{ ...الدكتورة رشا الصفي تجيب على استفسارتكم ..} استضافة اسبوعية

[تروبيكانا]

سوري دكتوره رشا اذيناج
بس بغيت اعرف اقدر اعطي بنتي اللي عمرها 9 شهور بيض وشنو الافضل اول البياض او الصفار وشكرا

 

[بشابيشي]

مرحبا دكتوره يعطيج العافيه على الرد
دكتوره عندي سؤال انه حق بليل لما بنام اسوي ميميتين حليب وعندي السخان اللي يسخن الحليب لما تيوع بنتي بس اسخن لها الحليب واعطيها عادي ولا لا يعني الحليب مايخترب ليصبح
وعندي سؤال ثاني مرات اسوي الحليب بماي حار وانطره لين يصير دافي واشرب بنتي هم عادي ولا الحليب يخترب بماي حار وشكرا

 

[nazek_q8]

انا بعد نفس سرال اخست بشابيشي

عادي اخلي الحليب بره اكثر من ساعه واسخنه بالسخان عند الرضعه

 

[تغريد الطيور]

السلام عليكم دكتوره أنا عندي مشكله عمرها عشر سنوات

عندي ولدي يعاني من التبول اللاإرادي من يوم صغير وديته الطبيب سواله فحوصات وتحاليل ما طلع فيه

شي يقول سليم وقالي قعديه من عز نومه ووديه( تكرمين )الحمام وسويت مثل ماقالي قعدته ووديته الحمام

مايحس فيني نايم امشيه وأفصخه بالحمام أقوله يالله ................ مايستوعب إنه بالحمام ويصارخ ويطلع

إحترت ما أدري شسوي معاه أبي الحل ضروري جدا الله يخليج ويوفقج. :0bee2e8d89:

 

[د. رشــا الصفــي]

العفو

حياج الله

 

[د. رشــا الصفــي]

شلونج دكتورتنا ..
دكتورة ولدى عمره سنتين و 3 شهور وللحين مايتكلم واااااااااايد يعور قلبي .. لما يبي شي يتكلم بس مادري شلون اشرحلج طريقته في الكلام يعني يأشر ومايقول الا (آآآآ) جذي يعني وبنتي الكبيرة اسمها نور ينادينها ((أوو)) وخدامتي اسمها شارون يناديها (ياياو) مادري انتي فاهمتني والا لا .. يقول ماما وبابا طبعا بس اقصد الاحرف ماينطقها عدل ... وودي اعرضه على دكتور بس زوجي مو راضي يقول توه صغير .. بس انا اقول اوديه الحين احسن من لايكون فيه شي الله لايقول .. ياليت اتطمنيني لاني وايد احاتيه واذا بوديه عند اي دكتور تنصحيني .. ومشكورة واااايد و ايد

Om_BaRRaK

بالنسبة حق ولدج ما يعتبر صغير على الكلام

انصحج انج تودينه الطبيب اول شي يجيكون على السمع عن طريق التخطيط

اول شي تودينه المستوصف و هناك راح يحولج على الأماكن المتخصصة بهالموضوع

بس بداية الطريق المستوصف

 

[د. رشــا الصفــي]

يعطيج العافيه دكتورتنا
حابه اسالج عن عادة مص الاصبع اهي طبيعية لي سن متى ؟
بنتي عمرها 9 شهور وتمص اصبعها وايد يعني اذاما شلت اصبعها ممكن تكون نص اليوم تمصه والكل يخانقني عشانها يعنيالمفروض انها ما تمصه وحطيلها شيباصبعها يكرها فيه ياليت تعطيني وجهة نظرج وشنو اسوي معاها

تروبيكان

الله يعافيج

بالنسبة حق مص الأصبع هذي من العادات اللي يمارسها الأطفال لزيادة الاحساس بالأمان و الراحة

بعص المختصين يشوفونها طبيعية بس بشرط انها ما تتعدى السنة علشان ما تأثر على النطق و شكل الأسنان

و في الوقت الحالي صعب تفطمين بنتج من مص صبعها

نطري عليها شوي لما تكمل السنة و بعدين ابدي معاها بالتدريج

اول شي حاولي تلهينها عن مص الصبع بأنج تخلين لعبة او بسكوتة على طول باليد لللي تمصها

