بنات من صجكم لا موقادره

[ابلة لولوة]

هلا والله حبايبي

بنات تكفووون ابيكم تهدووني موقادره استوعب انه العطله خلصت وبنرد انداوم

بالمدرسه

عقب الراحه ارد حق الغثا

وناظره تصرخ !

ووكيله تناجرج حتى لو تأخرتي دقيقه

وأولياء اموور اييونج بهووشه ويتبلوون عليج وانتي موقادره تدافعين عن نفسج

والله بنات حدي مكتئبه

تكفووون ريحووني بكلمه حلوة او دعاء

وربي يفرج اهمومكم قولو آمين :yaaaaaarb:​

 

[LA TROO7]

ليش هالتشائم !!

شنو تبين الحياة كلها نوم وبس

وماعليج من وكيله ولا ناظرة اهم شي ترضين ربج وضميرج مرتاح

مراح اواسيج لااا بهنيج ببدايه عام دراسي مليء بالانجاز والتميز والسعاده

 

[love-latee]

الله يكون بعونكم ولا تنسين ان وظيفتج يبيلها قوة تحمل وصبر لانج مجابلة اجيال

 

[fri2010]

واااي بنات تعبت من المواضيع التحبيط والتحطيم

اللي مو قادر ليش دخل هالوزاره وقبلكم كانو يذمون فيها!!

وترا الحين صار عادي اللي تخرجت تربيه تروح وزاره ثانيه

والله يوفقنا يارب ويبعد عنا الكدر وضيقة الخلق

 

[ابلة لولوة]

ليش هالتشائم !!

شنو تبين الحياة كلها نوم وبس

وماعليج من وكيله ولا ناظرة اهم شي ترضين ربج وضميرج مرتاح

مراح اواسيج لااا بهنيج ببدايه عام دراسي مليء بالانجاز والتميز والسعاده

حبيبتي تسلمين على ردج

بس هذا الواقع

الحمدلله ضميري مرتاح وطلبتي ايحبووني و اغلبهم متفوقين عندي بالماده

مع ان مادتي صعبه رياضيات

بس الحمدلله قادره اوصل لهم المعلوومه بطريقه سهله ومبسطه

بس انا الاداره ينرفزووني بتعاملهم والتفرقه اللي يسوونها

بتوزيع الجدول والاحتياط

يعني عشان انا استحرم اغيب عن المدرسه الا للضرورة ومواظبه على الحضوور

لازم يكافئوني باحتياط الاخيره جنه محد غيري مداوم بلمدرسه

​

 

[fri2010]

اوله عشان الاحتياط صارت المدرسه مو شي!!

مو احسن من قعدة الحريم في القسم حق القيل والقال!

 

[معلمة_منكوبة]

أبله تفائلي لا تداومين وانتي جذي ... كلنا لايعه جبدنا ونفس احساااااسج والله حاسه فيج

وكل اللي قلتيه عدل بس مالنا اللا نتذكر الاشياء الزينه علشان شوي نتفائل ..

وانا بحاول من السنه اليايه ماتعب نفسي زياده (كل سنه تقول نفس هالحجي) واتبع

أسلوب يديد مع كل أحد يغثني أولهم الناظره ..

يالله الغثا أول يوم وأسبوع بعدين نرد للهم ونتعود غصبن علينا

 

[ابلة لولوة]

حبايبي love lateee

و fri 3010

تسلمون على ردودكم

وصدقوني ماكو دوام مريح

سامحوني ابي افضفض مو قادرة

والله العظيم مو كسل مني بس صج معاناة ربي اعلم فيها

يعني انا مدرسه رياضيات وكويتيه وبنت عايله الحمدلله

تخيلي يننوني بمراقبه الامتحانات الفترات سواء شهريه او نهايه الكوورس

والله العظيم كل يوم عندي مراقبه حتى لما يكوون عندي تصحيح لين بالليل هم مايرحموني من المراقبه

وفوق هذا كله

يايه وليه امر حسبي الله عليها تشتكي عند الناظره تتوقعون شتقوول

اتهمتني وانا اراقب امتحان ماده الانجليزي

انه بنتها حاله صح بامتحان الانجليزي وانا خذت ورقتها ومسحت حلها الصح وكتبت بداله الحل الغلط

