انقطعت عنكم وماردني الا الشديد القوي طالبتكم العون والدعوه

[Dana.Qtr]

ياربي بنات شكثر انا تعبانه وحالتي سيئه وايد وايد
وبخاطري حجي وايد ولا اعرف من وين ابتدي
واشوف ان مشكلتي عويصه بس ان شاء الله الامل موجود وبذن الله تنحل


كنت وايد متردده اني اقولكم مشكلتي هني
لان فيه منهم بنات اعرفهم شخصيا
بس اتمنى يكونون ستر وغطى ويعتبرون ثقتي فيهم ميثاق بينا

السالفة اني باختصار راغبه بولد عمي الي اصغر مني بسنتين
وهو راغب فيني
وبلغ امه واخته بهالموضوع وانا عرفته منها وتعلقت فيه لي 4 سنين
لو بتخيل زوج ماتخيل غيره

المهم امي
امي منفصله عن ابوي من كان عمري سنه وانفصلت عن عايلته ومجتمعه بشكل عام
بسبب المشاكل وفعلا ابوي كان الغلط وايدوه فغلطته ثنين من عمامي ...

امي فرمضان حست ان مشاعري تميل حق حد من عيال عمي
وبالفعل اعترفت لها وردة فعلها كانت 90٪ مؤيده وراضيه

ارتحت وايد وتميت على امل انه خلاص يصير ريلي بعد ثلاث سنين لين اخلص دراستي وهو يكون نفسه عدل
يوم الاثنين اخته كلمتتي قالت امي تبي تكلم امج عن موضوعكم كخطبه مبدئيه شرايج
انا قلت لها مادري
لان فعلا مادري
لان تو الناس ومحد فينا جاهز
بس من باب الادب رحت كلمت امي
وحشرتني حشار
سبته وسبت هله
وماخلت فيهم
وقامت تقول عني بلا كرامه واني قاطه روحي عليهم
وقالت لو كلموني بقلبها حرب لان ماعندي شي اخسره

قتلها خلاص يمه الموضوع بيوقف هني وان شاء الله لين صار قد الزواج وانا قده بيتقدم
قالت اصلا صغير عليج ولا يناسبج ومنزين هلج ووو

قتلها اسمحي لي لين جا الوقت الصح وخطب بوافق
قالت تبيعيني وانا ماحب اختلط مع هلج وتطيحين كرامتي عندهم
وفكل مناسبه تبين اجابلهم
واجابل ابوج

وصحت وعتذرت لها ان ماكان ودي اغضبها فنفس الوقت هو الشريك الي تمنيته

وتمت عقبها يومين تتجاهلني ولاتكلمني لين اضطريت افتح الموضوع مره ثانيه
وتمت تذكر مواقفهامع ابوي
وان محد حتى سئل عنها
وان عمي الي هو ابوه صج ماتدخل بشر
بس فنفس الوقت مادش فخير
وان ولد عمي مايناسبني ولو خذته بيلعب فيني لعب
لان ابوي معدد فهو بيعدد

نهاية الموضوع قتلها خلاص لو خطب رديه وانا والله سجاجين تققطع قلبي
وايد تعبانه وافكر لو عقب خطبني اوافق لان هاي مصيري انا وحياتي انا ومن حقي اختار الي ابيه

واذكرت هي ان هي ماتزوجت عشانا وان قضت عمرها كله عشانا وفالاخير اني بوطي كرامتها لو خذت ولد عمي!