و اذا ما نفع مالج الا تحطين لها بلاستر لونه مو حلو و تحطين دوا مر عليه شوية اما من الصيدلية او من العطار

طبعا راح تصيح لها جم يوم و تنسى

 

[د. رشــا الصفــي]

السلام عليكم
اشلونج دكتوره انشالله تمام
دكتورة ودي اعرف السب ليش مانوكل الطفل وهو عمره 4 شهور اول كنا نوكلهم وعمرهم 4 شهور والحين الكل يقول لما يكمل 6 شهور شنو السبب وشنو المضار من انه انوكله 4 شهور؟
مشكورة

omdoodoo

عليكم السلام و الرحمة

موضوع تأخير أكل الطفل الى 6 شهور طلع علشان يخلون الطفل يرضع طبيعي اكثر وقت ممكن

و يقللون فرصة اصابة الطفل بحساسية الأطعمة الي من اهمها القمح

و اذا ودج توكلين الطفل من 4 شهور ممكن طبعا بس بشروط

الأكل تبدين بالأرز ثم بالخضار ثم الفواكه

القمح ممنوع منعا باتا قبل 6 شهور

الكميات تكون قليلة جدا

تزداد تدريجيا حتى الشهر السادس

 

[د. رشــا الصفــي]

السلام عليكم شلونج دكتوره آنا بنتي عمرها ثلاث سنين وتوها داخله الاربع
وصاااايره وااااااااايد أتأتأ بالكلام وبصراحه آنا صايره واااااااااااااايد اطقها واعصب عليها
وأختها توأمها عادي ما فيها شي لا أتأتأ ولا شي وبصراحه آنا وااااااايد خايفه
عليها صرت ما اطقها الحين لاني بديت اخاف ما ادري هذا عادي الي يسير
معاها ولا اوديها الطبيب احسن لان اخاف باجر لما تكبر واهيه جذي
ويعطيج العافيه

حصووووص

الله يعافيج

التأتأة غالبا ما تكون بسبب الخوف من الخطأ و من ثم العقاب

فتلاقين الطفل اللي يتأتأ يكون عنده وحدة من الثنتين

اما انه يكون طفل حساس جدا و ما يبي يغلط

او يكون احد الوالدين عصبي جدا و يخانق الولد او يضربه ساعات فيتوتر الطفل و يبدا يتأتأ

الحل انج تهدين بالج عليها

و تعطينها فرصة تعبر عن نفسها

و لما تتلعثم بالكلام لا تستعجلينها ولا تصلحين لها

لا

خليها براحتها تطلع الكلمة

و حاولي تصدين بعيونج عن عيونها لما تتلعثم علشان ما تزيد او ترتبك بس خليها تحس انج معاها مو متجاهلتها و تطالعين شي ثاني

اذا استمرت المشكلة

لازم تودينها مركز علاج النطق يعطونكم تمارين لها

 

[د. رشــا الصفــي]

سوري دكتوره رشا اذيناج
بس بغيت اعرف اقدر اعطي بنتي اللي عمرها 9 شهور بيض وشنو الافضل اول البياض او الصفار وشكرا

بالنسبة للبيض

الصفار من 8 شهور

و البياض من بعد السنة الأولى

لآن البياض نسبة الحساسية منه اكبر من الصفار

 

[د. رشــا الصفــي]

مرحبا دكتوره يعطيج العافيه على الرد
دكتوره عندي سؤال انه حق بليل لما بنام اسوي ميميتين حليب وعندي السخان اللي يسخن الحليب لما تيوع بنتي بس اسخن لها الحليب واعطيها عادي ولا لا يعني الحليب مايخترب ليصبح
وعندي سؤال ثاني مرات اسوي الحليب بماي حار وانطره لين يصير دافي واشرب بنتي هم عادي ولا الحليب يخترب بماي حار وشكرا

بشابيشي

اول شي الحليب لما تسوينه ما تخلينه اكثر من ساعة و عقب تقطينه

او تسوينه و تحطينه بالثلاجة على طول مو بالسخان

الأفضل انج تخلين الممية فيها مقدار الماي بالسخان ووقت الرضعة تضيفين الحليب بس و تعطينها

