عاد اليوم يوم الزفر .. بعلمكم تسون المطبق .. اي يابنيات الزفر يعتبر مفتاح لكريشة اي كويتي .. اذا بغيتي تصيدينه وتخلينه مثل الحلقه بأيدج طبخيله مطبق ..وكثريله من العداني وذاك الدقوس الخاثر والاجاار الناطع وادوات الخياس طبعا .... شوفوا يابنات بليس اليوم طبختها مطبق زبيدي حق 4 انفار .... نحتاج زبيديتين ولميات شاترين .. و ثلاث جيلات عيش.. لومي اسود .. شدة كزبر .. كركم .. كمون .. كزبر ناعم .. فلفل اسود وهيل ناعم ..3 بصلات .. اول شي بنسوي الحشو
بسم الله بدينا وعلى نبينا صلينا .. ياعيايز المستقبل العيش عرفنا شلون نغسله ونقعه ماله داعي اعيد وازيد زادكم ربي من حسناته ..طبعا الزبيدي مشقوق من الظهر عشان نحشي بطنه ونغسله زين اكثر من مره وبعدين نحطله كركم ونخليه فتره و نقصص البصل صغار ونفرم الكزبر وندق فصين ثوم .. الحين نحط البصل في جدر صغير او مقله ونحركه ومن يتلزق نرش عليه شوية ماي لما يقلب لونه يعني يصوفر هني نحط الكزبر ونحمسه معاه ونحط اللومي الاسود الناعم و الفلفل الاسود وفوقهم قفشة دهن ونحمس لمدة عشر دقايق .. ولما يخلص نخلي الحشو على كتر.. والحين نغسل السمج مره ثانيه ونرش عليه شوية لومي اسود ناعم وفلفل اسود ناعم وهيل ناعم وقبلها فركوا بطنه بالثوم ونحشي بطنه بالحشو ونربطه بالخيط .. والرباط له طريقتين في ناس تلف الخيط عليه لف وفي ناس تخيط بطنه وعلى هواكم شوفوا الاسهل .. وعقب مانربطه نرش على الزبيدي باجي البهارات نخلطهم مع بعض والحين نحط مقله ونقلي الزبيدي شوي مو وايد يعني نص ونص ونشيله على كتر وقبلها نكون مزهبين الجدر وحاطين فيه ماي وشووي من البهارات وفص ثوم مدقوق عدل وملح شويه بعدين نخلي الماي يفوح ومن تقلين السمجه شيليها وقطيها بالماي عشان الماي ياخذ ريحة السمج وبنفس الوقت السمجه تستوي عدل يعني خليها تفوخ 5 دقايق مو اكثر على حسب نوع السمجه والفوح يكون على نار هاديه عشان لاتفتت السمجه .. بعدين تشيلينها وتحطينها بصينيه او باي شي ثاني عشان تزل مايها .. ولما تخلصين كتي العيش فوق الماي اللي بالجدر وشوفي قياس العيش مع الماي يعني هبابه يغطي العيش لاتيصير زايد ولا يصير ناقص.. مو تخورونه وتخبصون السالفه ترى والله بتحصلون طراقات وفناقر من ريايلكم .. اي نكمل ومن تشوفين الماي خف ومايبين حطي حديده تحت الجدر وقصري على النار وبعدين حطي السمج وباجي الحشو اذا زاد عندج على العيش وسكري الجدر عدل وبجي تقريبا خلصنا.. اي هني يبدي الحش في ناس يحطون زعفران فوق السمج اللهم ياكافي مادري من وين يايبين هل طريقه ..لا اهل جبله ولا اهل شرق يحطون زعفران فوق السمج ولا حتى اهل المرقاب بس هذي شحاطة حريم .. وقبل منين لنا زعفران؟؟ مانشوفه الا بالحسره ونسمع فيه بس واذا قالوا رحنا بيت فلانه وعندهم زعفران نشرنا الخبر بكل سكه وبكل عاير ..اي ماعلينا من تشيحط حريم الكويت نكمل ترى طبختنا خلصت والحين وقت النجاب .. اذا نجبتي العيش تشيلين الخيط من الزبيدي وتاخذين من الحشو وتزينين فيه القنجه ولاتنسين دهن العداني ترى مهم مع المطبق ادري في ناس تقول موزين وفي ناس تقول كثروا منه ولا تحطون دهن مرت ابو .. انا عندي لكم طريقه للعداني ماتضر .. شوفوا يابنات قريح تاخذين طويسه وتحطين فيها عداني وتشيلين غطاتها وتحطينهم بالجدر وهو يتسكر بجذي اخذ ريحة العداني من غير لا تحطين عليه شي.. شفتوا شلون امكم العوده دندره ذكيه؟؟ طلعوا علي مالت عليكم حتى مالت وعليكم بالعافيه
وهذا المطبق وسوينا وطبعا هذي طريقة جميع انواع السمج .. الزبيدي والشيم ماكول الحشيم والبالول والشعم وغيره بس الكويتين يحبون الزبيدي مادري ليش ( زبيدي حق وليدي) هذي بعضكم راح يفهمها بس
طبعا حافظين شنو تحطون من خضره وغيره مع الاكل مثل الدقوس والاجار والمعبوج
وعقب ماتاكلين وتخلصين وريلج يترس كرشته ويشبع هني روحيله وقولي اي يابوعيالي شرايج بالطبخه شفت شلون مريتك طباخه .. راح يقولج الله يقويج الحقيقه طبخه عجيبه وريحتها خنينه .. عاد هني استغلي الوضع وطلبي اللي تبينه لان راح يكون خدران وصاير اثول ومندمغ
اي يابنات لبيه اللي فيكم عندها اعتراض على الطبخه او فيها تحلطم خل تكتب اللي بخاطرها وطرشه على صندوق البريد
مع تحيات امكم العوده دندره
