انخطبت وامي تضايقت .. ليش؟

[mi corazon]

السلام عليكم بنات شلونكم؟

بنات آنا بقولكم على سالفة

من فترة انخطبت وكنت قبل كل ما ايي احد يروح ومايرد لدرجه ظنيت اني مسحوره ..بس طلع نصيب

هالمره انخطبت وتم الاتفاق على كل شي .. وقلت استخير

استخرت اول مره ماطلع معاي شي

وتميت استخير .. ثالث مره حسيت بضيجه حيييييل .. بس ماقلت حق امي لأني اشوفها كل يوم مستانسه ان اموري تيسرت وبتزوج

لدرجة اني قلت لها يمه قوليلهم جذي وجذي .. واهي تقول يسري يابنتي ول تعسرين

واذا على اكملج الماجستير وتغيير وظيفتج هالشي تتفقون عليه بعد الزواج

وآنا يابنات عندي قناعة إن هالشي لازم نتفق عليه قبل الزواج .. اللي اوله شرط آخره نور .. صح؟

المهم .. دقت ام الولد تبشر امي ان نتيجة التحليل تمام .. وسالت امي متى تبون انييب الدزه والملجه متى؟ ووين؟

امي قالت كليفكم ..الام قالت خلاص عليل نملج وتيي بيتها علطول بدون عرس ولا هيصه

امي قالت لا لحظه .. الحين شلون تيي وماجهزت الشقه ولا جهزت نفسها

قالت لا ولدي صبغ دارة ونظف داره .. امي انصدمت .. قالت عمرج سمعتي عروس اتدش على فرش قديم؟ لازم يابنت الحلا تجهزون لهم مكان خاص

قالت الام اي لهم غرفة .. والحمام مشترك مع البيت فوق

امي انصدمت منها .. مو توج تقولين لها شقه؟ غرفة وصاله ومطبخ وحمام؟

قالت ها لا مو جذي

وبعدين اخاف على ولدي ما يتغدى بعدين خو اهي موظفه

امي قالت ماعليج بنتي طباخه .. ومره تدبر بيتها وماهي ميوعه ريلها

المهم وصلوا بالنقاش انها تخصص لنا يم الديوانيه غرفه وحمام " جنه سايق" ..

امي قاللت انزين تسكرون لها الممر علشان لي حبت تروح الحمام واهي لابسه بجامه او شي محد يكشفها وبالشتا برد عليها تطلع من الحمام للحوش

المهم قامت تتهرب وتخبص .. واخير شي قالت خلاص شكله ماكو نصيب

امي قالت ماتشوفون شر احنا كنا شاريين وانتوا بعتوا .. على هواكم فمان الله

امي عاد سكرت وعبالها آنا زعلانه

آنا بصراحه مازعلت لأني حسيت هم وانزاح .. ابي اضبط عمري واسوي عملية تكبير واهما يبون يدخلوني الاسبوع الياي؟ وين يمدي عروس تتجهز؟؟
وابي اكمل دراستي وووو

واهوا مو هاين عليه يقول كلمه؟ كله امه وابوه واهوا ماله شغل ولا راي.. حتن يوم الفحص مارفع عينه علي وكله يقول مادري كيفك يبه كيفك يبه .. صج البر بالوالد زين .. بس شكله مايتحرك إلا بشور امه وآنا اضيع بينهم

بنات آنا اللي حز بخاطري ان امي الحين متضايجه واتدق على المره ماترد . اخير شي دزتلها مسج .. تتشره عالمره وتقول عيب جذي بيوت الناس مولعبه .. وعيب تعشمونا وتعشمون بنتي بكلام وتالي تطلعون تلعبون .. ترى بيوت الناس لها حرمه وبنات الناس مولعبه

الحين بنات ابي امي تنسى السالفة شلون؟

واللي تقرا موضوعي تدعيلي وتدعي لبنات المسلمين بالزوج الصالح الكريم والمستقيم

آمين

 

[ToOoTi]

ربي يرزقج باللي احسن منج
وانتي قولي لامج خيره من رب العالمين
يمكن لاتزوجتوا بتصير مشاكل وتردين مطلقة
احسن بين كل شي وانتي على البر

 

[حنطاااويه]

حبيبتي الله يوفقج ان شاء الله
ويرزقج بالزوج الصالح عاجل غير اجل

 

[pure.soul]

واي يحروون شالناس استغفر الله ، و الله الحمدلله اللي الله فكج منهم و ما صرتي من نصيبه ..
قولي حق امج الخيره فيما اختاره الله ، و دام الله رده عني فأكيد خيره لي ..
و الله يعوضج باللي احسن منه " و ما أخذ منك إلا ليعطيك "

 

[(كويتيه عسل)]

كل شي قسمه ونصيب

المفروض امج ماتدزلهم مسج ولا تتصل عليهم جنه تترجاهم

اهما قالو ماكو نصيب خلاص كل شي انتهى بالعكس قولي الحمدالله خيره

وامج متضايقه لانها تحبج ومحتره علشانج

ولا تحاتين الوقت كفيل بالنسيان وانتي حاولي لا تييبين سيرة لامج بالموضوع

واذا امج يابت سيرة بالموضوع خليها تتكلم وتطلع اللي في قلبها

وانتي لاتناقشينها وتزيدين حرتها

 