بالنسبة للسؤال الثاني الأفضل ان يكون الحليب محضر من ماي دافي احسن من البارد علشان الوقت الي راح يبرد فيه بس

 

[د. رشــا الصفــي]

انا بعد نفس سرال اخست بشابيشي

عادي اخلي الحليب بره اكثر من ساعه واسخنه بالسخان عند الرضعه

bardana


جيكي الرد اللي قبل

الحليب ما يترك اكثر من ساعة ابدا

و ما يعاد تسخينه

 

[د. رشــا الصفــي]

السلام عليكم دكتوره أنا عندي مشكله عمرها عشر سنوات

عندي ولدي يعاني من التبول اللاإرادي من يوم صغير وديته الطبيب سواله فحوصات وتحاليل ما طلع فيه

شي يقول سليم وقالي قعديه من عز نومه ووديه( تكرمين )الحمام وسويت مثل ماقالي قعدته ووديته الحمام

مايحس فيني نايم امشيه وأفصخه بالحمام أقوله يالله ................ مايستوعب إنه بالحمام ويصارخ ويطلع

إحترت ما أدري شسوي معاه أبي الحل ضروري جدا الله يخليج ويوفقج. :0bee2e8d89:

تغريد الطيور

الله يعينكم

اول شي تسوينه انج تمنعين عنه السوائل قبل 3 ساعات من النوم

و تدخلينه الحمام قبل النوم مرتين

و تحطين له دفتر و يوم اللي يقوم نشف تحطين له نجمة

و اذا ما نفع

في حبوب اسمها مينيرين متوفر حاليا بأغلب المستوصفات لهالحالات

فالمطلوب منج تروحين لممستوصف منطقتكم و اهم يتابعون الحالة او يحويونكم للمستشفى التابع للمنطقة

 

[SweeTa_4ever]

السلام عليكم دكتووره شلوونج

حبيبتي عندي بعض الاسأله

1- متى اقدر احط ولدي الدراي

2- متى اقدر اقعده بالكرسي

3- متى العمر المسموح الي اقدر احطه بالعربانه وودي وطلعه معااي

4- ولدي عمر 3 اشهر و10 ايام احسه وااايد يسعبل وحك ايده بلثته هل يعني بيطلعله ضرس ومتى يطلع الضرس

5- متى ابدي اذوق ولدي الاكل

6- شعر ولدي واااايد خفيف اهوو شعر البطن متى اقدر اقرعه عشان يطلع شعر زييين وشنو الاله الاحسن المكييينه ؟؟؟

7- ولدي ليلحين يشرب 3 ارقام احاول ازييده رقم مايكمل حده 3 شسوي وليمتى 3 ارقاااام؟؟؟



وشكراا حبيبتي واسفه على الاطاااااله بس صج مالي غيييرج

 

[طير الحب]

السلام عليكم

دكتوره يعطيج العافيه

عندى جم سوال ارجوا سعه الصدر : )

ولدى عمره شهرين و3 ايام انولد بالاسبوع ال35 من الحمل وقعد بالحضانه 8 ايام بالحضانه رحت اطعمه بو شهرين قالت السستر لا التطعيم ما يكون من يوم ولادته يكون من يوم طلعوه من الحضانه .......... فما ادرى صج ....

وبعدين يتعصر بشى مو طبيعى 24 ساعه يتعصر وفيه غازات وايد وبصوت عالى عطيته اعشاب وغير الحليب جم مره مافى فايده

اول ما نولد عطيته اس 26 بعدين عيرت لابتاميل كمفورت والحين استعمل نان مع انى بس بالليل اعطيه الصناعى وطول اليوم من صدرى

ويرجع وايد وايد يعنى حتى عقب الرضعه لو بعد 3 ساعات عادى 2 ساعه يرجع حتى ممن خشمه

وسره من طلع من الحضانه كان طالع شوى الحين كبر وايد وايد ربطه له فش شوى والحين رجع اكبر من الاول ويطلع صوت مثل الفقاعات له دخلته مكانه شنو الحل


اعطيه منقوع التمر جم مره بالاسبوع عادى
يشربه يحبه عادى ولا لا

خشمه بالليل يتسكر مره وحده احطله قطره بس شوى ويرد تتسكر
وحسيت انه قل الترجيع لما شرب نان ما ادرى شنو رايج

