الحمدلله على كل حـال .. أتمنى تفيدوني خواتي !

[يا رب]

السلام عليكم .. يعيطيكم العافية خواتي ..

إللي يقدر يفيدني لا يبخل علي جزاه الله خير ..

أنا عندي أختي الصغيرة عمرها 9 سنين .. ما تتكلم ..

وأهي صغيره كان يجلها تشنج .. هالتشنجات استمرت معاها بين فترة وفترة .. نتيجة لارتفاع درجة حرارتها .. ليما دخلت العناية المركزة نتية لهالتشنجات ..

تعافت الحمدلله وطلعت من التشنجات .. بس كانت تجيلها هزات أو نوبات ماني عارفه شنو بالضبط نسأل الدكاترة يقولون نتيجة للكهربا اللي براسها .. هالهزات كانت تطيحها على الأرض واهي واقفة تفقد الوعي لثواني ..

بعده تم تشخيصها بأنها مصابة بالصرع .. رغم إن أعراضها ما تخلينا متأكدين 100% إنها مصابة بالصرع المهم أخذت دوا والحمدلله تعافت تقريباً من هالهزات وما قامت تجيلها لمدة سنتين ..

ولادته كانت عسرة " بشفاط " وأمي تأذت قبل الولادة نفسياً وبعد الولادة صحياً .. الحمدلله على كل حال ..

ألحين البنت كبرت .. ومادخلت مدرسة لأنا " بدون " محد يقبلها إلا الخاص ومصاريفه كثيرة الله يعين ..

لكن الحمدلله تيسر حالنا نوعاً ما .. وأخذنا أختي للطب التطوري على اساس يعطينا تقرير وبناء عليه ندلخها المدرسة ..

لكن هناك كانت الصدمة !

شخصها الدكتورخلال 5 دقايق بناء على أسئلة تافهة مثل : شسمج ؟ مع إنها ما تتكلم !
يعطيها صور حيوانات ويقول لها شنو وشنو ؟! واهي ماتتكلم ..!

وطلبنا اختبار ذكاء وهناك كانت المصيبة أعظم

الأخت الدكتورة الفاشلة تقول لا تحذفني وتعورني !! رغم إنها هادية بس كثيرة الحركة !! وهالشي خوفها !

وسألتها وين شعرج وين عينج ؟ جاوبتها لأنها تسمع وما تتكلم !!

المهم كانت نتيجة التقرير تحطيم واهي تأخر عقلي شديد ونسبة ذكاء لايوجد !!

شلون في آدمي مافيه نسبة ذكاء الحمدلله والشكر !!

أختي اسم الله عليها تعرف اسامينا وتناديهم بعض مرات بس مايكون مفهوم كلامها 100% تنادي يمه ويبه ..

تنفذ الأوامر إذا طلبنا منها .. قاعدين ندرسها بالبيت عالأحرف وتعرفهم وتنطقهم .. وتمسك القلم تحاول تكتبهم .. يعني اللي يشوفها يقول عاديه ماتعاني من أي شي ..

بس تخاف إذا شافت أحد غريب .. ما ترضى نترك إيدها إذا طلعنا لازم نمسكها .. إذا تركناها تروح تركض بس ترجع لنا

يعني مادري شقول

بس قلبي وايد يتقطع عليها .. إهي شمعة بيتنا ونور عيونا كلنا ..

بس الحمدلله على كل حال وإحنا مؤمنين بقضاء الله وقدره ..

إخواني كلهم سليمين الحمدلله ..

ألحين خواتي ياليت تفيدوني ذا أحد قدر يشخص حالتها بناء على خبرته وثقافته يعطينا الأمل بس !

ووين نقدر ندرسها .. وهل يقبلون البدون ؟

ومشكورين وآسفة طولت عليكم والله يحفظ لكم عيالكم ويشافيهم آمين يارب ..​

 

[الصابرة المحتسبة]

حياج الله أختي بينا
وترى إذا على التشخيص خليها على الله ,,,, بس لا تيأسون وتايعوا الحالة وربي يسهل أمركم

 

[مشاعل الشمري]

ونعمه بالله الحمد لله على كل حال مثل ما قالت لج اخيتي الصابره اذا على التشخيص خليها على الله بس انتو لازم تعرضونها على اكثر من دكتور وتكافحون لها والله بيرزقكم انشاءالله بواحد يريحكم

 

[نونا العتيبى]

أختي الله يعينكم ,,,أنتوا روحوا حق دكتور ثاني بالطب التطوري عشان يشخصها عدل ,,وأذا عالمدارس ماأدري المجلس الأعلي يقبل البدون؟؟

 

[@شمس الضحى@]

ما أملك لهاا الا الدعاااااء الله يشفيهااا ويخليهاا لكم بس لااااااتهملووووووونهااااااااااا

 

[بنت الكويت1]

حبيبتي الطب التطوري اللي في البنك الوطني في اكثر من دكتور واكيد عطوج موعد ثاني حاولوا تطلعون اختكم وتخلونها تتجاوب مع الاخرين وجربي الاختبار مرة ثانية ومن حقكم تختارون دكتور ثاني والله يشافيها يارب

 

[HearT ChocolaTe]

التقيم فاشل بالطب التطوري ومعروف الظلم فيه .. وإذا بتقارنينه بالدول اللي برا بتنصدمين
أكثر حبيبتي أنا أقول لنفسي ولكل أم أو أخت كبيرة كانت أو صغيرة
الذكاء أنتي بنفسج تكشفينه وهم حبر على ورق بس !!!

الحين أنتي قدمتي أوراقج للمجلس يعني هي عندها ملف ؟؟ المجلس رفضها وإلا شنو ؟؟
يعني التقرير اللي استلمتيه وديتيه للجنه؟؟