وعليكم السلام ورحمة الله وبركاته
مبارك عليك الشهر
بالنسبه له اذا يبي ولد فـ هو بالنسبه له عذر
مع انه رزق من الله بنات او اولاد شي بيد الله لا بيدك ولابيده
وجدام العالم بيقول ابي ولد !
هـ الشي لازم تكونين عارفته انه عذر وسبب له جدامك وجدام الناس
خصوصا احنا بمجتمع يهلل ويسعد بولادة الولد اكثر من البنت
وعند الناس بكل صراحه بيكون ردهم : معذووووور يبي له سند يبي له ذِكر
زواج وتزوج وخلص .. !
واحمدي ربك انه تزوج بالحلال
ولا كل يوم يخونك مع وحده ساقطه ( بصريح العباره )
حال احسن من حال
اطلعي من وتيرة الحزن والحقران يقطع المصران والصد والهجران
انتي بتخسرينه .. هو ما بيخسر شي
بالعكس بيكون كل اهتمامه وتوجهه ------>
العروس
يعني بيخليك .. وبيتركك .. ويمكن يهملك ويهمل بناتك
ترضين لنفسك ؟!
لـ هالدرجه انتي ماتحبينه !
طيب سهل تتخلين عنه !
تنسين سنوات حلوه ومره معاه !
طيب تتهاونين فيه !
تسلمينه بطبق بارده مبرده !
لأ لأ لأ من بدايتها لك حق وعليه واجب مثل ماعليك واجب ارضاءه كـ زوج امام الله
كوني " عروس "
ايه عروووس .. مثل شكلك قبل 15 سنه
وحاولي تجذبينه بدون اي ذكر لطاري او اخبار العروس الجديده
لا توترين جوك ولا تخلينه ينسحب منك بسهوله
لا تجيبين طاريها جدامه لا بخير ولا بشر
انتي خليك فلانه بس معاه .. بروحك الحلوه ولسانك الدافي له !
وديري بالك لا تظمرين بقلبك الحقد والكراهيه ولو انها صعبه
بس عشانك انتي وعشان صحتك ونفسيتك ومعاملتك لبناتك وحتى معاملتك معااه !
ع الاقل يكون موجود معاك وله روحه وجيه بحياتك ومتواااجد بالبيت عندك تشوفه عينك
ولا يكون بالاسم موجود زوج وهو مع وقف التنفيذ .. ترا هذا اللي يقهر !
واطلعي من حالة ليش وليش وليش
الله قاسم لك هـ الشي
ماتدرين والله وانا اختك
يمكن يكون خيره لاشياء ثانيه لك
الله واعلم
بعدين ياقلبي الرجال مثل الطفل الصغير
دلليه , دلعيه , لاتشدين عليه . احتوويه اذا جاك لاتخلينه يلقى فيك عامل نقص يتهرب منك لها !
رحبي فيه .. ابتسمي بوجهه لو بقلبك قهر معصور .. اقعدي لك يوم او حتى نص يوم بدون بناتك
لحالكم !
وقبل هذا كله استعيني بالله ادعي لنفسك يكتم غيظ قلبك ولاتدعين عليها
وادعي لزوجك الله يسخره لك ويجعلك قرة عين له ويجملك بعينه خلقا واخلاقا
لاتخلينه بالدعاء وقيام الليل ........ وابعدي كل المشاعر السلبيه عن قلبك وفكرك ونفسك ولسانك
ترا ماتجيب الا المرض والنفسية المنهاره
وابعدي عن كل ما يشحنك بالغضب مثل صديقاتك اواي احد يزيد مواجعك !
اقري لك القرآن كل ماحسيتي بضيق او قهر .. توضي وصلي لك ركعتين
واستغيثي من الله ....... مو من الناس !!
حبي نفسك وحبي بناتك يكفي الله كرمك بالامومه غيرك يدور بنت وحده !
الله يسخره لك ويكتب لكم الخيره ..
