بنات اللي عندها خبرة بليز تساعدني.. توني قابليني تربية ومادري شسوي ="(

[Rose.8.]

السلام عليكم بنات..​

بنات هذا الموضوع كاتبته من أمس بالحياة العلمية.. بس ماحد فادني.. وانا محتاجة الأجوبة ضروري بنات.. ساعدوني..

آنا اليوم ترشحت حق وزارة التربية.. وعندي جم سؤال..


1. تخصصي انجليزي (آداب)... فهل راح أصير مدرّسة ولا شي ثاني ؟ ادارية وهالسوالف ؟


2. في مقابلة ؟ لأن وحدة من البنات قالت شالوا مقابلة آداب انجليزي !!
بليز اللي عندها خبر أو توها متعينة تفيدنا بهالشي..


3. آنا أختار المدرسة والمرحلة ولا لأ ؟


وبنات راح أروح بروحي الوزارة.. والصراحة ضايعة مادري شسوي...
لازم آخذ معاي أوراقي وشهادتي ؟ ولا بعدين ؟
وشنو سالفة الفحص الطبي ؟
متى راح أسويه ووين ؟ ومتى تطلع نتايجه ؟ (وايد مهم بنات بليز)


بنات بليز... قولولي شسوي ؟
ترا والله حدي ضايعة وبحاجتكم..


أروح الوزارة وشنو عقب !!!


من فرّج من مسلم كربة.. فرّج الله عنه 70 كربة :eh_s(16):​

 

[Rose.8.]

بليز ساعدوني.. الأحد راح أروح الوزارة بروحي... ومادري شنو الاجراءات =""""(​

 

[ضايعه بالطوشه]

انشاء الله البنات الي توهم متعينين يفيدونج
لان انا تعينت من زمان و الوضع و الاجراءات تغيرت عن قبل

بس لما تروحين الوزاره اخذي معاج كل اوراقج شهادتج و بطاقة المدنيه
وبعدين الوزاره راح يقولون لج شنو الخطوه الي وراها اذا كانت مقابله و بعدها فحص طبي

اختي في موضوع كان موجود في ايام العطله اهني في المنتدى كان لبنات يسوون اجراءاتهم للتعين و مثلج خريجات اداب و علوم مو تربيه
كانوا يحطون كل اجراءاتهم احاول ادوره لج

 

[Rose.8.]

انا خايفة اروح واتوهق.. لأني راح أروح بروحي
فبعرف الاجراءات قبل ما أروح

اي والله أبي موضوع جذي.. جان زين أحصله
الله لا يهينج يابعد قلبي.. :eh_s(22):​

 

[ضايعه بالطوشه]

http://www.q8yat.com/t873637.html

هذا الموضوع وانشاء الله يفيدج

 

[منال القلب]

1- بتصيرين مدرسة
2- الانجليزي مالهم مقابلة قبول فوري
3- المرحلة الدراسية + المدرسة اهما يختارون
4- الفحص الطبي + المطلوب:

.

وين تروحين عشان تحددين المقابله لما تتخرجين من آداب اللغه العربيه و تصيرين معلمة ؟
أنا تخصصي عربي آداب وتخرجت من الجامعة شهر 1 سنة 2010 يعني قبل سنة تقريبا. فلما تخرجت قعدت 3 شهور ونص بطالية. لكن خلال هالـ 3 شهور نزل " إعلان " استثنائي بالجرايد وفيه ان طلبة الكليات + التربية الي حابين يكونون مدرسين يراجعون وزارة التربية حتى يستكلمون الاجراءات.. وانا رحت الوازرة وكان في بنات من طقتي واذا انتي خريجة الكورس الأول نفس حالتي ف المفروض هالفترة ينزلون اعلان استثنائي انهم بحاجة حق معلمين. واذا ما نزلوا لازم تقدمين على " ديوان الموظفين " لأن الي بتخرجون من أي كلية ثانية ومنهم الأداب ويبون يصيرون مدرسين لازم على الديوان اول. أما الي متخرجين من كلية التربية يروحون وزارة التربية دايركت. وحق الي من التربية لما تروح مبنى وزارة التربية تروح مبنى رقم 2 البوابة الي بالويه.

