بسم الله الرحمن الرحيم ...
دعوه للتراحم والمحبه .. ابتديها معاكم خواتي كلكم ...
اكيد كل وحده فينا متضايقه وتحس في اشياء ناقصتها بحياتها .. رغم عندنا كثير من النعم .. يمكن ننسى حتى نشكر الله عليها
يمكن بعضنا مو سيء ؟ يمكن تكون من احسن البنات لكن غفله .. والغفله خطيره جدا على الانسان
انا وحده بتكلم عن روحي .. انا انسانه عاديه جدا جدا .. ماقدر اقول اني ملاك ولا اقدر اقول اني اسوأ الناس
لكن اعرف ان لي قلب يحب الخير .. وعندي من الرحمه اللي اوزعها لي في قلبي الكثير...
تدرون ان الرحمه لما تدخل لقلب الانسان انها من نعم الله سبحانه وتعالى وتدرون ان مانملك منها شي؟ هي رحمه من رحمات الله .. سبحانه وتعالى يوزعها كيفما يشاء بين خلقه
حبيت افتح دعوه للتراحم مابينا .. ارجوكم وخصوصا الاخوات اللي ينصحون بطريقه فظه باسم الدين .. رغم الله ورسوله نهوا عن هذا الشي .. اتمنى اتمنى نتعايش مع الطرف الآخر
بحــــــــــــــب .. نعم بحب
انا اعتبركم كلكم خواتي .. في الله .. احب انادي المذنب قبل الطائع ... اقولهم لاتيئسون من رحمة الله
اي وحده مستمره في ذنب تحاول تبتدي تقلله بعدين توقفه تطلب من الله يقويها عليه ... وراح تقدر
الذنوب كثيره اولها داء القلوب ( الحسد المذموم - قسوة القلب ) شقي كل انسان لايملك رحمه في قلبه
الرحمه هي سر الله في كونه .. الله سبحانه وتعالى من حرم الظلم على نفسه .. وكتب الرحمه على عرشه
رحمتي سبقت غضبي ... رحمتي سبقت غضبي آه كم احبك يارب
وبدأ القرآن الكريم ( بسم الله الرحمن الرحيم ) ... ديننا كله رحمه
لكن البعض يستخدم اسلوب العصا اعتقادا منه انه اصلح الصالحين في الارض .. وهذا الاسلوب خاطيء ويبعد الانسان عن طريق الهدايه ..
عندي كلام وايد مايسعني الوقت اقوله .. لكن فتحت الموضوع افضفض بنفس الوقت اطلب منكم بنات
ان نسوي شي لآخرتنا .. يمكن عملنا الصالح يشفع لنا .. يمكن ربي يغفر لنا ذنوبنا
ابي كل وحده منكم .. تعرض افكار ...
اعمال خير
صدقات
طاعات
تدرون لو اقولكم نفسي امسح على راس يتيم بس مو لاقيه؟؟؟ ودي اروح دار الايتام بس قالوا مايستقبلون اي احد
انزين بنات احنا الله معطينا خير وايد .. جم نصرف على ملابسنا ؟؟ جم نصرف على المكياج ؟ على الزينه
انا ما ابيكم ماتصرفون ولاتتمتعون بالعكس بالف عافيه عليكم .. هذا حلالكم وربي يزيدكم من نعيمه ومايحرمكم
بس اتييني لحظات افكر بالموت افقر بالقبر وعذابه .. ادعي الله لو خذا عمري ياخذه بيوم الجمعه عشان يعصمني من فتنة القبر وعذابه .. افكر شلون بجابل الله وماسويت شي؟؟ مادري جم عندي عمل صالح ومادري لو ذنوبي طغت طغت حتى لو كانت صغائر ذنوب يمكن لما تتيمع تكون مثل الكبائر والعياذ بالله .. بس الله فتح لي طريق الاستغفار وانا تناسيته بس
عازمه ارجع لربي بكل حب وحنين .. واقوله يارب اقبلني .. اقبلني وخذ بايدي
بنات شنو يشغل تفكيركم؟ شنو تبون من الدنيا ؟؟ صدقوني راح تحصلونه لما ترضون ربكم
اللي تبي تتزوج ؟ اللي تبي زوجها يحبها ؟ الي تبي ماتتطلق ؟ اللي تبي وظيفه ؟ اللي تبي بياااض جسمها ادعوا الله يبيض قلوبكم . اتمنى الحين الحين اي وحده سوت غلط بحق ناس تروح تكفر عن غلطها .. واللي تسحر للناس مابي اقول شي فيها لكن اقول تسوى الحين تكفرين بالله ؟ عشان ولا شي؟؟؟؟ وتضرين خلق الله ؟؟
شوفي هالكلام
أوحى الله لداود عليه السلام : ( يا داود لو يعلم المدبرون عن شوقي لعودتهم ورغبتي في توبتهم ؛ لذابوا شوقاً إليَّ يا داود هذه رغبتي في المدبرين عنى ، فكيف محبتي في المقبلين على !! )
هالكلام مايذوب القلب؟؟؟؟ مايخليج تعدلين عن مضرة الآخرين ؟؟
منو مايبي يدخل الجنه ؟؟
منو مايبي النجاه من النار وسعيرها وجمرها وحرها اللي نار الدنيا برد عندها
وهذي الصور مجرد تشبيهات وتخيلات مو اكثر بيعده عن الواقع لان اجمل من مايتخيله انسان
انا الحين عمري 31 جم بعيش؟ لي 50 ؟ لي 70 ؟ بس آخرته لقاء ربي مافي مفر منه ..
