الموظفات المتزوجات تشاركون بمصرف الجمعيه

[للصبر اخر]

شلونكم بنات
بنات انا قلت بحد حد حق ريلي بالنسبه للمصرف
يعني معاشي على شهاده دورات خاصه ويادوب اصرف على نفسي ولا فلس يعطيني من معاشه اللهم معاش الخدامه و الجمعيه اول الشهر
وبعدها اي شي ينقص من معاشي سوق مطاعم جمعيه ومايصير اخر الشهر الا رصيدي صفر الحين انا بسوي ليزر جسمي كله ويكلفني تقريبا بالشهر 200 وشي بشوف نفسي صراحه

هل تشاركون بمصرف البيت ولا شايلين ايدكم من هالشغله وشلون اقنعه اني خلاص من هالشهر ماابي اساعده لاني الشهر اللي طاف قلت نفس الكلام بس كل اسبوع يقولي عطيني سلف ومااحب ارد احد صراحه فشلون ريلي ؟:bbbiu:

 

[جوري 2007]

لا الصراحه مااساهم بمصرف البيت ولا الخدامة ولا اليهال اللهم الا ساعات اشتهي جم شغله لليهال من كيفي او اكسسوارات للبيت

ماجله وايجار ومعاش خدامة عليه اهوة هذا دوره

 

[! بــدويه وآآيــد !]

،


لاتقولين تشاركون قولي تتصدقون ؟؟ لان المره لو تقط 100 فلس في بيتها تعتبر صدقه

وصراحه الصدقه على الرجال وبيته تخربه حسنات مني وقلب وسكر وضغط وقهر مني ، مانبي هالحسنه الي تخرب اكثر من انها تسنع

الرجال عليه بيته وخدامه وعياله وماجلة البيت والطلعات واذا بيعطيج بين فتره وفتره مايحتاج الشكر حتى هذا واجبه

لكن تعطين ويقول ابي سلف بعد ؟ خووش والله جمد معاشك احسن وخلني اصير رجال بدالك

حبيبتي لاتعودينه مع انج عودتيه وخلصتي لاتعطينه اذا طلب قوليله مضغوطه هالشهر والشهر الي وراه قوليله ماقدر عندي التزامات والي وراه قوليله انا يالله الحق على نفسي

وياريت انتي بعد تطلبين منه او قوليله محتاجه الي سلفتك ؟؟ صيري حريصه على فلوسج لاتعطين زوجج نصيحه احرقيهم ولاتعطينه ترى تخربينه جذي !!

 

[Grass]

طول عمري ادفع الجمعيه كامله ومحترق قلبي

مو عشان أتمنن لاااا !!!!!

بس اشووفه مو محتاااج ومعاشه صار أضعااااف

بس خلاااص تعود !!! ولو اتكلم عقب هالسنيين !! بصير منانه

فنصييييحه يابنات لا تعودوون رياييلكم وعيشوا على قد راتبه

نصيييييييييييييييييييييييحه

 

[عبالي حبيبي]

ههههههههههههه

اضحك على مصيبتي تعرفين ليه

لاني موموظفه وهمن اصرف اي شي وياي عيديات اهلي يعطوني اصرفه عالبيت ومرات اعطيه بعد

زمن اغبر صار الريال مايستحي كلش

 

[المرفأ~~]

الله المستعان ... بحالات نادرة او اذا ابي شي معين لي .

انزين اللي اندموا او اللي ماتعطي شلون اذا البيت فاضي كلش ..؟؟
او هو طلب .؟؟؟؟؟

 

[softlady]

امبيه لا

ديري بالج

تغيري بالتدريج لان والله تاكلينها

اول شهر وقفي سلف

ثاني شهر سكتي

الثالث طلبي

الرابع حطي قواعد وانا يلزم معاج صيف وشتا وجسوه عيد

ومدحيه واااااااااايد انت ماتقصر انت ولد حلال انت كريم

وطلبي بعياره مو تقثينه

طلبي بدلع وشطانه

وادعي الله يسخره لان مو خوش طبع

 

[om MaRyooM]

انا اشارك وماعندي مانع وعلى قلبي زي العسل

لان ادري فيه لو عنده زيادة مايخليني اقط فلس واحد .. وهذالأني عودته من اول ماتزوجنا ماقط فلس حمر عالبيت

بس الظروف صارت صعبة شوي عليه فالحين اقط معاه واشاركه مافي مانع

 

[بيرلا ستور]

اساعد بمحض ارادتي مافيها شي

بس هو مايتكلم وبالعكس الجمعية وكل شي عليه
بس انا اشارك لازم نكون عالحلوة والمرة مع الريال

الحياة صارت اصعب من الاول

ونبي لعيالنا الحياة الحلوة والمدارس الزينة ومانقصر وياهم بشي

الله يقوي الجميع

راق لي موضوعج تحياتي

 

[حجيه هيونه]

امبيه لا

ديري بالج

تغيري بالتدريج لان والله تاكلينها

اول شهر وقفي سلف

ثاني شهر سكتي

الثالث طلبي

الرابع حطي قواعد وانا يلزم معاج صيف وشتا وجسوه عيد

ومدحيه واااااااااايد انت ماتقصر انت ولد حلال انت كريم

وطلبي بعياره مو تقثينه

طلبي بدلع وشطانه

وادعي الله يسخره لان مو خوش طبع

انتي صح :eh_s(15):



ديري بالج ترا كلش ولا الريال يتعود هالطبع بتزهقين طول عمرج


فضي السيرة من الحين ولا باجر ترا بيكثر المصرف وتلقين نفسج متدبسه بكل شي

 

