الله يبلغنا رمضان .... شنو تجيهزاتكم للشهر الكريم؟؟

[نارنجه]

عليج بالعافية زعفررانه

ذكرتيني بالاقمااع شريتهم قبل الحمال ونسيتهم

مشترياتي الاسبوع الي طااف من زمزم ^^ بمجمع سندس

اغراض عملية و حليوة حق استعمالنا اليومي مو للضيووف

قلاصات قاعتها ملونه حلوه مع اجوااء رمضاان
واستكانات نفس الي تبيعهم تاجرة هني حصلتهم ب٣.٩٠٠
ومطارة صغيرة لونها عجبني خذتها للماي
وقلاصات صغيرة استخدمها للسلطة و للحلوووو
الكرتونه بنص اخذت ٤ كراتين

وطقم بايركس و غيرت صواني النقصة ^^ خذتهم خشب بني و لقيت عندهم ماعون المونيوم له غطا حلو لقلاي اللقيماات كنت ادوره من زمان اشوا حصلته عندهم
وغوري صغيرون حق القهوة اخف نوع يمدحونه السعوديات حق القهوة
وفعلاا جربته مادري حسيت القهوة بسرعه تطبخ اقل من نص ساعه وهي ضابطة
تهقون الشغله نفسيه هههههههههههه

 

[نارنجه]

زعفرانه

اظاهر غيروا الي تسوي الكبة
كانت احلى كبة


شهرزاد
يعطيكم العافية وتسوون الذ كبة ان شااء الله


ايمانوووو حلوة

عساج ع القوة حبيبتي
وبالعافية عليكم

امس لفيت رولات فلادلفيا
باقي لي رولات الدياي و كور مادري كبة الفلافل
والباجي اخذته جاهز


وجمعية الفيحاا يحلات مواعينهم و بهاراتهم

نجرب سمبوسته ماورانا شي ههههههههه

 

[بنت الاحلام]

انا للحين مازهبت شي

 

[زعفرانة_73]

يعافيج حبيبتي والله شهرزاد
كنا ناوين نشتري من كبة الديك الرومى بس قال ما فى اللحين لازم تدقون تطلبون، فأخذنا المقليه الجاهزه (والله خيره ) يوم جربنها لا طعم لا لون لا رائحه الله يديم النعمه الستاف اللى قبل راح وراحت أيامه كان يضرب فيه المثل :eh_s(2):، نصيحه جربوا عينه قبل لا تشترون ولا يطيح بجبودكم
صارت الشغله تجاره بحته شنو اللحم ( اللحم هندى ولا صينى)والمواد المستخدمه ، الله يرحمنا برحمته.​

 

[زعفرانة_73]

نارنجه يعافيج قلبى
تبارك الرحمن مشترياتج تونس عليكم بألف عافيه
فرق الأسعار بهالسوق شكلى بمر عليه:rerrerek: حريم مامنا فايده:eh_s(10):​

 

[زعفرانة_73]

ايمان الله يعطيج الصحه والعافيه

بنت الأحلام شدى حيلك :ada:​

 

[شهرزاد الحكاية]

عليج بالعافية الاغراض نارنجه .... تتهنون فيهم يارب حلوين ...
بسألج هذي اهي المواعين اللي تقصدينهم للسلطة؟
جان فجتي العلبة نشوفهم :eh_s(9): خبرج احب اللقافه :eh_s(9):
​

ماتعرفون بنات وين القي مواعين سلطة كبار مع قفاشهم
​

 

[شهرزاد الحكاية]

شهرزاد
يعطيكم العافية وتسوون الذ كبة ان شااء الله


امس لفيت رولات فلادلفيا
باقي لي رولات الدياي و كور مادري كبة الفلافل
والباجي اخذته جاهز


وجمعية الفيحاا يحلات مواعينهم و بهاراتهم

نجرب سمبوسته ماورانا شي ههههههههه

الله يعافيج يااارب

والله يعطيج الف عافية ....
انا بوريكم من النماين اللي سوتها امي ...ان شاء الله

افكر اطلب سمبوسه بوكس ومترددة مادري ليش
​

 

[شهرزاد الحكاية]

