بتوظف وضايق خلقي :(

[الزين يفرض نفسه]

سلام عليكم شلونكم شخباركم


انا متخرجه تخصص رياض اطفال بعد تفكير وتمحيص وتدقيق وعدة اراء ومره ( اي ) ومره ( لأ )

اخيرا قررت اني اصير ابلة روضه (لاني قبل كنت مفكره اني احول اداريه)

وبعد ما قررت لقيت الناس كلها تطنز علي وتضحك بويهي ولا من وراي على شغلتي ليش شنو انا مشتغله فراشه ولا طراره ولا شنو !! كل ماوحده تسألني وين بتتوظفين اقولها رياض اطفال تعفس ويها وتقولي ( الله يعينج ) ولا مره سمعت وحده تقول حلو ولا وناسه ولا الله يوفقج !! حده احباط

هذيله غير اللي يقطون بويهي: ايه الله يعينج على بجي اليهال - الله يعينج على الصرخ - الله يعينج على الركض ورا اليهال ... واللي تقولي: ويع يهال يبولون يوسخون نفسهم ولا لازم توكلينهم ولا مادري شنو ... والله بنات ببجي والله الاحباطات اتييلي من كل حدب وصوب

ليش وظيفة المعلم ( او وظيفة ابلة الروضه بشكل خاص ) مالها مكانة بالمجتمع ؟ ليش ينظرون لها كأنها خدامه توكل وتنظف وتلعب الاطفال وبس !! ؟؟؟

الحين انشاءالله بتعين عن قريب بس شكلي بقدم استقالتي او بنسحب او مادري شسوي ضايق خلقي وحدددددي متحبطه

 

[رقي]

كل دوام له عيوبه ومميزاته
كفايه تردين بيتكم الساعه 12 او 11 ونص
انا ارد الساع 3 مع اذان العصر
الله يعين
وربي يوفقج

 

[الزين يفرض نفسه]

اللي يقهر اني كنت مقتنعه 100 % بشغلي وقايله محد يقدر يغير رايي

بس كلام الناس اللي يعور الراس كثر ما يقولولي لوعوا جبدي يعني مو وحده ولا 2 وايد كبار وصغار كلهم يقولولي ليش داشه رياض والمثل يقول كثر الدق يفج اللحام .. كثر ما اطنزوا على هالوظيفه خلوني افكر انحاش منها

ليش نظرتهم جذي يعني ؟؟؟

 

[Winter Q8]

إسـمج معلمة و تربوية و نفسانية و مربية أجيال ..
ناهيج إن مرحلة الطفولة في الرياض من أهم المراحل في تربية النشىء .. و هالشي تشريف و تكليف ..
و ما عليج من احد .. و كل وظيفة بالدنيا لها عيوبها و مميزاتها ..
و اذا احنا بنات الديرة ما صرنا معلمات منو بيعلم عيالنا الغرب ؟!! ليش الغرب بيدارون عيالنا أكثر منا يعني ؟!!
و الله يوفقج ان شاءالله ..

 

[ضحـاوي]

بالعكس مكانة المعلمة مو شوية

سواء رياض اطفال او بمدرسة

كلهم نفس المستوى

ومثل ما قالو لج البنات

كل وظيفة لها مميزاتها وعيوبها

ولو معلمة رياض اطفال مو زينه لهدرجه

ما كان لقينا هالعدد من معلمات الاطفال عندنا

الله يحفظهم و يوفقهم ويقويهم

 

[رذاذ المطر]

لاتسمعين كلام الناس انتي ان شاء الل بتتوظفين وتشوفين بنفسج اذا يتعب والا لا
اهم شي انج مقتنعه بالتديس وااذا حبيتي شغلج راح تعطين ان شاء الله يارب تطيحين بمدرسه ادارتها
نفسياتهم حلوه وخلي الاطفال يحبونج
والله يوفقج ترا انا مثلج عن قريب بصير ابله ان شاء الله باذن الله

 

[معشووقة السفر]

الله يوفقج
لما اجربين تدريس رياض الاطفال والتوجيه والاداره اللي يتشيحطون على راسج راح تحسين فيها وانا معاج للاسف الشديد مدرسة روضه
وقاعده احاول اروح اي مكان غير التدريس وسمعت عن المركز الاقليمي للطفوله بالعميريه ونفس المسمى الوظيفي والراتب بس يبيلهم واسطه قويه
والله يوفقج حبيبتي بس مو معناته كل مدرسات الروضه مو مرتاحين ترا حسب ميول الوحده وصبرها وبالها الوسيع يمكن انتي تحبين الرياض ويمكن لا
عطي نفسج فرصه وشوفي والتساهيل من رب العالمين

 

[زيـنـه]

ارضاء الناس غايه لا تدرك

و انتي ادرى بمصلحتج و اللي يناسبج

اتمنى لج التوفيق

 

[$غــ(ز)ــل$]

انا بعد كل مااقول حق احد بتوظف برياض اطفال يقولولي نفس الكلام
وللحين محتاره
الله يعين

 

[الزين يفرض نفسه]

مشكورين بنات على رفع المعنويات

ادعولي بالتوفيق يارب اتوفق بمدرسة زينه ادارة وابلات يارب والله يوفق كل ابلة رياض

 

[جكورة]

والله إختي مادام إنتي مقتنعة بوظيفتج مالج شغل بكلام الناس

بالعكس معلمة رياض أطفال وظيفة محترمة ولها مكانتهـــــا وعليها إقبال من قبل البنـــات ...
وأكيد إنتي داشتهـــــا وإنتي حابتهــــا مو داشة ومغصوبـــة عدل....

الله يوفقــــج ويرزقج بالإدارة السنعـــــه.....

 

[june_m00n]

الله يوفقج انشالله