تجمع امهات العالمية الامريكية

[mr000]

اشلونكم امهات شخباركم..ياريت فيه امهات عيالهم بالهاي سكول يشاركون بالتجمع علشان نستفيد ببعض المعلومات عن هالمرحله..ماشاءالله اشكثرهم الطلبه والبنات ..معقوله ماكو ولا أم بالمنتدى عيالها بالهاي سكول بمدرستنا..

 

[bella bambina]

صباح الخير أمهات

 

[mr000]

اشلونكم امهات..بيلا اشلونج واشلون عيالج..دلول شمسويه مع المدرسه؟؟ يعطونها هووم ووركس؟؟

 

[ReeMaN]

بنسوار امهات العالميه

شلونكم شخباركم جيف حالكم؟؟؟ الله يسلمكم امس رحت اجتماعهم والحمدلله من ناحيه التعليم الكل قال في تقدم وبدى يتحسن ويفهم ومن ناحيه

الشطانه مازال نفس مااهو وامس ابلته ورتنى ان صارلها اسبوعين فصلته عن المجموعه وخلته بطاوله بروح عندها عشان مايتحرك واعليه

مكانه يضيق الخلق وواضح لكل من يمر من صفه انه شيطان او معاقب وبعطيها مهله هالاسبوع تالى ان ماردته مكانه ابتهاوش معاها

مروو مبطلعتى من الصف تعدو علي يهال الحضانه ايشوقوووون وابلتهم قاعده اتلعبهم وتغنى وتدور معاهم بغيت اوقف وياهم من الوناسه

عاد تذكرتج قلت جان زين مروو اتشوفهم عاد من كثر مايشوقون اغلب الاهالى اللي خلصو من الاجتماع وقفو يطالعونهم يبي جنتج المدرسه

خل اتشوف صفوفهم يمكن الله يهديها وتوافق تسجلينها بالمدرسه

بيلا نفس سؤال مروو شلون بنتج مع العربي ؟؟

 

[mr000]

السلااام امهات اشلونكم..ان شاءالله ريمان الله يسمع منج...

 

[mr000]

السلاااام اشلونكم امهات..بيلا ماعندج فكره الساعه كم يفتح دسمان؟؟ بروح اشتري وسائل حق ريلي..

 

[bella bambina]

صباح الخير أمهات
هلا والله مرو لا والله ما أدري متى يبطلون
ريمان بالعكس أحسن له يقعد جدام بروحه عشان ينتبه آنا قلت حق مدرسين بنتي يحطونها بروحها جدام لأنها تسولف مع اللي يمها وما تنتبه خلي يقولون عنها معاقبينها أحسن من انها ترد البيت مو فاهمه وأرد أدرسها
دلول الله يسلمكم تحسنت تحسن طفيف بالعربي بس الأهم انها قامت تحب أبلة العربي وما تخاف من الماده اليوم الصبح لما نزلتهم باب المدرسه ما كانو فاتحينه مرت على صبي لالثانوي تسمع له سورة الناس مات من الضحك وافترت بعده على كل اللي واقفين تسمع لهم واختها الكبيره مغطيه ويهها تقول يما فشلتنا قلت لها عادي هذي دلول

 

[ReeMaN]

وااااااااااااااهاهاهاهاهاهاهاااااااااي يازينه هالبنيه طماااااااااااشه واله اسم الله عليها شطانه على خفة دم عاد بيلا جان صورتيهااا واهى اتحوس

عند الطلبه والله تصير عندكم باجر تضحكون على هالمواقف والحمدلله انها قامت تحب حصة مس ماهي قلتلج هالابله تنحب بس بنتج مو

معطيتها فرصه

والله صاجه بكلامج وامري لله بخليه بمكانه عشان يركز وانشوف اخرة الريبورت

الا بسالكم وزعو عليكم اوراق الانترناشيونال دي والا لا ؟

 

[bella bambina]

صباح الخير أمهات
ريمان دلول أمس ردت البيت تقول لي ودينا أمريكا قلت لها ليش تقول قالت حق الأبله ماأبي عربي قالت لها روحي عيشي بأمريكا اذا ما تبين عربي فدلول ما تدري شنو أمريكا بس تبي تروح
الانترناشيونال دي غيرو اليوم أمس دازين ورقه عشان الجو حار آنا ولا مره رحت الانترناشيونال دي يحطون نطاطيات وألعاب وكل مرحله يبون أكل دوله ويلبسون لبسهم

 

[mr000]

السلام اشلونكم امهات..أمس سألت ولدي عن الانترناشونال داي..وقالي موزعين عليهم أوراق جنه تأجل بس نسيت آخذ الورقه منه ..هالأيام مااييبلي الأوراق اللي يعطونهم ولما أسأله يقولي يعطونا أوراق بس مو مهمين..مادري اشسالفة هالأوراق المو مهمين..برجع البيت بعد شوي وبدور الأوراق بغرفته إذا موقاطهم..آنا شفت الصبح بالكلندر جنه المفروض الانترناشونال داي يوم الخميس 21/10 بس على كلامه انه تأجل..مادري شنو مكتوب عندكم بالأوراق؟؟

