اللي تعرف شي عن بانكوك تدخل بليز

[اسطوره]

مرحبا كويتيات شلونكم حبايبي انشالله انا بروح بانكوك و بوكت و حبيت اعرف كل شي عنهم مثل شنو احلى الفنادق و المنتجعات و السوق و المطاعم .................... الخ:0bee2e8d89:

 

[الدلوعه2008]

حبيبتي والله ما ادري وانا اخوي بيروح الصين شتنصحيني قوله يجيبلي وشنو سوقهم ابي لي فيه شيء غريب وماركه

 

[أماراتية]

حياج اخت اسطورة ابتايلند ..<<< اللي يقول دارها ههه

بس انا موجوده فيها حاليا ممم والله الفنادق ما ادري شو الزين اللي فيها لاني قاعده بنظام شقق بس شكله مكان عاادي لكن مريح فديت الوالد ما يحب تسكيرة الغرف.. وعلى المولات يا كثرهم للحين رحت سيام براقون ورحت طوكيو سنتر وال mbk وروبنسون وعندهم اشياء حلوة وممم بس الاشياء الراقية اللي معوده عليهن في سيام وفيه السنتر بوينت للحين ما رحته وعن المطاعم يعني رحت اثنينه واحد اسمه بيروت في سنتر ممم نسيت اسمع وفيه ثاني هندي عجبني قريب من منطقة العرب شارع نانا جيه يسمونه ^^ و ما ادري ان شاء الله خبيرات تايلند عن السياحة يخبرونج لاني توني بس واصلتنها من اربع ايام فما اعرف شو المميز بعدي وبالتوفيق في سفرتج تراا اليوم طاح مطر ما شاء الله قوي وغزير ورحلة موفقه

 

[الباسمه]

فيه مطعم محمد المصري قريب من شارع العرب ببانكوك يهبببل كل شي حلوو ولذيذ عندهم انا لما رحت شهر العسل قزرتها على هالمطعم لاني انغثيت من السي فود
وعموما العاصمه ما اعجبتني بس اسواقها الغاليه اما الشوارع ريحتها خااااايسه
بوكت رومانسيه وفيها رحلات بحريه كثيره وجزر مثل جيمس بوند وجزيره الحب وغيرها
لا تنسين تطلبين من استقبال الفنادق بروشورات ويعطونج بعد اول ما تنزلين لمطار بوكت
ونصيحه ما تصير الساعه 6 الا انتو بفندقكم لان المصخره وخصوصا العرب بتشوفين اشكال والوان الله يهديهم يا رب ولا تنسين كريم الحماااااااايه
اسفه طولت عليج

 

[fat]

في بوكيت لا تنسين تروحين عرض فانتاسيا وايد حلو عبارة عن مسرح في عروض وايد حلوة لا تطوفكم وقبل العرض في استعراض برة فقرة رقص ومصارعة الاقزام والاعاب الحلوة والله يونسج في الرحلة واذا تبين اي شي لا يردج الا لسانج وحاضرين للحلوين

 

[kakooka]

عاد تايلند الدوله الوحيده الي ما تحتاج خريطه مجرد من تبطلين باب الفندق وتطلعين برا الشارع وتمشين كله سوووووووووووووق
واهيا دوله آمنه ومافيها شي بس مادري ليش سمعتها خايسه بالعكس مافيها شي وانا وحده ارجع الفندق الساعه 1 بالليل وأمان والي يبي الوصاخه يروح لها
بخصوص الفنادق الي ببانكوك انصج بفندق أماري بوسط السوق وما يحتاج تكسي او تكتك كله مشي ويمج كل المجمعات
اما بوكت مافيها سوق بس رحلاتها تونس ورومانسيه وتصلح للمعاريس
اذا انت تحبين السوق راح تحبين تايلند اما نظامج يكره التسوق فراح تلعنين اليوم الي رحت فيه
وبالتوفيق

 

[b.m.f.j]

حبيبتي سكني في فندق اسمه بايوكي سكاي ومو عند شارع العرب(لانه شارع العرب حده وصخ)
وهذا الفندق بمنطقة اسمها باتونام جدامه سوق شكبره سوق جمله وكل شي فيه والمجمعات قريبة واسعارهم رخيصة وعلى المطاعم مليانه بشارع العرب انا رايحه 3 مرات وهالسنه الرابعه انشالله احنا نروح شارع العرب عشان ناكل هناك بس
واي سؤال انا جاهزة

 

[شمع تحترق]

حبيبتي ادعي لي احصل حجز بروح الشهر الياي ان شاء الله


يا الغاليه بالنسبه لبانكوك أحسن فندق هوليدي ان صاير بنص السوق تطلعين منه و تصعدين على جسر المشاة لا بتشمين ريحة اكلهم اللي الله يزيد النعمه و لا بتشوفين شي و المجمعات على يمينج و يسارج و كله مشي و السكاي ترين فوق الممشي و شغل عدل و نظيف

اذا شفتي الفندق سعره غالي قولي لي ميزانيتج و اقولج شنو احسن شي لان انا كل مره انزل بفندق غير احب اجرب و ادل ما اضيع

