الغرفه الكتآبيّه لقروب .. لن يسبقنآ الى الله أحد 3... } .. !

[!! الواصليّـــــة !!]

هلا دوناتو شلونج ؟

 

[ناعم العود305]

السلام عليكم شلووووونكم فيه احد ؟

 

[Q8.Bee]

اهلين ميني وين مختفيه


وعليكم السلام نعومه شلونج؟


خياله جنى بدبد و البقيه اين انتم!

 

[!! الواصليّـــــة !!]

اهلين نعومه شلونج غلاي؟

 

[ناعم العود305]

هلا والله ام فطوم ووصالوووو
انا تمام انتو شلونكم

عندي ولد ااخوي يبجي انطر امه تاخذه شكلي بقطه من الدريشه

 

[وصيّه جــــابر]

سّلامٌ سّلامٌ كـ مسّك الخِتآم ..
كـ ليل الدُموعِ كـ قطّر المــطر ..



< - - عآد الدندنة عَليكُمْ ...


......
...............


شخبارتكُمْ .. علومِتكُمْ ..
دخول سّريعْ ..
احتآج بيت ريفي .. مافيه احد غيري انا والطبيعة ..
بدون اي ادوات من التكنلوجيـا
بعيد عن الناس ..


اقعد آحآسّب نفسي .. واروووق ..

 

[جنى q8]

السلاااااااام عليكم ورحمه الله وبركاااااته

شلونكم خواتي كلكم نكا نكا على قوله بدبدوه حبي

ام فطووم اهلين ياقلبي،،،،،،،

 

[ماسة الماسة]

في احد؟؟؟؟؟؟؟؟؟

 

[ناعم العود305]

وعليكم السلام لكل من دش

 

[Q8.Bee]

ها وينكم بنات

ها وصالو احط الدرس ولا انطرهم

 

[تنآهيد الجروح]

السلام عليكم

 

[Q8.Bee]

افا يا ذا العلم الليله وين هجيتن


خياله اين انتي نبي عصاج في ناس نايمه

 

[Q8.Bee]

وعليكم السلام والرحمه هلا تناهيد شلونج شخبارج يا قلبي

 

[ناعم العود305]

في درس وانا ما ادري

خلاص بثبت في مكاني
بعدين العصا حطيها علي الخياله الي متاخره

 

[Q8.Bee]

اي بعدي بنت عمي خلج مكانج


بعطيهم فرصه اخيره

 

[ماسة الماسة]

في درس..!!

يلا انطر

 

[!! الواصليّـــــة !!]

بي بي حطيه فديتج خلاص الساعه 1 دقت الساعه

 

[Q8.Bee]

يلاا الحين بحطه ان شاء الله.. كان معلق

 

[تنآهيد الجروح]

وعليكم السلام والرحمه هلا تناهيد شلونج شخبارج يا قلبي

هلا فيج حياتي انا بخير دامج بخير

وااااااي لي 4 ايام مادخلت احس كأنها سنه

انقطعت وصلتي:eh_s(14):

وانشغلت واليوم رحت رديتها

شخباركم بنات؟؟

شسويتوا بغيابي؟؟

وربي لكم وحشه،،فقدتكم

 

[Q8.Bee]

بسم الله الرحمن الرحيم
وبه نستعين
ونصلي ونسلم ونبارك على سيدنا محمد عليه افضل الصلاة واتم التسليم


الليله ان شاء الله الموضوع علي .. وسامحوني لاني حابه اني اوصل لكم شغله مني انا من اختكم ام فطوم مابي انسخ والصق من قوقل لا ..حابه اشياء اثرت فيني


انا من فتره كنت حاطه بتوقيعي محاضرة اسباب منسيه للشيخ الدكتور خالد الجبير .. طبعاً هالمحاضره في جزء منها يتكلم عن احسان الظن بالله سبحانه وتعالى

شلون يعني نحسن الظن بالله؟؟؟!!

يعني ذكر قصة شاب في بداية العشرينيات ملتزم خلوق لا يترك صلاة المسجد ..معروف ببشاشة الوجه والابتسامه والصلاح والاستقامه والخلق

تخرج من كلية الشرطه والحياة امامه سبحان الله ..فجأه يقدر الله له حادث ويصاب بشلل نصفي ..
الدكتور خالد الجبير يروي في المحاضره انه اخذ كشف اسامي المرضى قبل الدخول عليهم ..وقرأ اسم هذا الشاب بينهم فنصدم وسأل الممرضه ماذا قال الاطباء عن حالته؟؟؟ قالت ميؤوس منها ولا رجاء ي شفاءه .. فنصدم الدكتور واخذ الصراع بين عبراته ودموعه وكيف يدخل على هذا الشاب الذي عرف بما هو عليه من خلق ودين والتزام .. ويفكر كيف يهون عليه مصابه .. فدخل الدكتور ..ويقول ورأيت نفس بششاة وجهه لم تختفي ولم تنجلي .. وابتسامته العريضه تملأ وجهه ..واذا به يسبق الدكتور بالكلام ويقول : أرأيت يا شيخ الله علم اني مقصر في حفظ كتابه فأقعدني لأحفظ كتابه