و شنو الاوراق اللي تاخذينها .. ؟
المطلوب: ودي وياج ملف وحطي فيه كل المطلوب علشان لي طلبوا شي يكون عندج وما تضظرين تصورين وتروحين البيت مرة ثانية:

8 صور شخصية مقاس 4*6

5 صور شهادة ميلاد

5 صور جواز السفر

5 صور للبطاقة المدنية

5 صور للجنسية

4 نسخ من شهادة الجامعة ( بالألوان ) ولازم النسخ الـ 4 تاخذينهم من الجامعة يعني مو تاخذين نسختج وتروحين مال التصوير وتصورينهم بالألوان لأن الشهادة فيها رموز يبين انها اصلية او لأ.. فعلشان جذي روحي الجامعة " الشويخ " عند العمادة وطلبي منهم 4 نسخ بالالوان لان فيه ابيض واسود والي بالالوان اعتقد سعر النسخة 3 وشوي عن شهادتج الأصلية. وطبعا راح يقولون لج تعالي بعد 3 ايام تستلمينهم وعلى فكرة عليهم فلوس بس ناسية بجم انتي ودي وياج 2- دينار لان هناك فيه طوابع بفلوس ف ودي وياج خردة 20 يعني كل ما يكون وياج دنانير بترتاحين اكثر لان كل شهادة فيها طابع خاص فيها.. وديري بالج ان النسخ تطول على ما تستلمينهم فحطي بحسابج تطلبينهم مبجر وافتكي حتى تاخذينهم مبجر..


ورقة تحويل راتب على البنك الي فيه معاشج ان شالله لما ينزل


+

راح يطلبون منج تحليل دم + بول + فحص سريري وهو عبارة يفحصون صدرج وبس + اشعة حق صدرج

وكل هالأمور تسوينها بالمستشفى التابع حق منطقتج، انا سويتها بالاميري لان بطاقتي ع العاصمة وفي ناس بطاقتهم على حولي
ف يسوون في مستشفى مبارك وهكذا... ونتايج البول واشعة الصدر تاخذينهم بعد يوم كامل يعني سويتيه اليوم تاخذينه باجر
أما تحليل الدم يطول 3 ايام.. وبعدين تاخذين نتايج كل هالحوسة وتودينه المجلس الطبي الي صاير صوب مستشفى الصباح وهناك تسوين الفحص السريري وتحليل الدم وتعطينها نتايج الفحوصات الي سويتها وتقولج تعالي بعد أسبوع استلمي النتيجة
وبس تستلمين النتايج تاخذينهم وتروحين على وزارة التربية وهناك عاد راح ينطرونج اسبوع وبعدها تاخذين مباشرة العمل
وتروحين على مدرستج......

واذا كانت مباشرة العمل مكتوبة على تاريخ معين لازم تروحين ع التاريخ مو تقولين لأ برتاح اليوم لأن تعبت من الروحة والردة!! لان فرضا لو كانت مباشرة العمل صارت يوم الخميس وتقولين لا خلاص بداوم الاحد بداية الاسبوع لان الخميس نهاية الاسبوع راح ينخصم من معاشج على هاليوم والمعاش تاخذينه بعد مرور شهر من وظيفتج.



و جم شخص يقابلج بالمقابله ؟
بالمقابلة: انا قابلتني وحدة بس فتحت جدامي القرآن وخلتني أقرا صفحة كاملة بعدين قالتلي على جم كلمة شنو اعرابها... واعربت 3 صح و 4 خطأ لول وبعدها قالت انا بحطج متوسط قلتلها أوكي. يعني بنفس الوقت اهي تحددلج اي مرحلة ف انتي قولي لها المرحلة الي تبينها واذا سألتج ليش انتي قنعيها وقولي انج حاسة انج راح تتمكنين ومن هالكلام..



