزوجني ماحس يأنيب ظمير من ناحيت امي؟؟ انا واااايد احبها وابي اسعدها بس بنفس الوقت ابي الحياة الي حلمت فيها مع الشخص الي احبه...بعدين اهوا كويتي وجنسيتا اولا بس انه يعني اصلولهم غير عن اصولنا...وعلا فكرا حتا الي متقدملي اصلا مو ذاك الزود بس عايلتا معروفا ومن ساير الناس يعني ومعروفين انه عندهم خير يعني هذاااي مغطي على اصلهم...احس ودي اقول اقول العوايل او الاصول عشان تفهمون بس ماقدر هههههه وبعدين الي احبا حالتهم الماديا عايدا جدا يعني مو نفسنا والحين اهوا توا بيتوظف لانا طلع من وظيفتا من ظروف صارت ف الحين بيرد يتوظف قاعد يدور مكان