يعافيج حبيبتي والله شهرزاد
كنا ناوين نشتري من كبة الديك الرومى بس قال ما فى اللحين لازم تدقون تطلبون، فأخذنا المقليه الجاهزه (والله خيره ) يوم جربنها لا طعم لا لون لا رائحه الله يديم النعمه الستاف اللى قبل راح وراحت أيامه كان يضرب فيه المثل :eh_s(2):، نصيحه جربوا عينه قبل لا تشترون ولا يطيح بجبودكم
صارت الشغله تجاره بحته شنو اللحم ( اللحم هندى ولا صينى)والمواد المستخدمه ، الله يرحمنا برحمته.​

والله كلامج عدل يطري علي اول ايام ماكنا صغار كنت احب الاسباغيتي مالتهم :eh_s(11): من زمااان ما طلبتها تلاقينها اختربت الحين
والله خرعتيني كلامج عدل التجار يدورون الرخص الله يكفينا شر لجشع والغش يااارب
​

 

[Mjnont '3lay]

الله يبارك لنا بالشهر الفضيل ويعوده علينا كل سنه ..
شهرزاد روحي الشاهبندر الفحيحيل عنده الصحون اللي شكلها على بيضاوي مع القفشه يهبلووون روحي وان شاءالله يعجبج

انا تجهيزاتي للرمضان دراريع و دولكات بس لانه عندي من قبل صحون تقديم حلوه خاشتهم للحين ما استعملتهم

و طبعا اهم شي عندنا برمضان القهوه والتمر والحلويات هذول الشغلات لاااازم كل سنه نتفنتك فيهم
قهوتي السنه اللي طافت كانت القهوه التقليديه اللي هي هيل وشوية زعفران
بس طحت لي على طريقة قهوه فضيييعه اهيا قهوة العجمان رفيجتي علمتني عليها وخلاص باذن الله بعتمدها حق رمضان

طريقتها بالقوري مال القهوه احط ثلاث ارباع القوي ماي دافي مو بارد ولا حار واخلي الماي شوووي يغلي مو يفور الماي لااا يعني يطلع منه بخار شوي وقتها احط شوية كوفي ميت وشوية زعفران واذا غلى الماي يعني فار شوي احط فنجانين قهوه واخليه على نار هاديه لين ما يغلي عدل
واجيب دلة القهوه واحط قفشه ونص هيل مطحون وقفشة كوفي ميت وقفشة زعفران وكسره صغييره دارسين عدل مو مطحون
بس ما اكثر دارسين كلش لانه رح يصير طعمه بايخ ومو حلو وابشر نتففففه زنجبيل عشان الطعم والريحه وقفشة ماي ورد ايييييي ماي ورد لا تستغربون يعطي طعم فضيع للقهوه العربيه واخذ طرف قفشه صغيره مالت الجاي صبغة زعفران بس نتفه نتفه مو واجد عشان مايتغير طعم القهوه وبس اسكر على النار واصب القهوه بالدله واقدمه
وهذي كانت احلى قهوه بحياتي اشربها للامانه حتى الدله بعد ما اغسلها تظل لازقه فيها ريحة القهوه من حلاتها

والطريقه الثانيه اللي مره سويتها وعجبتني بس الطريقه الاولى احلى
احط قفشه وحده كبيره كوفي ميت وقفشه كبيره بهارات قهوه < نصيحه اذا تبونها لا تاخذونها الا من وحده عجميه بيتها بالعارضيه ناسيه اسمها بس معروفه
وفنجانين قهوه عربيه واخلي يغلي عدل
وبالدله قفشتين زعفران واربع حبات هيل وبعد ماتغلي القهوه اصبها بالدله


اما التمور قمنا نجيبها من الخبر ان شاءالله نروح باذن الله قبل رمضان ونجيب من هناك تمرهم يهبل
انا اجيبه من هناك بدون طعم واحشيه لوز وفستق وارش عليه جوز هند ورح احشي بعد بالككاو اجيب قطعة ككاو شبه مجمده واحشي وقبل لا اقدمه بدقايق بالماكرويف احطه على درجه اقل من الواحد واطلعه بسرعه بس عشان يذوب الككاو داخله وبنفس الوقت مايخترب التمر مع الحراره


