الدعاية والاعلان بين مطرقه التربيه وسندان العادات والتقاليد

[سنا الفضه]

السلام عليكم بنوتاتنا الحلوات

بالاول شرايكم بالعنوان حلوو مو صح ترى متعووب عليه صار لي اسبوع وانا اخطط فيه واكتب وامسح وارسم<<يعني ابد ماهو هين ها:eh_s(15):

المهم اقول لكم على الي نشووفه وعطوني رايكم ترى رايكم شباب مهم

الي يصير تشوفون دعايات التلفاز بصراحه تفشللللللللل

لمن تكونين قاعده مع رياييل سواء ابوج اخوج او اي احد حتى ريلج بصراحه ينقص ويهج من الي تشوفينه

تدورين الرمووت كنترول دوااره عاد انتي وشطارتج وساعات من رداة الحظ الريموت يندعس تحت القنفه والا يضييع والا تدودهين وتنثولين من الي تشوفينه بدال لا تغيرين المحطه تعلين الصووت

يعني الكل شايف شايف

وانتي يمالج من قصه الويه والفشله

والا اذا يمج ياهل وينشب ببلعومج شنو هذا واشحقه وليش علشان شنووو هذول ملوت منو؟؟؟

خاصه ملوت الاولويز وشسمونهم وخزياه بس:eh_s(22):

تعالي فججي عمرج وعابلي بالجواب

عيل بالله عليكم تشوفون دعايه النسفيت

مفصخه ومغطيه الصوب الي فوق وبنطرون ابيض لينن وتحلس على بطنها

والمصيبه جسمها ايننن عساج الريح ام الرحاريح احنا شكوو فيج بالله متفصخه والا هو على حليب

يعني ترى جسمي من ورى هالحليب

حليب والله حليب قاصين علينا

هذاك اليوم بنتي قاعده تطالع شوي الا تطلع هالدعايه قبحها الله

بنتي هني نطت وقالت لي مامي<<<اغلبكم يعرف السر بكلمه مامي ماله داعي فضايح

مامي وخزياه عيب غضي البصر شوفييييييي<<<شلون غضي البصر وشوفي مادري بصراحه

بس حتى الطفل ينقد على الي يشووفه

والا دعايات الشامبو والبونتي بعد اقصاه كاكاو هالخرابيط شكوو

وكلوووووووووو كووووووووووووووم ودعايه الديودرانت كوووم اخر

وي يمممه تاكل موزه وتقط القشره ويتسلط عليها اصبع عود ويزحلقها فيها تطير جنطتها على لوح تزلج وقصه قصه وعباااااااااااااااااله وسيناريوو

بالاخير يلقفها صبي ويتمنظروون ببعض بنظرات اعجاب ومحبه وينقالكم مستحيين امحق حيا

بعدها يشم ريحه صنانها واتفشل هي عشتو<< ليش بالله يعني انتي تعرفين الحيا

بالله عليكم هذي دعايه هذا مستوى وييييين قاعدين عيب ورب الكعبه عيب وشق ييب على قوله الاوليين

والا دعايه فرشه الاسنان والمعجوون يطلع من حلجه هوا بارد والا حار

هو:eh_s(12): بعد معجوون اسنان والا فرشه شكووو

حتى دعايات العطورات لازم وحده منسدحه جنها توها قاطه حوارها وتعبانه

والا ريال منسدح على سيارته متنح تقولين طرح مر

وهم هذيج الدعايه هادي بفرح قريييييبتي لبست الي مايتلبس وكلوو من اولويز

هذا حجي هذا منطق

شلون يبونا نربي عيالنا

وين العادات والتقاليد عنكم

خلونا نفرض جدلا انه الي مسوينها مجتمعهم وبيئتهم مغايره لنا

حلوو

طيب شكو تيبونهم لنا وتخلونا نتلعوز ويا هالدعايات الي ماهي من ثوبنا ولا نعرفها

الحين الي بيمنع عياله عن الكليبات والحجي الفاضي ضروري يمنع عنهم حتى الدعايات

خلف الله علينا اووول

دعايتنا على قدنا

جسوم ايه ده ياجسووم

سمسمونج ياسبيشه سمسونج

والا دعايه اذا طلعت قمنا انا واخوي الصغير انتبوسم يعني مستحيين ووخزياه فشله دعايه السليبات والفنايل القطن ملوت الرياييل