وبعد فيه حساسيه من البقوليات ابى اعرف عنه اكثر ولي متى هالحساسيه واسبابها لانها قالتى حتى انا ما اكل بقوليات عشان الرضاعه

شكرا مقدما

 

[د. رشــا الصفــي]

السلام عليكم دكتووره شلوونج

حبيبتي عندي بعض الاسأله

1- متى اقدر احط ولدي الدراي

2- متى اقدر اقعده بالكرسي

3- متى العمر المسموح الي اقدر احطه بالعربانه وودي وطلعه معااي

4- ولدي عمر 3 اشهر و10 ايام احسه وااايد يسعبل وحك ايده بلثته هل يعني بيطلعله ضرس ومتى يطلع الضرس

5- متى ابدي اذوق ولدي الاكل

6- شعر ولدي واااايد خفيف اهوو شعر البطن متى اقدر اقرعه عشان يطلع شعر زييين وشنو الاله الاحسن المكييينه ؟؟؟

7- ولدي ليلحين يشرب 3 ارقام احاول ازييده رقم مايكمل حده 3 شسوي وليمتى 3 ارقاااام؟؟؟



وشكراا حبيبتي واسفه على الاطاااااله بس صج مالي غيييرج

SweeTa_4ever

بالنسبة حق اسئلتج :

1- متى اقدر احط ولدي الدراي

من الشهر السادس او السابع مجرد ما يبدا يقعد عدل و يشد ظهره


2- متى اقدر اقعده بالكرسي

عادي من بعد الشهر تقريبا تقدرين تقعدينه بالكرسي بس تميلينه عالآخر


3- متى العمر المسموح الي اقدر احطه بالعربانه وودي وطلعه معااي

بعد الأربعين عادي وديه وين ما تبين بالعربانة


4- ولدي عمر 3 اشهر و10 ايام احسه وااايد يسعبل وحك ايده بلثته هل يعني بيطلعله ضرس ومتى يطلع الضرس

يطلع الضرس اقرب وقت من الشهر الرابع تقريبا بس المتوسط بعد الشهر السابع


5- متى ابدي اذوق ولدي الاكل

من الشهر الرابع يذوق الأكل بس خضار و فواكه و عيش و من السادس يبدا ياكل وجبات كاملة


6- شعر ولدي واااايد خفيف اهوو شعر البطن متى اقدر اقرعه عشان يطلع شعر زييين وشنو الاله الاحسن المكييينه ؟؟؟

والله ما عندي خبرة بالشعر ولا بالمكاين حبيبتي سوري

بس مافي ضرر انج تقرعينه اي وقت عادي دام الجو زين

بالنسبة للمكاين اعتذر منج ما اعرف


7- ولدي ليلحين يشرب 3 ارقام احاول ازييده رقم مايكمل حده 3 شسوي وليمتى 3 ارقاااام؟؟؟

لما يكمل 4 شهور تقريبا

ما عليج من المكتوب عالعلبة هذا كميات مهولة بصراحة

في اطفال يتمون يشربون 4 ارقام لي السنة تقريبا مو مقياشس

اذا وزنه زين و ياكل كميات كافية لا تحاتين كمية الحليب

راح ياخذ كفايته بدون ما تغصبينه

 

[SweeTa_4ever]

مشكوووره حبيبتي واااااااااااااااااااايد استفدت منج

وعندي سؤال ثاني >> ماتنعطى واااي

متى يبدي يقلب الياهل ؟؟

 

[د. رشــا الصفــي]

السلام عليكم

دكتوره يعطيج العافيه

عندى جم سوال ارجوا سعه الصدر : )

ولدى عمره شهرين و3 ايام انولد بالاسبوع ال35 من الحمل وقعد بالحضانه 8 ايام بالحضانه رحت اطعمه بو شهرين قالت السستر لا التطعيم ما يكون من يوم ولادته يكون من يوم طلعوه من الحضانه .......... فما ادرى صج ....