انا ماقدر ولا ابي اخذ حد غير الي تمنيته
خاصه ان متمسك فيني ومبين هالشي واخلاقه ودينه احسن شي فيه
والكل يمدحه والاهم انا مقتنعه

لو خذته برضي نفسي وبغضب امي
ولو خذت غيره برضي امي وبغضب نفسي

انا فكل الحالتين خسرانه
شاسوي ؟

ارجوكم ابي رد يريحني مب يعفسني
ولاتنسوني من صالح دعائكم

 

[Dana.Qtr]

ارجوككككم ردوا علي

 

[أسرار الجمال]

نصيحة من اختج لا تغضبين امج واستخيري ولا تتمسكين بشي الا الشي الي يصير في تيسير وصدقيني ماكو ريال بالعالم يستاهل تخلين بقلب امج عشانه وامج تشوف الصح اكثر منج لان الحب أعمى وإذا ما صار نصيب وامج راضية عليج ربج بعوضج خير

 

[صمتي عذابي:(]

الله يكتب لك اللي فيه الخير خيتو

 

[Combat]

انا اقول حسافة تطوفينه دام تبينة واهو يباج حساااااااااااافة تتنازلين عن حبج
هدي الموضوع شوية وخل امج تهدى
وبالهداوة كل شي بيصير بس خل يصبر لايتقدم الحين
وشويه شوية امج لمحيلها دايماً انج مازلتي تبينه وعلى موقفج بس لا تستفزينها علشان لا تاخذ السالفة عناد
ولما بيتقدم قوليله يدق يحاجيها بنفسه ويبين لها انه يبيج وشاريج وحبه حبه صديقين بتسلك امورج
وخصوصاً انها مبين انه قلبها كبير وضحت عشانكم ماراح تكسر نفسج

بس بالهداوة والسياسة ولا تفرطين فيه بها السهوله والله تتحسفين

 

[تحت ظلك]

موقف صعب
بس ليش الأم ترفض؟
دايم البنت او الولد هم الضحية بين مشاكل الأم والأب،،،
عندي كلام كثير والله بس حنا بمجتمع الكل بيدمج شخصيته بشخصيتك ونمشي ع نفس نظام حياتهم والي يبونه

الدعاء الدعاء الدعاء والاستخاره
الله يسهل امورج

 

[mnoraa]

أول شي الزواج نصيب بس حاولي أنه يكون نصيبج أهو
شوفي كلمي أمج لما تكون رايقة فهميها انج تحبينه واهو يحبج
لو امج تتقبل هالامور ترى الام مهما كان بتحس بحب بنتها
او اذا كنتي خايفة تواجهينها كتبي لها رسالة تشرحين فيها
الي بقلبج لازم تحس فيج وصلي لها احساسج عشان تفهمج
وتفهم حبج لا تستخدمين معاها الغضب او الاسلوب الاستفزازي
وربي يوفقج وتاخذينه ان شاء الله لو الله اراد

من وجهة نظري فقط ...........

 

[M!ss CoLoRz]

أم شايلة في قلبها وااااااااااااايد وموقفها عاطفي بزيادة وقاعدة تضركم واهيه ما تحس

جوفي كلارم الخطبة والزواج تو الناس عليه فعلا ... لي صار الصج حزتها يحلها ألف حلال .. بس بعد انتي تحركي على روحج ... امج حق مين تسمع من اهلها؟؟ مين يقدر يأثر عليها ويكون عاقل وفاهم وهادىء... دشي خالاتج في الموضوع إذا علاقتكم قوية مع بعض او إذا يدتج للحين موجودة او يدج اكيد لهم كلمة عليها وانتي بعد كلميها وقولي آبيه ، بر الوالدين شي واللي امج تسويه شي ثاني .. قاع
ة تعطيج اعذار واهية .. يعني اخوه شي طبيعي حتى ولو كان غلطان بيبلعها ويبتعد عن المشاكل ومو مغصوب يوقف مع امج ، العذر الثاني اللي قالته عن انها تجابلهم في المناسبات ترى كلللش مو غصب ولا اهوه فرض انه يكون بينهم علاقة واذا كللللش كللش بتكون القعدة جم ساعة احين امج عطتج عمرها بتعز عليج ساعات

إذا صج انتي حابته ومو جايفة فيه عيب واهوه بعد متمسك فيج وامج عذرها الماضي وجروحها ، ضروري انتي توقفين ويكون لج راي بس في نفس الوقت هاي امج ولها احترامها لا تغلطين عليها بس لا تظلمين روحج

 

[مـوج]

حبيبتي صدقيني قسم بالله نصيبج بيجيج وآنتي ببيتكم !