و شنو الاسئله اللي بالمقابله ؟
المقابلة: شفوي ووضحته فوق. والتحريري يكون عبارة عن امتحان من 4 صفحات والاسئلة مالته حيل صعبة بس لا تحاتين ما ياخذون عليه درجات يعني بس جذي شكليات. اهم شي دشي عليهم بكل ثقة ولا تحاتين لانهم اساسا يبون مدرسات ومو مستعدين يخسرون مدرسات...


متى تطلع نتايج المقابله ؟

نتايج المقابلة تطلع بعد أسبوع كامل يعني ان سويتيه الأحد بيطلع الأحد الياي.


و متى تباشرين دوام ؟
لما تخلصين تحليل الدم وكل الأوراق راح تتوظفين بعد أسبوع كامل من خلاصج من كل الإجراءات. وهذا رقم وزارة التربية حق الاستفسارات: 24840678وزارة التربية


^^^^

لكل الابلات ولي انا لازم اذكر نفسي بعد.. في أشياء ودي أقولكم عليها حتى لا تطيحون بالغلط، وخاصة الابلات مع وقف التنفيذ الي ما

باقي شي ويتوظفون ان شالله.. هذي جم معلومة مني لكم اكتسبتها خلال الــ 11 شهر من بداية ما توظفت شهر 4 سنة 2010 ولحد

يومكم هذا، وترا ها.. شوفوا ما صارلي سنة وشفت اشياء عن 10 سنوات جدام لووول. انا الحمدلله كنت عارفة شنو يصير بالمدارس ببركة

هالقسم الي كانوا يحطون شنو الي يضايقهم فعلشان جذي لما رحت مدرستي وعايشت الجو ما استغربت بالعكس اندمجت

ومسكت الامور صح.. والحين راح أقول الأشياء بنقاط علشان تكون كل نقطة واضحة:


1- لا تسوين صداقة أبدا ابدا ابدا بينج وبين أي معلمة داخل المدرسة، لا تخلين العلاقة تمتد خارج اسوار المدرسة. انا ما أقولج خلج صنم ولا تتكلمين وبوزج شبرين، لا بالعكس خلج نفس ما أنتي لكن فرقي بين الصداقة و ( الزمالة ) حلو يكون عندج زميلات المهنة، لكن لا تتعمقين وياهم وايد خاصة إذا كنتي معلمة. لان مجمتع المدرسة ماله أمان، لا تقولين هذي نفس طبعي وعلى قلب واحد وبينا توافق لا حبيبتي هالكلام مأخوذ خيره، يمكن بالوزارات الثانية اي لكن بالتربية لأ والف لأ.. مو يمكن لي صارت صديقتج الروح بالروح فجأة ما عجبها الوضع وتنتقل وتروح مدرسة ثانية وانتي تكونين معطتها اسرارج وكل شي وهي فجأة فجت عنج لانج مو بنفس المدرسة. ولا تقولين صداقتنا تكمل برا المدرسة، لا حبيبتي نادر جدا بهذي الحالات تكمل الصداقة. فعلشان جذي خلج بحدود الزمالة فقط. وان صادف لوحدة حالة وفاة او زواج او ولادة عادي توجبين وتقومين بالواجب.




2- اذا صار لأي مدرسة حالات وفاة او ولادة او مناسبة سعيدة أو حزينة تخصها، قومي بالواجب، شوفي اذا الابلات كلهم بيحطون مبلغ معين حطي وياهم، اما اذا شفتي لخطبة قولي انا راح أييب هدية بروحي .