[( المـلاك )]

كل شي قسمة و نصيب حبيبتي
و هذا مو نصيبج
و اكيد امج بتتضايق انتي بنتها و تبي لج الزواج و الستر و الراحه
و بعدين زين الله فكج منهم
جذابين و يلعبون عليكم و الريال شوره بيده اهله يعني لو تم الزواج ماتدرين شنو راح يصير فيج بعدين
الحمدلله على كل حال
والله يرزقج بالزوج الصالح و يسهل امورج يارب آمين ،،
وامج قعدي معاها على يوم وفهميها
قوليلها يما انا مو متضايقه لانه ليلحين ماصار شي اصلا
و انا استخرت و طلعت الخيره مو زينه وانا من يوم ما تقدموا وانا حيل متضايقه
و قوليلها من هالكلام و بينيلها و حسسيها انج حيل مو مهتمه و طاف عشان اهي بعد ترتاح

و بالتوفيق انشالله =)

 

[نـعـومـه]

رد : انخطبت وامي تضايقت .. ليش؟

حبيبتي كل شي خيره

المفروض تتفقون على السكن قبل الفحص وبصراحه شخباري غرفه وحمام

اوكي تسكن بيت اهل الزوج عادي بس مو غرفه وحمام مشترك !!

وهم ميخالف مولازم عرس بس عالاقل يعطونج فجه تجهزين فيها !!!

الحمدالله الله فكج منهم

وامج قوليلها خلاص الحمدالله افتكينا منهم ولو تزوجته جان صارتلي مشاكل وحووسه وقوليلها عن عيوبهم عشان ماتفكر فيهم

وقوليلها يما ادعيلي انه الله يعوضني احسن

 

[*صَبا*]

رد: رد : انخطبت وامي تضايقت .. ليش؟

الله يوفقج ويرزقج باللي احسن منه

انتي لاتبينين لهلج انج زعلانه واصلا مافي شي تزعلين عليه
الحمدلله ماتدبستي فيهم شكلهم مب مستعدين

الام لاشافت بنتها مستانسه بيتستانس

انتي قوليلها عن مشاريعج المستقبليه ووشلون ناويه تكملين دراستج وشنو بتسوين

يعني حسسيها انج مرتاحه ومقتنفع باللي الله كاتبه لج

 

[yam_yam]

رد : انخطبت وامي تضايقت .. ليش؟

كل شي خيره من رب العالمين


لا تحاتين الله بيرزقج النصيب الصالح
بس ادعي ربج واحنا بايام مباركه

عشى الله يرزق كل البنات الازواج الصالحين يارب

 

[روح مغليهآ]

رد: رد : انخطبت وامي تضايقت .. ليش؟

واي هذول هيلق من اولها جذب ولف ودوران زين الله يحبج فكج منهم قطيعه

 

[mi corazon]

توتي

حنطاوية

بيور سول

يم يم

مشكورين حبيباتي عالدعوة اللي تريح الخاطر تسلمون

كويتية عسل ... اي هالشي عور قلبي انها دزت المسج وقتلها يما حسستيني اني طايحه بجبدج وماياني احد غيرهم .. حافظي لى كرامتنا عالاقل خيولون .. بس اهيا قالت هالحجوة بقلبي وماني مخليتها تذبحني .. وبالعكس الحين آنا كله اضحك معاها بس من تشوفني رحت داري تقعد تحاتي وتدق علي علبالها افكر واحاتي

الملاك .. اي آنا قعدت معاها وفهمتها اني ماني زعلانه بالعكس هالخطبة بالذات كان وقتها مو مناسب كلش لي ... وعندي امور ثانيه مهمه اتوقع لو تزوجت الريل ماراح يعطيني مجال احققهم مثل الدوام الصبح مع الدراسه بالليل تاخذ كل وقتي .. والله يسهل ياخيتي والحمد لله اني استخرت والله خيرلي الأفضل الحمد لله


نعومة .. اي مو هاذا اللي صدم امي .. المره لمن ايت تخطب قالت اللي تبونه حاضرين لو تب تقعد عندنا احنا بنسويلها جناح خاص ولو تب تطلع بره احنا هم حاضرين .. اللي يريحها .. هاذا بجرنا .. ولمن صار كل شي اوكي ووافقنا قامت تقولب بالحجي وتخبص .. يامعوده صج روحتهم ما عليها حسايف الحمد لله ولا جان صارت مشاكل لي الراس.. تخيلي عروس بغرفة الصبي القديمة؟؟ شنو لاقيني بالشارع؟ عاد تخيلي غرف الصبيان شلون صايره .. اتوقع غرفتي الحين في بيت اهلي اهون منها عالاقل الحمام مو مشترك واي ياربي لك الحمد