والدنيا تركض ركض انا نفسي ومو مصدقه .. احس ان لما كان عمري 20 كان البارحه ! ماكان قبل 10 سنين
ماحسيت فيهم ابدا ابدا مشوا مثل البرق
لا احد يغتر يقول ان عمره صغير ... ياما ضمت القبور ناس بعمر الزهور واطفال ... يشهد الله اني احبكم وقلبي عليكم
تبون تعرفون عمر الدنيا الحقيقي؟؟
لما جاء جبريل إلى رسول الله (صلى الله عليه وسلم) بالبراق، فكأنها حركت ذنبها فقال، لها جبريل: مه يا براق، فو الله ما ركبك مثله. وسار رسول الله (صلى الله عليه وسلم) ، فإذا هو بعجوز على جانب الطريق، فقال: ما هذه ياجبريل؟ قال: سِرْ يا محمد. فسار ما شاء الله أن يسير، فإذا شيء يدعوه متنحيا عن الطريق، فقال: هلم يا محمد، فقال له جبريل: لا تلتفت إليه. فسار ما شاء الله أن يسير، قال: فلقيه خلق من خلق الله فقالوا: السلام عليك يا أول، السلام عليك يا آخر، السلام عليك يا حاشر، فقال له جبريل: أردد السلام يا محمد، فرد السلام.... حتى انتهى إلى بيت المقدس، فعُرض عليه الخمر والماء واللبن، فتناول رسول الله (صلى الله عليه وسلم) اللبن، فقال له جبريل: أصبتَ الفطرةَ، ولو شربت الماء لغرقت وغرقت أمتك، ولو شربت الخمر لغويت وغويت أمتك..
ثم قال جبريل: أما العجوز التي رأيت على جانب الطريق فلم يبق من الدنيا إلا كما بقيَ من عمر تلك العجوز، وأما الذي أراد أن تميل إليه فذاك عدو الله إبليس أراد أن تميل، وأما الذين سلموا عليك فإبراهيم وموسى وعيسى عليهم السلام).
جسد الله لنا في رحلة الاسراء والمعراج .. صورة امرأه عجوز مزينه بأجمل الحلي والجواهر ... ياسبحان الله
فمن تلك هي المرأه العجوز ؟؟ التي لم يتبقى من عمرها شي
هــــي هذه الدنيــــــــــــــــا
فمهما تزينت لنا او تزينا لها فنحن راحلون .. عمرها قصير مهما طال .. وان طال عمرها فهي ليست لنا
فممكن تعيش فيها 10 سنوات او30 او 50 ! ان طالت المده 70 وما اشقاها من حياه بعد السبعين
ولو طالت الف سنه .. راح تكون لاجيال اخرى غيري آنا وانتي
يااااااااه لهدرجه الدنيا قصيره ؟؟
انا اكتب لكم من القلب... دعوه من قلب محب للخير .. دعوه للمحبه والتراحم .. ارجوا ان تقبلوها
الاهم عندي .. ان نطرح افكار لاعمال الخير والصدقات .. وان نجبر بخاطر الضعفاء واليتامى والمساكين
ومن كان خصما لهم في الدنيا كان الله له خصما في الدنيا والآخره
عندي كلام وايد .. بس متضايقه من روحي .. واكتب .. لعلي اجد صديقه هنا تحمل نفس الهم اللي في قلبي
وتتمنى ان تتغير للافضل وان تكن يدا ممدوه لكل محتاج .. فك كربة مسلم .. تعتق الرقبه من النار
اللي تعرف ناس محتاجين مساعده ... تساعدنا .. واللي بالديره اولى بالمعروف .. ولو ان قلبي على كل المحتاجين
نبي افكار ندخر من فلوسنا .. بدل ماتروح بخرابيط تروح .. للخيرات .. بتكون لنا جبال حسنات في الآخره
لاتخافون مايضيع خيركم لان مضاعف عن الكريم الغني الله سبحانه وتعالى
واهل الكويت مجبولين على حب الخير والله لايغير عليكم .. خلونا نتسارع لعمل الخير والطاعات ..
ورمضان بعد خير وياينا .. نبي نستغله باشياء زينه تسعدنا وترضينا ...
والله يا اخواتي انا لما حافظت على صلواتي وصرت ادعي دعاء بكل صدق في صلاتي نور ويهي !! اشوف بويهي نور بدون مكياج وابجي ابجي اقول ويني عن ربي من زمان ندمااانه ندمانه وساعات احس اني اسوأ انسانه لاني غفلت فتره على اشياء كنت اشوفها بريئه لكنها تاااااااااااافهه وماكانت تتستحق اعطيها وقتي
انا ابيكم تعيشون الدنيا سعيدين والآخره ... واللي تستصعب انها تبتعد عن ذنب نساعدها ونشيلها عالراس والعين وباحضانا
سامحوني لاني كتبت وايد ومادري شنو كتبت ! كلام وايد بقلبي ومو مرتب .. لكن اتمنى وصلت الفكره
ابي اسوي خير مو بس بالكلام .. ابي بالفعل .. مابي اكون ممن يقول مالايفعل
والله يسعد قلبكم كلكم يارب :eh_s(17): احبكم في الله واللللللللله
مانبي المشاهدات وايد ... والردود شويه .. موضوعي هذا مو حقي .. لا ... لكم كلكم .. كلكم
حبيبياتي نبي لقائنا محبه .. وتراحم .. لانبي زحام ولاتصادم ردود ولا شد .. وعسى ربي يعطيكم كل ماتتمنون
:eh_s(22): وسامحوني لو قلت شي جذي والا جذي ... كل بني آدم خطاء وخير الخطائين التوابين
التعديل الأخير:
