بنتى والأكل اربع شهور

[وقفت حياتى عليك]

السلام عليكم ورحمة الله وبركاتة

حبيابي انا عضوة جديدة من السعودية وحبيت اشارك معاكم بعد ماكنت عطول التابعكم وحاطة

المنتدى عندى بالمفضلة بعد ماشفت روح التعاون بينكم والمساعدة لبعض فحمستوني مرة انة اسجل معاكم

صراحة استفدت منكم كثير وانشاءالله تستفيدو بعد منى

حبيايبي انا بنتى خلصت 4شهور موعارفة اش اوكلها بصراحة بعد كلام الدكاترة لاتدوهم الاكل الا

بعد 6شهور وانا بنتى مرة وزنها ضعيفة لحد الحين البسها من 0الى 3 انا ولدى لما كان بعمرها اسم الله كان وزنة كويس والملابس تجى علية حلوة تعرفو اول طفل يكون حقل تجارب
بس بنتى مدرى اش صاير لها ابغى اوكلها اكل صحى وانا لما اشوف جسمها تحزني عارفة الحين كلكم روسكم صدعت من الهرج بس مالى غيركم

يديكم العافية تقبلو تحياتي :eh_s(17):​

 

[فتاة-العنف]

حياج الله اختي وانتي بين اهلج وخواتج

وبالنسبه حق بنتج انا مالي خبره كبيره بالموضوع لانه ولدي توه صغير بس اللي اعرفه من عمر ال 4 شهور يبلشون يذوقون البيبي الاكل الموجود وتدريجي تاكل و في ناس ما تبلش توكل الا بعد ال 6 شهور واذا على بنتج عمرها 4 وتلبس 0-3 ترى مو شي نادر عادي يمكن بنيتها صغيره وضعيفه بس صحيا مافيها مشاكل هذا اهم شي

الحين انا اللي قرقرت وان شاء الله البنات اللي لهم تجارب يفيدونج اكثر

 

[Rayoma2]

صغيره بنتج خليها تكمل ٦ شهور افضل

 

[زييزا]

هلا وغلا ببنت ديرتي

شلونج

شوفي انا لمن كان ولدي عمره بعمرها ماكنت ااكله واقول لا بعد 6شهور
غلطت بحقه حرمته
انت طالعيها تنتبه للاكل تعض اصابعها
ابدأي ذوقيها سيريلاك في بالصيدليات سيريلاك اسمه الصحه
اسم الشركه الصحه نفس السيريلاك بس من عمر 4 شهور وكمان عندك الميلوبا
عندك بسكوت اسمه فارليز في بنده تذوبينه تعطينها اياه

انا ولدي كان وزنه 2.25 وضل نحيف الين اكلته

كمان اغلي التمر ا انقعيه واعطيها مويته في الرضعه مررررره كويس ومفيد
او جيبي الرطب وحطيه بصفايه صغيره واهرسيه فيها واعطيها المصفى منه انا عطيت ولدي ماجا عمره 7شهور الا بسم الله عليه خدوده تنور


انا اللي قرقرت اكثر ...
حبيت افيدك وانبهك لا تغلطين غلطتي مااكلته الا في الخامس

 

[Um Tuki]

حبيبتي حرام عليج
تأكلينها عمرها 4 شهور ؟؟

ومن قالج ان الضحه بالوزن ؟؟

ياما يهال وزنهم قليل و بصحه و عافية وياما يهال متنا ومافيهم صحة ودايم مرضة !!!!

حبيبتي حتى السيريلاك كان من عمر الاربع شهور و غيروووووه .. سوووه من عمر الست شهور

انا ما وكلت ولدي قبل الست شهور .. معدته ما تتحمل و ماظن في كلام افضل و أصح من كلام الدكاترة

لا تستعيلين الحليب افود لها يا قلبي ..

 

[Um Tuki]

حبيبتي بخصوص اللي تقول مسكين يتتبع الاكل و يعض اصابعه هاي شي طبيعي فالياهل

اصلا الياله اشفهمه للأكل عشان يشوف و يتحرمص و يتشهى ؟؟؟؟؟؟؟

سمعي ..

حطي لج 4 تمرات في كوب و صبي عليه ماي مغلي و بعدين هرسيه بقوة بشوكة ..
و لما يبرد صفيه في مرضعه و عطيه ..

زين لصحته ..

شوفي على زمن الرسول ما كان في مصاصة كان يعطونهم تمره و يلوتونها بقطعه قماش ..

و انتي بكيفج

و أرجع اقولج راجعي دكتورة ..

 

[وقفت حياتى عليك]

صراحة اشكركم كلكم بدون استثناء ومااقصرتو فديتوني كثير بنتى الحين دخلت الشهر الخامس وراح اديها انشاءالله تمر

يديكم العافية خواتي

 

[ام الحلوااات]

ااااااااااااااب

 

[مواصله]

بلفيت بلس بالرز والذره حلو انج تبتدين فيه اول مايكمل الجاهل 4شهور خفيف ع المعده وطعمه حلو قريب للسيريلاك

انصحتني فيه الطبيبه وحتى الصيدلي يقولون انه احسن شي ويكون كـ بداية تهيئة للاكل

ان شاءالله عالاسبوع بشتريه لولدي اول ما يكمل الاربع شهور وهذي صورته


مكتوب عليه من الشهر الرابع

 

[مواصله]

نصيحه لا توكلينها مباشره دخلي لها الاكل وهيئي معدتها عليه شوي شوي

يعني في البدايه خلطي شوي من مسحوق بلفيت بلس مع حليبها باليوم الثاني ذوقيها ملعقه ملعقتين

شوي شوي ليما تصيرين تعطينها وجبه كامله

ويقولون الموز زين ينفخ الجاهل

 

[انثى الكويت]

انا اول شي كنت اخذ ربع بسكوت فارليز واحطه لها بالحليب ولما تعودت عليه بو شهر
الحين اعطيها خضار وفواكه وسيريلاك

انتي عطيها بالحليب بسكوت وماي تمر وماي عيش
ظامي تقول ناخذ العيش المصري وننقعه وناخذ مايته ونخلطه بالحليب كان يمتن البيبي
وخالتي ام ريلي تقول شوي حلبه عشر حبات مو وايد نقعيها بماي الحليب وعطيها مع الرضعه يسمن البيبي

 

[miss_uk]

طريقتي مع عيالي

عطيه يلعب بالملعقه النايلون لل٤ اشهر

شلون نحدد العمر المناسب ٤ او ٦ اهيا قدرته ومهارته انه ياكل
ماله علاقه المعدة

ابدي بخظار اول اسبوع يوم بطاط مهروس
يوم جزر وبطاط

يوم كوسا وبطاط

يوم خظار مهروسه

لازم الطفل ياكل المالح الخظار بعدين نبدي ندخل ال فواكه الحاليه عشان ما يتعود على الحلا

بعدين عطيه العيش المطحون من الصيدليه

ابدي مقدار ملعقه وحدة اول اسبوع وزيدي تدريجيا

انا ابدي اوكل عيالي من ٤ اشهر خصوصا اني ارضع طبيعي لين ثلاث اشهر والرابع ادخل اكل طبيعي

 

[Um Tuki]

حبيبتي لا تعطينه اشياء غازية يعني البطاطس فيها غازات ..

نسيت اقولج

اخذي البسكوت الاصابع اللي تنحط مع الحليب .. و يشربه