اول مره نسافر بالسياره ... الحقوني شنو نحتاج بالسياره حق الدرب ترا اول مره !!!

[عيون ملكيه]

بنات

بسافر الخبر و بنحاول نمر قطر اذا ساعدتنا الظروف... انا و امي و ابوي و اخوي و مرته و وعياله الثنين 4 و5 سنوات ...


بنات اول مره نروح

شنو نحتاج

شنو ناخذ معانا ؟

ولا مره سافرت بالسياره و كله من اخوي يقول السياره تونس

بس اهو و مرته ولا مره راحو بالسياره

اهو سافر الحفر مره مع ربعه و بس لووول

يعني الخبره صفر من هالناحيه

شنو ناخذ حق اليهال ؟

شرايكم ناخذ ابريج الوضوء ولا في استراحات تكرمون حق الحمامات ...

واااي قاعده احاتي هالسفره !!!! اخاف انشوي من الشمس بروحي مو مترقعه...
بس احسها مغامره حلوه ...

:wqedqw:


عطوني كل التجهيزات ...

 

[لمن اكون]

رد : اول مره نسافر بالسياره ... الحقوني شنو نحتاج بالسياره حق الدرب ترا اول مره !!!

شوفي حق اليهال اخذوا ككاويات وخرابيد
امما الحمامات عزكم الله ويييييييييع
اخذوا ماء عصاير وفطائر لوزين صديقنا لما نسافر لان ما يتاج نوقف ناكل ونكمل مخاد و كمبل ووووممممم افكر >>هههه
دفد لليهال
وهذا لي اعرف واتمنا اني اكون ساعتج
ايي نسيت اهم شي القهود لالاتية

 

[om deaj]

بالعكس الجو الحين حلو ووناسة
اخذو بطانيات خفاف حق الطريج >> اكو بسناء بدينار ونص و3 حلوبين وايد
مخاد للرقبة>>> اكوهم بمركز سلطان
بسكوت و كب كيك >>> مثل مال المطاحن مو الي يجي معاه كريمة ماينفع
صمون وتوست واجبان او كرواسان محشي وفكي عمرج من اللوبة
فواكه خفيفة = موز - تفاح - عرموط>>> مغسلوين لا تاخذين شي يبيله تقشير وينزل منه عصير يوصخكم
كاكاوات
بطولة ماي وعصير
الي كتبتهم لا تكثرين لانه راح توقفون عند استراحات وتتشرون كل ماخلص منكم شي
افلام وبابايات او سيديات اناشيد
بي اس بي والعاب حق اليهال
العاب تتسلون بالطريج وخصوصا الي يسوق لا تخلونه بروحه ينام ويسهى بالطريج الله لا يقول
سجادة صلاة
ابريق للوضوء
مناديل معطرة / سنستايزر = الي هو معقم لليدين
كلينكس
لبس لليهال وكراسي لهم اذا هم بعمر 5 سنين واقل
مطارة شاي وقهوة وسكر >> واخذي شاي ورق عشان بالاستراحة تترسون منهم ماي حار وتحطين الشاي عليه
حب ومكسرات تسالي للطريج

سلة عودة تحطين فيهم الاكل عن اللوية
وجيس كفر نايلون تيمعون فيه البطانيات الخفاف
ومطارة حق العصاير والماي تحطون فيها شوية ثلج عشان يتم بارد
السلة والجيس والمطارة تحطونهم في مكان يمج مو يم السايق

جنطة المطارات والقلاصات يمج امج عشان تجابل ابوج

الله يوصلكم بالسلامة يارب وان شاء الله تستانسون

 

[moone GRL]

يا حلو السفر بالسياااارة .. احلى شي بالسفر الطريج


خذوا معاكم ديفيديات اذا السيارة فيها دي في دي .. خذوا جنجفه وحب

وبي اس بي للجهال

السفر حلو بالسيارة بس بدون جهال .. بيملون وكل شوي توقفون حمااااااام .. والاستراحات اللي بالطريج مو نظيفة

وخذي معاج كتب ومجلات اذا تحبين تقرين .. تروحون وتردون بالسلامة

 

[عيون ملكيه]

بعد عمري صاجين و الله ذكرتونا بنظام الكشتات ...

الله يعينا على اليهال ...

بعد بعد
لايوقف ...

