صباح الخير بنات ...
انا بكتب تجربتي بمستشفى السلام و الدكاترة اللي فيه ....
اول مرة حملت و الله ماكتب للجنين عمر .... وقف عنده النبض وكان بالشهر الثاني فسويت تنظيفات ....
دكتورتي كانت نجمة اذا ماني غلطانة ... وقالت لي لازم ما احمل لمدة 3 شهور عالاقل ....
بعد 7 شهور تقريبا راجعتها لاني ماحملت .... وكنت مسوية اختبار التبويض ( شاريته من صيدلية بوتس ) و كان التبويض عندي يوم 27
رحت قلت لها اني ما حملت وودي اسوي متابعة تبويض ...
قالت لي تعالي يوم 15 من الدورة .... وفعلا رحت لها ... قالت لي ان التبويض عندي ضعيف ولازم كلوميد ....
قلت لها ان تبويضي متأخر و الدورة عندي كل 40 يوم ... مو 30 يوم
قالت لي .... ان تبويض كل الحريم يوم 15 !!!!
طلعت منها وكلامها مو عاجبني .....
ماسمعت كلامها ....
رحت عند الدكتورة دعاء ( كانت تشتغل بالمستشفى ) وقلت لها عن كل اللي صار
وقلت لها اني شاكة بهرمون الحليب مرتفع ...
سوت لي تحليل هرمون الحليب وطلبت تحليل حق زوجي .... و سوت لي متابعة تبويض ...
وفعلا .... كان تبويضي متأخر .... بيوم 15 من الدورة كانت البويضة صغيرة ... وبعد اسبوع راجعتها وقالت لي ان البويضة قاعدة تكبر
و اتضح ان هرمون الحليب مرتفع شوية عندي ... عطتني حبوب آخذها لمدة 3 شهور واذا ما حملت اراجعها
والحمدلله ... ثالث شهر الله انعم علي بالحمل
وكنت اراجع عندها لحد الشهر الثامن لانها ما تولد ...
واخترت الدكتورة نزهت علشان تولدني ...
وبالشهر التاسع .... رايحة اراجع عادي عالموعد ... وقلت حق الدكتورة اني اعاني من حساسية في جسمي ... صايرة احك جسمي كله من غير سبب
طلبت مني اسوي تخطيط حق قلب البيبي وادخل المستشفى بالليل حق الولادة ....
قالت لي ان هالحساسية موزينة للبيبي وممكن يموت .... ودام اني بالشهر التاسع فـ عادي اولد
وطبعا عطوني طلق صناعي .... و ثاني يوم العصر ولدت الحمدلله ... بس مو الدكتورة نزهت اللي ولدتني
دكتورة مصرية ما اعرف اسمها .... لان الدكتورة نزهت كان عندها ولادة ... وقالوا لي تنطرينها و الا تبين تولدين الحين
طبعا قلت اولد وارتاح .... كنت حيل تعبانة
بس للاسف الدكتورة اللي ولدتني مو شاطرة ..... صار فيني بواسير ( بعيد الشر عنكم )
بس للامانة .... المستشفى سونارة واضح ... وعنايتهم حلوة ..... ونظيف
بس صار شي مخليني اغير رايي بالمستشفى ...
الحين انا عندي تأمين صحي ....
قبل شهرين رحت اراجع حق اسناني .... ولما الدكتورة عرفت ان عندي تأمين .... طلبت اسوي اشعه كاملة حق الاسنان ... وطلعت مليون عيب وعيب في اسناني !!
مع اني كنت مراجعتهم قبل ما يصير عندي تأمين ... وكانوا يسوون اشعه حق الضرس اللي اشتكي منه بس ...
وغير هذا .... بلا مبالغة .. كل ضرس عالجته الحين اشتكي منه .... آلام فضيعة كل يوم .... حسبي الله ونعم الوكيل
والحمدلله ... الحين انا حامل .... كنت تعبانة شوي ...
دخلت موقع المستشفى ... لقيت انهم موجودين لي الساعة 10 ....
رحت المستشفى الساعة 9 ... والا يقولون لي .. الدكاترة مشوا ... يخلص دوامهم الساعه 8 .... و الاستقبال بس اللي يداومون لي الساعه 10
مع العلم اني شكثر دقيت عليهم الساعه 8 علشان اتاكد اذا في زحمة او لا ... محد يرد !!!
المهم .. لقيت ان بالطوارئ في دكتورة اسمها ( اميره )
قلت اروح الطوارئ و اتطمن على نبض البيبي .. لاني وايد احاتي هالشي
و لما دخلت عند الدكتورة وقلت لها اني اعاني من آلام مثل آلام الدورة وودي اتطمن على نبض البيبي ...
على طول ... قالت لي نزلي تحت سوي سونار ... !!!
( كل هذا علشان التأمين !! ) لاني قبل كنت اراجع عندهم .. وولا مرة قالوا لي سوي سونار تحت
نزلت تحت .... والا اشوف اللي يسوي السونار دكتور ... مو دكتورة
صعدت فوق ... وقلت حق الدكتورة ( اميره ) انها تسوي لي سونار ...
مارضت .... قالت لي ان السونار ماراح يبين شي !!!
قلت لها ... انا قبل كنت اراجع بالسلام ولما كنت اتعب اروح الطوارئ واسوي سونار ...
قالت لي ... اوكي
شربي ماي وبعد ربع ساعه تعالي اسوي لج سونار
شربت ماي ورحت لها .. سوت لي سونار .. وكان معاها دكتورة ثانية ( اثنينهم مصريات ) وكانت قاعدة تعلمها شلون تستخدم جهاز السونار !!!
سمعتني نبض البيبيب .... وقالت لي هذا هو النبض ...
وخلاص .. تبي تمشي !!!
قلت لها ... جم حجم البيبي .... وباي اسبوع انا الحين ...
قامت تطقطق بالجهاز وواضح انها ما تعرف تستخدمه ! .... وقالت لي حجمة 24 ملم .... بالاسبوع السابع
مع العلم اني بالاسبوع التاسع ... وحجم البيبي24 ملم يقول اني بالاسبوع التاسع !!
خلصت السونار وطلعت من الغرفة .... !!
من غير اي كلمة زيادة !!!
طلعت منهم وانا اتحلطم ... !
الصراحة ..... طيبة كلينك ياخذون بالطوارئ 15 دينار ... والدكتورة تعطيج وقتها كله .... وتسوي سونار علشان تتطمن على كل شي
وبالسلام ياخذون 20 دينار .... وتقول لي سوي سونار تحت !!!!
الصراحة خلال سنة فرق علي المستشفى واااايد .....
اتوقع بسبب التأمين ...
حتى ريلي يقول ... مو بعيدة باجر يقولون لج تولدين قيصري علشان بس فلوس التأمين !!!!
ودي اراجع مستشفى ثاني بس ماني عارفة وين اروح ....
عاجبني سونار السلام .... ماشفت اوضح منه الصراحة ( انا راجعت بمستشفى هادي و طيبة كلينك و السلام )
وبس
سوري طولت عليكم .... و شكلي مالي غير هالمستشفى .... وبعطيهم فرصة اخيره ... والا بحط عليهم اكس ...
