dr_enshalla
New member
... فكرت شنو احلى موقف صارلي بحياتي .. شنو اكثر لحظات حسيت اني محظوظة فيها .. اكتشفت ولله الحمد عندي وايد بس في لحظات حبيت الكل يشاركني فيها .. لانها فخر لي ولكل كويتي
الكويت لو بختصرها اقول ابراج الكويت .. ناس طيبين و بـــابــــا جابر
احلى لحظات لما تشرفت وقابلت بابا جابر .. احس اني محظوظة لانه صج كلنا نحبه ونفتخر انه ابونا .. انا واختي دايما كنا نتفاخر واحنا صغار "يمكن تضحكون" بس كنا دايما نقول شيخنا اجمل حاكم ويها يشرح القلب
ارجع معاكم للحظاتي الحلوة واللي تبدي من سنة 1994
عمري وقتها كان 9 سنين ..
وقتها كانت الكويت للحين جراحها تنزف عقب الغزو .. اختارتني مدرستي ضمن مجموعه من الطالبات والطلبة نمثل ابمسرحية عن الغزو الغاشم ... المسرحية بروحها لها ذكريات وايد حلوة مضحكة ومحزنه .. المهم اختاروني اني القي قصيده بنهاية المسرحية .. انا وقتها ماكنت مستوعبه منو الحضور ومع التدريبات تمكنت من القصيده عدل وانشغلت بالتدريب ويوم المسرحيه كلنا نستعد و نلون ويوهنا وملابسنا بصبغ احمر يعني دم .. انا كنت اطلع باخر مشهد .. تبطلت الستارة اول ماشفت الحضور حسيت برهبه مو طبيعيه انعقد لساني و قمت غصب اتذكر كلمات الشعر لانه
بـــــــــــــــــــــابـــــــــــــــــــــا جابر كان اول واحد شافته عيني ... خلص دوري كملنا باغنية عن الاسرى وكان في شعر تلقيه بنيه بالروضه عن الشهدا .. بابا جابر عينه ادمعت ... كان موقف مؤثر وايد محد نساه
عقب المسرحية كنا كلنا نتسابق نروح نسلم عليه وكانت مغامره لانه احنا ياهال والمكان متروس شخصيات مهمه .. المهم قدرنا نوصله وسلمنا عليه و حتى صورونا وحطونا بالاخبار انا ماكنت مصدقه نفسي .. شفت بابا جابر وسلمت عليه !!!! و كشخت على اهلي بهالشي انه من قدي
وهمن ما انسى ابونا سعد هم سلمنا عليه وكان شرف لنا
مرت سنه كنت لاهيه بالدراسه ... وصلني خبر اكثر من رائع .. اختارو خمسة من ممثلين المسرحية يكرمهم الشيخ وانا بينهم
اهني انا كنت بقمة السعاده .. لاني ماكنت ادري انه دوري يعتبر بطوله ولانه والاهم انه راح اشوف بابا جابر مره ثانيه
وصار اليوم الموعود ... ودخلنا قاعه صغيرة بس حيييييل حلوة نفس اللي يحطونها بالتلفزيون وسلمنا على بابا جابر وسولفنا معاه وصورنا معاه ... انا كنت مستحيه وايد ماذكر شنو قلت .. الصبيان كانو اجرأ
و من كرمه عطانا ساعات يد على علم الكويت وفيها فص الماس صغير للحين خاشه ساعتي واعتز فيها
.... ومرت السنين وعقب 8 سنين .. وبفضل تعبي ومجهودي .. كرمني الشيخ ضمن متفوقين الثنوية .. كان يوم وايد حلو جمه التفوق بشوفة ابونا الغالي
.. دخلت الجامعه وانا حلمي اييب مجموع عالي .. البس الوشاح الاحمر ويكرمني الشيخ جابر ... بس.. واه من كلمة بس .. الموت علينا حق ... الله يرحمه ويغمد روحه الجنه ... بس دوري ودورنا كلنا انا ماننسى حبه للكويت ودوره الفعال برفع اسمها بالعالي .. كلنا نبدع بشغلنا وين ماكنا ويارب يحفظ ديرتنا من كل مكروه
هذي من احلى لحظات حياتي ... تمنيت اشاركها معاكم