الي يوقفوون متخوصرين وهم طرق الاندر ويرات

وتطلع عيووز تحاول تقطع السير مال الاندر وير

كنا انا واخوي الصغير نتبووسم ينقالكم شايفين شي عييب وخطير

هني كانت تيينا الرزه المزدوجه على روسنا والا ذييج الهبده المحترمه بنص اليافووخ من امي :eh_s(4):

يعني استحوووا

وتربينا نعرف الحيا والمستحا

اصلا قبل الي تلبس قصير يعني لمن تقعد تطلع ركبها كنا انتح جدامها يعني شايفين منكر ونخليها فقيره بس اتلتل بتنورتها مستحيه

ليش لانه الفطره سبحان الله عندنا موجوده وسليمه بالله عيالنا الحين ماتقولون لي شلووون بيطلعون للمجتمع

يعني عيونهم متعوده على شوفه الخاربيط والمفاصيخ هزلت والله هزلت

لمن يشوفون وحده لابسه علاليق عادي عندهم الا اقل من عادي

بالله انتو اشرايكم بهالدعايات مو قله حيا وسووء ادب:eh_s(4):

بس وي قرقت واايد اترك لكم المكرفوون يله حووووووول​

 

[أسيرة موني]

هاتي المايك اهووووووو

ون تو ثري ون تو ثري

اهم شي الاولويز <- بدا الطب

في دعايه وحده تكون نايمه على القنفه بعدين تقوم و تتحرك بحرية

يعني ترا كنت نايمه ومابقعت لوووول ..

عاد قطيعه اولويز يسوي حساسيه احسنلكم الي اسمه كوتكس <- شغلت دعايات خخخخ

ولا اتس برايفت .. الي يسوون رياضه و يتحركون بحرية .. اي نطروني لووول .. احنا بالثنوي من اتيينا انييب طبيه مانلعب بالبدنية

..

اما مال باونتي هذا شفييييييج يعني تعيشين روح المغامرة غمروهم بتيزاب قولي امييييين ..

اهم شي دعايه الي ماسكة موس والي ماسكة شيرة و الي ماسكة شمع عشان يزهبون العروس

طلعت الاخت فاهمه السالفه و مستخدمه براون لووووول ..

إقزاجريشن يعني مبالغه بالهندي ..

ولم تطلع هالدعايات سبحان الله اخوي العود دايم يكون ماسك الرموت و يتفرفر بالغرفه .. انزين ليش يعني لوووول .. وانا ومرته ماغير نطالع بعض و نتبوسم ..

مثل ماقلتي

والله لو تشوفين الدعايات كلها او اغلبيتها موضوعها لا يمت للمعروض بصله و ثومه بعد

ولا هذي دعايه سنكرز مالت اشارات المرور و مالت الكرة خرابيط شكو هذا بهذا ..

والله يسوي تشتيت بين الموضوع و المشهد .. ماكو موضوع صار تخبط

بس صراحه .. احلى دعايه مالت البيبسي .. الي يحط امية فلس بعدين مادري شيصير داخل البراده لين توصل العلبه لي الباب

اهم شي الشفايف الي تبوس البطل لوووووول هذي شكو مادري ..

بس يالله شتسوين .. محد يسمع عمك اصمخ ..

بس الي استغرب منه شلون يخلون الياهال يمثلون عالي يبونه ؟؟؟

شيفهمه هذا بالله

اييييييي ولا الدعايه الي مالت البف باف جنه

لم تقتل الزهيوي تطهره

لوووووووووووول الحين مات تطهرينه شكو بناكله احنا ؟

خخخخخخخخ يمعوده مانخلص بس قرقت وايد

يالله المايك للي وراي

 

[Smarties]

أسيرة موني المايك لو سمحتي:eh_s(13):

ألو ألو

اتفق معاج اختي سنا الفضه الدعايات هالأيام تفشل و تقص الويه بعد :eh_s(22):

كل الدعايات بصووووووب و دعاية الفياغرا بصوووب :eh_s(14): !!! في بعض القنوات الكحيانة يعرضون دعايات للمقويات الجنسية والله شي يفشل ... مره انا و اختي الصغيرة قاعدين نطالع تلفزيون جان تطلع لنا دعاية فياغرا جان تسألني سمارتيز حق شنو هذا ؟؟؟ قلتلها مادري !!!! اشوه اني ما شفتها جدام الوالد والله إنها تفشل تفشل

قبل واحنا نطالع الأفلام الأجنبية ايدنا على الريموت الواحد يخاف تطلع له لقطة بوسة !!! الحين بعد كل فاصل إعلاني نغير القناة والله مثل ما قلتي الواحد يخاف من الإعلانات ...

