بنات أنا محتاره ساعدوني الله يجزيكم الخير

[نورالضمير]

السلام عليكم ، بنات الله يخليكم شورو عليه شنو اسوي بروحي ، انا صرت افكر بالحمل 24 ساعه ونفسيتي تعبانه انا كنت أراجع عند دكتوره هند الحمدان في مستوصف الكويت الصاير بخيطان هي زينه بس متناقضه احس انها ماتركز مع حالتك يعني الشهر الاول اخد كلوميد وابر وتسويلي سونارات بعدين افتكرت ثاني شهر تقولي عندك ميلان بالرحم ولازم تغير وضعية الجماع وهذا سبب عدم حملك واول ما روحتلها تعبت نفسيتي بالمره وقالتلي عندك تكيسات وايددددددددددد وولازم ابر انا قولت خلينا نجرب على الكلوميد قالتلي كيفك بتقعد خمسين سنه عشان تحملي وسمعت كلامها واخذ ابر وكلوميد لمدة شهرين كل شهر الحمدالله يصير تبويض زين واعطتني جدول للجماع بس بصراحة ما مشيت على جدول لانه زوجي كان يرجع من شغله تعبان وينام وانا اقعد ابكي ، اكيد تقولون وين المشكلة ، مشكلتي انه انا وزوجي نمر بظروف ماديه جدا صعبه ورافض اروح لدكتوره يقول مصاريف على فاضي وان شاء الله راح تحملي مع وقت وهو ما يعرف عن موضوع التكيس لانه عارفه ردت فعله فقولت خليني اروح عند ممرخه ارخص ، وين اروح افضل للممرخه او من ورا زوجي لدكتوره والله حرام الدكاتره يستغلون الناس وايد غاليين . ما اقول غير الحمدالله على كل شي.اسفه على اطاله بس ودي افضفض

 

[زينب محجوب]

ربنا يعينك اختى انا كمان صايرة افكر فى الحمل بس ندعى ربنا وكثرى من الاستغفار واللة انا ماارتاح الا بعد مااقعد شى ساعة استغفر وواللة انا منتظرة الفرج واكيد ما بيخيبنى وبدعيلك اختى بالفرج القريب

 

[om-s3oodi]

يا قلبي قلبج ..

سمعي حبوبة .. دام الدكتورة أتلف و أتدور .. خلّج منها .. ولا يلعبون فيج الدكاترة ..

الكلوميد إذا مو بـ محله .. ترى يسبب تكيسات در بالج ..


جوفي حبوبة ..

أولاً .. أتروحين تشترين ميرمية .. ضروري .. و تشربينها عقب ما تخلصين الدورة .. كل يوم كوب .. ممتااااااازة جداً للتبويض ..

ثانياً .. تكثرين ماي .. لأنه يخفف التكيسات من بعد الله سبحانه ..

ثالثاً .. أتروحين حق وحدة تمرخج وتعطيج أعشاب " جان ما فادتج ما تضرج " .. عندج أم فيصل في جابر العلي كل من يمدح شغلها مشالله ..

رابعاً .. وهذا الأهم .. عليج بالأستغفاااااااار .. كثر ما تقدرين .. ولا تيأسين من رحمة ربج .. يمكن تأخر الحمل خيرة من رب العالمين ..


..

و عسى ربي يفرج همكم .. ويسهل أموركم .. ويفرح قلوبكم بالطفل الصالح ياااارب العالمين ..

 

[نورالضمير]

مشكورين بنات على ردودكم الحلوه والله يعطيكم الفي بالكم ام سعودي انا بفكر اروح عند ام عايد يمدحون فيها وراح اعمل ان شاء الله اشعة الصبغه في مستشفى الامومة شنو رايكم

 

[الزيـــــ^^ـــــن]

الله يرزقج

 

[قلب مغليك]

اشربي ماي كثير
اذا المشكلة بس انتي مو زوجج
في بنات هنيه قريت لهم تجارب ان التكيس راح اتوقع العضوة احلا سما كانت كاتبه تجربتها
والله يشافيج
واستغفري ربي يرحم
وانا اعرف وحده التكيس مالها شالوه بعمليه وكانت متزوجه لها ٣ سنين وبعدها حملت ٣ مرات ماشاءالله تبارك الله

 

[سعودية بالكويت]

الله يشفيك ويشفينا ويرزقك ويرزقنا

ويريحنا من التفكير بالحمل من غير حول

لأحد ولا قوة يارحيم

أبيه من عندك يارب ياكريم ياقدير​

 

[miss_uk]

التكيس اسال مجرب ولا تسال طبيب

اول شي القرآن والاستغفار بنيه الشفاء "وقل استغفروا ربكم انه كان غفارا يرسل السماء عليكم مدرارا ويمدكم باموال وبنين"

القسط الهنري الاسمر قال عليه الصلاة والسلام: " عليكم هذا العود الهندي فانه فيه سبعه أشفيه يستعط به من الغذرة ويلد به من ذات الجنب"

العسل من محل عسل يسوي خلطة فيها مقويات للرحم بس اول ١٤ يوم من الدوة

العلاج الطبي: اختي كملي العلاج مع الدكتورة اهوا بيد الله سبحانه اهيا سبب للعلاج وان شالله خير

انا انصح انج تستخدمين القسط شهرين ثلاثه بعدين الطبيب والعسل.
لاا تعاندي زوجك الله يرزقج الذريه، انا ضد فكرة انك تخشبن عنه التكيس. هذي حاله احنا ننولد فيها مالنا ذنب. انا من اول يوم اعترفت له عشان يساندني وما احاتي ..

النفسيه لازم تعدلينها حبي نفسج باللي فيه وكله اجر ان شالله *

 

[DALAL25]

حبيبتي ما اقدر اقولج الا الاستغفار والصلاة بوقتها والدعاء بالثلث الاخير من الليل ( والثلث الاخير مو شرط الفجر يبدي تقريبا من 12 وشي بالليل حسب الشهر والاذان ) وقراءة سورة البقرة وسورة ياسين وخلي علاقتج بربج قوية انامو قصدي شي انا ما اعرفج انا اتكلم بصفه عامة وريحي نفسيتج لان الرزاق بالسما واهو مقدر لج متى الحمل (وعسى ان تكرهوا شيئا وهو خيرا لكم )

وانا احوس بالنت قريت ان اللي فيها تكيس ما تشرب مرمية وترى معلومتي مو اكيدة

الله يوفقج ويهدي بالج ويرزقج بالذرية الصالحة

 

[(أم نونو)]

الله يرزقج

والبنات ما قصرو

 

[نورالضمير]

تسلمون بنات على ردودكم ويعلم ربي شنو ارتاح من ردودكم وان شاء الله الفرج قريب بإذن الرحمن الواحد الاحد