بخصوص مقابلة وزارة العدل بليز دشوا

[زهراء 24]

بنات دقوا علي وزارة العدل عندي مقابلة يوم الثلاثاء شنو الاسئلة للي يسالونها بالمقابلة انا تاريخ يعني عن شنو راح يسالوني بليز اللي تعرف تساعدني

 

[جوري!]

شنو تخصصج

 

[زهراء 24]

انا تخصصي تاريخ

 

[زهراء 24]

اب اب محد عنده فكرة

 

[حبيبة ماماتي]

حبيبتي اسئلة عاديه شنو تخصصج وشنو كتني تدرسين وشنو عن درجاتج وتقديرج وشنو هوايتج وشنو حاطه فبالج تكون وظيفتج والاكيد انهم راح يقولونلج عندنا نقص بالوزاره ولازم دوامج بالمجمع الي بالمرقاب وتسوقين وحالتج الاجتماعيه يعني اسئله سخيفه بس رهبه عاديه لان جم شخص بيكون موحود بالغرفه

 

[الممتعة]

يبي يسالونج انتي تخصصج تاريخ ليش مقدمة علي وزارة العدل يعني ليش مارحتي التربية ومن هالاسوالف ويمكن يسالونج عن تخصصج فوليلهم عن بالمختصر واهم شي خلج ريلاكس ولا ترتبكين والله أعلم.

 

[عادت ذكرياتي]

مقابلة العدل يسئلونج عن تخصصج وشنو يحتويه وبعدين يسئلونج أسئلة في تخصصج وبعدين يقولولج وين تبين أي قسم عاجببج ويقولولج تتوظفين سنتين إلزامي في مجمع الوزارات وإنتي ديري بالج وافقي موافقة مبدئية وبعدين حاولي تييبين واسطة وينقلونج بإذن الله

 

[زهراء 24]

مشكورين بنات

 

[حبيبي عبووودي]

شسويتي على مقابلتج شنو الاسئله الي سالوج اياها
انا باجر موعدي وتخصصي تامين
ومو عارفه شلون الطريقه

 

[محاميـــة]

انا خلصت المقابلة وقالولي انقبلتي بقصر العدل ادارة التنفيذ الجنائي والاتصالات الخارجية طبعأ ماعرف ولا شي عن هالقسم اللي تعرف تفيدني

 

[حبيبي عبووودي]

حبيبتي محاميه الله يوفقج يارب
انتي محاميه صح
فيبونج العدل
شنو طبيعه الاسئله اللي اسالوج اياها
يعني عن تخصصج اكثر شي

 

[محاميـــة]

هلا والله الاسئلة الله يسلمج اكثر شي عن دراستي وعن الوزارة وشنو مهام الوزارة الاصلية وتنقسم الى جم جهاز
يعني نشفو ريجي بالاسئلة اف اف
ومشكووورة على هالدعوة الحلوة

 

[كويتية بالخارج]

هلا حبيبتي
إدارة تنفيذ الأحكام الجنائية الله يسلمج إهي ادارة تختص بتنفيذ جميع الاحكام الواردة من المحاكم بجميع درجاتها المختلفة بقضايا الجنايات-الجنح العامة(بلدية-تجارة-شؤن-مطافي) جنح احداث-جنايات احداث
وتقوم ادارة تنفيذ الاحكام الجنائية بجميع اعمال التنفيذ للاحكام الواردة من المحاكم
واصدار شهادات براءة ذمة لموظفي الدولة غير الكويتيين المنتهية خدماتهم لديوان الخدمة المدنية
واصدار شهادة لمكتب التنفيذ الجنائي والاتصالات الخارجية تفيد بتنفيذ جميع الاحكام الصادرة بحق صاحب العلاقة وذلك لاسترداد الضمان المالي
واصدار شهادة لمن يهمه الامر تفيد جميع القضايا الصادرة بحق صاحب العلاقة

الله يوفقج حبوبة
ولما تنوين تحضري الماجستير في القانون قولي لي وأنا راح أساعدج وأدلج على الطريج ان شا الله
​

 

[محاميـــة]

ياابعد قلبي والله كويتيه بالخاارج

لا انا ماقبلوني بادارة التنفيذ انا قبلوني بمكتب التنفيذ الجنائي والاتصالات الخارجية هذا اللي ماعرف عنه شي ولا حتى رواتبهم ماعرف جم تقريباً
ومشكووووورة وااايد وان شاء الله اكمل ماجستيير يارب

 

[حبيبي عبووودي]

اليوم رحت مقابلتي والحمدالله سهله كله عن تخصصي وشلون اتعامل مع الناس وباي قسم حابه اشتغل وبس
قالولي انردلج خبر والله يوفقنا