بس وش الفآيده تتزوجينِ واحد تحبينه ويحبجِ بس امج غضبآنه عليج !

من صجج راح تعيشين حيآه هنيئه ؟ طيب خليج وياي شوي !

فكري بالمستقبل ! انتي عندج خوات او اخوان ؟

إذآ عندج خوات واخوان وتزوجوا وجآبوا عيال ، وانتي تزوجني ولد عمج وجبتوا عيآل

وش دراج ان امج ماراح تفرق بين عيالج وعيآل آخوانج وخواتج !

صدقيني شعور صعب صعب جدا ان امج تفرق بين عيالج وعيآل آخوآنج وخوآتج !

انتي لاتفكرين بقلبج وبس ! انتي استخيري آكثر من مره ! واذا حسيتي برآحهِ !

فآتحي آمج بالموضوع مره ثانيه ، قوليلهآ آنج آستخرتي وحسيتي برآحهِ !

واذا ماحسيتي برآحهِ بس انتي تحبينه ! آرفضيه ، لآنه مو من نصيبج !

وصدقيني صدقييني [ نصيبك بيصيبك ] هذا المثل آمشي عليه !

آتمنى ان الله يوفقجِ ويستر عليجِ ويجمع بينكم على خير ! ،

بس لاتتسرعين حتى ماتندمين ! لان بنات وآآآيد كانوا يحبون رجآلهم قبل لايتزوجون ورجآلهم كانوا يحبونهم

لكن كل شيء انقلب عكس بعد الزوآج !!

مع السلآمه !​

 

[Dana.Qtr]

سرور صح كلامج بس انا مستخيره وحاسه براحه الحمدلله
ومفكره بكل التفاصيل
بس اخذ واحد مب متقبله اتزوجه عشان لين جبت عيال امي اتحبهم!!
هم بيعيشون بيني وبين ابوهم لو ماشافوا وفاق بينا بينظرون
واللي مخليني اصر عليه انه مصلي فالمساجد وماله سوالف التدخين والسويكه
ومتعلق بالدين لدرجه الاغلب ينادونه يالمطوع
انا اشوف اغلب صفاته زينه بس عيوبه بنظر امي انه اصغر وانه ولد عمي!
لاتزر وازرة وزر اخرى
وحاليا صج انا فمشكله الله العالم بها بس فيني ايمان قوي واحساس ان كلشي بيتغير للافضل
ومرتاحه

ومشكورين كلكم بنات عالردود
لاخلا ولا عدم ولو احتجت اي شي بالجأ لكم بعد الله

 

[منيره آل ثاني]

لا حبيبتي مين الي قالج انج لو رضيتي امج بتبغضبين نفسج
بالعكس لو رضيتي امج الله بيرضى عنج وبتعيشين سعيده
حبيبتي الله الي كاتبلج إياه بيصير وبعدين ماتدرين حتى لو أهو أخلاقه عاليه ومتدين يمكن ربي بعده عنج لسبب انتي ماتعرفينه
اسمعي كلام امج احسن لج
واذا لسه تحبينه قولي اللهم اصرف عن قلبي حبه
وما تدرين الله شنو كاتبلج يمكن واحد أحسن منه ومن الي خلفوه

في حفظ الرحمن ورعايته

 

[Dana.Qtr]

من اصلي وادعي احس بطمأنينه ان كلشي بخير
ادعوا لي

 

[محلى حياتك]

اذا الله كاتبه من نصيبج راح يتسهل كل شئ

 

[Dana.Qtr]

ان شاء الله

 

[A p r i l]

انا نصيحتي .. انسي الموضوع بشكل مؤقت وشكلج صغيره ركزي في دراستج وأشياء أهم لا تخلين الموضوع محوررج وشي كل يوم تفكرين فيه لانه لا سمح الله اذا الله ماكتب ماتتعب نفسيتج وحاولي تهئين نفسج تحطين اسباب مثلا امي رضاها اهم وهكذا

والاهم
وادعي في صلاتج كل يووم وفي كل صلاه انه ربج يرزقج الزوج الصالح
وادعي واذكري بالاسم اسم الشخص اذا كان خير لي فقربني منه واذا شر ليي اصرفني عنه

او اذا كانت زواجي من هالشخص خيرر فتتمه لي يارب على خيرر واذا شرر اصرفه عني

ربي يوفقج وينولج مبتغاج ياررب والله يحنن قلبج امج عليج يارب ..