 

[law love]

شوفي السفره بالسياره وناسه اذا يمعه بس تعب الصراحه

اكره شي الحمامات لانهم ما يندخلووون

اول شي لازم تلبسين لبس حيييل مريح وخفيف لان بتمللين اذا لبستي جينز او شي جذي لبسي ترينج احسن و نعال مو جوتي و يفضل نعال نايلون كروكس مثلا

و عباتج لا تلبسينها بالطريج بس ليه نزلتي

و اليهال نفس الشي لبسوهم مريح و اخذو معاكم اشياء تلهيهم بالسياره دفدي بلير انصحج تشترينلج اذا ما عندج و تاخذين دفديات معاج
و مجلات و ايبود

و الاكل طبعا لازم تاخذون خرابيط بطاط و ككاو و هالسوالف لان هالاشياء اهيا الي بتلهيكم و تسليكم و احنا عادة ناخذ مطارة جاي و مطارة قهوه وحب و سوائل بس لا تشربون وايد و لا تشربون اليهال وايد لانكم بتلعوزون مع الحمامات استغفر الله


و اخذو سياده حق الصلاة بعض المصليات مش ولا بد و ممكن تصلون بالبر اذا ما مداكم

و كلنكس طبعا وديتول وابريج و صابونه و هالاشياء خلوهم بجنطه نايلون اي احد بيدخل الحمام عزكم الله يشيل هالجنطه و يروح بدال اللويه

وطبعا السوائل بتحطونهم بمطارة كولمن الي تبرد و الاكل بسلال ملوت الرحلات

و مو بس تاخذون خرابيط اخذو سندويشات الجاهزين ملوت الجمعيه

ايي و عن الشمس اشتري هذيله الي ينحطون على الجامه عشان ما تحوشج الشمس

لووول ذكرتيني مره الشمس كانت بويهي شوي و احترق جان اخذ غترة ابوي و واحطها على الجامه يعني فجيت الجامه و حطيت الختره و سكرت الجامه على الغتره و انا نايمه بالسياره تبطلت الجامه بالغلط و طااااااارت غترة ابوي

متنا ضحك هههههه



و رحله موفقه بس فرق الخبر و قطر وااايد بعاد عن بعض !!

 

[noo7a]

حلو السفر بالسياره
انا مجربه للبحرين قريبه
بس حق قطر مادري !!! شكثر طريجها جم ساعه ؟

 

[الباسمه]

بالعكس لاتخافين ولاتحاتين
الجو بديع اهم شي بسفر السياره ما يكون الجو حار
وبالنسبه للشمس اخذي كريم حمايه
وبالنسبه للاكل اخذو خفايف من الجمعيه بس لاتكثرون كل شي متوفر بالسوبرماركات والمطاعم وحتى الكافيهات بالطريج متوفره
اهم شي بطانيات خفاف وفرشه سبحان الله عطل والا شي؟
ودبه ماي كبيره للطوارئ حطوها باخر السياره
ونسيت اقولج بالنسبه لليهال مو تعطونهم عصاير وماي اول ما تمشون
عشان ما يقعدون يوقفونكم كل شوي
اخذي عده الحمام ولخي لج كتاب تقرينه

 

[تمنيتك]

رد : اول مره نسافر بالسياره ... الحقوني شنو نحتاج بالسياره حق الدرب ترا اول مره !!!

وناسه السفر بالسياره

كل شوي نوقف عند استراجه نشتري حلويات والخ

واذا الطريج السعوديه ... نطلب من الارنب الجائع كله كويتين هناك ههه

بس مشكله الحمامات وع


والبنات ماقصروو

 

[عيون ملكيه]

بنات انشالله بنمشي باجر الاثنين

بس استفسار اشرايكم بأسواق الخبر ..
فيها شي يسوا ؟

انا افكر اشتري الابريج الللي يتسفط مره قريت منه اسمه ابريح الوضوء او شي جذي

بس ما ادري من وين ينباع


و بالنسبه للدرب انا و اليهال بنتبطح بالدبه لووول الجمس وسيع لووول

و ابوي و اخوي جدام
و امي و مرت اخوي ورا و انا بسويلي غرفة تسليه من مجاميعووووو لووول بس بنخلي الثلاجه عند امي و مرت حماي عشان ما يلعبون فيها اليهال ...

بنات وييين نحصل مال الوضووووء ...

 

[ذهبيه مرصعه بألماس]

عادي سهالات

شوفي الجهال الله يعينكم عليهم

اهم شي دي في دي

العاب بال بي اس بي

اما الكبار عادي الدرب حده حلو و كل جم كيلو تلقون محطات و استراحات

اما الحمام اهم شي مناديل الديتول عشان تمسحون الحمام قبل لا تقعدون عليه
بالذات للاطفال و الكبار بالسن ...

