بين الماضي و الحب .. !! شنو القصه ؟

[:: Diva ::]

السلام عليكم



الموضوع لن يتحدث على المسلسل بين الماضي و الحب كعمل فني
بس راح نتطرق للقصه



المسلسل يعرض على قناة ام بي سي1
بطولة شهد و ملاك و حمد


صار لي اسبوع بكتب موضوع عنه بس انشغلت حيل ..
السؤال الي اسمعه في كل مكان


شنو قصته ؟
شسالفته ؟
ليش جذي ؟

و تعليقات اخرى وقحه و غير مهذبه

و الي كانوا يتابعون مسلسلات امريكيه رومانسيه و مكسيكيه و من امريكا الجنوبيه
فاهمين بالضبط شلون منحنى القصه و يتوقعون الأحداث

بكل بساطه لأن الكاتب برازيلي الجنسيه
تمت ترجمة و اقتطاع ماهو مخالف للدين و اضافة بعض الامثال
علشان يصير معقول على المشاهد الخليجي ..


النتيجه محد فاهم القصه
يحب وحده
وحده تحبه
ما يحب الثانيه
تنتقم من الاولى
صراع على رجل
و دائره من العلاقات



يعني روايات عبير ..

هل المشاهد الخليجي يبحث عن قصص اجنبيه حبني و احبك في الدراما الخليجيه ؟
هل الكاتب الخليجي افلس فكرياً و صار لازم نستورد كتابات اجنبيه ؟
هل تناسب القصص اللاتينيه مجتمعاتنا ؟ او حتى تمسها او قريبه من واقعها فتأثر علينا كأنها حياتنا الشخصيه ؟
هل التوجه الى المسلسلات المدبلجه هو سبب تجاهل النصوص الخليجيه ؟


انتي شنو رايج بهالموضوع ؟

 

[7ikayat]

اتذكر ايامنا الحلوة ايام مسلسلات مثل درب الزلق وخالتي قماشة وحبابة والابريق المكسور والى ابي وامي مع التحية
لو ترجع مسلسلات الماضي الجميل بدل الاستنساخ المشوه والمستفز والتكرار الممل للطلاق و"البويات" وزواج المسيار وكل هاذي القصص اللي لوعت جبودنا!​

 

[غيدآء]

السلام عليكم

القيتي الضوء على كذا شغله في سؤالج ديفا!

احنا نفتقد للاعمال اللي تحمل بين طياتها المشاكل الواقعيه اللي يعاني منها اي شخص فينا ..!

نفتقد للنصوص الخليجيه البحته

وكذلك نفتقد للنظره الاخراجيه ( الاعلاميه ) للاعمال الخليجيه..!

نفتقد للرقابه..( الرقابه مو بس منع وخلاص) لا الرقابه انها تطرح عدة نقاط مهمه يحتاجها المجتمع واهي اللي تحث الكتاب والفنانيين على الاعمال مو اهم اللي يحثون الرقابه ..والرقابه الحاليه اصلا اهي نفسها تفتقد اشخاص غيورين على الاعمال الخليجيه!

لاحظي مسلسلات وسهرات ومسرحيات الكويت قبل

من ينكتب على الشاشه انتاج تلفزيون الكويت تحسين بهيبة العمل..

مثل سهرة وكان وهماً ( القصه تتحدث عن غيرة الزوجه من ام الزوج )

الامل الضائع ( تتحدث عن معاناة الزوجه الثانيه )

يا حب لا تتاخر كثيرا ( تتحدث عن معاناة ذوي الاحتياجات الخاصه )

لاحظي الفرق في الماضي كان الاعلام فعلا رساله وهدف وقيمه..حاليا للاسف اباحيه ونشر للفساد وتشجيع على الخروج من القيم الاسلاميه

 

[:: Diva ::]

اتذكر ايامنا الحلوة ايام مسلسلات مثل درب الزلق وخالتي قماشة وحبابة والابريق المكسور والى ابي وامي مع التحية


لو ترجع مسلسلات الماضي الجميل بدل الاستنساخ المشوه والمستفز والتكرار الممل للطلاق و"البويات" وزواج المسيار وكل هاذي القصص اللي لوعت جبودنا!​

تصدقين لو تعاد هالمسلسلات على عيالنا
بيعتبرونها اي كلام و ما تعجبهم !



وقتهم غير وقتنا و وقتنا غير عن عيالنا
الوقت يتغير و الاذواق كذلك ..
العصر الذهبي الي ذكرتي اعماله ما اشبع منها لكن ما عادت تنفع لجيل الماك تشكن !