وانيت بتشوفيين اذا الامور بتتسهل او بتصعب

 

[Dana.Qtr]

ابريل
احاول اتناسى والله وكل ماضافت صليت ودعيت وارتحت
فيني يقين يقولي هالشي بيتحقق
الله حقق لي اشياء وايد تمنيتها وبذن الله بيصير هالشي الي نبيه
ماطلبنا الحرام ونبي الحلال ويارب يتيسر

 

[Um Tuki]

شنو قال النبي عليه الصلاة والسلام .. ,,

أمك ثم أمك ثم أمك ثم أبوك ..

ابوج بعد مو زوجج و لا عيالج ..

انا احسه فيج و بكسره قلبج والله

بس بعد حرام تكسرين قلب امج اللي حرمت نفسها من كل شي عشانكم

وهبت روحها و عمرها لج

لا تجازينها بعوار القلب

خلي ولد عمج ايي حق امج و يكلمها عل و عسى يلين قلبها

خل يقول لها انا شاريها و اني غير عنهم ..

و خليه يقول لها ماابي اسوي شي انتي مو راضية عنه

 

[Dana.Qtr]

امي صح ولها حقوق علي واحبها واموت فيها ومستحيل افكر اضرها
لو ماهمني رضاها ماطلبت حد يساعدني من الاساس
بس فيه قرارات مصيرية لازم الشخص نفسه يتخذها بنفسه ويتحمل عواقبها
مثلا هي تزوجت وتطلقت فمن عواقب هالقرار تفرقنا وصارت مشاكل
وبتدخل قراري المصيري فالمعمعه

لو رضيت بقرارها باتزوج بظربة حظ
لان باخذ الي يرضيها ويحفظ كرامتها مثل ماتقول
بس انا شلون وضعي بيكون معاه؟
مجرد اول خطوه اني اخذ حد عشان امي مب عشان نفسي انا حطيت نفسي فدائرة المشاكل بيني وبينه
وبكون ظلمت الريال قبل نفسي

امي هي امي الله اختارني اكون بنتها
بس زوجي انا من حقي الديني قبل الدنيوي اختاره
والرسول قال من ترضون دينه وخلقه زوجوه
ماقال عن اهله ولا عمه الي هو ابوي
لما اخطبت لاخوي ماقالوا بيصير مثل ابوه بعد
اذا الاخوان التوام مايتشابهون فشلون لازم كل شخصية من العيلة تشبه الثانيه؟
فانا ادعي اني اخذ الي اختاره برضى الجميع ان شاء الله
لاني مابي اجرح حد
ولما سالت دينيا قالوا لازم الام ولا الاب مايعرقلون مادام الرجل دينيا واخلاقيا زين

حرام ادفع ثمن غلطة ابوي باني اظر نفسي
بالاخير هي بتعيش بكل خير وسعادة وانا بسعى لهالشي
وابوي عايش بعد
وانا الي بتم اندب حظي واتحسف على قرار يغير مسار حياتي بدون ماختاره انا ويختاره حد غيري

 

[M!ss CoLoRz]

امج مع الاقناع راح ترضى وإذا اهوه من نصيبج بتاخذينه لو الكل وقف ضدج

وكلي أمرج لله ومثل ما وصيتج تحركي على موضوعج

 

[Dana.Qtr]

مس كلرز
ان شاء الله لين صار الوقت بفتح الموضوع مع اخوي وخالي