ماكو على قناة الكويت ما عندهم غير دعايتين ... ليتل سيزرز (بيتزا بيتزا) و بوبايز للمأكولات البحرية :eh_s(15):


المايك للي بعدي تفضلي اختي

 

[شاهة]

اووووووووووة سنا من مبطي انا كارهة اتلفزيون شحقة من هالبلاوي
دعايات العطور بالذات في ايحاءات مو حلوة بالمرة
غير الدعايات هالبرامج والمذيعين الي قمت الملاقة شوفي بس برامج الراي وانت طلقين التلفزيون بالثلاث

وللعلم في كتاب لكاتبة امريكية تقول ان التلفزيون خطر علي الاطفال وكلامها "لماذا اسمح للعدو بدخول بيتي "طبعا تقصد الtv

 

[المعنقيّة]

يسلمووووووووووو عالموضوووع المميّــــــــــــــــز

 

[المعنقيّة]

يسلمووووووووووو عالموضوووع المميّــــــــــــــــز

 

[جورية كويتية]

بصراحه صج فشله
وله مره وانا بالطبيب عندي موعد
والتلفزيون شكبره وكلا رياييل ويحطون هالدعايه
وخزيتاااااااااااااااااااااه
صج فشله


بالصين ما ادري اليابان وحده منهم بس اتوقع اليابان امنعوا هالدعايات بتلفزيون
مراعات لشعور الناس
واحنا ليش محد يراعي شعورنا ؟؟؟


مشكووره حبيبتي على الموضوع

​

 

[قهوة عربية]

مشكورة سنا ...صاجة حبيبتي

انتي شتلحقين عليه على الأفلام وإلا على الدعايات

أحسن شي نقطع التلفزيون بكبره أن يدخل بيوتنا >>> بس هذا مو حل !!

الله يهديهم وينور بصيرتهم ويفهمهم

 

[أم روعة]

والله في دعايات الصراحه حلوة وتشوقج تشترين المنتج .. وفي دعايات بايخه وتفشل
انا اعجبتني فكرة دعاية النسكافيه اللي يروحون دواماتهم وفرشهم معاهم لازقة بظهرهم ولما يشربون النسكافيه يصحصحون ويقطون الفرش من الدريشه لان هذا اللي يصير معاي بالدوام يوميا هههههههه

تخثني دعايات ريكسونا ( الديودرانت) اووووف تولع جبدي

 

[ii DareeN ii]

الله يا سنا والله جبتيها على الجرح والله الواحد صج يكره يشوف التلفزيون بسبه هالسوالف يا دعايات الويز ولا دعايه كلها ايحاءات جنسيه ولا دعايه المنشطات الجنسيه الي اليهال يسالون شنو هذا وتعالي شرحيلهم هذي قصه ثانيه بصراحه منتهي الوقاحه :eh_s(14):

 

[Filakawyia]

وين وصل المايك

اي والله دعاياتهم تفشل

عمى بعينهم اللي يسوون الدعايات مايفتشلون جدام هالمصورين و المخرجين و المنتجين و غير الصعايدة اللي يتيمعون عشان التصوير

قطيييعه ماكو حيا

ولا دعايه فازلين

ويييييييييع كل وحده جلحه ملحه ريولها امخططه تقول نمر و قاعده تتدهن

ولا الحامل عاد الله يلوع جبدها

حتى الياهل اللي باخر الدعايه يخرع

ويهه جنه ريال كبير و جسمه بيبي

الله يلوع جبودهم​

 

[BaiTotia]

ههههههههههههههههههههههههههه

عجبني تعلقيج على دعاية الديودرنت

لما شفت الدعاية مت من الضحك

دعايات الديودرنت دايما تفشل! تذكرين الدعاية إلي يدخلون بالأصنصير و يتسكر عليهم

وبعدين تطلع البنت لابسه هدوم الريال و العكس! هذي أوقح دعاية شفتها

و دعايات الكوتكس بعد

مشكورة على الموضوع