و صابون لايف بوي او ديتول السائل اريح شي تسكرينه و نحطينه بالجيس او مثل ما قالو البنات بالجنطه البلاستيك

و غير جذي حب و عصير و بفكات و شيبس و بسكوت و شاي و ماي و خلافه

و تقزر بالسوالف

بس نصيحه لا تسرعون لأن غير انه خطر ترا الطريج مراقب بالرادار و يعطونكم المخالفه بالدرب يعني في نقاط تفتيش تشيك اذا انتي تعديتو السرعه

اخذو معاكم كوشيات لنوم الاطفال و اذا ماخذين كفرات خلو المخدات حقهم يمكن ينامون

لاتلبسون شي ثقيل او متعب خلي لبس البيت او ترنج او حتى بيجامه بيت تحت العباة

و اليهال لبس عادي يعني الدرب مو مال كشخه كلش
مال ترتاحون فيه


انا حاليا بالخبر
حجزت بالبوكنج دوت كوم

بيت المسره للشقق الفندقيه
المكان جدييييد حده و نظيف لكن الشقه ضيجه شوي و ازعااااج قاعد يضبطون الادوار اللي فوقنا

اهم شي ان الاثاث نظيف و احنا اول من سكن فيه

موقعه بعيد عن الاسواق نوعا ما

المطبخ مجهز بكل شي ماكرويف
توستر
غلايه
ثلاجه

الاواني المنزليه بالكامل

الجدور
المقله
الصحون
الترامس مطارات الشلي و القهوه
دله
فناجين
كل شي حتى الاسفنج للغسيل و الصابون السائل

مافيه فوط و اساسا انا ما استعمل فوط الشقق الفندقيه

تلفزيون واحد بالصاله و الصاله ضيجه
المكيفات وحدات احسن عشان كل شخص يتحكم بدرجة الحراره

احنا خذينا 3 غرف نوم في غرفه و حمام عند المدخل عقب في باب ينقفل داخله المطبخ و الصاله و غرفتين نوم يعني الغرفه تصلح للسايق مثلا او لأي ضيف


مثل ما قلت احلى شي فيه انه جديييييد كل شي بقراطيسه ... حتى الصحون عليهم ليبل السعر ومكان الشراء و كلهم من السيف لووووول



عيبه ان الدرايش صغيره و قمته نوعا ما
و الصاله ضيجه
و الحمامات ضيجه شوي


الخبر ما تضيع و حدها حلوه و السوق فيها نفس الكويت بالضبط ....
الراشد كبير حيل و مع الجهال تتعبين اكثر

الظهران ما لقيت فيه شي مميز

عموما انا مو رايحه اتسوق انا رايحه اغير جو لأن كل شي بالكويت و لله الحمد

حتى العبي شفت شغلات حلوه بس لحد الحين ما شريت شي ...

و المطاعم حلوه ... و شارع الكورنيش يهبل

 

[سارونه العوبه]

رد : اول مره نسافر بالسياره ... الحقوني شنو نحتاج بالسياره حق الدرب ترا اول مره !!!

شوفي اذ سيارتكم كبيره تتحون الكرسين الي ورا واغراضكم فوق بسلة السياره وووالكرسين الي ورا تشيلونهم بس تخلون مال السايق والي يمه والباقي قسمو فراشات ومخاد لليهال ووووحطو اكلكم بزاويه وزاويا تسولفوووون فيه وجذي وتقبل تحياتي

 

[أحلى همبه كويتية]

البنات ما قصروا
حطووووووووووووا كل شي تحتاجينه

انا بشهر 8 رحت العمرة والطايف والمدينة بالسيارة
صج تعب
بس والله وناسة


احسن شي تشترون الطربال اللي مثل الشنطة
ينحط فوق السيارة وداحله الشنط ويتسكر عشان وسع لكم المكان داخل حق التسدح والتبطح
خصوصا الطريق طويل
ولما تنزلون الأستراحات تمشوووووون رويلاتكم احسن

انا ما شريت هالشنطة واحنا رايحين
بس حطينا الشنط فوق السيارة
بس لما فتحتهم بمكة لقيت العبي فيهم غبااااااااااااار
مكان سحاب الشنطة
عرفتي


ربي ييسر لكم طريجكم ويوصلكم بالسلامة
ولا تمشون سرعة الله يخليكم

 

[سيدة الذوق]

بالعكس قطر مو بعيده يعين مو درب

من الدمام لي الحسا تقريبا 4 ساعات

ومن الحسا لي قطر ساعتين

اخذوا قهوه وجاي .. وشبسات وككاو وخفايف

وبطانيات خفيفه وجاكيتات اهم شي ماااااااي حق الوضوء يمكن ماتمرون محطه زينه