النشافة والثلاجة

[ام فجور 2008]

قوة بنات

انا ساكنة مع حمولتي غرفتين وحمام محكر حمام ولله الحمد :0bee2e8d89:

مليت الصراحه من العفسة وكثرت الاغراض وصغر الغرف ففكرت اغير الغرف واسوي نيو لوك غرفه القعدة مستطيله وفيها كبت وكاونتر وتلفزيون ونشافة وثلاجة وكبت ادرج حق اغراض السي سيد وجهاز مشي بروحه ماحذ مكان ماني عارفة شلون ارتبها احترت وايد ففكرت قلت ودي اسوي حركة بالثلاجه والنشافة مثل الفهم بخام او البسهم شي بس مو عارفة شنو عالشان ما يبين شكلهم

 

[ديما الكويت]

هلا ام فجور ، عندي لج رايي :
1/ اول شي خلي غرفة النوم للنوم فقط ، يعني سرير وكبت(دواليب) وتسريحتج(تواليت) وهم بعد الكمودينو تراه ضروري تحطينه يمج للادوية الله يحفظج وللجرايد أو الكتاب (إذا فيج أرق وماياج نوم) للقرأن الكريم وطبعا هذا مايبيله وتالي أغراضج اللي تحتاجينها ، ويفضل ماتحطين تلفزيون.
2/الحمام :أهم شي صيدلية بما أن المكان ضيج وما عندج مطبخ. وتالي خزانة صغيرونة تحطين فيها الفوط اليومية/البرنص/ الفوط الصحية(طبعا ولاحظي حبيبتي أنج لازم تسكرينه على طول منعا للجراثيم وهذه نصيحة مني للبنات انهم دايما يسكرون كيس الفوط ) /البندول /الشيرة / الديودرنت /البودر/ كريمات الشعر وحمامات الزيت /أمواس الحلاقة مالوتج زوجج/الصابون /الفراشي وغيرها. والغسالة والنشافة أممممممممم؟ الغسالة تحطينها بالحمام عشان الأزعاج ودوران الماكينة وبصراحة تعجبت شلون غسالة ونشافة بغرفة ؟مو بحمام او مطبخ . وإذا تقدرين تشترين غسالة ونشافة مع بعض يكون اوفر لج بالمكان.
3/في وحده من الاخوات جزاها الله عنا ألف خير حطت موضوع عن"إذا كنت ساكنة عند حموله وما عندج مطبخ شتسوين؟"
طبعا أهي تعلمج شلون تسوين لج مطبخ مختصر ومايكلفج شي . أرجعي لموضوعها وحاولي انه الغرفة الثانية تسوينها صالة وقعدة لكم وإذا عندج عيال أو ياهل تقدرين تحطين فاصل بالجدار (الطوفة) وتحطين وراه السرير وتزين هالفاصل بالرسومات المحببة للاطفال ومن بره رسومات طبيعية
وخليلج مكان مخصص لمشاهدة التفلزيون والاكل وماألى ذلك. وحياج الله

 

[ام فجور 2008]

الله يحييج ماقصرتي يا قلبي شدعوة جم مشاهدة ومافي غير ديما جزاها الله خير

 

[AFRoDiT]

انا فكرت انج تسوين مساحه في صالة القعده
يعني اذا تلفزيونج على طاوله وماخذ مكان .. اشتري التلفزيون الي يتعلق بالطوفه

والغساله حطيها بالحمام ..
والثلاجه حاولي تلبسينها شكل خشبي يناسب خشب اثاث الصاله وحطي عليه براويز صور .. عشان يصير شكل الثلاجه كأنها شيفونيره أو كبت ..


واذا انتي حاجتج للثلاجه مو كبيره دام انتي ماعندج مطبخ
استغني عنها و اخذي صلاجه صغيره حق غرفة النوم


أتمنى أكون قدرت أفيدج بالاقتراحات الي قدمتها


وسوري اذا ماقدرت افيدج لأني موشايفه المكان


أتمنالج التوفيق حبوبه

 

[ام فجور 2008]

يعطيج العافية والله فكرت التلفزيون بالطوفة حلوة