شوفو سبحان الله هني نستشعر حسن الظن بالله سبحانه وتعالى .. يعني لو واحد ثاني بينهار انشل وانا توني بأول حياتي وتوني متخرج وانا ما كنت اطوف صلاه ليش يصير معاي جذي .. والعياذ بالله هذا فاق الجزع من ما قدر الله له 


بس سبحان الله شلون الايمان القوي يترجم الاقدار التي يكتبها الله تعالى للإنسان بطريقه ايجابيه وهي حسن الظن بالله


لما سمعت هالقصه بالمحاضره فكرت في حياتي .. الكل يشوفني مكسورة الجناح لاني مطلقه مع ان والله ثم والله ثم والله لما ترجمتها بطريقه ايجابيه واحسنت ظني بالله عرفت اني كنت مقصره مع ربي حييييييييييييييييييييييييييييييييييييل وكنت اعصيه بأمور كثيره .. فطلاقي صار سبب لتركي لهذه المعاصي مثل الحف والاغاني وعباية الكتف ..


حتى انتوا بنات .. اللي تشعر بظلم سواء كان بالبيت ولا بالعمل .. ولا من شخص معين . ترجميها بحسن الظن بالله .. فكري لعل الله يريد ان يكتبك من الصابرين المحتسبين  .. او تكتبين من كاظمين الغيظ .. سبحان لله لو تعرفون اجر الصابرين والمحتسبين واجر كاظمين الغيظ لفرحتم فرح شديد وسررتم من ما قسمه الله لكم

او اللي ابتليت بشيء من الضيق او مرض او مرض عزيز لها اسال الله ان يشافي مرضانا ومرضاكم ومرضا المسلمين ..هل الانسان يكره ان يريه الله علامات حبه ؟؟!! شنو نرجو احنا من هالدنيا غير حبه ورضاه سبحانه ... سبحان الله نتمنى ان اي شي يطمن قلوبنا ان الرحمن يحبنا وانه رضاي عنا .. وهذا الابتلاء علامه هل تجزعين!! هل ترفضين اخباره لكِ بحبه !!!! يا سبحان الله


بنات انا ادري .. ان كل وحده فينا سبحان الله مضايقها شي بحياتها او نقول ضغط او سبب في ضيقتها
مثال قتلكم مرض .. قله في الرزق , تأخر الزواج , تشعر بالوحده او انها من عالم آخر ...


انزين خلوني انا معاكم نفكر بصوت عالي

المرض وقتلكم محد يرفض ان يريه الله حبه  سبحانه

قله في الرزق لعل الله يريدِ ان ترطبي شفاتك بذكره وكثرة الاستغفار

تأخر الزواج .. نفسي انا لعل الله يرى ان في زواجك انشغال عن الدين .. يعني احنا الحين نتناصح ما شاء الله ونتعاون على الطاعه .. يمكن اكثر البنات نشاطاً في القروب واكثرهم تأثير علينا ..واكثر يشد على ايدنا في الطاعات .. يريد الله ان تستمر في هذا الطريق اللي والله نهايته جنات الخلد بصحبة الحبيب محمد عليه الصلاة والسلام .. ولا يريد لها ان تتوقف عن هذا الخير الذي تكسبه وتثقل ميزانها به ..وتكون سبب في هداية بنات كثيرات .. الله يعلم ونحن لا نعلم احسنوا الظن

اللي تشعر بالوحده لعلها لم تتذوق الانس بقرب الله .. والله يريد ان يذيقها هذا لثأثر حب الله والانس بقربه على الدنيا وكل مافيها


حاولت كثر ما اقدر اني اوصل لكم شي من قلبي .. واتمنى ان كلماتي لامست قلبكم .. اختكم اللي تحبكم وتموت فيكم ام فطوم ..
الحمدلله .. ان اصبت فهو منه سبحانه وان اخطأت فهو مني .. وعذروني لان موضوعي واسلوبي والتنسيق على قدي ما اوصل مو اصيل خواتي اللي اموت فيهم وصالو وخياله وام مصعب بمواضيعهم المميزه والطرح المميز


الموضوع خفيف وقصير وتكفون بنات اللي عندها اي ملاحظه او اي شي تبي تصححه تقول والله مازعل ابي اتعلم لمستقلبي *داعيه لله * بإذن الله