المفطح على طاولة الطعام؟؟؟

[مشتاقة لأمي]

الشباب قبل الشياب يعانون من ضعف المفاصل ويتعبون من قعدت الارض
الأغلبية يقول لو قعدت لازم احد يسحبني يوقفني!!!!!!:denya:الموضوع :

أنا متعوده اسوي البوفيه صواني والعيش يكون نوع او نوعين مع اللحم مقطع احجام صغيره وتكون على طاولة البوفيه ويغرفون ويجلسون على طاولة الطعام .

المشكلة ابي اسوي مفطح يعني العزيمه لشخص ولازم وجود المفطح كامل ، مو عارفه احطه على طاولة الطعام والسلطات والمقبلات وباقي الاصناف على طاولة البوفيه .

أو ارصهم كلهم على طاولة البوفيه وبيضيع شكل المفطح خصوصاً الراس وهو فاتح فمه ويخز.

أو اخليهم كلهم على طاولة الطعام وشكلها صعبه احد يفر بالصواني الكبار؟؟؟؟:gr4uu::gr4uu:

مع العلم أن الطبخ كله بالبيت ماعدا المفطح
يعني اللي تقول خل المطعم يضبط أنا طاولاتي جاهزه بمفارشهم واكسسواراتهم.

بنات واللي يعافيكم اللي عندها فكره مجربه ونجحت او صور تساعدني، العزيمه يوم الاحد.

اللي بتساعدني ترى معزومه بس بعد ما يقومون الرجاجيل .

وهذي لكم :aha:

 

[الغلاااااااكله]

الله يعطيج العافيه

من رايي حلاته المفطح عالارض

اصلا حتى اغلب البوفيهات يخلون المفطح بصواني عالارض

وباجي الاطباق على طاولة البوفيـه

: )

 

[مشتاقة لأمي]

مشكوره يالغلا الله يعطيك العافيه.....

بس المشكله مايبون قعدة الارض ولا اريح لي المفطح والسلطة والمرق والفاكهة حوله وكان الله غفور رحيم

ابو الشباب اول واحد يتعب من قعدة الارض، يقول ربعه إذا الي عازم يمونون عليه حيل اول سؤال عسى فيه طاوله؟
إذا قعدة ارض يتعذرون بالرجيم ويقولون نبي نسولف وما يقومون للعشاء.

يقول والله شباب صغار مايقدرون يتربعون والشياب انشط منهم.
أنا اهم شي عندي الضيف ما يحب قعدة الارض لوجود مشاكل صحية عنده.

 

[Little Things]

نو يعني مفطح :|

 

[مطلع الشمس@]

حطية على الطاوله وبس شتسوين .. عادي
وخلي السلطات وباقي الأصناف على طاولات البوفيه

او

وزعي السلطات والأصناف الجانبية بصحونهم بترتيب على الطاوله مع صينية المفطح جذي أحسن لج واسرع للرياجيل

 

[مشتاقة لأمي]

يعطيك العافيه يا مطلع الشمس

وشكلي بجرب اشوفه على طاولة الطعام بروحه والاصناف الباقيه مثل ما قلتي على طاولة البوفيه

أنا ما حبيت اوزعهم لأن راح يتدمرون من العيش .

ستروبري ياعمري من شفتك ساكنه بمكدونلدز مثل عيالي عرفت انك جد مو راعية مفاطيح
المفطح هو الخروف كامل البعض يسمسه غوزي ويكون الراس منسدح بجنبه دليل أن ذابحين خروف لك مو حيالله عزيمه ههههههههههه.

 

[الغلاااااااكله]

اي خلاص حبوبه

حطيه عالطاوله بس لاتكثرين اطباق يادوب المرق والسلطات

حتى الفاكهه خليها مع البوفيه عشان ياخذون راحتهم عالاكل وماتكون الطاوله متروسه

لان خبرج صحن المفطح كبير يعني هو بروحه بياخذ حيز كبيـر

ان شاء الله تتوفقين بأحلى الاطباق ويكون شغل عدل مدل