صبا .. حياتي والله مو قاعده ابينلها الزعل ولاني زعلانه اصلا بالعكس هم وانزاح .. وفعلا آنا قتلها واهي بنفسها قالت لي قعدتج عندنا معززه مكرمه تطلعين وتردين محد يكلمج تنامين وقت ماتبين وتكملين دراستج واحلامج تسو الدنيا عندي .. بس ستل احسها قلبها يعورها وادش عليها الاقي استعطاف في عينها .. ياربي كرهت دشتهم علينا يابولها الهم حسبي الله عليهم ناس ماتراعي حرمة بيوت ولا عندها امانه

الله يعوضني خير
مشكورين حبيباتي

 

[^ليلاس^]

رد : انخطبت وامي تضايقت .. ليش؟

اشوه ان هالشي صار وانتوا عالبر قبل لا تدبسون فيهم

المهم حبيبتي كل شي قسمة ونصيب وانشالله الله يرزقج بالزوج الصالح

وكلمي امج ان انتي اصلا لما استخرتي ماكنتي مرتاحه وبيني لها ان انتي مو متضايقه وان خيره هالشي صار قبل الملجه

 

[pure feminine]

ياااااااااااارب ياااااااااااااارب بهالوقت المستجاب فيه الدعااء أن ربي يعوووضج خير
ويرزقج بالزوج الصالح الي يسعدج


ولا تضايقين ولا شي خيييييييييييره أن شاء الله دام أستخرتي ولا خيره الا فيما أختار الله

بعدين خلاص أمج لا أدق عليها ولا شي مبين عليها مره ما عندها ذوق الله يهديها
ولا وين أحنا بأي عصر يحطونج بغرفه وحمام مشترك @@

 

[G!RLooNa]

حبيبتي قولي حق امج بس شكو تدقدق عليهم و تدز لهم مسجات جنها تترجاهم يردون !! اذا احد بيترجى و يساحل اهما لانه اهما الغلطانين مو انتو و تقولين حق امج حتى لو ردوا دقو و لا حاولوا يصلون لا تعطينهم ويه خلاص ما نبيهم و انشالله الله بعوضج اللي احسن منه وصج صج صج الله فكج منهم قولي حق امج المفروض نصلي ركعتين شكر انه الله فكنا من هالزواج مو نتحسف عليه و قوليلها انج اصلا ما كنتي مرتاحه و يت السالفه خيره من الله!

 

[[[ عيون جابر ]]]

رد: رد : انخطبت وامي تضايقت .. ليش؟

يا بعد عمري لايظيق خلقج ولاشي ترا معاكم حق لازم شقه حتى لو صغيره اهم شي مكان معزول شنو حمام مشترك وين صارت هذي سايق ولاخدامه انتي
خل يولون واييج تاج راسه ويحطلج بيت انشالله مو بس شقه
قولي امين
كثري من الاستغفار حبيبتي وقولي الحمدلله خييييييره ماتدري بعدين شنو راح يصير دام اهو ورا شور امه وابوه لا شخصيه ولا شي جان عل قلبج

 

[مرمووور]

رد : رد: انخطبت وامي تضايقت .. ليش؟

الحمدالله يمكن خيره
ولاتخيلي حتى حماام مااعندج
وانتي حسسي امج انج مرتااحه انج مااتزووجتييه عشاان ترتااح وتطمن
واللله يووفقج ويرزقج الزوج الصاالح الي يسعدج :

 

[G A L A W I]

رد : انخطبت وامي تضايقت .. ليش؟

أول شي:صدقيني كل شي ربج يكتبه فيه الخير حتى لو احنا نشوف غير جذي
ثانيا:الحمدلله انج افتكيتي لان مثل ماقلتي ماعنده شخصية وباجر شلون بيتحمل زوجة وعيال وبيت
ثالثا:بالنسبة لامج عسى ربي يخليها لج ويشرح صدرها..صدقيني لاشافتج تضحكين وتسولفين وعلى طول مفرفشه هي اكيد بتستانس..هي يمكن عبالها انها هي السبب وندمانه..لاتخلينها تدز شي لهم خل تحقرهم..وانتي عيشي حياتج ومن الحين ضبطي عمرج

وعسى ربي يرزقج بالزوج الصالح اللي يبرد قلبج وقلب امج..آميييييييييييييين

 

[Miss McDonald]

آمبيه ..! @@ ..

صرآحه انآ مآ آلووم آمج زين تسسوي فيهم ..،،

حبوووبة .. " الخيرة فيمآ آختآره الله "

وانتي بيني لأمج انج مسسستآنسسة ..،،

والوقت كفيل ينسسيهآ .. :eh_s(21):

 

[Loutes]

رد : انخطبت وامي تضايقت .. ليش؟

قولي لها من زينهم
وين حنا غرفة وحمام سلالالالالالالامات
وقولي لها قصص زميلاتك اللي تاخرو وخ1و نصيب حلو
والله يرزقك

 

[زينة الشرق]

الله يوفقج ان شاء الله
ويرزقج بالزوج الصالح عاجل غير اجل​