التكرار في القضايا لها عدة اسباب
الكتاب نفسهم نفسهم
الجمهور يطلب من الكاتب عرض قصص معينه
رقابة وزارة الاعلام ما تطوف اي شي
المنتج قال لي انا شخصياً الناس ما تبي يدييد الناس تبي قصص حب و رومانسيه !

شاكره مرورج حب :eh_s(17):

 

[:: Diva ::]

السلام عليكم

هلا وعليكم السلام غيوده
الف مبروك المساعده بالاشراف
و تهنئه لحضورج الجميل في الساحه

القيتي الضوء على كذا شغله في سؤالج ديفا!

أكثر من سؤال و حلو لو يفتح ابواب نقاش اكثر مما قصدت
يمكن اكون غفلت عن شي

احنا نفتقد للاعمال اللي تحمل بين طياتها المشاكل الواقعيه اللي يعاني منها اي شخص فينا ..!
نفتقد للنصوص الخليجيه البحته

في هذي اختلف فيها معاج
يمكن هالرمضان بس شفنا مسلسلات مو واقعيه
كريم + ساهر الليل واقعيه لكن قديمه + الملكه و ربما يمس الفنانات فقط
و رمضان الي قبله ما تحضرني الاسماء

لكن بشكل عام الدراما الخليجيه تعكس الواقع
مشاكل حقيقيه ربما تكون اقوى من ان نصدقها و يمكن تكون اسرار ما طلعت الا متاخر
لكنها كلها من الواقع

اما النصوص فهي خليجيه بحته ما عندنا عربي يكتب مسلسل خليجي
بل يكاد يكون هناك احتكار لخمسة اسماء كل سنه !
الحشاش + الكواري + العليوه + محارب + حماده
مع ظهور النشمي + حنين و اسمين او ثلاثه اخرين ..


نحتاج الى كتاب جدد
و لكن للاسف الباب مو مفتوح
محارب من القدامى .. تخيلي رقم تلفون ما يعطونج و لا يدلونج على منتجين و يكشتون فيج
لما تسألينهم عن الطريقه الفنيه لكتابة السيناريو !

و المنتجين يبون الاسماء الي اشتغلت من قبل
فصعب حيل تحصلين على فرصتج

وكذلك نفتقد للنظره الاخراجيه ( الاعلاميه ) للاعمال الخليجيه..!

بهذي معاج 100 %
كم من كاتب مبدع و يظلمه مخرج !
و كم من قصه رائعه يدوس عليها ضعف الاخراج

نفتقد للرقابه..( الرقابه مو بس منع وخلاص) لا الرقابه انها تطرح عدة نقاط مهمه يحتاجها المجتمع واهي اللي تحث الكتاب والفنانيين على الاعمال مو اهم اللي يحثون الرقابه ..والرقابه الحاليه اصلا اهي نفسها تفتقد اشخاص غيورين على الاعمال الخليجيه!

شوفي حبي بما اني بهالمجال
الرقابه بالكويت
لا تكتب عن سنه و شيعه و لا تمس الذات الالهيه

فقط لا غير
هالسنه قانون يدييد
كل النصوص تاخذ اجازة الاعلام و لا تتم مخالفة المنتج 5000 و لا 10000 دينار
الهدف زيادة القيود حول الموضوعات المطروحه

انا اشوف الرقابه تهذب بعض النصوص
لكن ما تخلي كل الاعمال مثل مثل

لاحظي مسلسلات وسهرات ومسرحيات الكويت قبل
من ينكتب على الشاشه انتاج تلفزيون الكويت تحسين بهيبة العمل..

شوفي على الرغم من ان تلفزيون الكويت فقد بريقه من ظهور الام بي سي بالتسعينات
و القنوات الكويتيه الخاصه بالالفين الا ان المنتجين للحين يموتون و يتعاملون معاه مشكلة تلفزيون الكويت البيروقراطيه و المحسوبيه و الرقابه بزياده و النقطه الاخيره طبيعيه لانه جهاز يمثل الدوله رسمياً
و علشان لا نظلم التلفزيون ترا يقطون قط صجي اقصد ايدهم راهيه و في الآونه الأخيره في تحسن بالدراما المعروضه

مثل سهرة وكان وهماً ( القصه تتحدث عن غيرة الزوجه من ام الزوج )
الامل الضائع ( تتحدث عن معاناة الزوجه الثانيه )
يا حب لا تتاخر كثيرا ( تتحدث عن معاناة ذوي الاحتياجات الخاصه )

السهرات الي كتبتيها رااااااااااائعه
لكن لكل زمان قضايا و جو
يعني القضايا وقتها لأول مره تطرح او طرحت علينا بشكل مختلف
لكن الحين صار تكرار مع ان كل مره نفس السالفه لكن تنعرض بشكل يدييد
ما تستهويني انا وياج لكن اكيد تعجب الي اصغر منا او الي ما لحق على السهرات الحلوه