والحلويات اللقيمات طبعا عواااشه مافي غيرها هذي الوحيده اللي لقيماتها رووووووعه ومقرمشه وسنين وانا اخذ منها
وبالبيت رح اسوي صب بالقفشه وكريم كراميل وقطايف رح اسوي حشوتين الاول بالقيمر والثانيه بالجبنه والسنه اللي فاتت سويت بالمكسرات بس ماعجبني مرح اسويه هالسنه ورح اسوي رز بالحليب بس ابي طريقه حلوه ياليت اللي تعرف لا تبخل علي ابي طريقه حلوه وسهله ورح اخذ من الطبيعه كل اسبوع خلية نحل تغيير واذا نزلت عند حمولتي رح اسوي جيز كيك فراوله ورح اخذ طريقة الشيف نانا بالحلويات ان شاءالله رح امر على ملفها واخذ الوصفات

اما السمبوسه رح امر جمعية السره شغلهم توب
والكبب من مطعم الهندي اللي عندنا كببه رووووعه

والاكلات اللي رح اسويها برمضان .. قبوط و مرقوق و عيش بخاري ودجاج وتشريب لحم او دجاج ماتفرق وعيش لحم و عيش احمر مع سمج فيليه
والسلطات تبوله وفتوش وسلطة ذره و سلطة باذنجان وسلطة معكرونه حلزوني بالصوص الاحمر
والشوربات اكيد شوربة عدس و شوربة خضار

وباذن الله هالسنه ناويه اختم القران الله يقدرني على هالشي و يعيني على طاعته بهالشهر الفضيل

 

[Mjnont '3lay]

نارنجه حلوين القلاصات اللي بتخلينهم حق السطات يجي معاهم قفاش ولا لا
ومن وين ماخذتهم وبجم وياليت تبطلينهم نشوفهم عالطبيعه لانه بالكرتون مو مبينين عدل اذا ماعليج كلافه

 

[انوثه واناقه]

الله يبارك لنا الشهر الفضيل يارب

ويعوده علينا كل سنه بصحه وعافيه مع اهلنا وحبايبنا

ولا يحرمنا وجودهم لاكبير ولاصغير يااااااااااارب

الحمدالله جهزت المواعين بس الماجله لا للحين لان بسافر
اسبوع وراده ان شاءالله

 

[انوثه واناقه]

صورة لكم شوي من اغراضي

[/

بنات لا يهمكم المضهر اهم شي الجوهر)))خخخخ
طبعا هي حافضه للبروده هالدولكه

وشريت هالقطاعه اللي عذبوني فيها بغيتها حق تقطيع البصل
والطماط والسلطه مربعات صغيره بس للاسف لا
تقطع شغلات دوائر متينه وضعيفه وبطاط شيبس
وشغلاات وللامانه حلوه لهشغلات وسرييييعه[


IMG]http://i.imgur.com/guBZQ.jpg[/IMG]


وعقب شريت هالقطاعه يبيلها عضلااااات خخخخ[

IMG]http://i.imgur.com/iirac.jpg[/IMG]

بس بعد مااقدر تعبت

 

[انوثه واناقه]

يوووه ماطلعت الصور

هذي اللي عذبوني فيها

وهذي يبيلها عضلات تحسين داخله معركه))خخخخ

 

[انوثه واناقه]

وعندي خلطه للسمبوسه حلوه مع الشاي

كوب ماش+نص كوب عدس اخضر

تسلقين المكونات وخليهم

عقب احمسي بصل مع شوية كركم وبطاط مبشور شوي
وجزر مبشور شوي مكعبات ماجي وفلفل اسود
وكيفكم علا حسب الطعم اللي تبونه للفلفل والماجي

وبس ترا تهبببل عن نفسي احبها

 

[انوثه واناقه]

بنات الحين رمضان وقت عطله وسهر

عطوني افكاركم للي ماعندها خدامه شلون

انضم وقتي ومتا اطبخ وشنو اللي اطبخه من الليل

وشنو اصناف سهله ويكون طعمها روعه

في عندي حلويات حللوووووه تبهل وسهله حيييل

ماتاخذ من وقتج واجد وتقدرين تحطينها بصحن كبير
او قلاصات بلاستيك نفس الحلويات ويطلع شكلهم
روووعه وعن تجربه حتا الطعم الكل يقعد يسأل

