بجم .. بجم .. بجم .. بجم .. بجم ...؟؟؟ بجم بجم بجم ..؟؟

[Patcholli]

قوه بنات

موضوعي واضح من العنوان
اشلون تتعاملين مع البنات اللي كل ماشافو عليج شي قالولج بجم ..؟؟؟
انا الصراحه قبل كنت اقول عادي خل يسئلون بس من انتقلت قسمي اليديد صرت حيل اتظايق لان من اول ما ادخل يستلمون على شغله شغله بجم وبجم وبجم ؟؟؟
والله قامت تلوع جبدي ورب الكعبه
الشي لي زاد عن حده ينقلب ضده
يعني ماعندي مانع اذا وحده عجبتها شغله علي وسألتني بجم ..؟؟ اذا ودها تشتري مثلها مثلا وتحب تسأل عن السعر
بس في بنات بشكل يومي يكررون هالسؤال مو معقوله بيشترون كل الاشياء الي علي ادري مايبون يشترون بس جذي يسئلون بجم ..؟؟
والله العظيم قمت اكره البس شي او اشيل شي يديد لان ادري بيني سؤال بجم على طول ؟؟

شنو الحل مع هالفئه ؟؟؟
وساعات تكون وحده عزيزه على قلبج ماودج تحسسينها ان هالسؤال يظايقج بس بنفس الوقت تلوع جبدج
اتمنى تفيدوني
ورجاءً لا اتيني وحده مشتطه وتتفلسف انا ماتكلم عن وحده سألتني مره وحده عن شغله عاجبتها اتكلم عن اللي يسئلون بشكل يومي يغث ويخنق ويلوع الجبد
مو معقوله كلشي اتذكر سعره
وساعات شغلات اتكون يايتني هدايا ماحب اقول انها هديه ولا ادري جم سعرها
او اكون شاريتها من اوت ليت وماعرف سعرها الاصلي بالبوتيك او اكون شاريتها من برا وتكون ارخص من سعر الكويت واهي تعرف السعر الاصلي ولما اجاوبها تشككني بالشغله الي شاريتها وتقولي تقليد ..!!!
انزين مدام تعرفين سعرها بالبوتيك ليش تسئليني بجم ..؟؟

عشان جذي اتظايق
ناطره ردودكم
شنو الحل مع هالفئه
​

 

[granted]

انا عاد ماحفظ بجم هذا وبجم ذاك غالباً اقول مادري نسيت واهم على بالهم اني اجذب ولا مابي اقول ولا نحيسة
بس والله انسى بجم انا ذاكرتي ضعيفة بشغلات وايد الاسعار والاسماء
بس عندي وحدة تصير لي تسالني بجم هالشغلة او هذي شنو ماركتها لما اقول لها تقوم اتطلع لي شغلة اغلى عشان اتوريني انها كشيخة حمدلله والشكر

 

[Patcholli]

واي قرانتيد صاجه الواحد مو كلشي يحفظ خصوصا اذا شي قديم من زمان شاريه او من برا عشان جذي ماحب هالسؤال :/

سخافه الصراحه

 

[معي احلى]

والله مااقول لك الا كل خير ..


هي معاناه مع كثير من الناس وكلام الاخت الذي فوق (مش عارفه اقرا اسمها ) صدق بعضهم تسالك علشان تعرض الذي عندها .. ناس مريضه

 

[ري777ما]

عادي قولي ماذكر نسيت. مره مرتين بينطمون

 

[LoLaTi]

اي حاسه فيج سؤال ينرفز لوووول تحسينهم شفااااااااااااااااااااااااحه حتى لو شي مكود منه بالسوق ووين ماتروحين تلقين منه هم يسألون :rgewrg:

انا اقول ما ادري دخلت المحل وشريت كذا شغله ماثبت على السعر
او مادري والله نسيت او من زمان شاريته ماذكر
او امي يابته لي
جذي يعني فكي عمرج لووووول

 

[M!SS.LOBY]

الله يعينج هذا حسد يا أختي

 

[Beauty paradise]