اي صح

لان التطعيم ينحسب من اخر تطعيم خذاه البيبي وهو يوم خروجه من الحضانة

وبعدين يتعصر بشى مو طبيعى 24 ساعه يتعصر وفيه غازات وايد وبصوت عالى عطيته اعشاب وغير الحليب جم مره مافى فايده

اول ما نولد عطيته اس 26 بعدين عيرت لابتاميل كمفورت والحين استعمل نان مع انى بس بالليل اعطيه الصناعى وطول اليوم من صدرى

لا تغيرين له الحليب وايد

كل الأنواع بما فيهم حليب الصدر يسوي غازات

طبيعي لي عمر 4 شهور

لازم تتحملينه

و اذا بس بالليل تعطينه الصناعي معناته المشكلة مو من الصناعي

انتي حاولي نما تاكلين اشياء تسبب غازات علشان ما يتأذى البيبي

ويرجع وايد وايد يعنى حتى عقب الرضعه لو بعد 3 ساعات عادى 2 ساعه يرجع حتى ممن خشمه

اذا وزنه يزيد هذا الترجيع الزايد من الحليب او ممكن يكون ارتجاع و يخف بروحه دام يرضع من صدرج لا تغيرين شي

وسره من طلع من الحضانه كان طالع شوى الحين كبر وايد وايد ربطه له فش شوى والحين رجع اكبر من الاول ويطلع صوت مثل الفقاعات له دخلته مكانه شنو الحل

هذا فتاق بالسرة

لازم تراجعين فيه دكتور الأطفال او المستوصف يحولج على ابن شينا جراحة الأطفال يتابعون حالته و اذا ما راحت لي شهور او سنه يسوون لها عملية

بس ما منها خوف

اعطيه منقوع التمر جم مره بالاسبوع عادى
يشربه يحبه عادى ولا لا

ما في مانع

بس التمر يسوي غازات وايد

خشمه بالليل يتسكر مره وحده احطله قطره بس شوى ويرد تتسكر
وحسيت انه قل الترجيع لما شرب نان ما ادرى شنو رايج

الترجيع راح يقل مع العمر بغض النظر عن الحليب

و ممكن يكون ناسبه حليب نان اكثر من الباقي

نوع الحليب و تقبله بالنسبة للأطفال يختلف من بيبي لي الثاني

مو قاعدة

وبعد فيه حساسيه من البقوليات ابى اعرف عنه اكثر ولي متى هالحساسيه واسبابها لانها قالتى حتى انا ما اكل بقوليات عشان الرضاعه

شكرا مقدما

حياج حبيبتي

بالنسبة لحساسية البقوليات ارد عليج برد منفصل لأن الشرح يطول

 

[د. رشــا الصفــي]

وبعد فيه حساسيه من البقوليات ابى اعرف عنه اكثر ولي متى هالحساسيه واسبابها لانها قالتى حتى انا ما اكل بقوليات عشان الرضاعه

شكرا مقدما

طير الحب

الحساسية من البقوليات

يسمونها

G6PD deficiency

و هي عبارة عن نقص في انزيم معين داخل كريات الدم الحمراء و اللي يخليها عرضة انها تتكسر اذا تعرضت للبقوليات او لأدوية معينة او اذا اصاب الطفل التهابات شديدة

الأعراض تكون عبارة عن

شحوب شديد باللون

صفار بالعين ( بو صفار )

تغير لون البول الى لون غامق يشبه الشاي او الكولا

في هذه الحالة تتم مراجعة المستشفى لعمل التحاليل اللازمة و في اغلب الأحيان يتم نقل دم للطفل

و تعاد التحاليل للتأكد من ثبات نسبة الدم بعد النقل و توقف التكسير عن طريق متابعة لون البول الى ان يتحول الى لونه الطبيعي

الحساسية هذا ما تروح من الطفل

بعضهم تخف مع التقدم بالعمر بس الأغلبية تبقى موجودة طول العمر

انصحج انج تعيدين التحليل بعد مدة علشان تتأكدين بس

و اذا عندج عيال ثانيين سويلهم لأن ممكن يكون موجود بأطفال ثانيين و مو مبينة عليهم اعراض

هذا الموضوع باختصار

اتمنى اني اكون جاوبت على اسئلتج

اي استفسارات ثانية انا حاضرة

لا تترددين في طرح اي سؤال مهما كان

 

[omdoodoo]

دكتوره ولدي عمره 4 اشهر ونص للحين مايقلب عادي؟