اقسم بالله لما نادتني الناظره جدام هالام وقالت اتهامها بغيت انهار

بس سويت نفسي متماسكه وقلت لها انا مدرسه واخاف الله واصلن الماده مو مادتي

انا شلوون اغير الاجابه وانا موعارفه اذا كانت اجابه بنتج صح ولا غلط ؟

هذا وانا كويتيه وديرتي انهان بهالطريقه ؟

لما شافتني الناظره عصبت جان تطلعني من الغرفه ماخلتني اتواجه معاها

بس بنتها كرهتها كره العمى حتى المدرسات اللي عندي تضايقو منها والسبه هالموقف

والله لو بدرسها السنه اليايه ماراح اراعييها باي درجه تحتاجها

 

[¤§ زيتونة §¤]

حبيبتي

صلي عالنبي يا حياتي وتوكلي على الله والدوام نعمة ولله الحمد تحصلين معاش حلو وتقضين احتياجاتج والله ميسرها عليج غيرج يتمنى اي وظيفة مهما كانت بساطتها ، واحمدي الله على نعمة الصحة والعافية والسلامة ، ولا تتشاءمين لهالدرجة حبيبتي .





الحمدلله عطلنا وقبضنا المعاشات مقدم واستانسنا وصمنا وعيدنا والدوام حلو وتغيير من بعد العطلة والكسل وتجديد للنشاط والحيوية ، الصراحة حسيت انه في مصيبة والعياذ بالله بتيي لنا بالدوام ؟؟؟؟؟!!!!

لا بنات لا تتشاءمون جذيه من اي شي ودوامنا نقدر نتعامل معاه ومع صعوياته بقليل من الحكمة والصبر والتاني

ومعاملة اولياء الامور ان كانت سيئة نقدر بطيبتنا واسلوبنا الراقي نحولها الى احلاها معاملة

والناظرة والوكيلة ما يبون منا اشياء تعجيزية بالعكس اهم شي تطبقين القوانين وتلتزمين باللوائح وتراعين ظروف الزميلات مثل ما اهما يراعونج والاحتياط يا حياتي استغليه بشي تاخذين اجر عليه والنت متروووووووووس طرق ووسائل لهالشي : ولو فرضنا وما لقيتي شي اقله خليهم يحلون واجباتهم ولا عرضي عليهم فلم بغرفة العروض ولا وديهم المكتبة وخل يستفيدون ويتسلون وانتي سوي شغلج ولا قعدي ريحي بالج بهالحصة...



الصراحة ودي اتكلم وايد بعد بس مابي ادوخ راسكم هههههههههههه


وكل عام وانتم بخير وعام دراسي سعيد عالجميع ان شاءالله

 

[q8tyah]

وييييه كلش ماتشجون الوحده تحول مدرسه ، عاد انا حد الراحه بداومي والسنه 12 شهر لوبحسب جم يوم ادوام مايتعدون شهرين بس ناويه احول عشان فرق المعاش . هالدور اداوم كل يوم ودوام كامل وخلق الله تصارخ علي وتهاوش لا يبه اقعد بوزارتي وايد ابركلي

 

[الكرملين]

تساهيل ان شالله لازم تحبين شغلج عشان تبدعين

 

[ابلة لولوة]

وغير هذا كله مافيه تقدير

يعني يبوونج مثل الآله تشتغلين وتكرفين ومالج حق تكونين ام او يكون لج مسؤوليات ثانيه

يعني الكورس اللي طاف

شفت نفسي مومحتاجه استئذان فما كنت استأذن

اللي صار انه ولدي الله يحفظه بأولى ابتدائي وكان اسم الله عليه متفوق

قبل الحفله بيووم رحت للوكيله والناظره اني باجر بستأذن عشان حفله ولدي

قامت الوكيله بدلت حصصي وخلتهم الاولى والثانيه عشان بالفرصه استأذن وألحق على الحفله

تدروون الاستئذان مدته ساعتين بس

لما وصلت مدرسه ولدي كان فيه برامج بلحفله

ولما كرمو الطلبه ابتدوو بتكريم خامس ابتدائي

وعلى ما وصلو لصف ولدي بأولى الا الساعتين مخلصين

دقيت على المدرسه وشرحت لهم الوضع وقلت لهم ترا عدت الساعتين والحين بكرمون ولدي

قالولي لا , ردي المدرسه

ياجماعه الخير ماقدر مايصير اكسر بخاطره حبيبي

قالولي ان ماييتي الحين بنحسبج غياب

قلت والله لو مايحسبونه غياب لو يفصلووني من الوزارة مابي اكسر بخاطر ولدي

وصج احسبولي هاليوم غياب وانا يومها حاضرة الطابور وشرحت حصتين

بذمتكم هذي انسانيه

والله العظيم احس دكتاتوريه عند هالحريم

من يصيرون وكيلات او ناظرات يتفرعنون ليش مادري

الله المستعان

​

 