3- من أول يوم كوني صريحة علشان بعدين لا تننحرجين. اتكلم عن ( الأكل ) إذا انتي مو من النوع الي يحب ياكل بالمدرسة قولي لهم عندي نظام خاص واكل بالبيت. او انج عندج اكل خاص تييبيينه وياج الداوم. كل قسم فيه ثلاجة + قطية كل اسبوع على وحدة وفي افسام يسوون كل يوم الريوق على وحدة يعني انتي وحظج قسمج شنو نظامه. انا قسمي كل وحدة تييب ريوقها من بيتها ومحد لها شغل بالثانية وجذي مرتاحين اما اذا صارت مناسبة سعيدة تقولنا الابلة صاحبة المناسبة ترا باجر ريوقكم علي لحد تييب وياها ريوق. فعلشان جذي شوفي انتي شنو نظامج بالريوق وقوليها بالفم المليان علشان بعدين لا تتوهقين



4- اذا عندج طالبات يولج القسم وخاصة اذا كانوا 4 أو 5 لا تخلينهم يوقفون على مكتبج، اخذيهم وطلعيهم برا وكلميهم عند باب القسم. لان راح تحسبلج سلبية من السلبيات وان القسم من داخل صار فوضة والسبب انتي ويمكن رئيسة القسم مو موجودة ووحدة من القسم تفتتن عليج. فعلشان جذي اخذيهم برا القسم يم الباب وخلصي وياهم الأمور ودخلي داخل. اما اذا كانت طالبة وحدة او 2 فعادي



5- الإدارة ( ناظرة - وكيلة - اخصائية ) خلج رسمية رسمية رسمية جدا جدا جدا... حتى لو كانوا عسل وياج هم خلج رسمية. لا تقطين ويهج عندهم وايد.. انا اسلم عليهم لما أدخل المدرسة ولما يصير الهدة ان شفت وحدة منهم اسلم عليهم مع اني ما أصادفهم وايد.. علاقتي فيهم حيل رسمية وخاصة الوكيلة.



6- علشان تسكرين حلوجهم وما يتكلمون عنج بشي سواء الادارة او المدرسات تعالي المدرسة مبجر. مافيها شي لي ضبطتي المنبه على ساعة محددة. بالأول والأخير هذا شغلج يعني انا صح ماكلة تبن حشاكم.. كل يوم مضبطة الساعة على 5:30 الفير لان مدرستي بالديرة وانا بمبارك الكبير فلما اطلع من البيت 6:15 ولما اوصل المدرسة الساعة 6:55 هههه حاسبتهم بعد... اروح مبجر اقعد بالقسم ماكو احد ، اعدل مكتبي، احضر، اسوي امور ماقدرت اسويها من زمان لحد ما يطق جرس الطابور



7- لازم تعرفين نظام قسمج شلون صاير. يعني مو تفلينها من أول يوم وتقولين واي شحلاتهم طيوبات واحلى قسم. خلج أول شهر تراقبين الوضع وتعرفين تصرفاتهم وعلى اساس هالمراقبة تعرفين تتصرفين مع قسمج. وخاصة رئيسة القسم وان شالله ماتكون نسرة كوني حذرة منها. انا رئيسة قسمي عادية بس مرات تعر لكن مع هذا اعاملها رسمي. يعني مرات اضحك وياها واسولف بس هم مو قاطة ويهي عندها وايد. وجذي احس احسن علشان تعرف اني عارفة حدودي.


8- أي كلمة سمعتيها من أي أبلة ثانية سواء داخل قسمج أو من قسم ثاني، لا تقولينه. حتى لو كان سوالف واشياء عادية. لأن ممكن ينقلب ضدج وتصيرين انتي صاحبة المشكلة الي تنقلين الكلام المو محترمة. اما بخصوص الشغل عادي نقلي كلام وجنه العيد. اما هذي قالت وهذيك سمعت ابدا ابدا لا تحطين هالاشياء براسج علشان لحد يمسك عليج شي..


9- لما يكون عندج حصة دايما تلفونج حطيته على السايلنت واخذيه وياج او حطيه داخل الدرج وقفلي عليه بالمفتاح واخذي مفتاحج.. والاشياء المهمة من اوراق واقلام حطيها بالدرج اذا ماتبين احد يستخدمها، وتأكدي من جنطتج وبوكج ترا عيال الحرام والسرقة ما تعرف مدرسة من شارع..


10- حاولي تكونين مرنة. ولا تخلين المدرسة همج الوحيد، طلعي من المدرسة وانتي خلاص ناسية كل شي صار فيها، لأ عندج حياة خارجها.. ولا تفكرين فيها الا باليوم الثاني لما تدخلينها. ترا هذي وظيفة لا راحت ولا ردت، ليش تحرقين أعصابج لان ناظرتكم ذيبة؟ ولا الوكيلة اخلاقها زفت؟ ليش تحرين نفسج وما تاكلين لانج تأخرتي شوي وعطوج افادة؟.. انتي مو ماخذة معاشج اخر الشهر؟ مو كويتية؟ شنو يعني راح يفنشونج ويقولون لج رجعي البيت ماكو معاش؟ او راح يخصمون من معاشج؟ يخسون.. معاشج غصب عنهم ماخذته كل اخر شهر.. اهم شي طالباتج فاهمين وانتي مو مقصرة وياهم وبس.. ما أخلي اي شي ينكد علي.. انا ما اقولكم اني مرات ما اتضايق بسبة امور بس صدقوني من اطلع من المدرسة خلاص انساها وبالطقاق والله، ليش اخرب صحتي علشان جم وحدة معوقة تفكير!! الزم ماعلي صحتي وراحتي والله باجر لي مرضت وطحت ومت ( اسم الله علي وعليكم ) منو بينفعني؟ محد وراح اروح من جيس اهلي واهما ولا هامهم يعني باختصار خلج ريّالة داخل المدرسة ولا يهزج ريح وخففي من الحساسية...


11- ان شالله ما تكونين كثيرة الغياب. وهالشي نابع للظروف انا الحمدلله ما أحب أغيب الا اذا صار ظرف حيل يخليني أغيب. استأذني لوقت الحاجة ولأن صج انتي بحاجة للاستئذان بسبب موعد طبيب أو امور ثانية او او او او..





في الختام هذي أهم الأمور الي حبيت اوضحها.. والي اكيد حاشتني وبعضها سلمت منها والبعض ماقدرت بس حرصت اني مااكررها مرة ثانية بالمستقبل.


الله يوفقكم ويسهل عليكم ويفتحها بويهم، ويبعد عنكم الضيقة والهم والغم بحق محمد وآل محمد، اول ما تحطون ريولكم بالمدرسة دخلوها باليمين تسبقها المعوذات وآية الكرسي وتوكلوا على الله..

 

[Ajmal E7sas]

انا رديت هناك بموضوعج الثاني و بعيد الرد هني
انا اداب انجليزي و توني مترشحه يوم الخميس اللي طاف و كنت امس بالوزارة



السلام عليكم بنات..

آنا اليوم ترشحت حق وزارة التربية.. وعندي جم سؤال..

1. تخصصي انجليزي (آداب)... فهل راح أصير مدرّسة ولا شي ثاني ؟ ادارية وهالسوالف ؟
مدرسة انجليزي

2. في مقابلة ؟ لأن وحدة من البنات قالت شالوا مقابلة آداب انجليزي !!
بليز اللي عندها خبر أو توها متعينة تفيدنا بهالشي..
في مقابله , عقب ما تقدمين اوراقج يقولون راح ندق عليج نقولج متى مقابلتج ,,
المقابله فيها امتحان قواعد و كلمات ,, و قراءة و كتابة

3. آنا أختار المدرسة والمرحلة ولا لأ ؟
عقب الامتحان اللي يسوون لج ياه بالمقابله يحددون وين يحطونج حسب مستواج بالامتحان او حسب النقص بالمنطقه التعليمية مالتج

