مساكم الله بالخير والنور .. شلونكم يابنياتي شخباركم .. اليوم بنسوي اكله كويتيه عتيجه شوي والحين مافتكر وايد ناس يسونها وادري انتوا بتقولون استغفرالله.. والله يزيد النعمه .. لانكم ماتستحون ولا تعرفون الاكل الزين ..المهم اكلتنا اليوم الميدم .. والميدم اكله يحبونها اهل الكويت قبل ويسونها من اليريرو الولد .. .. الولد المقصود منه يكون حجمه ولمي يعني صغيير .. ومو شرط يكون نثيه او ذكر.. وترى مو شرط تسونه مع يريوور تقدرون تسوونه مع النويبي او اي سمجه لكن يفضل اليريووور .. ماعلينا
نحتاج حق طبختنا .. يريووور ولييد .. 3 جيلات عيش .. 5 حبات بصل .. شدة كزبر .. والبهار عباره عن هيل .. ملح .. فلفل اسود .. دارسين .. مسمار .. لومي اسود .. كركم .. كمون.. كزبر ناعم
بسم الله بدينا وعلى النبي صلينا .. اول شي نغسل العيش ونخليه يتنقع وماراح اقول طريقة الغسيل لان انبح صوتي وانا اعيد وازيد ولا راضيين تفهون .. مالت ...اي نكمل شغلنا .. بعدين نقص راس اليريووور ونقطه ونيييب جدر ونحط فيه ماي وفوق الماي نحط .. دارسين خشن 4 اعوااد و مسمار خشن 4 حبات وهيل 5 حبات و قفشة صغيره كمون اللي تحوسون فيها الشكر حاس الله بطن العدو .. ولا ترسونها حدها؟؟ لا يعني ترس عادي مايصير فيها جبل .. ماعلينا ونحط مثلها فلفل اسود و كركم .. والملح طبعا قفشتين كبار او اكثر على حسب ذوقكم .. وخليه يقلب لمدة ثلث ساعه او اكثر وعقبها نشيل اليريوور من الماي ونحطه في ماعون او صينيه ونقعد نشيل الشوك واليلد منه ونفتته بالايد .. ونخليه على كتر .. وبعدين نشخل ماي السمج ونحط منه بجدر ونكت فوقه العيش .. عرفتوا؟؟ ولا بس تهزون بهل راس مثل الكمخه ...اي هين .. وتقدرون تسون الميدم مع مشخول عادي ...ماعلينا نجبس العيش بماي السمج ونخليه يتسكر على راحته ..والحين نروح حق السمج .. نقص البصل صغار بحجم بصل الحشو ونحمسهم بجدر مع نتيفة دهن .. ونحط فوقهم فصين ثوم و البهار الناعم طبعا مثل فلفل اسود قفشه صغيره وكمون والكزبر الناعم و قفشتين او ثلاث لومي اسود ناعم
ونحمس الحميس شوي وبعدين نحط اليريوور المفتت عدل وشايلين منه الشوك .. وفي ناس تحط السلسله مالت الظهر تقصص الشوك اللي فيها و تحطها مع الحميس وتصير جنها بسكوت اتقروش .. المهم نحمس الحميس عدل وتقدرون تحطون شوية معجون طماط مع الحميس على هواكم .. ومن يخلص الحميس تخلونه تحطونه بالجدر على كتر .. و وقت النجااب يصير الحميس هذا اهو الحشو فوق العيش يعني تقريبا نفس طريقة حشو الربيان او نفس الفكره . وعليكم بالعافيه
اييي يابنات الدفاتر .. اللي تسوي فيكم الميدم صج بتكبر بعين ريلها ولا ان عييونه ماتكبر جنها عين عنجووووه
بس صج صج بيفرح وبتدقييين امه عيوووز النار اللي مايعجبها العجب .. سليحط ..
ولاتنسون عاد الخضره السنعه ام الروايح القتااااااااااااله مثل البقل والرويد والبصل الاخضر .. والدقووس الاصلي و الاجاااااااااااااار الطيب بوريحه خنييييييييييينه
نصايح امكم العوده
يلد اليريووور تاخذينه وتحطين معاه شوية كنار وبمبر وتفركينه بجسمج وشوفي شلون راح يصير طريي ناعم شزينه .. ولا تاخذين اليلد وتسوين قناع على ويهج وتخرعين رييلج كل يوم عشان يسووقج طراق وتنامين
عاد هني الحجي اللي امها صج اتعنفق ولا تقول شي ولا هذا في وذاك مادري شنو .. اول شي قوليلها اذا فيج خير قومي سويلنا ميدم وثاني شي عطيها ايميلي وانا اعلمها
ولا تنسون شعرانا
كونوا معانا في حملتنا ضد الرجال وحاربتهم من خلال كروشهم . والهوايه حمايه
امكم العوده دندره