[LA TROO7]

وانتي كل احتياط توافقين عليه ؟

انا اقول لااااااااااااااااا وفي امه خير اللي يقومني

اذا شفت ان الكل متعادل ومافي تفرقه عند الوكليه رحت

بس بما انه صاير على ناس وناس

اقوللل لااااااااا والله اغلب الوقت ينطمون

بنات لاتصيرون كل شي عااادي واوكل وحاضر خصوصاا اذا شفتواا فيه سوالف طبقات بالمدرسه

 

[ترف بابا]

قولي الحمدلله هذي الحياه يوم تعب ويوم راحه

وتمر الايام

وعلى فكرة ترى ردوا التجنيد اذا التدريس عندج تعب جربيه !

 

[zqertya]

والله انا حاسه فيج الاداره مو شي ماتشتهين اداومين وانا بعد اقول مابي العطله تخلص الله كريم

 

[ابلة لولوة]

انا لو اعترض علىى الاحتياط

ابيردحون لي الاداره

وكلامهم اللي يجرح واتهامهم لج انه انتي مومتعاونه

والشي بيأثر على تقويم الكفاءه

انا الي مستغربه عليه هالتقويم على اي اساس ؟

على اساس قوتج وادائج بالماده العلميه ؟

ولا الاحتياط اللي تاخذينه ؟

ولا الطابوور اللي تحضرينه ؟

والا المناوبه ؟

جد موعارفه

كل ماتحجينا هددونا

وذا ماهتمينا بالتقويم وقلنا كيفهم وبالطقاق

يتنيذلوون بالاستئذان او بالاحتياط صج يطلعونها من اجبوودنا

انا مره كلمت الوكيله بهدوء وقلت لها ماقدر اخذ هالاحتياط لاني قاعده اطبع امتحانات فاينل

تتوقعون شسوت ؟؟

راحت سوت اجتماع طارئ بلمدرسه وقالت اكو عندنا مدرسه موعاجبها الاحتياط وتعترض واسمها فلانه الفلاني


الله المستعان بس​

 

[fri2010]

حبيبتي ابله لولوة تقدرين تقدمين على نقل ما فيها شي بالمنطقه تبيين الاسباب ووجهه نظرج اكيد هم متفاهمين اهناك

 

[ابلة لولوة]

حبيبتي

تقصدين نقل لمدرسه ثانيه او نقل لوظيفه ثانيه ؟

اذا تقصدين نقل حق وظيفه ثانيه خل اقولج شغله تضحك

العام قدمت عشان اصير اداريه بجامعه الكويت

ودقو علي عشان يسوون لي مقابله

والحمدلله قاعده انجح بلمقابله

بس موضوعي مايتم تتوقعين ليش ؟

ردهم لي انه انتي حرام بهالاسلووب ومدرسه رياضيات وفاهمه هالماده وتطلعين ؟

والله انه اللي قابلووني قالو اذا انتي واللي مثلج يطلعون من التدريس عيل منو يدرس اعيالنا ؟؟

وهم قسم ثاني بلجامعه سوولي مقابله وعطيتهم السي في مالي

لما قروو اني مدرسه اخترعو وقالولي لا يامعوده

انتو وزارتكم منبهه علينا مانقبل اي مدرسه عندنا عشان فيه عجز بالمدرسات الكويتيات

يعني بهالوزاة

الداخل مفقود ... والطالع مولوود ​

 

[fri2010]

ليش جامعه الكويت روحي ديوان المحاسبه شركه البترول هذيلا اماكن وايد زينه

بس اللي قصدته مدرسه ثانيه

 

[ابلة لولوة]

حبيبتي هالاماكن اللي قلتيها يبيلها واسطه ولا مو اي واسطه بعد

حاولت بس الاماكن الي ابيها لازم واسطه

وانا واسطتي رب العالمين .

ونعم بالله .​