وبنات راح أروح بروحي الوزارة.. والصراحة ضايعة مادري شسوي...
لازم آخذ معاي أوراقي وشهادتي ؟ ولا بعدين ؟
روحي وزارة التربية بشويخ مبنى 2 .. صالة المراجعين يعطونج رقم تنطرين دورج
اخذي وياج صورة شخصيه و صورة من شهادتج الجامعية مع كشف الدرجات ,, و صورة البطاقه المدنية ,, و خلي وياج رقم الجواز لأنه راح يطلبونه منج بالاستماره اللي تعبينها

وشنو سالفة الفحص الطبي ؟
متى راح أسويه ووين ؟ ومتى تطلع نتايجه ؟ (وايد مهم بنات بليز)
الفحص مو الحين , عقب المقابله ولما تنجحين ويقولون لج اوكي تسوينه , يقولون لج بعدين شنو المطلوب و شتسوين , انا ليلحين ما سويت مقابله امس مقدمه اوراقي
بس رفيجاتي سووه , تحليل دم واشعه و هالسوالف بس مو الحين عقب المقاله بـ فتره

بنات بليز... قولولي شسوي ؟
ترا والله حدي ضايعة وبحاجتكم..

أروح الوزارة وشنو عقب !!!


من فرّج من مسلم كربة.. فرّج الله عنه 70 كربة :eh_s(16):​

 

[Ajmal E7sas]

اللي يقولون ماكو مقابله حق الانجليزي امبلى في و رفيجتي الدفعه اللي قبلي و قالولها قرار حجي جرايد ما تطبق
قدمت امتحان تحريري و قراءة و كتابه ...


حتى انا امس كنت هناك قدمت اوراقي وقالولي خلاص نطري ندق عليج نقولج متى مقابلتج

 

[Rose.8.]

يابعد قلبي يا منال القلب...
انتي دوا القلب والله مو منال القلب =**

حياااتي الله يرزقج شفاعتهم أحبابج و يحشرج معاهم
ان شالله

والله لا يحوجج حق أحد.. واذا احتجتي أحد.. الله يدزلج
ألف من يخدمج ويساعدج يابعد قلبي والله

خجلتيني والله مادري شقولج..
مشكورة عالرد وعالنصايح الحلوة..
وراح آخذها بعين الاعتبار..

في ميزان أعمالج يالغالية..

***************

Ajmal E7sas
موفقة يا زملتي الانجليزية.. وان شالله تنقبلين
وتنقطين بأحسن مدرسة يارب

الله يرزقكم كل ما تتمنونه الهي
ويثبتكم على حبه وطاعته =********​

 

[Rose.8.]

مشكووووووووووورة ضايعة بالطوشة
الله يكتبلج اللي تتمنينه ان شالله =****​

 

[درة أهل الطولات]

لا ما تختارين المدرســة ،،،

هذا اللي أعرفه واذكره

 

[Lourdez]

انااا بعد قبلووووني تربية و انا شهادتي اداب انجليييزي و صراحة للحين محتارة بين اوافق ولا لأ

موووووفقين يا ابلات المستقبل :***

 

[Angel_store]

اب اب اب

 

[Lourdez]

يا جماعة استخرت و رحت و عدل كلام الاخت اجمل احساس
يطلبون منج صورة الشهادة و كشف الدرجات (تصوير الجمعية )
صورة وحدة 4*6
و بطاقتج المدنية مادري اذا لازم اصلية انا وديت الاصليه
و يعطونج مثل استمارة تعبين بياناتج و يطلبون منج رقم الجواز فودي معاج صورة جوازج
و قالولي اهم بيدقون علي
موفقيييييييييييين كلكم

 

[ضايعه بينهم]

سؤال صج في امتحان تحريري للانجليزي. ومن متى هالسالفه
ياليت احد يوضح لي. لان خبري شفوي