 

[mr000]

صباح الخير أمهات
ريمان دلول أمس ردت البيت تقول لي ودينا أمريكا قلت لها ليش تقول قالت حق الأبله ماأبي عربي قالت لها روحي عيشي بأمريكا اذا ما تبين عربي فدلول ما تدري شنو أمريكا بس تبي تروح
الانترناشيونال دي غيرو اليوم أمس دازين ورقه عشان الجو حار آنا ولا مره رحت الانترناشيونال دي يحطون نطاطيات وألعاب وكل مرحله يبون أكل دوله ويلبسون لبسهم

بيلا وعليه دلول حبيبتي قاعده تدور لها حل حق هالعربي تفتك منه_03BA: عاد لي بقيتوا تودونها أمريكا أخذوني معاكم:ada: آنا هم ودي أعيش بمكان بارد وهدوء وخضره .:krkrkr: ياأمريكا يابريطانيا ياسويسرا ميخالف أي شي

 

[omlolo]

ياصباح الجو الحلو على امهات العالميه

شلونكم وشخباركم؟

يا الامهات القدامى فيدونا احنا الامهات اليدد

يقولون امس بالورقه الانترناشيونال دي تاخر لي 3 ديسمبر ؟؟ شنو الانترناشيونال دي ؟؟ يلبسون زي معين يعني؟؟

 

[ادارية]

رد : تجمع امهات العالمية الامريكية

صباح الخير اشلونكم ..

ماشالله واصلين 265 صفحة انا ويني عنكم من العام ؟؟؟ ولدي الحين كي جي 2

طبعا ماقريت كل شي قريت مقتطفات وعجبني كلام مروو لما ادلت بدلوها بصفحة 60

يعطيكم العافية وتقبلوا مروري ...

 

[mr000]

رد: رد : تجمع امهات العالمية الامريكية

صباح الخير اشلونكم ..

ماشالله واصلين 265 صفحة انا ويني عنكم من العام ؟؟؟ ولدي الحين كي جي 2

طبعا ماقريت كل شي قريت مقتطفات وعجبني كلام مروو لما ادلت بدلوها بصفحة 60

يعطيكم العافية وتقبلوا مروري ...

صج ؟؟ والله نسيت شنو كنت كاتبه.. خل أروح أشوف دلوي شنو كان فيه..:bye22:

 

[mr000]

ياصباح الجو الحلو على امهات العالميه

شلونكم وشخباركم؟

يا الامهات القدامى فيدونا احنا الامهات اليدد

يقولون امس بالورقه الانترناشيونال دي تاخر لي 3 ديسمبر ؟؟ شنو الانترناشيونال دي ؟؟ يلبسون زي معين يعني؟؟

هلا والله ام لولو وينج من زمان:eh_s(6): مايصير تغيبين جذي ترى كله مسجل عليج خصم:denya: والله قالي ولدي ان تأجل بس ماشفت الورقه..وماأقدر أفيدج شنو فيه هاليوم..لأن ولدي سنتين ولامره حضر هاليوم..وواعدني من ألحين انه ماراح يروح هالسنه بعد ومستانس انه خلوه يوم سبت..على كلامه..علشان يغيب..يعني مو اجباري الحضور:ggdw: بس مااعتقد يلبسون لبس معين..

 

[bella bambina]

صباح الخير أمهات

 

[mr000]

السلام امهات اشلونكم

 

[ادارية]

رد : تجمع امهات العالمية الامريكية

السلام ..

كاتبين ان تاجل الانترناشونال دي والسبورت دي الورقة بالبيت للاسف بس ذاكره السبورت دي 3/2/2011

 

[mr000]

رد: رد : تجمع امهات العالمية الامريكية

السلام ..

كاتبين ان تاجل الانترناشونال دي والسبورت دي الورقة بالبيت للاسف بس ذاكره السبورت دي 3/2/2011

زين خلوه بشهر 2 لأن العام وأولة العام كانوا يسوونه بشهر 3 مادري 4 كان الجو حار وجنه صار غبار وتأجل مره..عاد اشدعوه ولدي يروح:s141:

 

[Fouz]

رد : تجمع امهات العالمية الامريكية

السلام عليكم
شلونكم أمهات
ماني مصدقة اني قاعدة لي هالحزة ماني قادرة أنام،، فوز نايمة عند اختي و تعودت ما أنام الا لما تكون معاي حاشني أرق،،، بعد توبة أخليها تنام برة
يوم الأثنين ان شاءالله عيد ميلادها و تبي تسويه بالصف عاد طلبت لها كيكة و دار مدارها كب كيك أسهل حق اليهال و الكيكة بقولهم يعطونها الفراشات مساكين يستانسون،، عاد اليوم شريت أغراض حق اليهال بس تحسون ما عندي خبرة بالصبيان مادري شيحبون، باجر ان شاءالله زوارة أهلي يمكن أقدر أطلع أشتري شوية ألعاب
بروح أحاول جود تييني نومة،، كاراميلا اذ تبين أحد يعاونج بالسهر انا موجودة