[ياغفور اغفر لي]

الله يرزقني بوظيفة عشان اساعد امي بس
ادعوا لي

 

[شيخة العوب2]

والله انه معاش خدامتي علي وانا الي ماخذتهاا من المكتب بالسعر الفلااني وانا الي اشتري لعيالي ملابسهم الماركه او العااديه وكل شي بخاطري اجيبه مابخل علي نفسي وعلي عيالي بشي وحتي زوجي اشتري له بجايمه وعزكم الله الشوز والساعات يعني بالمختصر المفيد ماااخلي شي الا واجيبه بفضل ربي انا مع زوجي متقاسمين امور البيت وحياتنا ماشيه وللله الحمد والمنه شكو الرجال كل شي عليه وليش الرجال مايستحي يعني عشان ماقط في بيته كلن وظروفه والرجال اذا دفع للخدامه والبيت والماجله والعيال والطلعات شباقي من معاشه حقه ليش اهوه مايحتاج مصروف يومي حبيبتي هذا رجال يبيله بانزين وزقاير ويمكن يفصل اويشتري ملابس في باله يمكن متسلف من ناس اقساط سيارته قرضه لازم يعطي امه او اخوه الي ماتوظف لازم يساعد اذا كان في بيت اهله كل شهر من نعاشه انشالله يعطيها ١٠٠ الحياة صعبه ياعزتي له راح المعاااش مابقي شي ًً وكل شي غالي والله ماخلي كل شي علي ظهر زوجي والله نص علي ونص عليه والحمدالله ومافيها اي شي اذا قطيتي في بيتج بالعكس اتحسن انه صج معاشج فيه فايده موكل علي لبسج وعطوراتج ومكياجج وزوجج المسكين يروح يتسلف من ربعه موحلوه بوجهه حلاته الرجال فلوسه بجيبه احفظ مالك عن الناس يغنيك *

 

[سفيره الكويت]

اعرف انه على الرجل ان يصرف على البيت ولكن الكل يجزم بغلاء المعيشه وتحتاج الحياه الان لرجل ومرأه متحدان ويظهر حبهم الحقيقي بمثل

هذه المواقف ..!

على المرأه ان تساعد الرجل خاصه اذا اهيه تعلم انه لا يستطيع ان يوفر كل مايطلبه البيت ولا يحب يتشكى من هالشي حتى لا يكون بوضع

محرج فلهذا يطلب منج المساعده والاولى انج تخصصين مبلغ لو بسيط للبيت يعني مثلا 100 دينار او 200 وانتي دورات خاصه انا مثلج

بس للحين قاعده ادرس ومعاشج حلو ولله الحمد 650 يكفيج وزياده

 

[بنوته كيكه]

لا جد صدق ولا غشمره للحين ؟
من صدق انتو تكلموون للحين انتو موظفين اوكي لا علي شننو
اهو اغراض البيت جيبها وفلوس خدامه يعطيها يعني اهو متحمل بعد تبين بعد يدفع فلوس مصروف لكم وانتو متوظفين
معاشكم وينه ؟
اختي انا اقولج الحق حق زوج يعني مو واحد من الشارع اكيد بقط ويها انا ماتوظفة الي علشان اسعده
مع اني مو متوظفه بس خي الله ماجود

 

[زوجة عزيز]

أنا مو موظفه بس مصروفي اللي يعطيني يرد للصرف لأنه الصراحه وإيد إشوفه وأنا وإيد أراعيه والصراحه كل شيء غالي والصرف وإيد مافيها شيء ليساعدتيه

 

[حظ من عنده انا]

اذا تبين طريقه تخلين زووجج ماياخذ منج فلوس وانتي قبل معودته


اول شي معاشج حطيه ببطاقه بروحها مايدري عنها

او حطي لج بوك وخشييه باي مكان واثقه انه ماراح يجيه


وخلي ببوكج اليوم مصروف شهري بسسيط لصرفج اليومي

واذا قال سلفيني قولي مامعاي الا هالفلوس وابيهم مصرف لي

ابي جذي وجذي وجذي

واذا سالج عن الباقي

طلعي اي عذر


والله يعينج

 

[FJ style]

اساعده بالاجار وانا اييب الجمعية وهم ادفع معاه اقساط المدارس واصرف ع نفسي والحياة مشاركة عادي

 

[للصبر اخر]

مشكورين بنات انا اساعده من ملجت علي حتى بدله عرسي بعتها وعطيته الفلوس
عمري ماحاسبته ابداااا بس هالمره بشوف نفسي يعني ٦٥٠ شنو تسوي انا بسوي ليزر ومحتاجه
كل شهرين اصبغ وكراتين يكلف وعيالي ادخلهم معاهد وكله مني غير العابهم وملابسهم
لاقلت له ابي حق عيالك يقولي ماعندي غريبه يعني معاشه زين واعرف جم يعني مومعقوله يخشهم
اهو نوعه صريف ومايبخل على نفسه بشي
على العموم ماقصرتوا وبتبع نصايح البنات والله محد بيفيدني غير نفسي ريلي جدا اناني للاسف

 

[تبطي عظم!]

لا والله ما اشاارك مو بخل لا لان معاشه دبل معاشي ثلاث مرات

مو محتاج اساعده يالله لك الحمد

 

[مس عسولة]

والله اقط وايد مو شوي للجمعيه وملابس اليهال لان ريلي معاشه مو ذاك الزود وعنده قرض سيارته واشياء وايد
ومافيها منه