اذا تبون اكتبها لكم

 

[الشيخه فطامي]

روووووووعه الموضووع ينن

يااارب تبلغنا رمضان او تصلحنا لنيل رضاك وغايتك لطاعتك يارب

صج مشتاقين له ماشاالله الايام تركض

انا امس رحت ايكيا طبعا حسافه خلصت التنزيلات

لاني مسويه جرد عل المطبخ قطيت اغلبيه الاشياء البلاستيك او اللي مابيه او اللي رايح لونه

خذيت طوس حق الخلط ستيل اذا بسوي كيك او شي كلا اخلط ببلاستيك او قالولي مو زين عاد قطيتهم خذيت من ايكيا

جدورتهم بنات لا يعلى عليها صج غاليه بس تسوى

طوس حق السلطه زجاج
بغيت طقم صحون حلو ما حصلت اللي عندهم كلا ساده

تكرمون اخذت حاويه قمامه ^^^6 شاريكم باللغه العربيه الفصحى

او قطعه صغيره مثل حصيره حق المطبخ كلا من ايكيا ارقى شكلهم

بس قبل فتره رحت مع امي مجمع بيروت القيبت نظره سريعه صراحه مواعينهم حلوه

حتى كان بو 100 عنده قراش حق البهارات مع قفاشهم زجاج خذيتهم او قطيت كل اللي بالمطبخ لانه ماكان عندي قراش حلوه

او كنت ابي كلهم نفس الشي مو حاطه مالوت الجبن او المايونيز او الصوصات كنت اغسلهم او استخدمهم الحين صارو طفم واحد

بس بغيت سله حقهم من ايكيا ما حصلت حلوه

شنو بعد ^^^^ ايي ابي طاوله طعام مع كراسها بس مابيها غاليه صراحه لانها طاولتي صغيره حيل ماتكفي او من زمان عندي ياها

او سلامتكم ناطره معرض الاكل نفس كل سنه بارض المعارض

بس نفس ماقلتو ماني مجيله وايد حرام او يزيد صج الجلي كراتين كنت اخذ من سيتي سنتر على بو عرض او اخر شي ينقط

ايي اللي تبي تسوي محلبيه او جلي امي شرت الجدور الميني الصغار مع رؤوسهم حلوين

او خذت طوس صغار هم معاهم غطاهم حق الجلي او المحلبيه لما تسوينا بالطاسه تغطينه بنايلون هذا مع الراس على طول حلو شكله

طولت علي او قرقت وايد

 

[نارنجه]

صورت لكم القلاصات
الكرتون فيه ٦ وسعره نص دينار

هذا شكل السلطة فيهاا

و هذا شكلهم
مامعاهم قفاش بس تقدرين تستخدمين معاهم القفاش الوسط او القفاش البلاستك الفضية الصغيرة و الشوك
لايق مع حجمهم

/



وهذول عندي اياهم من جم سنة ^^
الي فوق كنت ماخذتهم من بو 100 من سوق المعلم الي بحولي
والي تحت تركي كنت ماخذتهم من محلات شويخ
بس حسافة مابقالي منهم الا 4

شكل الحلو والسلطة يصير غيرر وايد ذرب
وغير جذي تحافظين على وزنج و وزن الرعية ههههههههه
اسوي فيهم المحلبية و الجلي و الكريم كراميل و حلو الطبقات
و قمر الدين و اكون جاهزة حق اي ضيف
شغلي موجود بالثلاجة و جنه من محلات الحلو ^^

وما احتاج ادبل الكمية و موفرة مكان بالثلاجة يادوب رف حق هالسوالف ^^
واحلى من البلاستك

 

[نارنجه]

وهذول نفس الفكرة مع الصحوون البيضا / حق السلطة الكبة الشبس الكتشب الي تبينه
عندي اياهم من العام ^^

هذا الماعون المغربي خذت منه ٢
من جمعية الفيحا بثلاثة و شي تلاقونه يم السلم العادي
للقيمات و هالسوالف ^^

 

[نارنجه]

و كنت مجربة القلاصات و المغربي في موضوع السمبوسة