حبيبتي يا تصارحينها وتقولينلها انج تتظايقين

او قولي مادري او نسيت او مثلا اذا جنطة ب٤٠٠ ومبين انها غالية قوليلها خذيتها بخمسين خل تنصدم وخلي ويهج جدي

 

[وردة الدوحه]

عادي حبيبتي وسعي صدرج وخلج دبلوماسيه مع الكل

مره ردي ومره قولي هديه من زوجي أو امي في حال ماتبين تقولين السعر

يعني صرفي نفسج بشكل لايق معاهم

 

[امـل لاينتهي]

كله قولي ماذكر نسيت او مو انا شاريتها اختي شرتها ولاامي لين تمل

 

[a7lami_]

صح شغله تنرفز
بس انا عني دايم اشتري مجموعه اشيا من محل واحد فاصير ماذكر صراحه كل قطعه بكم لحاله
واجاوب ع هالاساس.. اني شاريه مجموعه وحاسبت للكل فماذكر كل قطعه بكم

 

[Omhamood]

واي قطع ياكره الي جذي

بجم هين هالسؤال يترقع اي شي المصيبه لاسالتج من ووين ؟؟؟

ومومره ولامرتين كذا مره يصير غثا بصراحه انا غاثتني وحده كل مالبس شغله قالتلي من ووين ماخذته

وتم وتنشبلي اقسم بالله ًواذا ما جاوبتها وصرفرفتها تسال خواتي يعني بعض الاشياء اخذهم من خواتي الا اقول من خواتي يعني
ً
فشله وخصوصا عند الحموله صج صج هالاشخاص مصدر غثا

 

[Beauty paradise]

خو صارحوهم يمكن اهم مو منتبهين على عمرهم واذا زعلت بالطقاق خل تزعل ان شاء الله ما ادارين خاطرهم على حساب نفسج

 

[Tom ♥ Jerry]

,

قوليلهم مره ثانية كلمآ اشتري شي بييبلكم الفاتورة وياي
قطي نغزات عليهم حتى لو مآ يعجبهم
المهم يسكتون

شنو هالناس الملقوفة

 

[M!ss CoLoRz]

اي والله نفس الشعور

انا عادي عندي اقول السعر ومن وين وبالضبط في وين ممكن تحصله بس عاد كل مرة بعد ملل

في وحدة اعرفها جذي ... حتى لو اعطيها هدية تسألني بجم!!!!!!!!!!!!!!!!! اهيه مو قصدها شي بس مادري شكله السؤال لاصق في لسانها ههههههههههه

حتى فستان عرسي سألتني بجم وانا مابي اقول حق كل من حالوت اتهرب قلت لها حصلته بسعر زين يناسبه ردت سألت يعني جم !!!!!!!!!!!!!! قلت لها الحمدالله وغيرت السالفة!!!!!!!!!!!!!!!!!!


مسامحة عبرت عن شعوري وما عطيتج حل بس عن جد يبي له حل مناسب وفي نفس الوقت يحفظ ماي ويهنا ههههههههههه

 

[الغلاااااا]

عطيهم طاف بس بلباقه اذا سألتج قولي ماذكر بالضبط وانشغلي بشي جدامج او نسيت تصدقين يعني حسسيها ان سؤالها ماله داعي

او على ضحك مره قولي المره الجايه ماراح اشيل الليبل من البدله او الجنطه بخليه عشان ماتتعبون نفسكم بالسؤالةمثل كل مره وضحكي واهما اذا عندهم دم بيحسون انهم مصخوها حيل

 

[ام الدرر]

ضحكني العنوان
باتشي
البنات ماقصرو​

 

[Rooz Aziz]

ماجربت الشغله هذي
لا
ني انسسسسسا السعر
ومو من النوع اللي اهتم بالسعر

 

[نوف الصقعبي]

بالعكس انا لما يسالوني اقول مافيها شي

وما اتضايق لان ممكن احط نفسي مكانها

ودايمآ اردد بقلبي حب لأخيك ماتحب لنفسك​

 

[شــــــــــــــوقــــه]

اسهل و اسرع جواب حق اي شي ما تبين تجاوبينه


( مادري )

هذي طريقتي