لاحظي الفرق في الماضي كان الاعلام فعلا رساله وهدف وقيمه..حاليا للاسف اباحيه ونشر للفساد وتشجيع على الخروج من القيم الاسلاميه

حبي الحين تعدلت الامور
قبل 10 سنوات بس ياتنا موجة غريبه
رقص بالمسلسلات و بويه و انتهت بتوقف الكاتبه عن العمل

لكن هالامور كلها موجوده بحياتنا اليوميه
و فاقت كل حدود العقلانيه لكن الاعلام الحين غير
صار يطق بريك ..
القنوات الرقابيه زادت
الوزاره + القناة + المنتج
و مافيها واسطات



تصدقين احياناً أقول شنو الهدف من عرض حبني و احبك
اكتشف الى الان بيوت تنهدم و بنات تنقتل بجرايم شرف بكل سذاجه !
و تحتاج الى توعيه

 

[Tom ♥ Jerry]

,

هل المشاهد الخليجي يبحث عن قصص اجنبيه حبني و احبك في الدراما الخليجيه ؟

اييي وآيد يدورون هالسوالف

هل الكاتب الخليجي افلس فكرياً و صار لازم نستورد كتابات اجنبيه ؟

لا طبعا مآ آفلس بس صراحه معروف عن العرب يستوردون حتى الآفكار من بره
و الدليل آنه ستار اكآديمي و عرب آيدول و غيره وغيره من البرآمج و المسلسلات من بره
مسوينهآ على نسخه عربيه ، مآلهم آفكار مآكو آحد ينجز و يفكر و يبدع ..

هل تناسب القصص اللاتينيه مجتمعاتنا ؟ او حتى تمسها او قريبه من واقعها فتأثر علينا كأنها حياتنا الشخصيه ؟

الصراحه تناسب بعض العوآيل و المجتمعات .. لانه فعلا في بعض العوايل
الله يهديهم آن شاء الله الآم و الابو مآ يربون عيالهم على الصلآح و الصلاه .. و بالتالي
تشوفين الشباب و البنات يسوون هالسوالف و الحركآت الغربيه ..
الي اصلا لا من دينا الاسلامي و لا من عادآتنآ و تقاليدنآ
و لو بذكر بعض الآمثله مآ رآح آخلص .. منهآ لبس التاج و القلادآت بالنسبه للشباب
و طبعا غير الحب و الطلعات و التعارف و الفرندز على قولتهم
الشقق و الشاليهات .. هاذا وآقع موجود محد ينكره

هل التوجه الى المسلسلات المدبلجه هو سبب تجاهل النصوص الخليجيه ؟

اييي ..


يعطيج العافيه على هالموضوع المهم ؛$

 

[الاحاسيس المبهمه]

كيف حال الجميله =))

أولا..
لم أسمع بهذا المسلسل من قبل ... لذا ليست لدي ادنى فكره عنه ...

__________

ولكن سأشارك بمافي قلبي ...

( للأسف المسلسلات الكويتييه البعض موالكل ... يتطرقون لما هو شاذ عن المجتمع ويمثلونه على انه اهوا المجتمع ... حلو اني اتكلم عن حاله شاذه بس مااطلع واقول هذا اهوا المجتمع !!!! ووايد نزلوا من العادات والتقاليد ... لان من وجهة نظري كل شي ينعرض على الشاشه لابد له من مراقبه تامه ودقيقه ... تخيلي معاي ( رغم انه موجود بس مجرد مثال عشان اوصلج فكرتي ) اذا انتي شفتي وحده تدخن بالمسلسل وقعد ينعرض عليج بكذا وقت ومكان ودام عرضه فتره وشافوه وايد ناس , بعدها اذا شفتي وحده تدخن ماراح تستنكرينها وان استنكرتيها راح تكون بدرجه خفيفه لييييششش؟؟؟؟؟ . لأن العين تعودت على هل المشهد فـ اللي راح يصيير ان المجتمع يتقبل هذا الفعل ... )

ورغم كل هذا ...
في كتاب فرضوا نفسهم على الساحه ...
عندج الحشاش كاتب راااااائع واكبر مثال ( الدخيله )
عندج العليوه ,,, حتى هبه لها نظره ...
بس كل واحد منهم له سلبيته وانتقاده ...

مادري لييش حسيت اني طلعت عن الموضوع وضيعت =)))
حدده قلبي مترووووس من هل الناااحيييييييه ... وصراحةً اهتمامي الكبير وعشقي اهوا المسرح فـ تلاقيني اناقشج اكثر بالمسرح ...