بالنسبه لحبي الاسواق عندج المجمعات
التوب اسمه ( سيام براقون ) و في كواريم بالسرداب لا يطوفج يصفط اللي عندنا و الجمعيه اللي بالدور الارضي صايره بزاويه حلوه
روبنسون زوين
mbk و طوكيو اثنينهم بمجمع واحد و زينين
سنترال وولد اهو بالنص و لاصقين فيه مجمعين على الاطراف واحد اسمه zen و الثاني ايستان وهذيلي حلوين و ما يكفيهم يوم واحد
مجمع سنترال حلو و نظامه ادوار و دايما فيه خصومات
مجمع الماركات اسمه g و بصفتهم طبعا
في مجمع مو ذال الزود بس فيه جمعيه كبيره 3 ادوار اسمه Big c

عندج أسواق الليل اثنينه
البات بونق هذا وصخ و فيه بارات و شو يعني اذا معاج يهال ما ينفع و الساعات و الجناط التقليد الدرجه الاولي فيه و ما اوصيج بالمكاسر يعني الساعه حدها 1500 و الجنطه نفس الشي و اذا شي توه نازل 1700 و اذا ما رضي امشي عنه اهو يلحقج و اذا ما لحقج تري كلهم عندهم نفس الشي غيره يعطيج بالسعر اللي تشوفينه

سوق الليل اللي احبه بس عيبه حر شوي اسمه ( سلوم بازار ) او ( نايت بازار ) هذا ما يكفيه يوم و حلو و فيه فناتق و اشغال يدويه انا اعزه بس ريلي ما يحبه فادور له ملوت المساج أحد منهم يكون عندهم ريال و أدخله يسون حق ريله و انا اتفرفر على كيفي

و لا يقولون لج ملوت التكاسي او الطقطق مطاعم سي فود تري نار لو دشين الشيراتون ارخص لج انا جربت مره الله وكيلج 1 ام الربيان و شوية ربيان و بطاط شبس و قبقب 1 ب 70 دينار طلعوا على

سوق الاحد فيه شغلات غريبه بس حر حر حر و لا تروحين له بالتكسي لانه بعيد بالسكاي ترين اسهل و اسرع و براد و ارخص و سأل اللي يشتغلون بالمحطه يورونج اي محطه تنزلين و على العموم اهو آخر محطه يالقطار

اذا تبين مجمع الكمبيوتر اسمه بانتيب

عندج اسواق الجمله و لو اني ما نصحج كلش اسمه باتونام و باتونام 1 يم بعض و بوبي بس بعيد و لوعه و السوق الصيني حر و ضيج و بعيد

و ما اوصيج بالعربانه السحب ضروريه جدا بتايلند بالذات و حق الاسواق او تشترين الجنطه الكبيره اللي على رسومات دزني و تنسحب فيها تواير

الاماكن الترفيهيه
سفاري اهي حديقة حيوان و اهي فيها عروض
فانتسي وولد مدينه ملاهي و وايد حلوه
عرض التماسيح بس انا اقول ماكو شغل اقط فلوس عشان اشوف تمساح
و عرض الحيايا نفس الشي
حديقة الفراشات ما رحت لها في بانكوك بس يقولون حلوه
السوق العائم ما رحت له بس ناس تقول حلو و ناس لأ بس تري بعيد

البخور و دهن العود بنانا بس ما نصحج لا المنطقه وايد وصخه و ملوت البخور نصابين و حراميه

و اذا تبين اكل غير السي فود انا مرات اروح عند شهرزاد بنانا اكله وايد نظيف و طعم الاكل احسن واحد بالمطاعم اللي يمه و يذبح بروحه يوم الجمعه و طلبوا منه مواقيت الصلاة

=============================


بالنسبه لبوكت رطوبه عجيبه و حر و لو تقدرين تبدلينها بشنغ ماي ابرد و احلي و جوها لندني

اذا بوكت

الرحلات كلها حلوه و الحجز بكل مكان و اللي يحجزون قاعدين بالشارع بس افتري عشان تحصلين الارخص
و الرحلات لا تنسين تجيلين لج جنطه فيها بطاط و كاكاو لان ما راح تقدرين تاكلين الاكل اللي بحطونه لج

و لو تآخذين معاج توست و جبن كلاس افضل لان الرحلات طويله

رحلات البحر 3 و باجي الشغلات مثل الجت و اللذي منه كلهم على البحر اللى جدام الفندق

واحلي شي الفانتازيا صج روعه

حديقة الحيوان زينه و حديقة الفراشات و عندهم شي اسمه سفاري تركبين على فيل و يدخلونج بالغابه انا ما جربته لان قعدت فتره بسيطه

الاسواق عندهم مجمع كبير و حلو بس ما اذكر اسمه

و الفنادق التوب الهولدي ان و انا جربت اللي يمه اسمه هورزن وايد حلو و عجبني و غرفته كبيره و نظيفه

و أي استفسار من عيوني يا الغاليه


نسيت اقولج تري كنتاكي حلال و اذا تبين تتأكدين يوريج الختم مال شركة حلال

و عموما اذا تقدرين تتحملين ريحة اكلهم اللي بالشارع افتري على البسطات تري تحصلين شغلات لقطه

و الاقل انا آكل بالبيتزا و المطاعم الايطاليه باستات

 

[Om_Ksha]

^
^
ررررررررردج وايد فااااااااادني مشكوووووووره